Tšwela pele ka ntle le poifo – Letšatši la 1

Floyd Mayweather Jr. kgahlanong le Manny Pacquiao. Papadi ye ya ntwa ya matswele e bile ka 2 Mosegamanye 2015, kua Las Vegas, Nevada. E be e hlalošwa bjalo ka “ntwa ya ngwagakgolo” ke methopo ya go fapanafapana ya ditaba. Ka dimilione tše 300 tša ditolara (mo e ka bago dibilione tše 4 tša diranta) tša tšhelete ya mofenyi ye e bego e beilwe fase, go a kwagala gore ke ka lebaka la eng papadi ye ya matswele e tantše šedi ya lefase.

Pele go ka ba le ntwa, difilimi tše mmalwa mabapi le boramatswele ka bobedi di ile tša bontšhwa. Ka rekoto ya Mayweather ya go se lahlegelwe ke dintwa tše e nyakilego go ba tše 50, mogaši wa dipapadi wa Moamerika o mmotšišitše go poledišano ya pejana ge e ba o be a tšhogile go yo lwa le Pacquiao ka ge le yena a na le rekoto e botse. Ka ntle le tikatiko, Mayweather a fetola: “Ke bona Pacquiao bjalo ka mophegišani yo mongwe. Ke mophegišani fela. Ge nka bolela leina la mophegišani, seo se tla nkama. Ka gona, go no swana le dintwa tša ka tša go feta, Pacquiao ke fela mophegišani ge ke itokišetša ntwa.”

Mantšu a dirile gore ke nagane ka ntwa ya rena ya letšatši le letšatši lefaseng. Go Baefeso 6 re bala gore ga re lwe le nama le madi, eupša re lwa kgahlanong le meoya ye mebe ya lefaufaung. Lenaba le phaphaila bjalo ka tau, le nyaka ditsela tša go re hlasela. E tee ya maano a gagwe ke go šomiša poifo go re golofatša. Se sebaka gore re lahlegelwe ke pono e botse. Se utswa boitshepo bja rena le go re dira gore re iketle re lebale ka fao Modimo a nago le maatla mo e lego gore ga go se se Mo palelago.

Nakong e nngwe bophelong bja Dafida, o be a swanetše go tšhabela Saulo letšatši le letšatši le go phološa bophelo bja banna ba gagwe. Nakong ya boemo bjo, o be a ka ba a dumeletše poifo gabonolo go mo gatelela, eupša a kgetha go bea tshepo ya gagwe go Modimo – le go mmona fela bjalo ka mophegišani. Go Pesalome 118:5-6 o ngwala gore: “Mola ke le tlalelong ke ile ka rapela Morena, gomme a nkwa, a ntlhatlola. Ka ge Morena a na le nna ga ke boife; motho wa nama yena a ka ntirang?” Gape, go Pesalome 91:7, re bala gore: “Le ge ba sekete ba ka bolawa kgauswi le wena, ba dikete tše lesome ka mathoko ohle a gago, wena o ka se kgwathwe ke selo.”

Lenaba ka mehla le tla leka go tsenya poifo dikgopolong tša gago. Le nyaka gore o bee sefahlego le leina go mathata a gago – gomme o se a bone fela bjalo ka mophegišani yo Modimo a ka go thušago go mo fenya. Ke eng tlhohlo ya gago lehono? Mathata a ditšhelete? Go felelwa ke mošomo? Bolwetši bja go bolaya? Ekaba o dumeletše poifo go go golofatša goba o bona boemo fela bjalo ka mophegišani yo a ka fenywago? Modimo a go šegofatše.