2 BAKORINTHE 13

₁Bjale ke la boraro ge ke tla go lena. Taba ka moka e tia ka melomo ya dihlatse tše pedi le ge e le tše tharo. ₂Ke šetše ke boletše; le bjale ke sa eme ka le ke le boletšego mola ke na le lena la bobedi. Le bjale ke sa na le lena ke botša bao ba go senya mohla wola, le ba bangwe bohle ke ba botša ke re: Ge ke etla, nka se setše, ₃Gobane le nyaka bohlatse bja go re ke Kriste e a bolelago ka nna. Gomme yena ga se mofokodi; ke yo maatla mo gare ga lena. ₄Gobane le ge a be a fokola mola sefapanong, bjale ke e a phelago ka maatla a Modimo. Le rena ge re le bafokodi ba gagwe, le tlo re hwetša re le ba ba phelago le yena ka maatla a Modimo.

₅Itebeledišeng lena beng le bone ge le na le tumelo; iphenyekeng! A ga le lemoge gore Jesu Kriste o na le lena? Ge go se bjalo, gona le ka se botege. ₆Gomme nna ke holofetše gore le tlo lemoga ge ba go se botege e se rena. ₇Rena re kgopela Modimo, gore le se ke la dira se e kago ba sebe. Ga re kgopele gore e be rena re bonalago re le babotegi; re kgopela gore botse bo dirwe ke lena; rena re ka no itšwela re etša ba go se botege. ₈Gobane re ka se kgone selo ka go lwa le therešo; re kgona ka go lwela yona. ₉Re ka thaba ge bafokodi e ka ba rena, ba maatla ya ba lena; ke sona se re le rapelelago sona; re re ditaba tša lena di loke. ₁₀Gomme ditaba tše ke le ngwaletše tšona ke sa le mono kgole, gore ge ke etla go lena ke se hlwe ke dira ka bogale, le ka maatla ao Modimo a nneilego ona; ke tlele go agiša, e sego go phušola.

₁₁Ke fetša ka go re: Bana bešo, thabang! Bang babolokatlalo. Eletšegang, le be ba kgopolo e tee, le be ba leago; mme Modimo wa lerato le molao o tlo ba le lena.

₁₂Dumedišanang ka katlokgethwa.

₁₃Kgaugelo ya mong wa rena Jesu Kriste, le lerato la Modimo, le kopano le Moyamokgethwa, a di be le lena ka moka. Amene.