To The Word – Day 94

₁Bamoaba ba rometše mmuši wa Jerusalema seloba sa kwanyana ba le motseng wa Sela lešokeng. ₂Ba kgobokana maribeng a nokana ya Arnone, ba ya kua le kua boka dinonyana tše di rakilwego ka sehlageng sa tšona.

₃Ba re go batho ba Juda: “Re botšeng se re swanetšego go se dira. Re šireletšeng manabeng bjalo ka mohlare wa moriti wo mogolo mosegare wo monana. Re khutišeng, rena re šwalalanego; le se ke la re eka, rena batšhabi. ₄Re dumeleleng go dula nageng ya lena, re šireletšeng go babolai ba rena.”

Mogateledi ga a sa le gona, basenyi ba naga ba timeletše, ba tlogile nageng. ₅Yo mongwe wa ditlogolo tša Dafida e tla ba kgoši ka kgaugelo ya Morena, gomme mmušo wa gagwe wa tia. O tla nyaka toka, a fišegela gore e be gona.

₆Setšhaba sa Juda se re: “Re kwele ka boikgogomošo bja Bamoaba – ba ikgantšha kudu! Re kwele ka go kganya le go ipona ga bona, eupša tše ba ikgantšhago ka tšona ke maaka.”

₇Bamoaba ba tla itelela. Bohle ba tla lla ge ba gopola diphaphathi tšela tša makwapi a diterebe tša motse wa Kire-Herese. Ka nnete ba tla welwa ke manyami. ₈Mehlare ya dikenywa dirapeng tša Heshbone le merara ya Sibma e ponne; le beine ya gona ya go tuma e ušitše babuši ba ditšhaba. Merara yeo e be e fihla Jasere, mahlogedi a yona a nabela bohlabela lešokeng, a iketlile a tshela Lewatle le le Hwilego ka bodikela. ₉Bjale ke llela merara ya Sibma go swana le ge ke llela Jasere. Ke tšhela lena Heshbone le Elale ka megokgo, ka gobane ga le sa na le puno ye e thabišago ba go pitla diterebe ka maoto. ₁₀Lethabo le megobo di fedile mašemong ale a go nona; mašata le mekgolokwane ga di sa kwala dirapeng tša merara, bopitlelong ga go yo a pitlago diterebe ka maoto; Morena o fedišitše mekgolokwane ya bona. ₁₁Ka gona ke llela Moaba le batho ba Kire-Herese go swana le motho ge a letša sefela sa poloko ka sekgapa. ₁₂Bamoaba ba itapiša ka go ya dintotomeng le ka ditempeleng tša bona moo ba khunamelago medimo ya diswantšho, eupša seo se ka se ba hole selo.

₁₃Ao ke mantšu a Morena a a boletšego pele mabapi le Moaba. ₁₄Gomme bjale Morena o re: “Mo mengwageng ye meraro fela bogolo bja Moaba bo tla be bo nyatšega. Le ge bjale batho ba gona e le ba bantši, mašaledi a ka se be a makae, gomme le ona a ka se be le maatla.”

₁Morena o re: “Damaskose e ka se sa ba motse; e tla fetoga marope. ₂Metse ya Siria e tla tlogelelwa sa ruri. E tla ba phulo ya mehlape ya diruiwa, gomme ga go yo a tlago e raka. ₃Israele e tla hloka boitšhireletšo, Damaskose le yona e ka se sa ipuša. Mašaledi a Basiria a tla goboga boka setšhaba sa Israele.” O realo, Morena Ramaatlaohle.

₄Morena o re: “Mehleng yeo bogolo bja Israele bo tla fokola, gomme bodiidi bja ema bohumi legato. ₅Israele e tla swana le tšhemo ye mabele a yona a thennwego, ya ba bjalo ka ge diako di bududitšwe molaleng wa Barafa. ₆Mašaledi a setšhaba a ka se be nene – Israele e tla etša mohlware wo o hlothilwego dikenywa ka moka, gwa šala tše pedi goba tše tharo makaleng a ka godimodimo, goba tše e sego tše kae makaleng a gare. Ke realo, nna, Morena Modimo wa Israele.”

