BAHEBERE 6

₁Ke gona a re leseng tša mathomo a thuto ya Kriste, re iše pele ka tša phethego; re se boeletše tša mathomo a tshokologo ya go ila mediro ye e hwilego, le tša go dumela Modimo. ₂Le tša kolobetšo, le tša thuto, le tša go bewa diatla, le tša go tsoga ga bahu, le tša go lahlwa o sa felego, tšeo a re di leseng. ₃A re direng ka mokgwa woo, ge Modimo a ka re dumelela.

₄Gobane bao ba šetšego ba kile ba bonegelwa ba kwa bose bja neo ya legodimong, ba ba kilego ba fiwa kabelo ya Moya o Mokgethwa, ₅ba kwa monate wa lentšu le botse la Modimo, le maatla a mehla e tlogo tla. ₆Ge bona ba ka hlanoga, go ba mpshafatša gape le go ba iša tshokologong go ka se kgonege, ka gobane ba boetše ba ipapolela Morwa wa Modimo sefapanong, ba mo nyatšiša.

₇Gobane tšhemo ye e nwago pula ye e e nelago gantši, mme ya medišetša beng ba yona merogo e lewago, yona e tlo fela e šegofatšwa ke Modimo. ₈Fela, ge e ka mediša meetlwa le ditshehlo, e ka se kgahliše, e tlo tloga e lahlwa, mme pheletšo ya ba go tšhungwa. ₉Ge e le lena barategi, le ge re bolela ka mokgwa wo, re le belaelela tše kaone le tše di išago phologong. ₁₀Gobane Modimo ga a bebe motho, ga a lebale mediro ya lena, le lerato le le itapišitšego ka lona ineng la gagwe mola le direla bakgethwa, le ba direla le bjale. ₁₁Se re se dumago ke gore ka moka ga lena le bonwe le na le phišego e bjalo, go fele go phethega se re se holofetšego, go be go fihle bofelo, ₁₂Gore le se ke la ba ba botšwa, eupša ka tumelo le kgotlelele le be baetši ba bao ba ruilego tše di holofedišitšwego. ₁₃Gobane mola Modimo a nea Aborahama dikholofetšo, go be go se e mogolwane yo Modimo a kago ena ka yena, mme a ena ka yena mong, ₁₄A re: Ke tlo go šegofatša wa go šegofatša; bana ba gago ke tlo ba atiša gagolo. ₁₅Gomme Aborahama a se fele pelo, a ba a tlelwa ke tše a di holofedišitšwego. ₁₆Ge e le batho ba ena ka e a ba fetago, keno ya fediša dikgang ka moka ya ba go tiiša taba. ₁₇Ke tše Modimo a di dirilego a rata gore bajabohwa ba se se holofedišitšwego ba be le lentšu le le tiilego, le le sa fetogego, a tiiša taba ka keno. ₁₈Gore ka mafoko a mabedi a a sa fetogego, ka ge Modimo a sa aketše, re be le khomotšo e maatla re hweditše setšhabelo, re gomaretše kholofelo ya go holofela se se lego kua pele. ₁₉Kholofelo ye eke ke yona thekgo e tiilego ya meoya ya rena, thekgo ye e sa tomogego, ye e tsemilwego kua Sekgethwakgethweng, go širilwego ke sešireletšo. ₂₀Ke mo Jesu Moetapele a tsenego ka baka la rena, yena a tlilego a ba Moperisita e Mogolo wa neng le neng ka mokgwa wa Melekitsedeke.