Tšwela pele ka ntle le poifo – Letšatši la 7

E be e le bošego kudu. Go be go le leswiswi le lesoleso Lewatleng la Galilea. Diiri morago, barutiwa ba bona ka fao Jesu a ntšifaditšego dilofo tše hlano tša senkgwa le go fepa batho ba dikete tše hlano. Ba ile ba makatšwa ke o tee wa mehlolo ya Gagwe. Jesu a ba laela go namela leselawatle mola Yena a eya go rapela thabeng.

Lewatle le be le tšubutla, leselawatle le akgaakgwa ke maphoto. Ga go o tee wa barutiwa yo a bego a robetše. Gomme le semeetseng, ka gare ga kgodi ya meetse, ba bona monna a sepela a ba lebile – godimo ga meetse. Ba tšhoga kudu gomme ba hlaba mokgoši. E be e le sepoko? Ba be ba tlo hwa fao? Letšhogo e bile le legolo ge monna a ba bitša ka lentšu la go tlwaelega: “Betang dipelo! Ke nna – le se ke la boifa!” E be e le Jesu.

Petrose o bile le sebete sa go ka botšiša: “Morena, ge eba ke wena, ntaele gore ke tle go wena ke sepela godimo ga meetse.” Jesu a mo laela. Mahlo a gagwe a tsepeletše go Jesu, Petrose a tšwa ka leselawatleng gomme a gata dikgato tše mmalwa godimo ga meetse ka ntle le go sobela ka meetseng. Lega go le bjalo, ge Petrose a tloša mahlo a gagwe go Jesu le phefo le maphoto a mo tšubutla, poifo ya tšea legato la tumelo gomme a thoma go sobela ka meetseng. Nakong yeo Jesu a obeletša letsogo la Gagwe go Petrose gomme a mo gogela ka leselawatleng, a botšiša: “Wena wa tumelo ye nnyane, o reng o belaela?” Ba tsena ka leselawatleng gomme phefo ya homola.

Ka dinako tše dingwe re hloka tumelo ge re “sepela godimo ga meetse”, go fa mohlala, ge re tšea dipheto tše boima lefelong la mošomo, le balapa la rena, ka ditšhelete tša rena goba mabapi le bokamoso bja rena. Mohlomongwe o sepela godimo ga meetse ga bjale, phefo e tšubutla go go dikologa e tšhošetša go go wiša. Se e dumelele. Ga re ikgopotše gore dimelo tša rena di a lekwa nakong ye boima le maemong ao a se nago le kholofelo, mola re hlola monyetla go Modimo go ka bontšha semolo le bogolo bja Gagwe. Go Jeremia 32:27 Modimo o re: “Ke nna Morena, Modimo wa batho ka moka. Kgane go na le se se ntšhitago?” Gomme go Lukase 1:37 Jesu o re: “Gobane ga go se se ka palelago Modimo Modimo.”

Ge Petrose a goeletša Jesu ge a thoma go nwelela, Jesu a mo swara le semeetseng a mo gogela ka leselawatleng mola phefo e homotše. A ka dira ka mo go swanago go wena. O šetše a otlolotše letsogo la Gagwe go wena. Le sware ge o tsepeletša mahlo a gago go Yena. Modimo a go šegofatše.