Tšwela pele ka ntle le poifo – Letšatši la 12

Ke neng la mafelelo moo o ithutilego ka mohlare wa mopalema? Ke o mongwe we mehlare ya go tia ye re nago le yona. E ka phela ditikologong tše omilego, tšeo di se nago le selo, ka gobane modu wa wona o otlologela fasefase go fihlelela meetse a kgauswi. O kgona go phologa go ledimo moo mehlare ye mengwe e kago tumolwa mobung. Bjang? Mohlare wa mopalema o hlodilwe ka bokgoni bja go kobega – le go ya boemong bjo o kago rapama fase mobung – ka ntle le go robega. Ge ledimo le fedile, mohlare o tla emelela gape. Ka maatla. Ka medu e tsemilego fasefase. Ge o lebelela dibidio tša mehlare ya mepalema ka gare ga ledimo, go bonala eke e a bina ka gare ga ledimo.

Ka dinako tše dingwe re ba le dinako tša go oma, tše go se tšweletše selo maphelong a rena moo ekago Modimo o lebetše ka rena. Re a rapela, eupša go bonala eke dithapelo tša rena di gomela morago go rena ge re sa itemogele phetogo le semeetseng maemong a rena. Ka dinako tše dingwe go bonala eke ledimo le tšubutla bophelo bja rena ka sebopego sa tlhalo, lehu la moratiwa, tobo ya ditšhelete, bolwetši goba go lahlegelwa ke mošomo ka tsela ye e sa lokago mošomong. Bobedi dihla tše di hlola menyetla go rena go dumelela medu ya rena go tsenelela fasefase mobung ge re tšwela pele go nyaka sefahlego sa Modimo.

Go Pesalome 92:12 re bala gore: “Baloki bona ba tla atlega boka mepalema; ba tla letla bjalo ka mesedere ya Lebanone.” Gomme go Johanese 4:14, Jesu o re ke Yena meetse a a phelago: “Mang le mang yo a nwago meetse a o nyorwa gape, fela yo a nwago meetse a nna ke mo fago ona a ka se tsoge a nyorilwe gape. Meetse a ke tlago mo fa ona e tla ba mothopo mo go yena wa go seloga meetse a go mo fa bophelo bjo bo sa felego.” Go Baheberu 13:5b Modimo o re: “Nka se tsoge ke le tlogetše, ebile nka se tsoge ke le lahlile.”

Ekaba o itemogela sehla sa komelelo sa ledimo bophelong bja gago? A re otlolleng medu ya rena go Yo a abago meetse a a phelago ao a tlago timola lenyora la rena le go re kgontšha go ema gape morago ga ge ledimo le fetile. Re na le maatla. Ka medu ye e tseneletšego fasefase go Modimo. Ge e le gabotse, re ka, bjalo ka mepalema, tšwela pele go bina ka gare ga ledimo, re tseba gore ga re noši. Modimo a go šegofatše.