PSALM 66

₁VIR die musiekleier. 'n Lied. 'n Psalm.

Juig tot eer van God, o ganse aarde!

₂Besing die eer van sy Naam, maak heerlik sy lofsang!

₃Sê tot God: Hoe vreeslik is u werke! Deur die grootheid van u sterkte sal u vyande kruipende na U toe kom.

₄Laat die hele aarde U aanbid en psalmsing tot u eer; laat dit u Naam verhef in psalmgesang. Sela.

₅Kom en aanskou die dade van God, Hy wat gedug is in werking oor die mensekinders.

₆Hy het die see verander in droë land; hulle het te voet deur die rivier gegaan. Daar was ons bly in Hom.

₇Hy heers vir ewig deur sy mag; sy oë hou wag oor die nasies. Laat die wederstrewiges hulleself nie verhef nie. Sela.

₈Loof, volke, onse God, en laat hoor die stem wat Hom roem —

₉wat aan ons siel die lewe gee en nie toelaat dat ons voet wankel nie.

₁₀Want U het ons getoets, o God, U het ons gelouter soos 'n mens silwer louter.

₁₁U het ons in die net gebring, 'n swaar las op ons heupe gelê.

₁₂U het mense oor ons hoof laat ry; ons het in die vuur en in die water gekom, maar U het ons uitgelei in die oorvloed.

₁₃Ek sal met brandoffers in u huis ingaan; ek sal U my geloftes betaal,

₁₄wat my lippe geuit en my mond uitgespreek het toe ek benoud was.

₁₅Brandoffers van vet diere sal ek U bring saam met offerrook van ramme; ek sal beeste saam met bokke berei. Sela.

₁₆Kom luister, en laat my vertel, julle almal wat God vrees, wat Hy aan my siel gedoen het.

₁₇Ek het Hom aangeroep met my mond, en lofgesang was onder my tong.

₁₈As ek ongeregtigheid bedoel het in my hart, sou die Here nie gehoor het nie.

₁₉Waarlik, God het gehoor; Hy het geluister na die stem van my gebed.

₂₀Geloofd sy God wat my gebed nie afgewys en sy goedertierenheid aan my nie onttrek het nie!