Tšwela pele ka ntle le poifo – Letšatši la 4

Kane ya sepiniše. Se ke se nkgwete ya diswantšho tša go šutha, Popeye, a hlokago go se fetola go tloga go mosesiši wa go tlwaelega go ya go monna wa sephaka se maatla nakong ya metsotswana e mmalwa, yeo e tšhabišago manaba a gagwe. Gomme go a kwešišega gore manaba a Popeye a tla leka go fediša sepiniše ka mo go kgonegago go netefatša katlego go tlhaselo.

Lethabo maphelong a rena le bjalo ka sepiniše go Popeye. Ke maatla a rena ao a re thušago go kgomarela pono ya rena nakong ya maemo a a hlohlago kudu. Le re gopotša gore Modimo ke Mong wa rena le go dira gore dilo ka moka di šomele go hola bao ba ratago Yena (Baroma 8:28).

Go Nehemia 8:10, Nehemia o botša Baisraele gore ba se lahlegelwe ka lethabo la bona: “Go thabela Morena go tla le šireletša”. Ge re lahlegelwa ke lethabo la rena, ga re lahlegelwe ke maatla fela, eupša gape re šutha ka tlase ga tšhireletšo ya Modimo go ba bao ba hlaselwago gabonolo ke lenaba.

Lenaba le utswa lethabo la rena bjang? Satane o tseba mafokodi a rena gomme o re hlasela mafelong ao. O nyaka gore re balabale le go boifa maemo a mabe. Go fa mohlala, ge o na le bothata bja boitshepo bja go inyatša, o tla dira gore o dumele gore bašomi-gotee bao ba emego sedikong ba bolela le go sega, ba seba ka wena – mola ba ka se bolele leina la gago. Goba o ka bula kuranta gomme wa bala ka mpshafatšo ya naga, bomenetša goba polao gomme gateetee wa thoma go balabala ka bokamoso bja gago le bokamoso bja bana ba gago ka nageng ya rena. Goba o ikwa o lwala gomme ngaka e go botša gore o yo dira diteko. Pele o ka hwetša diteko, o letetše tše mpe le go balabala kudu, mola o botša batho ka moka bao ba lego kgauswi le wena matšhogo a gago – go e na le go tshepha Modimo ka dipoelo tše botse.

Re ka tsošološa bjang lethabo la rena? Go 1 Bathesalonika 5:16 re bala gore: “Le dule le thabile.” Lethabo ke kgetho, e se boikwelo. Re swanetše go kgetha go dula re thabile letšatši le letšatši. Re dira bjang se ka gare ga boemo bjo bobe? Ka boomo re lebelela dilo maphelong a rena tše re kago di thabela – le go thoma go leboga Modimo ka tšona. Tsela ye nngwe ke go ngwala fase dipharologantšho le go akanya ka tšona. Di tla re gopotša ka maatla a Modimo le bokgoni bja go tliša katlego mola o bolela bjalo ka Mopesalome: “Le ke letšatši le le beilwego ke Morena; a re hlalaleng, re gobeleng go lona!” (Pesalome 118:24).

A re jeng sepiniše sa rena ge re dira lethabo selo sa pele maphelong a rena. Ga re boele morago fela ka tlase ga tšhireletšo ya Modimo, eupša re hwetša gape sephaka sa go swana le sa Popeye go tšhabiša manaba a rena ge a leka go re gobatša. Modimo a go šegofatše.