Tšwela pele ka ntle le poifo – Letšatši la 2

Ka matlagosa a 2 Mosegamanye 2011, uniti ya go ikgetha ya sešole sa ka meetseng ya U.S. Navy SEALs ye a tsebjago ka NAVY Team 6, e fihlile lefelong la go iphihla la moetapele wa motšhošetši Osama Bin Laden kua Abbottabad, Pakistan ka helikoptere. Tlhaselo ye e bego e rulagantšwe e phethagaditšwe gomme metsotso e masome a mane morago, sehlopha sa tloga lefelong le setopo sa Bin Laden ka gare ga mokotla.

Mengwaga ye lesome, tshedimošo e nngwe le e nngwe ya go ka hwetša Bin Laden e ile ya latelwa gomme batho ba ba bego ba le kgauswi le yena ba ile ba swara le go hlabja ka dipotšišo. Katlego, lega go le bjalo, e tlile ka Phato 2010 ge mogala go tšwa go o tee wa barongwa ba Bin Laden o ile wa gatišwa. Ditemoši tša founu ya morongwa di ile tša latelwa gomme tša fihliša uniti ya go ikgetha go lefelo la go iphihla la Bin Laden. Nakong ya go latela, theknolotši ya sebjalebjale e dirišitšwe go lekola lefelo la go iphihla. Lefelo la go iphihla la go swana le ile la agwa kua Amerika moo NAVY Team 6 ba itokišeditšego tlhaselo ye e rulagantšwego. Ge nako ya maleba e fihla, ba ile ba hlasela. Akanyeditšwe. Rulagantšwe. Atlega.

Satane ke lenaba la rena. Go swana le Maamerika ge a beile leihlo lefelo la go iphihla la Bin Laden, lenaba le bea leihlo maphelo a rena. Go Johanese 10:10 re bala gore: “Lehodu lona le tlela go utswa le go bolaya le go lobiša.” Ditlhaselo tša Satane maphelong a rena gape di rulagantšwe ka maano le tlhokomelo. O nyaka go re betha mo re tlago kwa bohloko kudu.

Jobo ke mohlala wa se. O bile le ntlo e botse, dithoto tše ntši, lapa le legolo gape le tswalano e botse le Modimo. Satane o be a sa rate seo. Go mo hlakahlakantše kudu gore ditlhaselo tša gagwe go Jobo ga di a šoma, ka gobane Modimo o be a dirile lebota la tšhireletšo go dikologa yena, lapa la gagwe le dithoto tša gagwe (Jobo 1:10). Lega go le bjalo, go be go na le bofokodi bjo tee fela: Jobo o be a nagana gore selo se sebe se tlo direga go lapa la gagwe le dithoto tša gagwe. Jobo o swanetše go ba a boletše ka sona, ka gobane ge Satane a bile le monyetla wa go leka tumelo ya Jobo, o mmethile mo a tlago kwa bohloko kudu. Go Jobo 3:25 re bala mantšu a Jobo morago ga go lahlagelwa ke tšohle: “Tše ke di boifago ke tšona tše di ntlhagelago; tše ke di tšhabago di a ntlela.”

Ke dipoifo dife tše o di hlagolelago bophelong bja gago? O a boifa gore selo se sebe se ka hlagela bana ba gago goba molekani wa gago a ka se botege? O boifa gore lapa la gago le ka ba ka gare ga kotsi ya koloi goba kgwebo ya gago e ka tswalela ka lebaka la go palela ke go patela dikoloto? Ekaba o bolela ka dipoifo tša gago gantši? Gopola, lenaba le theeletša mantšu a gago. Go 2 Timotheose 1:7 re bala gore: “Gobane moya wo Modimo a re filego wona ga o re dire gore re boife; o re tlatša maatla le lerato le boitshwaro.” Gomme go karolo ya bobedi ya Johanese 10:10, Jesu ka boyena o re gopotša gore O tlile go re nea bophelo bjo bo feletšego.

Ge re dumelela poifo go ba e maatla go feta tumelo ya rena go Modimo, re hlaselwa gabonolo ke lenaba. Go e na le seo, a re duleng re ikgopotša (le lenaba) ka yo Modimo e lego yena le gore O na le polelo ya mafelelo go boemo bjo bongwe le bjo bongwe. Ge a bea leboto la tšhireletšo go go dikologa le lapa la gago le bao o ba ratago, ga go mesebe ye e tukago ya lenaba ye e tlago re kgoma.