Dipono tša Paulo
1Go thwe go a ithetwa, le ge go sa nkhole selo; a nke ke fetele pele diponong le dikutollong tša Morena. 2Nna ke tseba motho e lego wa Kriste; yena -- bjalo go fetile nywaga e lesome la metšo e mene -- o kile a rotošetšwa legodimong la boraro, ke sa tsebe ge a be a le mmeleng goba ka ntle ga mmele. Go tseba Modimo. 3Motho eo ke a mo tseba; se ke sa se tsebego ke ge a be a le mmeleng, goba a be a le ka ntle ga mmele. Go tseba Modimo. 4A rotošetšwa Paradiseng, a kwa mantšu a palago go bolelwa, ao motho a sa dumelelwego go a bolela. 5Ke tlo kgantšha tše bjalo; nka se ikgantšhe ka tša ka, ge e se ka phokolo tša ka. 6Gobane ge nka rata go ikgantšha, ke tlo ba ke se lešilo, ka gore ke tlo ba ke bolela therešo. Fela, ke a itshwara, gore go se ke gwa ba le e a ntshemago a fetiša seo a se bonago go nna, le se a se kwago go nna.
7Gomme gore ke se ke ka ikgodiša ka dikutollo tše kgolokgolo tšeo, ke neilwe phatša nameng, morongwa wa Sathane wa go ntshetla ka matswele, gore ke se ikgodiše. 8Ka baka la gagwe ke rapetše Modimo gararo, gore a ntlogele. 9Modimo a fetola a re: Kgaugelo ya ka a e go lekane, gobane maatla a ka a iphetha phokolong. -- Ke gona ke rego go kaone ge nka kgahlwa ke go kgantšha diphokolo tša ka, gore maatla a Kriste a age mo go nna. 10Ke ka baka leo ke thabago diphokolong le mabothateng le tšhegong le ditlaišegong, ke le tlalelong ka baka la Kriste; gobane ge ke fokola ke mo ke nago le maatla.
11Ke bile lešilo ge ka go itheta ke gapeleditšwe ke lena; gobane, le ge ke se selo, ga go na mo ke phalwago ke baapostola bao ba go bata bonatla. 12Ge e le mabohlatse a Moapostola a bonetše mo gare ga lena ka kgotlelelo le ka mehlolo le ka matete le ka ditiro tše maatla. 13Ke eng se se bonwego ke diphuthego tše dingwe sa hlokwa ke lena, ge e se ke sa ka ka le imela? Ntshwareleng bošaedi bjoo.
14Tsebang gore ke la boraro bjalo ge ke itokišetša go tla go lena. Nka se ke ka le imela, ka gobane ga ke nyake tša lena, ke nyaka lena. Gobane ga go a swanela ge batswadi ba kgobelelwa mahumo ke bana ba bona; ke bana ba ba swanetšego go a kgobelelwa ke batswadi. 15Gomme nna nka ikgafa ka ipheletša, gore ke phološe meoya ya lena. Ge ke le rata gakaakaa, a nka hlaela go ratwa?
16Le ge go ka ba bjalo, nna ga nka ka le beleša boima; fela, ke thwe yo maano wa go le swara ka bohlale. 17Afa ke le hlakotše ka e mongwe wa bao ke ba rometšego go lena? 18Ke kgopetše Tito, ka mo roma a na le e mongwe wa bana bešo. Afa Tito o le hlakotše? A ga ra ka ra swara tsela e tee moyeng? A ga ra ka ra tšea mohlala o tee?
19A le buša le re re ipolelele go lena? Rena re bolela re itebantše le Modimo, re le ba Kriste. Baratiwa! Tšeo ka moka ke tša gore re le agiše. 20Ka gobane ke a boifa, e se re ge ke tlile ka tlo hwetša le se bao ba ke ratago go ba hwetša; le lena la nkhwetša ke se eo le mo ratago, mme ka hwetša go le dikgang, le mona, le kgalefo, le dikarogano, le maroga, le ditshele, le boikgogomošo, le mpherefere. 21Ge ke boela ke etla, a Modimo wa ka a se nkokobetše ka tša lena, ka nyamišwa ke bontši bja e rego ge ba sentše, ba se sokologe ba lahla ditšhila le bootswa le bohlotlolo bjo ba bo dirilego.
