To The Word – Day 95

₁Ba lešika la boJesu Kriste, setlogolo sa Dafida, yo e bego e le setlogolo sa Abrahama, ba latelana ka mokgwa wo:

₂Abrahama e bile tatagoIsaka, Isaka a tswala Jakobo, Jakobo a tswala Juda le banababo, ₃Juda le Tamare ba tswala Peretse le Serage, Peretse a tswala Hetserone, Hetserone a tswala Ramo, ₄Ramo a tswala Aminadaba, Aminadaba a tswala Nagshone, Nagshone a tswala Salmone, ₅Salmone le Rahaba ba tswala Boase, Boase le Rute ba tswala Obede, Obede a tswala Isai, ₆Isai a tswala Kgoši Dafida.

Dafida le yo e bego e kile ya ba mosadi wa Uria ba tswala Solomone. ₇Solomone a tswala Rehabeamo, Rehabeamo a tswala Abia, Abia a tswala Asafo, ₈Asafo a tswala Joshafate, Joshafate a tswala Joramo, Joramo a tswala Usia, ₉Usia a tswala Jotamo, Jotamo a tswala Ahase, Ahase a tswala Hiskia, ₁₀Hiskia a tswala Manase, Manase a tswala Amone, Amone a tswala Josia, ₁₁Josia a tswala Joyakine le banababo. Ka morago ga moo batho ba Juda ba thopelwa Babilone.

₁₂Morago ga ge batho ba thopetšwe Babilone, Joyakine a tswala Sealtiele, Sealtiele a tswala Serubabele, ₁₃Serubabele a tswala Abihude, Abihude a tswala Eliakime, Eliakime a tswala Asore, ₁₄Asore a tswala Tsadoko, Tsadoko a tswala Agime, Agime a tswala Eliude, ₁₅Eliude a tswala Eleasara, Eleasara a tswala Mathane, Mathane a tswala Jakobo, ₁₆Jakobo a tswala Josefa, monna wa Maria, mmagoJesu yo a bitšwago le ka la Kriste.

₁₇Ka gona, go tloga ka Abrahama go fihlela ka Dafida go bile le meloko ye lesome le metšo ye mene; go tloga ka Dafida go fihlela lebakeng la go thopelwa Babilone go bile le ye lesome le metšo ye mene, le go tloga nakong yeo go fihlela matswalong a Jesu Kriste go bile le ye lesome le metšo ye mene.

₁₈Tša matswalo a Jesu Kriste di bile ka tsela ye: Maria, mmagwe, o be a beeleditšwe ke Josefa; eupša ya re pele ba nyalana, Maria a lemoga gore o imišitšwe ke maatla a Moya wo Mokgethwa. ₁₉Josefa e be e le monna wa go phetha melao ya Moshe, eupša o ile a se ke a rata go goboša Maria phatlalatša; ka gona a ikemišetša go mo tlogela ka go ngwega. ₂₀Ge a sa gopodišiša taba yeo, morongwa wa Morena a tšwelela go yena torong, a re go yena: “Josefa, setlogolo sa Dafida, o se ke wa boifa go nyala Maria, gobane o imišitšwe ke maatla a Moya wo Mokgethwa. ₂₁O tla belega morwa, gomme o mo ree leina la Jesu, ka gobane o tla phološa setšhaba sa gabo dibeng tša sona.”

₂₂Tšeo ka moka di ile tša direga gore go tle go phethege sela se boletšwego ke Morena ka moprofeta mola a re: ₂₃“Kgarebe e tla ima, ya belega morwa yo a tlago bitšwa Imanuele.” Ke go re “Modimo o na le rena”.

₂₄Ka gona, ge Josefa a tsoga, a yo nyala Maria, bjalo ka ge morongwa wa Morena a be a mo laetše. ₂₅Eupša a se ke a robala naye a ba a belega morwa yoo wa gagwe. Gomme Josefa a mo rea leina la Jesu.

₁E rile ge Jesu a tswetšwe motseng wa Betlelehema, nageng ya Judea, mehleng ya Kgoši Heroda, boradinaledi ba bangwe ba tla Jerusalema ba etšwa bohlabela, ₂ba fihla ba botšiša ba re: “E kae kgoši ya Bajuda ye e sa tšogo tswalwa? Re bone naledi ya gagwe e rotoga ka bohlabela, gomme re tlile go mo khunamela.”

