Tšwela pele ka ntle le poifo – Letšatši la 8

Mengwaga ya go feta, kgoši ye bohlale e tšere sepheto sa go leka potego ya mmušo wa gagwe. Mesong e mongwe, a kgokološetša leswika le legolo bogareng bja tsela gomme a utama ka morago ga leswika go bona gore ke mang yo a tlago go tloša leswika tseleng go hola basepedi ba bangwe.

Bjale ka ge kgoši a boleletše pele, ba bangwe ba badudi ba go huma ba go tuma ba mmušo wa gagwe ba sepetše go dikologa leswika, gomme ba le tlogela fao. Ba bangwe ba sola kgoši ka leswika leo, bjale ka ge, go ya ka bona, e le boikarabelo bja kgoši go le tloša. Ga go motho, lega go le bjalo, yo a lekilego go le tloša.

Gomme, thapama, molemi yo a diilago o fetile fao ka karikana ya gagwe. A ema le semeetseng gomme a katana le go kgokološa leswika nako ye e ka bago iri. Ge a atlegile go dira seo, o ile a ithekga ka leotwana la karikana ya gagwe go ka buša moya. Ge a gadima morago go bona fao leswika le bego le le gona tseleng, gateetee a bona mokotla ka gare ga molete. Ka go nyaka go tseba seo se lego ka mokotlego, o ile a sepela a lebile go wona, a o topa gomme a o bula. Ka go makala, a hwetša mokotla o tletše ka dipapetlana tša gauta. Go be go na le pampišana ka gare ga mokotla go tšwa go kgoši e hlaloša gore dipapetlana tša gauta ke tša yo a tlošitšego leswika tseleng.

Maphelong a rena, ka dinako tše dingwe go na le maswika tseleng, ka sebopego sa mapheko a re swanetšego go a tloša. Bjale ka ge kgoši a be a utame ka morago ga leswika, a lebeletše batho, Modimo le Yena o re lebeletše. Go tšwa go setulo sa Gagwe sa bogoši o lebeletše bohle bao ba phelago lefaseng. Go Pesalome 33:13-14 re bala gore: “Morena o lebelela a le legodimong, mme o bona batho bohle. O lebelela badudi bohle ba lefase a dutše setulong sa gagwe sa bogoši …” Ka dinako tše dingwe, O šomiša mapheko go leka semelo sa rena. Go Jakobose 1:2-3 re bala gore: “Banabešo, le itsheme ba lehlogonolo kudu ge le tlelwa ke meleko ya mehutahuta, gobane le a tseba gore go lekwa tumelo ga lena go le tlišetša kgotlelelo.”

Ekaba o boemong moo o ikwago o ka re o a lekwa ka lebaka la leswika le le lego tseleng ya gago? Mohlomongwe o na le lepheko lefelong la gago la mošomo, lenyalong, go tša maphelo, tlhohlo ka ngwana goba ka ba bogweng bja gago? Goba mohlomongwe o dirile kgopelo ya mošomo, eupša motho yo mongwe wa boitemogelo bjo bonnyane go e na le wena o thwetšwe? Goba mohlomongwe go na le motho yo a phatlalatšago maaka ka wena gomme o ka se dire selo ka seo? Ke eng karabelo ya gago ka gare ga maemo a a hlohlago? O sola batho goba gaešita le Modimo? Goba o fenya teko ya semelo ka go bea tumelo ya gago go Yena?

Abrahama le Josefa le bona ba ile ba lebeletšana le maemo a boima moo ba ka bago ba arabile Modimo. Ka gare ga mathata a bona, Modimo a leka dimelo tša bona gomme bobedi ba kgotlelela le go fenya teko. Modimo a dira Abrahama tatago ditšhaba, le go hlatloša Josefa ka letšatši le tee go tloga go mogolegwa go ya go mmušiši wa Egepeta.

Lepheko le lengwe le le lengwe ke monyetla wa go kaonafatša boemo bja rena bja bjale. Se ke se molemi yo a diilago a se hweditšego tseleng ya gagwe. Ka gona a re fenyeng teko. Moputso ka lehlakoreng le lengwe o tla go šia o maketše. Modimo a go šegofatše.