To The Word – Day 96

₁Molaetša wa Morena mabapi le Babilone, lešoka la kgauswi le lewatle, šo:

Masetlapelo a tla bjalo ka ledimo le le putlago lešoka, a etšwa nageng ye e boifegago. ₂Ke bone pono ya tše šoro, pono ya go lahletšana le go senya.

Lena madira a Elamo, hlaselang! Lena a Media, dikanetšang metse! Modimo o tla fediša metsetlo ye e tlišwago ke Babilone.

₃Tše ke di bonego le gona ke di kwelego di ntlabile, di ntlholetše letšhogo le go kwa bohloko, bohloko bja go etša bja mosadi yo a šokwago. ₄Ke gakanegile, ke thothomela ka letšhogo. Ka mehla ke be ke thabela ge leswiswana le swara, eupša lehono le ntlišeditše letšhogo.

₅Moo ponong ke bona dijo di sotšwe, magogwa a adilwe gore go dulwe. Go a lewa, go a nwewa. Gateetee go kwagala taelo e re: “Balaodi ba madira, tlotšang dikotse ka makhura!”

₆Ke moka Morena a re go nna: “Sepela o yo bea moleti, o mmotše a bege tše a di bonago. ₇Ge a bona banna ba etla ka babedi ka babedi ba nametše dipere, le ba ba nametšego dipokolo le dikamela, a ba lebelele gabotsebotse.”

₈Moleti o a goelela o re: “Morena, ka mehla ke dula ke letile mo, bošego le mosegare.”

₉Šebao ba etla ge! Ba nametše dipere ba tla ka babedi ka babedi. Moleti o a bega o re: “O fentšwe, motse wa Babilone o fentšwe! Medingwana ya ona e pšhatlagantšwe.”

₁₀Lena setšhaba sa ka sa Israele, le fotšwe la feferwa bjalo ka mabele, eupša tše ke di kwelego go Morena Ramaatlaohle, Modimo wa Israele, ke le begetše tšona.

₁₁Molaetša wa Morena mabapi le Edomo šo:

Go na le yo a mpitšago kua Edomo a re: “Hee, moleti, bošego bo tla feta neng? Mpotše gore go tla sa neng.”

₁₂Nna ka mo fetola ka re: “Masa ona a etla, eupša bošego bo tla tla gape. Ge o nyaka go mpotšiša gape, o boe o tle o botšiše.”

₁₃Molaetša wa Morena mabapi le Arabia šo:

Lena basepedi ba Badedane, lena le lalago ka mehlašaneng le dikamela tša lena nageng ya Arabia, ₁₄išetšang ba ba nyorilwego meetse. Le lena ba naga ya Tema, yelang batšhabi le dijo. ₁₅Gobane ba tšhabile ditšhoša tše di hwanyolotšwego le mesebe ye e ngangilwego, le mathata a ntwa.

₁₆Ya ba Morena o re go nna: “Mo ngwageng o tee fela bogolo bja Bakedara bo tla be bo fedišitšwe. ₁₇Boramesebe ke bona bagale ba Kedara, eupša go tla šala ba se bakae fela. Ke realo, nna, Morena Modimo wa Israele.”

₁Molaetša wa Morena mabapi le Moedi wa Pono šo:

Na go diregang? Ke go reng batho bohle ba motse ba keteka godimo ga ditlhaka tša dintlo? ₂Motse o tletše lešata, batho ba a goa ba thabile.

Banna ba gabolena ba ba hwilego ntweng ye ga se ba bolawa ka lerumo goba ba hwa ba itwela. ₃Baetapele ba lena ka moka ba ile ba tšhaba gomme ba thopša ntle le go thunywa ga mosebe. Batho ba gabolena ka moka bao ba ilego ba hwetšwa ba ile ba thopša, le ge ba be ba tšhabetše kgole. ₄Bjale ge, lebelelang thoko, ke lle gabohloko; ke nyaka go llela batho ba gešo ka moka ba ba bolailwego. Le se ke la leka go nkhomotša. ₅Ye ke mehla ya go tlalelwa le go fenywa le go gakanega Moeding wa Pono, gomme Mong wa bohle, Morena Ramaatlaohle, o re tlišeditše yona. Merako ya motse wa gaborena e kgerešitšwe, gomme bao ba llelago go thušwa ba kwagala dithabeng.

