Tšwela pele ka ntle le poifo – Letšatši la 9

Ge ke be ke gola kua Freistata, tiragalo e kgolo ya ngwaga le ngwaga ya buti wa ka, sesi le nna e be e le Pontšho ya Molalatladi ya Bloemfontein. Go be go se na madulo a mantši bjalo ka phaka ya boithabišo ge letšatši le dikela. Moo re be re namela dikoloyana tša go thulana, dišele le seketswana se segolo sa moswinki. Nna ke be ke rata terene. Batho ba bane ba be ba tla dula ka gare ga karikana ye e latelago tsela seporong ka manamelelo a morotoga, ka go retologa ga go se letelwe le go theoga ka pejana. Karolo ya mafelelo ya tsela gantši e be e dira gore banamedi ba goeletše le go swarelela kudu ge karikana e theogela fase ka lebelo motheogeng pele e ema mafelelong.

Bjale, o ka nagana letšhogo le poifo tše o tla itemogelago tšona ge o dutše kua pele ga karikana gomme o lemoga gore diporiki tša yona ga di šome gomme ge karikana e oketša lebelo, o bona karikana ye nngwe ka pele ga gago gomme o lemoga gore dikarikana di tlo thulana? Se ke sona se se diregilego kua phakeng ya boithabišo ya Alton Towers Resort kua Staffordshire, England. Banamedi bao ba bego ba dutše kua pele ga karikana ga ba gobala o šoro fela, eupša mosetsana o kgaogile leoto.

Lefaseng le rena re “karikana” tseleng bjalo ka terene phakeng ya boithabišo. Ka dinako tše dingwe re itemogela manamelelo a morotoga maphelong a rena, ka tše dingwe go retologa ga go se letelwe gape le go thulamela fase ka pejana. Ka gobane Modimo o re hlodile ka tokologo ya go ikgethela, re ka kgetha go Mo dira karolo ya maphelo a rena, re ka sepela bogoneng bja Gagwe ka letšatši la rena la go hwa (ge go namela go fela) – ge go bapetšwa le leeto ka ntle le Yena le le tlago fela ka masetlapelo bjalo ka leeto la kua Alton Towers ge re tsena ka go sa felego ka ntle le Yena.

Ekaba re na le nnete ya bophelo ka morago ga lehu? Go Johanese 11:25 Jesu o bolela le Marta morago ga ge Marta a mmotša gore buti wa gagwe Lasarose a ka ba a sa hwa ge Jesu a tlile pejana: “Ke nna Mophedišabahu le Mobaphedišetšasaruri. Yo a dumelago go nna o tla phela le ge a ka hwa.”

Re swanetše go dira eng gore re be le bophelo bjo bo sa felego? Re swanetše go bolela dibe tša rena le go amogela Jesu Kriste bjalo ka Mophološi. Go Baroma 10:9 re bala gore: “Ge o bega gore Jesu ke Morena mme o dumela gore Modimo o mo tsošitše bahung, o tla phološwa.”

Go thweng ka baratiwa ba rena bao ba sa dumelego? Go 2 Bakorinte 3:14 re bala gore lenaba le tswalela mahlo a bao sa dumelego ka seširo gore ba se itemogele nnete goba ba sa nyake go e amogela. Nagana ka dipoledišano ka moka tša go hloka dipoelo tše o bilego le tšona le baratiwa ba gago bao ba sa dumelego. Ka tsela ye e swanago Modimo a ka se go gapeletše go Mo hlankela. O ka se gapeletše monna wa gago, mosadi, bana goba bagwera go kgetha Yena – le ge go ka ba boima. Se o kago se dira ke go rapela, ka gobane go na le maatla a mantši thapelong. Mafelelong, ke Moya wo Mokgethwa wo o nolofatšago dipelo le go hlola menyetla ya gore seširo se tloge gore baratiwa ba gago ba bone nnete.