Tšwela pele ka ntle le poifo – Letšatši la 5

Le thomile bjalo ka letšatši la go tlwaelega ka studiong go nna kua Radio Tygerberg 104fm ge ke bala melaetša ye e rometšwego ka SMS go tšwa go Johanna go mogala wa studio wa SMS. Johanna ke motswadi a le tee yo a šomago polaseng go bapa le mmila wa N2 ka ntle ga Cape Town. O rile morwa wa gagwe, Jason, ke sebapadi se hlwahlwa sa rakpi. Bothata lega go le bjalo ke gore dieta tša gagwe tša rakpi e be e le tše nnyane gomme a ka se kgone go reka tše mpsha mola diteko tša rakpi di batemela ka lebelo. Johanna o rile pelo ya gagwe e bohloko go bona Jason a dutše gae, a na le dihlong tša go botša batho gore ke ka lebaka la eng a be a sa itokišetše diteko bjalo ka bašemane ba bangwe. Ke ile ka aba molaetša wa SMS le batheeletši gomme le semeetseng ba mmalwa ba bona ba fetola ka meneelo gore re kgone go rekela Jason dieta tša rakpi.

Ke ile ka mema Johanna le Jason ka studiong go ba fa dieta tše mpsa. Nakong ya poledišano ya rena, ke botšišitše Johanna go botša batheeletši ka letšatši leo a rometšego molaetša ka SMS ka studiong. Nako ya rena e be e lekanyeditšwe gomme ga ke a ba le nako ya go mmotšiša se pele re ya moyeng. Dilo ka moka tše a mpoditšego tšona e be e le tše difsa go nna.

Johanna o boletše gore o eme a maketše ka phapošing ya go hlapela mesong yeo dikeledi di elela marameng a gagwe. O be a le tlalelong gomme ke Modimo fela yo a bego a ka mo thuša go fetola boemo. Ge a khunama ka matolo, a kgopela Modimo mohlolo. Ka ponyo ya leihlo, a bona pono ya dieta tša rakpi tše ntsho, tša mmala o mešweu le o mokhubedu. Pelong ya gagwe o tsebile gore e be e le kholofetšo go tšwa go Modimo gore O tlo abela. A thoma go Mo leboga ge a hlapa sefahlego sa gagwe gomme a tšwa ka phapošing ya go hlapela. Pelong ya gagwe o bile le tšhoganetšo ya go re romela molaetša ka SMS. A dira bjalo.

Ka studiong, ke butše mokotla wo o bego o tletše ka dimakatšo tša Jason. Go tšwile lepotlelo le lebotse la go lokela meetse, kgwele e mpsha ya rapki ya leina, mokotla wa go lokela dilo tše a ralokago ka tšona le lepokisi la dieta tše mpsha. A bula lepokisi gomme pele ga gagwe go be go na le dieta tša rapki tše ntsho tša mmala o mokhubedu le o mošweu – bjalo ka ge Johanna a bone ponong. Bobedi mme le morwa ba ile ba lla. Re be re sa tsebe, eupša Modimo o tsebile gomme a kgetha go tšweletša go loka ga gagwe ka tsela ye go mošemane.

Go Pesalome 24:1 Mopesalome o re gopotša gore tšohle lefaseng ke tša Modimo. Gomme ka go realo A ka abela se sengwe le se sengwe se re se hlokago. Go Lukase 12:24 Jesu o re gopotša gore re se belaele ka bokamoso: “Lebelelang magokobu: ga a bjale, ga a bune, ga a na difala goba matlolo, le ge go le bjalo Modimo o a a otla. Bjale ga ke re lena le bohlokwa kudu go feta dinonyana?” Gomme go Baefeso 3:20-21 re a gopotšwa gore Modimo o kgona go re fa se re se hlokago ka gobane o tseba dikganyogo tša rena: “Yena a kgonago go dira tše di fetago kudu tše re kago di kgopela goba ra di nagana, ka maatla a gagwe a a šomago mo go rena, a a tumišwe …”

O rapelela eng lehono? Ekaba o rapelela ngwana goba mohlomongwe molekani? Goba tšhelete ye e lekanego go patela dikoloto tša gago? Goba monyetla wa mošomo? Goba mohlomongwe selo se sengwe bjalo ka dieta tša rakpi? Gopola, Modimo o tseba dikganyogo tša pelo ya gago gomme ga go se se mo palelago. Ke ka lebaka la eng o sa nee Yena sebaka go go bontšha go loka ga Gagwe?