₇Matšatšing ao batho ba tla lebelela Mmopi wa bona ba nyaka thušo, ba tla emišetša mahlo go Mokgethwa wa Israele. ₈Ba ka se sa ikanya dialetare tše ba di agilego ka diatla, goba ba bota mediro ya diatla tša bona, e lego dikota tša borapedi, le dialetare tša go tšhumela diorelo.

₉Mehleng yeo metse ya bona ye e ageleditšwego ka merako e tla tlogelwa ya ba marope bjalo ka metse yela Bahibe le Baamore ba go e tlogela ge ba tšhaba setšhaba sa Israele.

₁₀Lena Baisraele le lebetše Modimo yo a le hlakodišitšego; yo a le šireleditšego bjalo ka leswika, ga se la ka la mo gopola. Ka gona le itemetše dirapa tša modimo o šele, la bjala le dibjalo gore le tle le o khunamele ka moo. ₁₁Fela le ge dibjalo tšeo di be di ka mela tša gola le wona mosong wo di bjetšwego ka wona, le be le tla no se bune selo. Go tla ba fela le matshwenyego le mahloko a go se fele.

₁₂Joo, ditšhabatšhaba di tsošitše modumo, modumo wo nkego ke wa lewatle; merafe e dira mogwaša, mogwaša wa maphoto a lewatle. ₁₃Ditšhaba di tla bjalo ka maphoto a a pšhatlaganago, eupša Modimo o a di kgalemela tša tšhabela kgole, tša tšewa ke phefo bjalo ka mooko ge motho a fola mabele mmotong, goba matlakala ge a tšewa ke ledimo. ₁₄Mantšiboa di a tšhoša, pele tšatši le hlaba ga di sa le gona. Ke tšona tše di tlago hlagela bao ba re hlakolago, ba re hulago.

₁E lahlegile naga ya go phuphusela diphego ya ka mošola wa dinoka tša Etopia. ₂Nageng yeo go tšwa batseta ka magopo a mahlaka, ba sepela ka noka ye kgolo ya Naele. Boelang ga gabolena, lena batseta ba lebelo! Gomelang nageng ya lena ye e arotšwego ke dinoka, setšhabeng sa lena se se tiilego sa diganka, bathong ba gabolena ba batelele ba letlalo le boreledi, setšhabeng se se boifšago kgole le kgauswi.

₃Theeletšang, lena batho bohle ba lefase! Lena ba le agilego lefaseng! Mohla sefoka se hlomilwe godimo ga dithaba le se lebelele, le theeletšeng ge phalafala e lla. ₄Gobane Morena o rile go nna: “Ke tla lebelela fase ke le legodimong, ke homotše boka phoka ge e ewa mašegong a a tutetšego a sehla sa go buna; ke iketlile boka letšatši le le hlabilego mme le ruthetše. ₅Pele ga ge go fulwa diterebe ge matšoba ohle a hlohloregile, gomme diterebe di butšwa, manaba a tla fediša Baetopia gabonolo bjalo ka ge motho a kgotha morara ka mphaka. ₆Ditopo tša bona di tla gafelwa manong le dibata. Manong a tla di ja selemo, dibata tša di ja marega.”

₇Nako e etla yeo ka yona setšhaba se se tiilego sa diganka, sa batho ba batelele ba letlalo le boreledi, se se boifšago kgole le kgauswi, se se dulago mo nageng ye ya go arolwa ke dinoka, se tlago loba Morena Ramaatlaohle. Ba tla tla thabeng ya Sione moo Morena Ramaatlaohle a khunamelwago gona.

₁Molaetša wa Morena mabapi le Egepeta šo: Morena o tla Egepeta a nametše leru la lebelo. Medimo ya diswantšho ya Egepeta e a tekateka ge a fihla, gomme batho ba Egepeta ba nolega moko. ₂Morena o re: “Ke tla lweša Moegepeta le Moegepeta, motho le ngwanabo, motho le mongkayena. Motse o tla lwa le wo mongwe, mmušo wa lwa le mmušo. ₃Ke tla gakantšha Baegepeta mererong ya bona, gomme ba nolega moko. Ba tla kgopela medimo ya bona ya diswantšho, le ba malopo, le dinoge, le didupe gore ba ba eletše. ₄Baegepeta ke tla ba gafela go mmuši wa sehlogo, kgoši ye šoro, gore e ba buše. Ke realo, nna, Morena Ramaatlaohle.”

