Tšwela pele ka ntle le poifo – Letšatši la 11

[Bokamorago: E sa le ka amogela emeile go tšwa go mmadi: “Pelo ya ka e hwile. Ga go na boikwelo; ke fela go betha ga pelo. Ka kgopelo nthuše.”]

Ekaba ke ka tsela ye o ikwago ka yona lehono? O lekile go ya pele, eupša ka mehla o thula lebota le le sa bonagalego? Goba mohlomongwe o lekile go ya morago go yo lokiša dipheto tša go feta, eupša gape o thibela ke leboto le le sa bonagalego? Gomme go mpefatša dilo, o ikwa o ka re o eme ka gare ga molete wa leraga gomme maboto a go tswalelela go tšwa ka mothoko ka moka, a ntšha lethabo le bophelo go tšwa go wena?

Se ka ka fao Shadraka le Meshaka le Abednego ba ka bago ba ikwele ka gona ge ba be ba ema pele ga moubelo wo o laumago mollo. Ba ganne go khunamela medimo ya diswantšho, ba emela Modimo, eupša bjale ba be ba lebeletšane le lehu. Goba ka fao Abrahama le Sarai ba ka bego ba ikwele ka gona. Ba be ba na le kholofetšo go tšwa go Modimo ya ngwana, eupša ba be ba fetile nako ya bona ya go belega bana.

Ke eng bothata bja gago lehono? Molekani yo a sa dumelego? Bothata bja ditšhelete lefelong la mošomo? Bolwetši? Goba mohlomongwe o lahlegetše ke moratiwa gomme o palela ke go gatela pele? Go Pesalome 40:2-4 Mopesalome o re gopotša gore Modimo a ka re ntšha ka gare ga molete ofe goba ofe wa leswiswi: “A nntšha moleteng wa tahlego, moo tebetebeng ya leraga, a mpea sebong, a ntshepediša mo go omilego. A mpha kopelo ye mpsha, sereto sa Modimo wa rena. Ba bantši ba tla re go kwa kopelo ya ka ba gakgamala, ba tshepha Morena. Go lehlogonolo motho yo a tshephilego Morena, yo a sa fadišego baikgogomoši, goba ba ba itharetšago ka bofora.” Gomme go Jeremia 32:27 Modimo Ka boYena o re: “Ke nna Morena, Modimo wa batho ka moka. Kgane go na le se se ntšhitago?”

Shadraka le Meshaka le Abednego ba be ba sa tsebe gore ba ka se swe. Ge Kgoši Nebukadnesare a ba lwantšha ka gobane ba sa khunamela seswantšhobopša sa gagwe, ba fetotše ka gore: “Ge Modimo yo re mo hlankelago a kgona go re hlakodiša moubelong wa mollo wo o laumago le diatleng tša gago, kgoši, gona yena o tla re hlakodiša. Fela le ge a ka se re hlakodiše, wena kgoši, tseba gore modimo wa gago wona re ka se o direle, le seswantšhobopša sa gauta se o se hlomilego re ka se se khunamele” (Daniele 3:17-18). Ka gobane masogana a mararo ga a lahlegelwa ke tumelo ya bona go Modimo, ba tšwa ka mollong meriri ya bona e sa tlaboga. Gomme ka ge Abrahama le Sarai ba sa ka ba furalela Modimo le kholofetšo ya Gagwe ya ngwana, Sarai a ima go sa šetšwe mathata le lebaka.

Ke ofe mohlolo wo o o rapelelago lehono? Ekaba o tla tlogela poifo le pelaelo, o tshepha gore Modimo a ka go ntšha ka gare ga molete wa leraga gomme a bea maoto a gago godimo ga leswika? Ga a dire seo fela, gape O bea kopelo e mpsha dipelong tša rena ka kholofelo ya bokamoso bjo bokaone. Modimo a go šegofatše.