2 PETRO 2

₁Baporofeta ba maaka, le bona ba be ba le gona setšhabeng le mo go lena, baruti ba maaka ba tlo ba gona, ba ba tlogo tliša dikarogo di išago tshenyegong, ba hlanogela mong wa bona e a ba rekilego, ba ikobela tshenyego ye e tlago ka bjako. ₂Ba bantši ba tlo ya nabo ba keka le ditšhila; ke bona ba go tlo nyatšiša tsela ya therešo. ₃Ba tlo leka go le fora ka dipolelo tša maano ba dirwa ke megabaru. Fela ke bona le kgale kahlolo e sa diegego go ba wela, mme kotlo ya bona ga e robale.

₄Le Barongwa ba ba kilego ba senya, Modimo ga a ka a ba tsebafa; o ba lahletše moleteng ba tlemilwe ka ditlemo tša leswiswi, a ba gafela go bolokelwa tsheko. ₅Le lefase lela la kgale ga a ka a le tsebafa, a phološa batho ba seswai ka Noage segoeledi sa toko mola lefase la banyatši a le ribegetša ka meetsefula. ₆Le metse yela ya Sodoma le Gomora o e lahlile ya ba molora, gore ka yona go tsebje se se tlogo dirwa banyatši, ₇a phonyokgiša Loto moloki, e a bego a tenegile ka mekgwa ya ditšhila ya dilalogi tšeo. ₈Gobane motho eo wa moloki o lle pelo mola a agile le bona, a hlwa a bona a ekwa ge ba senya molao ka mediro ya bona.

₉Ke mo go bonalago gore Modimo, ba ba mmoifago o ba hlakodiša melekong; bakgopo o ba bolokela kotlo ya tšatši la kahlolo. ₁₀Gagologolo kotlo e tlo wela ba go latela nama ba gogwa ke dikganyogo tša ditšhila, le ba go nyatša go bušwa, ba mereba, baikgogomoši ba ba sa šiego go goboša tša letago, ₁₁Mola barongwa ba ba ba phalago ka thata le ka maatla ba sa ba bege go Morena ka maroga. ₁₂Ba bjalo ka diphoofolo tše di se nago tlhaologanyo, tše di bopetšwego go tanywa le go bolawa, ge ba goboša tše ba sa di tsebego. Ba tlo senyegela tshenyegong ya bona, ₁₃Ba tlo fiwa moputso wa bokgopo, bona bao ba go bona maipshino, e le menate ya letšatši le tee. Ke bafefa, ke ditšhila. Ba iphsina ka dithuto tša go iphora ge ba eja menyanya le lena. ₁₄Ke ba mahlo a a tletšego bootswa, ga ba hore sebe; ba goketša dipelo tša bafokodi; tša bona dipelo di hlalefetše megabaru. Ke bona ba go tlo lahlwa. ₁₅Ba arogile tsela ya go loka; ba timetše ka go tšea ka tsela ya Bileama morwa wa Beoro, e a ratilego moputso wa bokgopo, ₁₆A tla a solwa a arogile; lekaba la semuma la bolela ka lentšu la motho, la diba bošilo bja moporofeta.

₁₇Batho bao ke didiba tše di se nago meetse; ke kgodi ye a tšewago ke ledimo; ba boloketšwe kgampi ya leswiswi la go ya go ile. ₁₈Ba ba sa tšwago go phonyokga ka go kgaogana le ba go tšea ka tsela ya timelo, ba ba goketša ka dipolelo tša boikgantšho bja lefela, le ka maipshino a nama le a ditšhila. ₁₉Ba ba holofetša khunologo, mola bona beng e sa le mathopya a tshenyego. Gobane se motho a fentšwego ke sona, o ba lethopša la sona. ₂₀Gobane ge ba šetše ba phonyokgile ditšhila tša lefase ka go tseba Mong wa rena Jesu Kriste Mophološi, mme ba boela ba yo tanywa ke tšona ditšhila, gona tša mafelelo di tlo ba befela tša phala tša pele. ₂₁Go bona go ka be go le kaone ge tsela ya toko ba ka be ba sa ka ba e tseba. Se se befilego ke ge ba e tsebile, mme ba napa ba hlanogela molao o mokgethwa wo ba o neilwego. ₂₂Ba dira tše seema se rerešago ge se re: Mpša e boetše mahlatšeng a yona; kolobe e hlapetše go yo pshikologa lerageng.