₃Ge Kgoši Heroda a ekwa taba yeo, a ferekana gotee le batho ka moka ba motse wa Jerusalema. ₄A kgobokanya baprista ba bagolo ka moka le boramangwalo, gomme a ba botšiša a re: “Mesia o tla belegwa kae?”

₅Bona ba mo fetola ba re: “O tla belegwa motseng wa Betlelehema, nageng ya Judea, ka gobane moprofeta o ngwadile a re:

₇Ka gona Heroda a biletša boradinaledi bale sephiring, a ba botšiša nako ya nnete yeo naledi e bonagetšego ka yona. ₈Ka morago a ba roma Betlelehema a ba laela a re: “Sepelang le yo nyakišiša moo ngwana yoo a lego gona, gomme ge le mo hweditše le tle le ntsebiše gore le nna ke yo mo khunamela.”

_9-10Ge ba seno kwa tša kgoši ba tloga, gomme ba bona naledi yela ba e bonego ka bohlabela. Ba rile ge ba e bona ba thaba kudukudu. Ya ba eta pele ya ba ya yo ema ka godimo ga moo ngwana a bego a le gona. ₁₁Ba tsena ka ngwakong, gomme ge ba bona ngwana le Maria, mmagwe, ba wa ka matolo ba mo khunamela. Ba phutholla mekotlana ya bona ba mo ntšhetša dimpho tše: gauta le seorelo le mira.

₁₂Ka morago ba boela nageng ya gabobona ka tsela ye nngwe, ka ge Modimo a be a ba boditše torong gore ba se ke ba boela go Heroda.

₁₃Ge ba tlogile, morongwa wa Morena a tšwelela go Josefa torong, a re: “Tsoga, o tšee ngwana le mmagwe o tšhabele Egepeta, o dule gona go fihlela ke go botša gore o tloge, ka gobane Heroda o tlilo nyaka ngwana yo gore a mmolaye.”

₁₄Josefa a tsoga, a tšea ngwana le mmagwe, a tloga e le bošego a leba Egepeta; ₁₅a dula gona go fihlela Heroda a ehwa, gore go tle go phethege se se boletšwego ke Morena ka moprofeta mola a re: “Ke biditše morwa wa ka Egepeta.”

₁₆Ge Heroda a seno lemoga gore boradinaledi bale ba mo forile, a tuka bogale. A laela gore bašemanyana ka moka ba Betlelehema le tikologong ya gona ba mengwaga ye mebedi goba ka fase ga fao ba bolawe, a lekanya ka nako yela a bego a botšišitše boradinaledi gore naledi e bonagetše neng.

₁₇Gwa napa gwa phethega se se boletšwego ke moprofeta Jeremia mola a re:

₁₉Ya re ge Heroda a hwile, morongwa wa Morena a tšwelela go Josefa torong kua Egepeta, ₂₀a re: “Tsoga, o tšee ngwana le mmagwe, o boele nageng ya Israele, ka gobane bale ba bego ba nyaka go bolaya ngwana ba hwile.” ₂₁Josefa a tsoga, a tšea ngwana le mmagwe, a boela nageng ya Israele.

₂₂Eupša ge a ekwa gore Argelaose o buša naga ya Judea legatong la Heroda, tatagwe, a boifa go ya gona. Ge a seno laelwa ke Modimo ka toro, a ya nageng ya Galilea, ₂₃gomme a aga motseng wo o bitšwago Nasaretha. Gwa napa gwa phethega se se boletšwego ke baprofeta mola ba re: “O tla bitšwa Monasaretha.”

₁Mehleng yeo Johanese Mokolobetši o ile a yo ruta lešokeng la Judea ₂a re: “Sokologang, gobane mmušo wa Modimo o batametše!” ₃Ke yena yo moprofeta Jesaya a boletšego ka yena a re:

₄Johanese yo o be a apara seaparo sa boya bja kamela; a itlema letheka ka lepanta la mokgopha, gomme dijo tša gagwe e le ditšie le todi ya dinose. ₅Batho ba be ba etla go yena ba etšwa Jerusalema, le seleteng ka moka sa Judea, le nageng yohle ya kgauswi le noka ya Jordane. ₆Ba be ba ipolela dibe mme yena a ba kolobetša ka nokeng ya Jordane.

