Molaetša wa Morena mabapi le Jerusalema
1Molaetša wa Morena mabapi le Moedi wa Pono šo:
Na go diregang? Ke go reng batho bohle ba motse ba keteka godimo ga ditlhaka tša dintlo? 2Motse o tletše lešata, batho ba a goa ba thabile.
Banna ba gabolena ba ba hwilego ntweng ye ga se ba bolawa ka lerumo goba ba hwa ba itwela. 3Baetapele ba lena ka moka ba ile ba tšhaba gomme ba thopša ntle le go thunywa ga mosebe. Batho ba gabolena ka moka bao ba ilego ba hwetšwa ba ile ba thopša, le ge ba be ba tšhabetše kgole. 4Bjale ge, lebelelang thoko, ke lle gabohloko; ke nyaka go llela batho ba gešo ka moka ba ba bolailwego. Le se ke la leka go nkhomotša. 5Ye ke mehla ya go tlalelwa le go fenywa le go gakanega Moeding wa Pono, gomme Mong wa bohle, Morena Ramaatlaohle, o re tlišeditše yona. Merako ya motse wa gaborena e kgerešitšwe, gomme bao ba llelago go thušwa ba kwagala dithabeng.
6Bahlabani ba go tšwa nageng ya Elamo ba tlile ba nametše dikoloi tša ntwa le dipere, ba itlhamile ka mesebe. Ba go tšwa nageng ya Kire ba be ba swere dikotse tša bona. 7Meedi ye e nonnego ya Juda e be e tletše dikoloi tša ntwa; bahlabani ba ba nametšego dipere ba eme pele ga dikgoro tša Jerusalema. 8Boitšhireletšo bja Juda bja pšhatlagana.
Ge tšeo di diregile le ile la bota dibetša tše di bego di le ka Ngwakong wa sethokgwa sa Lebanone. 9-11Le gona la bona gore menga ya merako ya Jerusalema ke ye mentši. La lekola dintlo tša Jerusalema, gomme tše dingwe la di kgereša gore le hwetše maswika a go tsošološa merako ya motse. Le ile la aga letamo ka gare ga motse gore le tle le thibele meetse a a tšwago mogobeng wo motala. Fela Modimo yo a hlotšego dilo tše go tloga kgale, yo a di dirilego, la se mo ele hloko.
12Ka nako yeo Mong wa bohle, Morena Ramaatlaohle, o be a le bitša gore le lle le ilele ka go boola dihlogo le go apara diaparo tša go ilela. 13Eupša lena la thaba la ipshina, la hlaba dikgomo le dihuswane, la ja nama la nwa le beine, la re: “A re jeng, re nwe, ka gobane gosasa re tla be re hwile!”
14Morena Ramaatlaohle ka boyena o mpoditše a re: “Ba ka se tsoge ba lebaletšwe bobe bjo go fihlela ba ehwa. Ke realo, nna, Morena Ramaatlaohle, Mong wa bohle.”
Shebna o a kgalwa
15Mong wa bohle, Morena Ramaatlaohle, o mpoditše gore ke ye go Shebna, mookamedi wa tša mošate, ke mmotšiše ke re: 16“O gopola gore o mang wena? Na o re o dirang ge o ipetlela lebitla letlapeng mmotong? 17-18Mothwana tena, Morena o tla go swara a go phuthaganya, a go lahlela nageng ye e nabilego. O tla hwela gona kgauswi le dikoloyana tša ntwa tše o bego o ikgantšha ka tšona. O goboša lapa la mong wa gago. 19Morena o tla go kgorometša bookameding, a go tloša mošomong wa gago.”
20Morena a re go Shebna: “Ka nako yeo ke tla bitša Eliakime, mohlanka wa ka, morwa wa Hilkia. 21Ke tla mo apeša seaparo le lepanta la gago, ka mmea mookamedi legatong la gago. E tla ba motswadi bathong ba Jerusalema le ba Juda. 22Ke tla mo dira yo a hlatlamago kgoši, setlogolo sa Dafida, ka maemo. Ke yena a tlago dumelela motho go tsena mošate goba a mo ganetša. 23Ke tla mo tiiša maemong a gagwe bjalo ka sebapola se se kokotetšwego lebotong gabotse, gomme lapa labo la hlompšha ka yena.
24“Eupša ba lapa labo le meloko yabo ba tla mo imela. Ba tla ithekga ka yena bjalo ka dipitša le dibjana ge di lekelela sebapoleng se se kokotetšwego lebotong. 25Ka nako yeo sebapola sela sa go kokotelwa gabotse se tla nyefa, sa robega, sa wela fase, mme tšohle tše di bego di fegilwe go sona tša pšhatlagana.” O realo, Morena.