₆Bahlabani ba go tšwa nageng ya Elamo ba tlile ba nametše dikoloi tša ntwa le dipere, ba itlhamile ka mesebe. Ba go tšwa nageng ya Kire ba be ba swere dikotse tša bona. ₇Meedi ye e nonnego ya Juda e be e tletše dikoloi tša ntwa; bahlabani ba ba nametšego dipere ba eme pele ga dikgoro tša Jerusalema. ₈Boitšhireletšo bja Juda bja pšhatlagana.

Ge tšeo di diregile le ile la bota dibetša tše di bego di le ka Ngwakong wa sethokgwa sa Lebanone. _9-11Le gona la bona gore menga ya merako ya Jerusalema ke ye mentši. La lekola dintlo tša Jerusalema, gomme tše dingwe la di kgereša gore le hwetše maswika a go tsošološa merako ya motse. Le ile la aga letamo ka gare ga motse gore le tle le thibele meetse a a tšwago mogobeng wo motala. Fela Modimo yo a hlotšego dilo tše go tloga kgale, yo a di dirilego, la se mo ele hloko.

₁₂Ka nako yeo Mong wa bohle, Morena Ramaatlaohle, o be a le bitša gore le lle le ilele ka go boola dihlogo le go apara diaparo tša go ilela. ₁₃Eupša lena la thaba la ipshina, la hlaba dikgomo le dihuswane, la ja nama la nwa le beine, la re: “A re jeng, re nwe, ka gobane gosasa re tla be re hwile!”

₁₄Morena Ramaatlaohle ka boyena o mpoditše a re: “Ba ka se tsoge ba lebaletšwe bobe bjo go fihlela ba ehwa. Ke realo, nna, Morena Ramaatlaohle, Mong wa bohle.”

₁₅Mong wa bohle, Morena Ramaatlaohle, o mpoditše gore ke ye go Shebna, mookamedi wa tša mošate, ke mmotšiše ke re: ₁₆“O gopola gore o mang wena? Na o re o dirang ge o ipetlela lebitla letlapeng mmotong? _17-18Mothwana tena, Morena o tla go swara a go phuthaganya, a go lahlela nageng ye e nabilego. O tla hwela gona kgauswi le dikoloyana tša ntwa tše o bego o ikgantšha ka tšona. O goboša lapa la mong wa gago. ₁₉Morena o tla go kgorometša bookameding, a go tloša mošomong wa gago.”

₂₀Morena a re go Shebna: “Ka nako yeo ke tla bitša Eliakime, mohlanka wa ka, morwa wa Hilkia. ₂₁Ke tla mo apeša seaparo le lepanta la gago, ka mmea mookamedi legatong la gago. E tla ba motswadi bathong ba Jerusalema le ba Juda. ₂₂Ke tla mo dira yo a hlatlamago kgoši, setlogolo sa Dafida, ka maemo. Ke yena a tlago dumelela motho go tsena mošate goba a mo ganetša. ₂₃Ke tla mo tiiša maemong a gagwe bjalo ka sebapola se se kokotetšwego lebotong gabotse, gomme lapa labo la hlompšha ka yena.

₂₄“Eupša ba lapa labo le meloko yabo ba tla mo imela. Ba tla ithekga ka yena bjalo ka dipitša le dibjana ge di lekelela sebapoleng se se kokotetšwego lebotong. ₂₅Ka nako yeo sebapola sela sa go kokotelwa gabotse se tla nyefa, sa robega, sa wela fase, mme tšohle tše di bego di fegilwe go sona tša pšhatlagana.” O realo, Morena.

₁Molaetša wa Morena mabapi le Tirose šo:

Bokolelang, lena baotledi ba maselawatle a a lego gare ga lewatle! Motse wa gabolena wa Tirose o sentšwe; dintlo tša wona le boemakepe di pšhatlilwe. Le kwa ditaba tšeo ge le tšo boa Saeprose. ₂Makalang, lena bagwebi ba motse wa Sidone, lena badudi ba naga ya lebopong ya Fenikia! Le be le tlišetša Sidone tšhelete ka go tshela lewatle ₃la yo reka le rekiša mabele a Egepeta a go bunwa nokeng ya Naele, le ka go yo gweba le ditšhaba tše dingwe.