₇Ge a bona Bafarisei le Basadusei ba bantši ba etla go yena gore ba kolobetšwe, a re go bona: “Dinoga tenang, ke mang yo a le boditšego a re le ka phepha kotlo ye Modimo a lego kgauswi le go otla bakgopo ka yona? ₈Go kaone le dire tše di tlago laetša gore le sokologile. ₉Le se ke la gopola gore le tla phepha kotlo ka ge Abrahama e le rakgolokhukhu wa lena. Gobane ke le botša gore Modimo a ka fetoša maswika a ditlogolo tša Abrahama! ₁₀Selepe se šetše se loketše go rema mehlare medung; mohlare wo mongwe le wo mongwe wo o sa enywego dienywa tše dibotse o tla rengwa wa lahlelwa mollong. ₁₁Nna ke le kolobetša ka meetse ka ge le sokologile, eupša yo a tlago ntlhatlama o tla le kolobetša ka Moya wo Mokgethwa le ka mollo. O mpheta ka maatla, gomme ga se ka swanela le go mo swarela dieta. ₁₂O swere leselo ka seatla, gomme o tla fefera mabele gabotse. O tla a tšhela ka letlolong, mooko wona a o tšhuma ka mollo wo o sa timego.”

₁₃Mehleng yeo Jesu a ya go Johanese nokeng ya Jordane a etšwa Galilea gore a kolobetšwe ke yena. ₁₄Eupša yena a gana a re: “Ke nna ke swanetšego go kolobetšwa ke wena, bjale o reng o etla go nna?”

₁₅Jesu a mo fetola a re: “Ga bjale a go no ba ka mokgwa wo, gobane ke tshwanelo gore re phethe thato ya Modimo.” Ka gona Johanese a dumela go mo kolobetša.

₁₆Jesu ge a seno kolobetšwa, a tšwa ka meetseng. Legodimo la mmulegela, gomme a bona Moya wa Modimo o le ka sebopego sa leeba o theoga o dula godimo ga gagwe. ₁₇Gwa napa gwa kwagala lentšu le etšwa legodimong le re: “Yo ke yena Morwa wa ka yo ke mo ratago; o nkgahla kudu.”

₁Pele ga ge lefase le hlolwa, Lentšu o be a ntše a le gona, a le go Modimo, ebile ka boyena e le Modimo. ₂E sa le a eba go Modimo go tloga le go tloga. ₃Tšohle di hlodilwe ka yena, gomme go tše di hlodilwego ga go le se tee se se sego sa hlolwa ka yena. ₄Dihlolwa tšohle di hweditše bophelo ka yena, bophelo bjo e bilego seetša sa batho. ₅Seetša seo se bonega leswiswing, gomme leswiswi ga se la kgona go se fenya.

₆Modimo o kile a roma monna yo mongwe yo leina la gagwe e bego e le Johanese. ₇O be a tlile go begela batho seetša, gore bohle ba kwe se a se begago gomme ba se dumele. ₈Yena ka boyena e be e se seetša; se a bego a se tletše e be e le go bega seetša. ₉Seetšaetša sa go bonegela batho bohle se be se etla lefaseng.

₁₀Lentšu o be a le lefaseng, gomme le ge Modimo a hlodile lefase ka yena, batho ba lona ga se ba mo amogela. ₁₁O be a tlile ga gabo, fela ba gabo ba se mo amogele. ₁₂Eupša ba ba ilego ba mo amogela mme ba dumela go yena, bona a ba fa tokelo ya go ba bana ba Modimo. ₁₃Ya ba bana ba Modimo, e sego ka go tswalwa bjalo ka bana ba bangwe, e sego ka go tswalwa ka tumo ya nama, goba ka thato ya monna, eupša ka go tswalwa ke Modimo ka boyena.

₁₄Yena Lentšu e bile motho, a dula le rena e le yo botho kudu go rena, a re utollela ka botlalo se Modimo a lego sona. Ra bogela letago la gagwe, letago le a le filwego ke Tatagwe, e le yena Morwa a nnoši wa Tatagwe.

