1 PETRO 5

₁Ba e lego ba bagolo mo go lena, ke ba eletša ke le e mogolo le bona, ke le hlatse ya ditlaišego tša Kriste, yo le nna ke tlogo abelwa letago le le tlogo utollwa, ₂Ke re: Dišang mohlape wa Modimo wo le nago nawo; Le se dire ka go gapeletšwa, e be ka go ithapa; e sego ka go ipabalela, e be ka pelo ye e ratago; ₃e sego ka go re le babuši ba diphuthego; a e be ka go re le baetapele ba mohlape, ₄Gore mohla yena Modiši e mogolo a tlogo bonala, le fiwe mphapahlogo wo o sa onalego wa letago.

₅Le lena ba bafsa, kwang ba bagolo; mme seng sa lena le phedišane le ne boikokobetšo; gobane Modimo o lwa le baikgogomoši; ba ba ikokobetšago o ba setša ka kgaugelo. ₆Ke gona, ikokobetšeng ka tlase ga seatla se maatla sa Modimo, gore a le godiše lebakeng la gona. ₇Dipelaelo tša lena ka moka di lahleleng godimo ga gagwe, gobane ke yena a le belaelelago.

₈Le phafoge le phakgame, gobane diabolo lenaba la lena o le dikologa boka tau e bopago; o nyaka yo a kago mo metša. ₉Lwang le yena le tiile tumelong; le fele le tseba gore ke tšona ditlaišego tše di welago le bana beno ba ba lego mo lefaseng. ₁₀Mme Modimo wa dikgaugelo tšohle, e a le bileditšego letagong la gagwe la neng le neng la Kriste, lena ba go tlaišega ka lebakanyana, o tlo le dira ba botlalo; o tlo le thekga; o tlo le tiiša, le se hlwe le šišinyega. ₁₁Letago ke la gagwe le maatla go iša mehleng ya neng le neng. Amene.

₁₂Ke le ngwaletše ka boripana ka Silibano ngwanešo e a botegago, ka le eletša, ka le hlatsela gore se le kago ema ka sona ke yona kgaugelo ye ya makgonthe ya Modimo.

₁₃Phuthego ye e hlaotšwego boka lena mono motseng wa Babele, e a le dumediša, le Mareka morwa wa ka.

₁₄Dumedišanang ka katlo ya lerato.

Khutšo a e be le lena ka moka ba le lego ba Jesu Kriste. Amene.