BAHEBERE 7

₁Yena Melekitsedeke yo e be e le kgoši ya Salema; e be e le Moperisita wa Modimo e mogologolo; ke yena a kilego a gahlanetša Aborahama ge a boa ntweng ya dikgoši, a mo šegofatša. ₂Ke yena yo Aborahama a mo lobilego ka sa lesome sa dilo tšohle. Sa pele: Leina la gagwe ge le fetolwa ke go re: Kgoši ya khutšo. ₃Ga go tsebje tat agwe le mmagwe le ge e le moloko wa gagwe, le ge e le mathomo a mehla ya gagwe le bofelo bja bophelo bja gagwe. Sa gagwe ke go bapetšwa le Morwa wa Modimo ge go thwe: Ke Moperisita wa neng le neng.

₄Gomme le bona e le e mokaakang eo Aborahama rakgolo wa rena a mo lobilego ka sa lesome sa thoto yeo a bego a e thopile? ₅Bjale bao ba hlaotšwego go barwa ba Lefi ba fiwa boperisita, ba laetšwe go tšhediša setšhaba ke gore bana ba bobona ba be ba ntšha sa lesome ka Molao, le ge le bona e le bana ba Aborahama. ₆Bjale Melekitsedeke, yo lešika la gagwe le bego le sa tšwe go bona, o tšhedišitše Aborahama ka sa lesome, a šegofatša yena mong wa dikholofedišo. ₇Gomme go ka se ganetše motho ge re re: E monyane o šegofatšwa ke e mogolo. ₈Bjale fa, ba ba tšhedišago ke batho ba ba hwago; ge e le mola ke e a itšwego o a phela. ₉Le gona re ka re, mola go tšhedišwa Aborahama, go tšhedišitšwe le Lefi, ₁₀gobane, le ge a sešo a tswalwa, o be a le gona ka motswadi wa gagwe mola a gahlanetšwe ke Melekitsedeke.

₁₁Bjale ge boperisita bja Balefi e ka be e le bja go tlo tliša phethego ya ba moka, ka ge boperisita e le wona motheo wa Molao, go sa nyakelwang Moperisita e mongwe wa mokgwa wa Melekitsedeke e a sa bewego ka mokgwa wa Arone? ₁₂Gobane ge boperisita bo ka šatolwa, gona go swanetše ge go šatolwa le wona Molao. ₁₃Gobane Moperisita eo a bolelwago ka mokgwa wo ke wa moloko o šele, wo go sego motho go wona e a kilego a hlankela aletare. ₁₄Gomme mong wa rena go tsebja gore ke wa moloko wa Juda, ke wa moloko wo Moshe a sa kago a re o ka ba le boperisita.

₁₅Le gona go tsebja ka botlalo gore go tlo tsoga Moperisita e mongwe wa mokgwa wa Melekitšedeke, ₁₆e a sa bewago ka taelo ya Molao wa nama, e le e a beilwego ka maatla a bophelo bjo bo sa senyegego. ₁₇Ke tše a hlatselwago tšona ge go thwe: Moperisita wa neng le neng ke wena ka mokgwa wa Melekitsedeke. ₁₈Ge Molao e be e le wa go tlo fedišwa, ke ka gobane o fokola o sa hole selo. ₁₉Gobane Molao e be e se wa go tlo tliša phethego; sa wona e be e le go re fihliša kholofelong e botse ya gore re tlo batamela Modimo.

₂₀Gomme se segolo ke ge taba ye e na le keno ya Modimo. Ba bangwe baperisita ba beilwe go se na keno. ₂₁Ge e le wa rena o beilwe ka keno; ke mo go itšwego: Morena o enne, a ka se šegame: Moperisita wa neng le neng ke wena ka mokgwa wa Melekitsedeke. ₂₂Ke ka tšona tše ge Jesu e le Khumedi ya kgwerano ye e fetago yela ka bogolo.

₂₃Gomme bala ke ba bantši ba ba hlatlamanego e le baperisita, ka ge lehu le ba šitišitše go dula. ₂₄Ge e le Jesu o na le boperisita bjo bo sa šielwego e mongwe, ka gobane a dula a le gona neng le neng. ₂₅Ke tšona di mo kgonišago go phološamoka, go phološa bao ba batamelago ka yena, ka ge e le wa go phela neng le neng le go ba rapelela.

₂₆Gobane re be re kgonwa ke Moperisita e mogolo yo bjalo, e lego e mokgethwa, e a se nago sebe e a se nago bosodi, e a sa etšego badiradibe, e a godišitšwego godimodimo ga magodimo. ₂₇E a sa etšego baperisita ba bagolo ba bangwe, bao go bego go ba swanetše ge ka mehla ba thoma go tliša didimo tša go hlatswa dibe tša bona, ba tsebo tliša sa go hlatswa dibe tša setšhaba. Tšeo o di dirile gatee ya ba moka mola a itira sehlabelo. ₂₈Molao wona o be o bea batho ba ba fokolago ya ba baperisita ba bagolo. Ge e le Lentšu lela la keno, la go tla Molao o šetše o beilwe, lona le beile Morwa e lego yo bolo ka tlalo, ya ba Yena Moperisita wa neng le neng.