₁₅Johanese o be a bolela ka yena mola a goeletša a re: “Ke be ke era yena yo ge ke be ke re: ‘Yo a ntlhatlamago o mpheta ka maemo, ka gobane o be a le gona pele nna ke tswalwa.’ ”

₁₆Ka ge a re loketše kudu, o re šegofaditše bohle, a re šegofatša leboelela. ₁₇Melao Modimo o re file yona ka Moshe, gomme ka Jesu Kriste a re utollela ka mo e lego yo botho go rena ka gona, a ba a re utollela se a lego sona. ₁₈Ga go motho yo a kilego a bona Modimo. Batho ba mo tseba ka go mo utollelwa ke Morwagwe, Motswalwanoši, yo ka boyena e lego Modimo, yo a lego kgauswi le Tatagwe.

₁₉Mola baetapele ba Bajuda Jerusalema ba romile baprista le Balefi go Johanese gore ba ye go mmotšiša gore ke yena mang, yena o ile a ipega, ₂₀a se gane go ba fetola, a bolela phaa a sa iphihle a re: “Ga se nna Mesia.”

₂₁Ba mmotšiša ba re: “Bjale o mang? Kgane ke wena Eliya?”

Yena a re: “Aowa, ga ke yena.”

Ba re: “Kgane e ka ba o yena Moprofeta?”

A ba fetola a re: “Aowa.”

₂₂Ba napa ba re: “Gona re botše gore o mang, gore re yo botša ba ba re romilego. O reng ge o ipega?”

₂₃Johanese a ba fetola ka go tsopola se se boletšwego ke moprofeta Jesaya a re:

₂₄Baromiwa bao ba bego ba romilwe ke Bafarisei ₂₅ba botšiša Johanese ba re: “Bjale ge eba ga o Mesia, ga o Eliya, ebile ga o yena Moprofeta, o reng o kolobetša?”

₂₆Johanese a ba fetola ka go re: “Nna ke kolobetša ka meetse, fela mo gare ga lena go na le yo le sa mo tsebego. ₂₇Ke yena yo a ntlhatlamago, eupša nna le go mmofolla marala a dieta ga se gwa ntshwanela.”

₂₈Ditaba tšeo ka moka di diregile Bethania ka mošola wa noka ya Jordane, moo Johanese a bego a kolobetša gona.

₂₉Ka tšatši le le latelago Johanese a bona Jesu a etla go yena. A re: “Bonang Kwanyana ya Modimo ye e tlošago dibe tša lefase! ₃₀Ke yena yo ke bego ke bolela ka yena mola ke re: ‘Monna yo a ntlhatlamago o mpheta ka maemo, ka gobane o be a le gona pele nna ke tswalwa.’ ₃₁Le nna ke be ke sa tsebe gore ke ofe, etšwe ke tšwetše ke kolobetša ka meetse gore a tle a utollelwe setšhaba sa Israele.”

₃₂Johanese o hlatsetše ka go re: “Ke bone Moya o theoga legodimong nke ke leeba, wa fihla wa dula godimo ga gagwe. ₃₃Nna ke be ke sa tsebe gore ke yena, fela Modimo yo a nthomilego go yo kolobetša ka meetse o be a rile go nna: ‘Yo o bonago Moya o theogela go yena o dula godimo ga gagwe, ke yena yo a kolobetšago ka Moya wo Mokgethwa.’ ₃₄Bjale ke bone, gomme ke hlatsela gore ke yena Morwa wa Modimo.”

₃₅Ka tšatši le le latelago Johanese o be a le moo gape a na le ba babedi ba barutiwa ba gagwe. ₃₆Ya re ge a bona Jesu a feta, a re: “Bonang Kwanyana ya Modimo!”

₃₇Barutiwa bao ba babedi ba mo kwa ge a realo, gomme ba latela Jesu. ₃₈Jesu a retologa, a ba bona ba mo latela, a ba botšiša a re: “Etse le nyakang?”

Bona ba re: “Rabi,” (ke go re “Moruti”), “na o dula kae?”

₃₉A ba fetola a re: “A re yeng le yo bona.” E be e šetše e le iri ya bone mathapama. Ke moka ba ya le yena ba yo bona mo a dulago gona, ba hlwa le yena tšatši leo.

