Mehlako ya Paulo
1A nke le nkgotlelele ge ke dira tša bošilonyana; le nkgotlelele hle. 2Gobane ge ke le hufegetše ke direla Modimo. Gobane ke le beeleleditše monna o tee, gore ke le iše go Kriste boka mosetsana e a se nago bosodi. 3Se ke se boifago, ke gore le ka senywa megopolo, la timelwa ke therešo ye e išago go Kriste, la etša Efa ge a forwa ke noga ka maano a yona. 4Gobane ge go etla motho a le ruta tša Jesu o šele, yo rena re sa kago ra mmolela go lena, goba ge le ka fiwa Moya o šele wo le sešogo la o fiwa, goba ge le rutwa Ebangedi ye le sa kago la e amogela, motho e mobjalo le mo dumela gabotse.
5Gomme nna ga ke bone ka mo nkago phalwa ke baapostola ba bangwe bao ba maipei. 6Le ge ke se makgone polelong, tsebong gona ke a kgona, ka mo le re lemogilego dilong tšohle re na le lena.
7A ke dirile sebe mola ke ikokobetša gore go godišwe bolena, ke bolela Ebangedi ya Modimo ke sa boelwe ke selo? 8Diphuthego tše dingwe ke di hlakotše ka tšea dipabalelo go tšona, gore ke kgone go direla bolena. Le mola ke na le lena ke hloka, ga nka ka imela motho. 9Mo ke bego ke hloka ke babeletšwe ke bana bešo ba ba bego ba etšwa Matsedonia; gomme ke itotile gore ke se le lapiše ka selo; mme ke tlo fela ke itota fao. 10Ka therešo ya Kriste ye e lego go nna, ke re: mo dinageng tšeo tša Akaya ga go e a kago nkganetša ge ke kgantšha tšeo. 11Ka baka lang? A ke ka gobane ke sa le rate? Modimo o a tseba.
12Se ke se dirago ke tlo fela ke se dira, gore bao ba dulago ba ntheile ke ba hlokiše sebaka sa go ipata ka rena. 13Gobane batho bao ke baapostola ba maaka, ke ba go dira ka maano, ba ikgantšha ba itira baapostola ba Kriste. 14Ga se taba ye e kgotsišago; gobane le yena Sathane o ikgantšha a itira morongwa wa seetša. 15Ke gona re se ke ra tlabega ge bahlanka ba gagwe ba itira bahlanka ba toko, bao pheletšo ya bona e tlo go ba matšo a mediro ya bona.
16Ke buša ke re: Go se ke gwa ba le e a ntirago lešilo. Fela, ge a le gona, le ka mo ntshema lešilo, gore le nna ke ithete ka gonyane. 17Tše ke di bolelago bjalo, ga ke di bolele ka Morena; nke ke ye le bošilo bja ge go thwe go a ithetwa. 18Ge ba bantši ba itheta ka tša bophelo bja nama, le nna nke ke ithete. 19Gobane le ba go rata go kgotlelela mašilo, mola le le ba bohlale. 20Hleng le kgotlelela ge motho a le dira bahlanka, ge motho a le ja, ge a le thopa, ge motho a le tsogela, ge motho a le setla sefahlogo. 21Nke ke bolele ke inyatšiša, ke re: Tše bjalo re be re sa di kgone.
-- Ge go na le e a ikgantšhago -- bolela wa bošilo -- gona le nna nka ikgantšha. 22Ge ba re: Re Bahebere, le nna ke realo. Ge ba re: Re Baisiraele, le nna ke realo. Ge ba re: Re peu ya Aborahama, le nna ke realo. 23Ge ba re: Re bahlanka ba Kriste, le nna -- ke bolela ka bošilo -- nka re ke a ba phala; ke ba phala ka go itapiša, ka go otlwa gantši, ka go tlengwa gantši, ka go ba wa go bolawa gantši. 24Ke gahlano ke otlwa ke Bajuda ka kgati tše masome a mane a go hlaya e tee. 25Ke gararo ke otlwa ka tshelane; ke gatee ke thungwa ka mabje; ke gararo ke robegelwa ke leselawatle ka fetša letšatši le bošego ke le bodibeng bja lewatle. 26Ke ba phala ka maeto a mantši, ka dikotsi tša dinokeng, ka dikotsi ka bahlakodi, ka dikotsi ka setšhaba sa gešo, ka dikotsi ka bantle, ka dikotsi metseng, ka dikotsi lešokeng, ka dikotsi lewatleng, ka dikotsi ka bana bešo ba maaka; 27ka ditapišo le mehlako, ka ge gantši ke sa robale, ka tlala, le ka lenyora, ka go ikona gantši, ka go tlaišwa ke phefo le tšhego. 28Tše dingwe ga ke di bolele, tša ge ke sa khutše go imelwa ke phakgametše diphuthego ka moka. 29O kae motho e a fokolago mme nna ke se fokole nae? O kae motho e a hlanošwago mme nna ke sa swe pelo?
30Ge go thwe go ithetwe, nna ke tlo itheta ka phokolo ya ka. 31Modimo Tatago Mong wa rena Jesu Kriste o tseba ge ke sa aketše. 32Mola motseng wa Damaseko, mokgoma wa kgoši Areta o kile a bea balaledi, a rata go ntshwara. 33Ka phonyokga matsogo a gagwe ka go ntšhiwa ka lešoba la morako wa motse, ka fološetšwa ntle ke le sešegong.