₄Wena motse wa Sidone, lewa ke dihlong! Lewatle le motse wo mofsa wa Tirose di a belaela di re: “Ga se ra ka ra šokwa ra belega bana. Ga se ra ka ra godiša barwa le barwedi.”

₅Le bona Baegepeta ba tla ba bohlokong kudu ge ba ekwa gore Tirose e pšhatlagantšwe.

₆Bokolelang, lena batho ba Fenikia! Tshelang lewatle le tšhabele Tarshishe! ₇Na e ka ba wo ke wona motse wola wa mekgolokwane wa Tirose, wa go agwa kgale? E ka ba ke motse wola wa go romela batho ba wona mošola wa lewatle go yo laola ditšhaba tša moo? ₈Ke mang yo a logilego maano a go pšhatla motse wa Tirose, motse wo wa go buša dinaga tše ntši, woo bagwebi ba wona e bego e le dikgošana, bahlomphegi lefaseng? ₉Morena Ramaatlaohle ke yena a logilego maano ao. O dirile seo gore a kokobetše baikgogomoši, le gore a goboše bahlomphegi bao.

₁₀Sepelang le yo lema, lena batho ba Tarshishe, ka gobane ga le sa na le boemakepe. ₁₁Morena o emišitše letsogo ka godimo ga lewatle, gomme o thothomediša mebušo. O laetše gore dibo tša Fenikia di thubje. ₁₂Wena motse wa Sidone, o ka se sa thaba, gomme batho ba gago ba gateletšwe. Le ge ba ka tšhabela Saeprose, manaba a bona a tla no ba latelela gona.

₁₃Ke Bababilonia, e sego Baasiria, bao ba ilego ba dikanetša motse wa Tirose, ba thuba dibo tša wona, ba fetoša motse marope, mme diphoofolo tša lešoka tša phela gona.

₁₄Bokolelang, lena baotledi ba maselawatle a a lego gare ga lewatle! Motse wola wa lena wa go tia o pšhatlagantšwe.

₁₅Nako e etla yeo ka yona Tirose e tlago lebalwa mengwaga ye masome a a šupago, e lego mengwaga ya go phela ga kgoši. Ge mengwaga yeo e fetile, Tirose e tla dira bjalo ka segwebakathobalo mo košeng ye e rego:

₁₇Ge mengwaga yeo ye masome a a šupago e fetile, Morena o tla šetša motse wa Tirose gape, mme wona wa boela wa gweba bjalo ka pele, wa dumelela mebušo yohle ya lefase go gweba le wona. ₁₈Tšhelete yeo motse woo o e hwetšago ka mokgwa woo e tla fiwa Morena. E ka se bolokwe, eupša bao ba khunamelago Morena ba tla reka dijo ka bontši le diaparo tša botšhepi ka yona.

₁Morena o tla senya tšohle lefaseng, a le tlogela le se ne selo. O tla hlakahlakanya lefase, gomme a phatlalatša batho. ₂Bohle ba tla hlagelwa ke masetlapelo a a swanago – moprista le setšhaba, lekgoba le mong wa lona, moreki le morekiši, moadimi le moadingwa, mokolotiwa le mokoloti. ₃Lefase le tla hulelwa sa ruri, la tlogelwa le se na le seloselo. Ka ge go boletše Morena, tšeo di tla direga.

