Petro o laela ka go eletša phuthego gore e botegele Ebangedi ya Kriste
1Simone Petro Mohlanka wa Jesu Kriste le Moapostola wa gagwe, o ngwalela ba ba filwego tumelo e bohlokwa ya rena ka toko ya Modimo wa rena le ya Mophološi Jesu Kriste.
2Kgaugelo le khutšo a di le tlele ka botlalo ka go tseba Modimo le Jesu Kriste Mong wa rena.
3Ke maatla a gagwe, maatla a Modimo, a re seditšego ka tšohle di išago bophelong le borapeding ka go tseba yena e a re biditšego ka letago la gagwe le ka bokwala bja gagwe. 4Ke tšona tše a re filego dikholofedišo ka tšona, tše bohlokwa ruri le tša theko e kgolo, gore ka tšona le tle le amane le se yena Modimo a lego sona, le le ba ba tšhabilego go senyega ka dikganyogo tša lefase. 5Bjale a nke le phegeleleng ruri gore tumelo ya lena e tšweletše bokwala; bokwala bo tšweletše tsebo; 6Tsebo e tšweletše boithswaro; boitshwaro bo tšweletše kgotlelelo; kgotlelelo e tšweletše borapedi; 7Borapedi bo tšweletše leratano; leratano le tšweletše lona leratorato. 8Ge dilo tše di ata, gona le ka se dule fela le hloka dienywa tše di išago tsebong ya go tseba Mong wa rena Jesu Kriste. 9Gobane yo dilo tšeo di sego gona go yena ke sefofu, o a apaapa; o lebetše gore o hlatswitšwe dibe tša gagwe tša kgale.
10Ke gona, bana bešo, lošang le phegelele gore go bitšwa ga lena go thupele, le go hlaolwa ga lena; ge le dira ka mokgwa wo, le ka se ke la ba la kgopiwa. 11Gobane ke mo le tlogo humišwa ka go bulelwa tsela ya go tsena mmušong wa neng le neng wa Mong wa rena Jesu Kriste Mophološi wa rena.
12Ke gona ke tlogo nama ke le eletša ka ditaba tše, le ge le di tseba, le ge therešo ye e tlilego ya ba gona, le šetše le tietše go yona. 13Gomme ke re: ge ke sa le mokutwaneng wa bophelo bjono, go swanetše ge ke fela ke le tsoša ka dikeletšo. 14Gobane go khudušwa fa mokutwaneng wo, ke tseba gore go tlo ntlela ka pela ka mo Mong wa rena Jesu Kriste a nkutolletšego ka gona. 15Gomme ke tlo loša gore, ge ke khudugile, le šale le na le ditaba tša go eletšana ka tšona ka mehla.
16Gobane ge re le tsebiša maatla a Mong wa rena Jesu Kriste le go tla ga gagwe, e be e se go le anegela dinonwane tša mahlajana a batho; rena bogolo bja gagwe re bo bone ka mahlo. 17Bogolo le borena o neilwe ke Modimo Tatagwe mola a tlelwa ke lentšu le legolo lela la go tšwa letagong le legolo le le šiišago la re: Yo ke yena Morwamoratwa wa ka, yo ke kgahlwago ke yena! 18Lentšu leo re le kwile le etšwa legodimong mola re na le yena thabeng yela e kgethwa.
19Gomme re na le lentšu leo la porofeto le le tiilego ruri; le dira gabotse ge le le šetša boka lebone le le etšago mo go lego leswiswi, gore go be go se gohle, mme naledi ya meso e hlabe dipelong tša lena. 20Se segolothata ke gore le tsebe ge go se porofeto e kago hlathollwa ka boithatelo, 21gobane ga go ešo gwa ba gwa tšwelela porofeto ka go ithatela ga motho, gobane batho ba bakgethwa ba Modimo ba boletše ba išwa ke Moya o mokgethwa.
