JOHANE 5

₁Gwa tla lebaka la monyanya o mongwe wa Bajuda; mme Jesu a rotogela Jerusalema. ₂Moo Jerusalema ka thoko ya kgoro ya dinku go na le sediba; ka Sehebere ba re ke Bethesida. Se na le nywako e mehlano ya mathudi. ₃Gona moo go be go letše bontši bjo bogolo bja balwetši, ba difofu le dihlotša, le ba ba omeletšego ditho, ba lebeletše go seloga ga meetse. ₄Gobane morongwa o be a fologela sedibeng ka mabaka a hudue meetse; gomme e a thomago a tsena meetseng ge a sa tšo seloga e be e le yena a folago, le ge bolwetši bja gagwe e le bofe. ₅Bjale felo fao go be go na le motho e mongwe, e a feditšego nywaga e masome a mararo a metšo e seswai a babja. ₆Jesu ge a mmona a letše malaong, a tseba ge e šetše e le kgale motho eo a babja, a mmotšiša a re: A o rata go fola?

₇Molwetši a fetola a re: Morena! Ga ke na motho, yo e rego ge meetse a huduegile, a mphološetša sedibeng. Gomme ge ke re ke sa ya, e mongwe a fologele pele ga ka.

₈Jesu a re: Tsoga! O tšee malao a gago o sepele. ₉Motho eo a napa a fola e sa le semeetseng, a rwala malao a gagwe a sepela.

-- Gomme tšatši leo e be e le la Sabatha. ₁₀Bajuda ba bolela le motho eo a fodišitšwego, ba re: Ke Sabatha; ga go a swanela ge o rwala malao ao.

₁₁Yena a fetola a re: E a mphodišitšego ke yena a mpoditšego a re: Rwala malao a gago o sepele.

₁₂Ba mmotšiša ba re: Ke mang motho eo a go boditšego a re: Rwala malao a gago o sepele?

₁₃Gomme motho eo a fodišitšwego o be a sa mo tsebe, ka gobane Jesu o be a širetše ka ge felo fao go ne batho ba bantši.

₁₄Ge go fetile lebakanyana, Jesu a mo hwetša Ntlongkgethwa; a bolela a re: O ko bone! O fodišitšwe. O se ke wa hlwa o dira dibe, o se tlo welwa ke tše di fetago tšela.

₁₅Motho eo a tloga moo, a yo botša Bajuda a re ke fodišitšwe ke Jesu. ₁₆Ke ka baka leo Bajuda ba hloilego Jesu, ba rata go mmolaya, ka gobane a dira tše bjalo ka Sabatha. ₁₇Jesu ge a bolela le bona a re: Tate o sa dira le bjalo; mme le nna ke a dira.

₁₈Ke tšona tše Bajuda ba mo hloetšego tšona ka go fetiša ba rata go mmolaya, ba re: O re go goboša Sabatha, a buša a re Modimo ke Tatagwe ka sebele, a itekanya le Modimo.

₁₉Jesu ge a bolela le bona a re: Ruri, ruri, ke a le botša, ga go se Morwa a kgonago go se dira ka la gagwe; gobane tše Tatagwe a di dirago ke tšona tše le Morwa a di dirago. ₂₀Gobane Tate o rata Morwa, mme o mo laetša tše a di dirago tšohle. O sa tlo mo laetša mediro e fetago ye ka bogolo la tlo ba la tlabega. ₂₁Bjalo ka ge Tate a tsoša bahu a ba phediša, le yena Morwa ba a ratago go ba phediša o ba phediša ka mokgwa woo. ₂₂Le gona Tate ga a sekiše motho, kahlolo ka moka o e gafetše Morwa, ₂₃gore bohle ba boife Morwa, bjalo ka ge ba boifa Tate. E a sa boifego Morwa, ga a boife Tate e a mo romilego.

₂₄Ruri, ruri ke a le botša, e a kwago se ke se bolelago a dumela e a nthomilego, o na le bophelo bjo bo sa felego, a ka se ke a tsena kahlolong; o tlogile lehung a selela bophelong. ₂₅Ruri, ruri ke a le botša, go tla lebaka, le bjale e šetše e le lona, leo bahu ba tlogo kwa lentšu la Morwa-Modimo; mme ba ba le kwilego ba tlo phela. ₂₆Gobane bjalo ka Tate ge a na le bophelo e le yena mong wa bjona, le Morwa o mo neile bophelo, a be mong wa bjona. ₂₇O mo neile maatla gore moahlodi e be yena, ka ge e le yena Morwamotho. ₂₈Di se ke tša le tlaba; gobane go tla lebaka leo bohle ba lego mabitleng ba tlogo kwa lentšu la Morwa-Modimo ka lona. ₂₉Gomme ba tlo tšwa; ba ba dirilego tše botse ba tlo tsoga ba phela; ba ba dirilego tše mpe ba tlo tsoga ba lahlwa.

₃₀Ga go se ke kgonago go se dira ka la ka; ke ahlola ka mo ke kwilego; mme kahlolo ya ka ke ya toko, gobane ga ke nyake se nna ke se ratago, ke nyaka se se ratwago ke e a nthomilego.

₃₁Bohlatse bja ka ge e ka ba go ipolela, gona bohlatse bja ka e ka be e se bja go rereša. ₃₂Ke e mongwe e lego hlatse ya ka; gomme bohlatse bjo a mpolelago ka bjona, le tseba ge e le bja go rereša. ₃₃Le kile la roma batho ba ya go Johane, mme a hlatsela therešo. ₃₄Ge e le nna ga ke wa go hlatselwa ke motho; fela tše bjalo ke di bolela gore le phološwe. ₃₅Johane e be e le lebone le le tukago la bonega; fela, le ratile go hlalala seetšeng sa gagwe lebakanyana fela. ₃₆Ge e le nna ke na le bohlatse bjo bo fetago bjoo bja Johane; gobane mediro ye Tate a nneilego yona gore ke e phethe, yona mediro ye ke e dirago, e hlatsela nna gore Tate o nthomile. ₃₇Le yena Tate e a nthomilego o ntlhatsetše. Lentšu la gagwe ga le ešo la ba la le kwa; le se a lego sona ga le ešo la se bona. ₃₈Le tše a di boletšego, ga go mo di dulago go lena, ka gobane le sa dumele Moromiwa wa gagwe. ₃₉Latišang mangwalong, ka gobane lena le re le na le bophelo bjo bo sa felego ka ona; gomme ke ona gee a a hlatselago nna. ₄₀Gomme ga le rate go tla go nna la ba le bophelo bjo bo sa felego.

₄₁Ga se go re ke nyaka go tumišwa ke batho; ₄₂Fela se ke se lemogilego, ke ge mo go lena go se na lerato la Modimo. ₄₃Nna ke tlile leineng la Tate; mme lena ga le nkamogele. Mohla go tlago e mongwe, wa go tla leineng la yena mong, le tlo mo amogela. ₄₄Le tlo kgona bjang go dumela ge le le ba go rata go retana, le sa nyake go retwa ke Modimo fela? ₄₅Le se ke la re ke nna ke tlogo le bega go Tate; wa go le bega o gona, ke Moshe, yo le mmotilego. ₄₆Gobane ge le ka be le dumela Moshe, le nna le ka be le ntumela, gobane Moshe o mpoletše ka mangwalo a gagwe. ₄₇Bjale ge le sa dumele mangwalo a gagwe, tše nna ke di bolelago le tlo di dumela bjang?