₄Lefase le omile, naga e sehlafetše. Lefase ka moka le galogile; legodimo le lefase di senyegile. ₅Batho ba tšhilafaditše lefase ka go tshela melao ya Modimo le kgwerano yela ya go ya go ile. ₆Ka gona Modimo o rogakile lefase, a le senya. Batho ba lona ba otlelwa tše ba di dirilego, ba a fokotšega mme ba ba šalago ga ba nene. ₇Merara e a pona, gomme beine ga e sa hwetšwahwetšwa. Bohle ba ba bego ba dula ba thabile, bjale ba nyamile, ₈gomme dikoša tšela tša lethabo le mekgolokwane, tša dikgapa le tša meropa, di fedile. ₉Ge go nwewa ga go sa opelwa; batho ga ba sa ipshina ka bjala. ₁₀Mekgotheng ya motse ga go sa le motho; motse o huduegile gomme batho ba itswaleletše ka dintlong gore go se ke gwa tsena motho. ₁₁Lešata mekgotheng ke fela la batho ba ba nyakago beine. Lethabo le tlogile; nageng ga go sa ne boipshino. ₁₂Motse ke marope, le kgoro ya wona e robagantšwe. ₁₃Tšeo ke tše di tlago hlagela ditšhaba lefaseng ka moka. Go tla swana le mola mehlware e hlohlorwa dikenywa, le mola diterebe tše di bego di šetše, di fulwa.

₁₄Mašaledi a tla hlaba mekgolokwane. Ba ka bodikela ba tla goa ka ga bogolo bja Morena, ₁₅le ba ka bohlabatšatši ba mo hlompha. Batho ba ba dulago lebopong ba tla godiša Morena Modimo wa Israele. ₁₆Re tla kwa dikoša tše di tšwago magomong a lefase di re:

Eupša nnaena ke lahlegile! Ke a fela, ke a felela! Boradia bo sa tšwela pele, le bonokwane bo a gola. ₁₇Lena batho bohle ba lefase, letšhogo le melete le melaba di le emetše! ₁₈Yo a ka rego o a tšhaba ge a ekwa mokgoši wa yoo a tšhogilego, o tla wela ka moleteng; ge a ka tšwa ka moleteng, o tla tanywa ke molaba. Go tla na dipula tša matlorotloro, mme metheo ya lefase ya tekateka. ₁₉Lefase lona le tla šikinyega kudu la pharoga. ₂₀Le tla thekesela bjalo ka setagwa goba mohlahlana wo o tšewago ke ledimo. Lefase le imelwa ke dibe tša lona; le tla phuhlama gomme la se sa tsoga.

₂₁Nako e etla yeo ka yona Morena a tlago otla barongwa ba babe godimo le magoši lefaseng. ₂₂Modimo o tla kgoboketša magoši bjalo ka dibofša tše di tsentšwego ka moleteng. O tla ba hlahlela kgolegong yeo go fihlela ge ba tlile go otlwa ka morago ga nako ye telele. ₂₃Ngwedi o ka se sa taga, le letšatši le tla fifala, ka gobane Morena Ramaatlaohle e tla be e le kgoši, a buša a le thabeng ya Sione, motseng wa Jerusalema, gomme baetapele ba setšhaba sa gagwe ba tla bona letago la gagwe.

₆Morena Ramaatlaohle o tla direla ditšhaba tšohle tša lefase monyanya mo thabeng ye ya Sione, monyanya wa dijo tše bosebose le beine ye bogale. ₇Gona mo o tla fediša manyami ao a bego a aparetše ditšhaba tšohle. ₈Morena, Mong wa bohle, o tla fedišetša lehu sa ruri! O tla phumola meokgo mahlong a bohle, gomme a tloša go goboga ga setšhaba sa gagwe lefaseng ka moka. O realo, Morena.

₉Mehleng yeo batho ba tla re: “Yo ke Modimo wa rena! Re be re botile yena gore a re phološe. Ke yena Morena! Re be re mmotile, gomme bjale a re iketleng, re thabeng, ka gobane o re phološitše.”

₁₀Morena o tla šireletša thaba ye ya Sione, eupša batho ba Moaba bona ba tla gatakwa bjalo ka mooko ge o gatakelwa bolokong ka moleteng. ₁₁Ba tla leka go tšwa ka moo bolokong ka go akga matsogo bjalo ka motho yo a tuntelago, eupša Modimo o tla ba gatelela fase le ge ba akga matsogo ka mokgwa woo. ₁₂O tla thubaganya metse ya Moaba ye e ageleditšwego ka merako ye e phagamego, a e pšhatlaganya.