₄₀Yo mongwe wa bao ba babedi ba go re go kwa Johanese a bolela ba latela Jesu e be e le Andrease, ngwanaboSimone Petrose. ₄₁Yena a raka a yo nyaka Simone, mogolwagwe, gomme ge a mo hweditše, a re: “Re hweditše Mesia!” (Ke go re “Kriste”.)

₄₂A nama a iša Simone go Jesu.

Jesu ge a mmona a re: “Etse ke wena Simone, morwa wa Johanese, fela o tla bitšwa Kefase.” (Ke go re “Petrose”.)

₄₃Ka tšatši le le latelago Jesu ge a re o ya Galilea a hwetša Filipi, gomme a re go yena: “Ntatele!” ₄₄Yo Filipi ga gabo e be e le Betsaida, motse wa gaboAndrease le Petrose. ₄₅O rile go hwetša Nathaniele, a re go yena: “Re hweditše yola Moshe a ngwadilego ka yena ka pukung ya melao, le baprofeta ba ngwadilego ka yena; ke Jesu wa Nasaretha, morwa wa Josefa.”

₄₆Nathaniele a mmotšiša a re: “Na go na le se sebotse se se ka tšwago Nasaretha?”

Filipi a mo fetola a re: “A re ye o yo bona.”

₄₇Ge Jesu a bona Nathaniele a etla go yena, a bolela ka yena a re: “Šo Moisraele wa mmakgonthe yo a se nago bomenetša.”

₄₈Nathaniele a mmotšiša a re: “O ntsebela kae?”

Jesu a mo fetola a re: “Ke go bone o le mola moriting wa mogo, pele ga ge Filipi a go bitša.”

₄₉Nathaniele a mo fetola a re: “Moruti, o Morwa wa Modimo! Ke wena Kgoši ya Israele!”

₅₀Jesu a re: “Na o dumela ka ge ke go boditše gore ke go bone o sa le mola moriting wa mogo? O sa tlilo bona tše di fetago tšeo.” ₅₁A tšwela pele a re: “Ruri, ruri, ke le botša gore le tla bona legodimo le bulegile gomme barongwa ba Modimo ba namelela ba bile ba theogela go Morwamotho.”

₁Ge go seno feta matšatši a mabedi gwa ba le monyanya wa lenyalo motseng wa Kana, nageng ya Galilea. MmagoJesu le yena o be a le gona. ₂Jesu le barutiwa ba gagwe le bona ba be ba laleditšwe moo monyanyeng. ₃Ya re ge beine e hlaetše, mmagoJesu a re go yena: “Ga ba sa na beine.”

₄Jesu a mo fetola ka go re: “Mma, etse tša ka o di tsena bjang? Gape nna nako ya ka ga sešo ya fihla.”

₅MmagoJesu a botša bahlanka a re: “Le dire tšohle tše a le botšago tšona.”

₆Ka lapeng leo go be go beilwe dipitša tše di selelago tša maswika, ye nngwe le ye nngwe e tlatšwa ke metšega ye mebedi go iša go ye meraro. Go ya ka setlwaedi sa Bajuda meetse a gona a be a šomišetšwa go itlhwekiša. ₇Jesu a botša bahlanka a re: “Tlatšang dipitša tšeo meetse.” Ba di tlatša pshi. ₈A nama a re go bona: “Bjale egang le išetše moswaramarapo.” Ba mo išetša. ₉Ya re ge a ekwa meetse ao a fetogilego beine ye a sa tsebego gore e tšwa kae, go tseba bahlanka bale ba go ga meetse, a bitša monyadi ₁₀a re go yena: “Batho ka moka ba thoma ka go ntšha beine ye bose; ge batho ba nwele go kgolwa, ba kgone ba ntšha ye e sego bose kudu. Fela wena ke gona o ntšhitšego ye bose gonabjale!”

₁₁Mohlolo wo wa mathomo Jesu o o dirile motseng wa Kana, nageng ya Galilea, a bontšha batho bogolo bja gagwe, mme barutiwa ba gagwe ba dumela go yena.

