BAHEBERE 8

₁Tabakgolo mo go tše re di bolelago ke ge re na le Moperisita e Mogolo e mokaaka, e a dutšego letsogong le letona la sedulo sa borena bja kua magodimong. ₂E le yena molaki wa yona Ntlokgethwa ya makgonthe ye e hlomilwego ke Modimo, e sa kago ya hlongwa ke motho.

₃Ge e le baperisita ba bagolo bohle ba be ba bewa gore ba fihliše dibego le didimo. Le yena wa rena o na le tše a swanetšego go di fihliša. ₄Bjale ge e ka be e le wa mo lefaseng, a ka be a sa kgone go ba Mofihliši, gobane ba go fihliša dibego ka Molao e be e le baperisita. ₅Ba be ba hlankela ngwako e bego e le seswantšho le moriti wa tša kua legodimong, boka Moshe mola a laelwa go aga Ntlokgethwa, gwa thwe: O bone gore e dirwe ka go swantšha ka tše o di bontšhitšwego thabeng. ₆Wa rena bjale o gafetšwe bolaki bjo bo fetago bja bala kgolekgole, ka ge a tlile a ba Khumedi ya kgwerano ye e fetago yela ka bogolo, kgwerano ye e tiišitšwego ka dikholofedišo tše di fetago tša yela.

₇Le gona kgwerano yela ya kgale ge e ka be e se na mo e hlaelago, ye mpsha e ka be e sa nyakelwe sebaka. ₈O bolela le bona ka go e nyatša ge a re: Tsebang, go tlo tla lebaka le ke tlogo dira kgwerano e mpsha le ba leloko la Isiraele le la Juda. O realo Morena. ₉E ka se ke ya ba kgwerano e kakago yela ke e dirilego le borrabo, mola ke ba swara ka seatla ka ba ntšha Egipita. Kgwerano yeo ba e sentše, le nna ka ba ngala. O realo Morena. ₁₀Gobane kgwerano ye ke tlogo e dira le bona ba leloko la Isiraele ge go fetile mehla yeno, Morena o re še: Ke tlo bea melao ya ka matswalong a bona; ke tlo e tloka dipelong tša bona. Ke tlo ba Modimo wa bona; mme bona e tlo ba setšhaba sa ka. ₁₁Motho a ka se hlwe a ruta wa gabo le ge e le ngwanabo a re: Tseba Morena, ka gobane ka moka ga bona ba tlo ntseba, ba banyane le ba bagolo. ₁₂Gobane ke tlo ba lebalela melato ya bona, ke se hlwe ke gopola sebe sa bona. ₁₃Ge a re: Kgwerano e mpsha, ke gore yela e bego e le gona e onetše. Gomme se se onetšego, se se fetilwego ke mabaka se kgauswi le go timelela.