PSALM 65

₁VIR die musiekleier. 'n Psalm van Dawid. 'n Lied.

₂Aan U kom 'n lofsang toe, o God, in Sion, en aan U moet die gelofte betaal word.

₃o Hoorder van die gebed, tot U moet alle vlees kom!

₄Ongeregtige dinge het die oorhand oor my gehad, maar U versoen ons oortredinge.

₅Welgeluksalig is hy wat U uitkies en laat nader kom, dat hy kan woon in u voorhowe. Ons wil versadig word met die goeie van u huis, die heiligheid van u paleis.

₆Vreeslike dinge antwoord U ons in geregtigheid, o God van ons heil, vertroue van al die eindes van die aarde en van die verste see!

₇Wat die berge grondves deur u krag, wat omgord is met mag,

₈wat die gebruis van die seë stilmaak, die gebruis van hulle golwe en die rumoer van die volke;

₉sodat die bewoners van die eindes vrees vir u tekens; U laat die uitgange van die môre en die aand jubel.

₁₀U het die land besoek en oorvloed gegee; U verryk dit grootliks; die stroom van God is vol water. U berei hulle koring; ja, so berei U die land.

₁₁U maak sy vore nat, sy kluite gelyk; deur reënbuie maak U dit week; U seën sy uitspruitsel.

₁₂U kroon die jaar van u goedheid, en u voetspore drup van vettigheid.

₁₃Die weivelde van die woestyn drup, en die heuwels gord hulleself met gejuig.

₁₄Die weivelde is bekleed met troppe kleinvee, en die dale is bedek met koring; hulle juig, ook sing hulle.