₁₂Ka morago ga moo Jesu le mmagwe le banababo le barutiwa ba gagwe ba ya Kapernaume, ba fihla ba dula gona matšatšinyana.

₁₃Monyanya wa Bajuda wa Paseka o be o šetše o le kgauswi, ka gona Jesu a ya Jerusalema. ₁₄Kua Tempeleng a fihla a hwetša babapatši ba dikgomo le ba dinku le ba maeba, a hwetša go dutše le ba go rekanya ditšhelete. ₁₅A loga tshelane ka dithapo, a ba raka Tempeleng ka moka ga bona, le dinku le dikgomo, a gašanya ditšhelete tša barekanyi ba ditšhelete, a ba a menola ditafola tša bona, ₁₆gomme a laela babapatši bale ba maeba a re: “Ntšhang dilo tšeo ka mo! Le se sa dira ntlo ya Tate bobapaletšo!” ₁₇Barutiwa ba gagwe ba napa ba elelwa gore go ngwadilwe ka Mangwalong a Makgethwa gwa thwe: “Modimo, ke jewa ke go fišegela ntlo ya gago.”

₁₈Bajuda ba mmotšiša ba re: “O ka re bontšha ka mohlolo mang gore tše o di dirago tše di go lebane?”

₁₉Jesu a ba fetola ka go re: “Kgerešang Tempele ye, gomme ka matšatši a mararo ke tla e tsoša.”

₂₀Bona ba mmotšiša ba re: “Tempele ye go tšerego mengwaga ye masome a mane le metšo ye e selelago go e aga, wena o ka nama wa e tsoša ka matšatši a mararo?”

₂₁Jesu ge a re Tempele o be a era mmele wa gagwe. ₂₂E rile ge a šetše a tsogile bahung barutiwa ba gagwe ba elelwa gore taba ye o be a kile a e bolela, gomme ba dumela Mangwalo a Makgethwa le se Jesu a ilego a se bolela.

₂₃Mola Jesu a le Jerusalema ka nako ya Monyanya wa Paseka, batho ba bantši ba ile ba dumela go yena ge ba bone mehlolo ye a e dirago. ₂₄Eupša yena a se ikanye bona ka gobane o be a ba tseba bohle, ₂₅gomme go sa nyakege gore a botšwe ke motho tša yo mongwe, ka ge a be a itsebela ka boyena tša ka pelong ya motho.

₁Go be go na le leloko le lengwe la Kgorokgolo ya Bajuda yo leina la gagwe e bego e le Nikodemose, e le yo mongwe wa Bafarisei. ₂O kile a ya go Jesu e le bošego, a fihla a re go yena: “Moruti, re a tseba gore o moruti yo a tšwago go Modimo, gobane ga go motho yo a ka kgonago go dira mehlolo ye o e dirago ye, ge Modimo a se na le yena.”

₃Jesu a mo fetola ka go re: “Ruri, ruri, ke go botša gore ge motho a sa tswalwe gape, e ka se be wa mmušo wa Modimo.”

₄Nikodemose a mmotšiša a re: “Motho a ka tswalwa gape bjang e šetše e le mokgalabje? Kgane a ka boela ka popelong ya mmagwe, a tswalwa?”

₅Jesu a mo fetola a re: “Ruri, ruri, ke go botša gore ge motho a sa tswalwe ka meetse le ka Moya e ka se be wa mmušo wa Modimo. ₆Gape nameng motho o tswalwa ke batswadi ba nama, mola moyeng a tswalwa ke yena Moya. ₇O se makale ge ke go botša gore le swanetše go tswalwa gape. ₈Moya o fokela mo o ratago gona; wa kwa modumo wa wona, fela wa se tsebe mo o tšwago goba mo o yago gona. Go bjalo ge le go bohle ba ba tswetšwego ke Moya.”

₉Nikodemose a mmotšiša a re: “Go ka kgonega bjang?”

₁₀Jesu a mo fetola a re: “Mmalo! Wa re o le moruti yo mokaaka wa Israele wa nama wa se tsebe? ₁₁Ruri, ruri, ke go botša gore rena re le botša se re se tsebago, ebile re hlatsela se re se bonego, fela ga le amogele bohlatse bja rena. ₁₂Ge le sa nkgolwe mola ke le botša tša mo lefaseng, ge ke le botša tša legodimong gona le tla nkgolwa bjang? ₁₃Gape ebile ga go yo a kilego a rotogela legodimong, ge e se yena Morwamotho yo a theogilego gona.

