PSALM 67

₁VIR die musiekleier; met snaarinstrumente. 'n Psalm. 'n Lied.

₂Mag God ons genadig wees en ons seën; mag Hy sy aangesig by ons laat skyn! Sela.

₃Sodat die mense op aarde u weg kan ken, onder al die nasies u heil.

₄Die volke sal U loof, o God, die volke almal saam sal U loof.

₅Die nasies sal bly wees en jubel, omdat U die volke regverdig oordeel en die nasies op aarde lei. Sela.

₆Die volke sal U loof, o God, die volke almal saam sal U loof.

₇Die aarde het sy opbrings gelewer; God, onse God, sal ons seën.

₈God sal ons seën, en al die eindes van die aarde sal Hom vrees.