Tšwela pele ka ntle le poifo – Letšatši la 16

[Nakong ya go feta, o tee wa babadi ba rena o ngwetše: “Ke ka lebaka la eng go tšea Modimo nako e telele go araba dithapelo tša rena? Ke na le mengwaga ye seswai ke hladile gomme ke rapelela mo go nyakilego go lekana le mengwaga yeo motho yo ke tlago mo rata le yena a nthata. Gape, motho yo a ratago Modimo gape yo a tlago ba yo a lokilego go barwa ba ka ba babedi. Ekaba ke rapela ka tsela e e fošagetšego? Ka dinako tše dingwe go bonala eke Modimo o ntebetše.”]

Ke eng mootlwa goba meetlwa bophelong bja gago lehono? Go mmadi yo a boletšwego ka godimo, mootlwa wa gagwe ke bodutu. Ke na le nnete ya gore mootlwa o mo kweša bohloko kudu ge a bona balekani bao ba thabilego, a ekwa ka mogwera yo a hweditšego monna wa go loka goba ge barwa ba gagwe ba babedi ba ikhwetša ka gare ga maemo ao ba hlokago tate gore a ba hlahle le go ba thekga.

Meetlwa maphelong a rena ga e phele e le ye mebe. Ka dinako tše dingwe ke se re se hlokago gore re kgone go rapela gore re be kgauswi le Modimo. Paulose o lemogile se. Go 2 Bakorinte 12:7-9 o ngwetše: “Fela gore ke tle ke se ikgogomoše ka tše di makatšago kudu tše ke ilego ka di utollelwa, ke ile ka kgontlhetšwa phatša nameng, phatša ye e bego e itirile moromiwa wa Sathane wa go ntlaiša gore ke fele ke ikokobetša. Ka rapela Morena gararo ke mo kgopela gore a ntlhomole phatša yeo. Yena a mphetola ka go re: ‘Kgaugelo ya ka e go lekane, gobane maatla a ka a tiile kudu mo go ba ba fokolago.’ Ka gona ke kgahlwa kudu ke go itheta ka mafokodi a ka, gore maatla a Kriste a tle a dule mo go nna.”

Ka dinako tše dingwe Modimo o tloša mootlwa ka pela maphelong a rena ka go fa yo a kwago bodutu molekani, ka go fodiša bolwetši goba go dira gore molekani goba ngwana yo a sa dumelego a dumele. Ka dinako tše dingwe, bjalo ka Paulose, Modimo ga a hlomole mootlwa ka gobane o na le morero wo o itšego le go re dira gore re be kgauswi le Modimo.

Ekaba ke re Modimo a ka se hlomole mootlwa wa mmadi wa bodutu – goba mootlwa wa gago? Aowa! Modimo o leetong la go ikgetha le yo mongwe le yo mongwe wa rena. O tseba se re kago emelana le sona le se se re palelago, gape O tseba nako ya maleba ya go hlomola meetlwa. Meetlwa e re dira gore re khuname pele ga Modimo le gore re kgone go itemogela maatla le bogona bja Gagwe. E re kgontšha go kwa lentšu la Gagwe gape. Ge re tšwela pele go dula kgauswi le Yena, re tla itemogela ka fao meetlwa yeo e bego e re tlogetše mathomong ka dikeledi le tlhakatlhakano, e bago dimonyumente tša digopotšo tša go ya go ile le Modimo, ka gobane O kgauswi le rena ka mehla dinakong tše boima.

Nako ya rena lefaseng ke e kopana. Ke monyetla wa go ba le tswalano ya kgauswi le Mohlodi ge re leka go ba bjalo ka Jesu. Ka gona a re tumišeng Modimo — go sa šetšwe gore O tloša meetlwa goba aowa. Ge re ka dira seo, re tla be re lokologile ka nnete. Modimo a go šegofatše.