₁₄“Bjalo ka ge Moshe a kile a fega noga ya mphiri koteng kua lešokeng, Morwamotho le yena o swanetše go fegwa bjalo, ₁₅gore mang le mang yo a dumelago go yena a tle a be le bophelo bjo bo sa felego.

₁₆“Gobane Modimo o ratile lefase kudu mo a ilego a ba a le fa Morwa wa gagwe a le noši, gore mang le mang yo a dumelago go yena a se lahlege, eupša a be le bophelo bjo bo sa felego. ₁₇Gape Modimo ga se a roma Morwagwe lefaseng gore a tle a le ahlole, o mo romile gore a tle a le phološe.

₁₈“Yo a dumelago go Morwa wa Modimo a ka se ahlolwe, eupša yo a sa dumelego, yena o šetše a ahlotšwe, ka ge a sa dumele go Morwa a le noši wa Modimo. ₁₉Kahlolo ya Modimo e tla ka mokgwa wo: Seetša se tlile lefaseng, fela batho ba ratile leswiswi go feta sona seetša, ka ge mediro ya bona e le ye mebe. ₂₀Gape motho yo a dirago tše mpe o hloile seetša gomme ga a tle go sona, ka ge a sa nyake gore mediro ya gagwe e bonwe. ₂₁Yo a dirago tša nnete yena o tla seetšeng gore mediro ya gagwe e bonwe e le ye e dirilwego ka go theeletša Modimo.”

₂₂Ka morago ga moo Jesu le barutiwa ba gagwe ba ya nageng ya Judea, moo a ilego a fihla a dula nabo lebakanyana a kolobetša. ₂₃Johanese le yena ke ge a kolobetša motseng wa Enone, kgauswi le Salime, ka ge felo moo go be go na le meetse a mantši. Batho ba be ba eya go yena gomme a ba kolobetša. ₂₄Ke pele ga ge a išwa kgolegong.

₂₅Barutiwa ba gagwe ba phegišana le Mojuda yo mongwe mabapi le taba ya go itlhwekiša. ₂₆Ka gona ba ya go Johanese, ba fihla ba re: “Moruti, monna yola a bego a na le wena ka mošola wa Jordane, yola o bego o bolela ka yena, le yena o a kolobetša gomme batho ka moka ba ya go yena!”

₂₇Johanese a ba fetola a re: “Gape ga go se motho a ka se dirago a se a laelwa ke Modimo. ₂₈Lena beng le ka ntlhatsela gore ke be ke bolela ke re: ‘Nna ga ke Mesia, ke dio ba ke romilwe go mo kgorela tsela.’ ₂₉Mong wa monyadiwa ke monyadi. Phelesi yena sa gagwe ke go ema a theeleditše ge monyadi a etla, gomme ge a ekwa lentšu la gagwe o thaba kudu. Ke ka mo le nna lethabo la ka bjale le phethagetšego ka gona. ₃₀Gape yena setumo sa gagwe se swanetše gore se gole, sa ka se fokotšege.”

₃₁Motšwagodimo ke wa maemo a go feta a bohle. Motšwalefaseng ke wa lefase gomme o bolela tša lefaseng, kganthe motšwalegodimong yena ke wa maemo a go feta a bohle. ₃₂O hlatsela tše a di bonego le tše a di kwelego, eupša bohlatse bja gagwe ga bo amogelwe ke motho. ₃₃Fela yo a amogelago bohlatse bja gagwe o tiiša gore Modimo ke yo a rerešago. ₃₄Yo a romilwego ke Modimo o bolela mantšu a Modimo, ka gobane Modimo o mo fa Moya wa gagwe ka botlalo. ₃₅TatagoMorwa o rata Morwagwe gomme o gafetše tšohle diatleng tša gagwe. ₃₆Yo a dumelago go Morwagwe o na le bophelo bjo bo sa felego; yo a hlomphollago Morwagwe yena a ka se be le bophelo, eupša o tla otlwa ke Modimo go ya go ile.