₅Meetse a Naele a tla thoma go gopa go fihlela e pšhetše sa ruri. ₆Mekero ya yona e tla nkga ge e gopa e epšha. Mahlakanoka le mehlahla di tla pona; dimela tša molomong wa Naele ₇le dibjalo tša ka mathoko a noka yeo di tla omelela tša tšewa ke phefo. ₈Bathei ba dihlapi ba tla lla – bohle ba ba phelago ka go tanya dihlapi ba tla ilela, ba ba tlwaetšego go lahlela malokwa ka meetseng ba tla bolawa ke tlala. ₉Baohli ba tlhale ba tla lewa ke dihlong, le balogi ba gakanega, ₁₀ba kwa bohloko; ba ba thwetšwego ba tla nyama.

₁₁Ruri, baetapele ba motse wa Tsoane ke mašilo! Bahlale ba bagolo ba kgoši ya Egepeta ba mo eletša tša botlaela. A bjale le ka botša kgoši bjang gore bona ke ditlogolo tša banna ba bohlale le tša magoši a bogologolo? ₁₂Wena kgoši ya Egepeta, dihlalefi tšela tša gago di kae? A di go botše se Morena Ramaatlaohle a ikemišeditšego go se dira naga ya Egepeta. ₁₃Baetapele ba Tsoane ke ditlatla, ba Memfise ba tšwile tseleng. Dihlogo tšeo tša Baegepeta di arošitše setšhaba. ₁₄Morena o dirile gore dikeletšo tša bona di gakantšhe kgoši. Ka gona Egepeta e dira tše di phošagetšego fela; e thedimoga bjalo ka setagwa ge se thedimoga mahlatšeng a sona. ₁₅Ga go le o tee Egepeta, mohumi goba modiidi, mohlomphegi goba monyatšegi, yo a kago thuša naga yeo.

₁₆Nako e etla yeo ka yona Baegepeta ba tlago boifa bjalo ka basadi; ba thothomela ba tšhogile ge ba bona Morena Ramaatlaohle a ba rethela matswele. ₁₇Juda e tla ba setšhoša go Egepeta; nako le nako ge Baegepeta ba gopotšwa Juda ba tla thothomela ka lebaka la se Morena Ramaatlaohle a ikemišeditšego go ba dira sona.

₁₈Mohla nako yeo e fihla, leleme la Seheberu le tla bolelwa metseng ye mehlano Egepeta. Batho ba fao ba tla ena ka leina la Morena Ramaatlaohle. Wo mongwe wa metse yeo o tla bitšwa “Motse wa Letšatši”.

₁₉Ge nako yeo e fihla go tla ba le aletare ya Morena nageng ya Egepeta, le kokwane ya leswika ye e abetšwego yena mollwaneng wa naga yeo. ₂₀E tla ba tšona dišupo tša go ba gona ga Morena Ramaatlaohle Egepeta. Ge batho ba fao ba gateletšwe gomme ba llela Morena gore a ba thuše, o tla ba romela mohlakodiši yo a tlago ba lwela a ba phološa. ₂₁Morena o tla ikutolla setšhabeng sa Egepeta, gomme ke gona ba tlago mo tseba ba mo loba ka go mo tlišetša dihlabelo le dikabelo tša bupi. Ba tla mo enela gomme ba phetha dikeno tšeo. ₂₂Morena o tla otla Baegepeta ka bolwetši, mme ka morago ga moo, ge ba sokologela go yena ba mo rapela, a ba kwa, a ba fodiša.

₂₃Ge nako yeo e fihla go tla ba le tsela ye kgolo ye e tlogago Egepeta e eya Asiria. Batho ba dinaga tšeo ba tla etelana, gomme ditšhaba tšeo tše pedi tša rapela mmogo. ₂₄Ka nako yeo Israele e tla gwerana le Egepeta le Asiria, mme kgwerano yeo ya ba lehlogonolo la lefase ka moka. ₂₅Morena Ramaatlaohle o tla šegofatša ditšhaba tša dinaga tšeo a re: “Ke a go šegofatša, wena Egepeta, setšhaba sa ka, wena Asiria, setšhaba se ke se hlodilego, le wena Israele, setšhaba sa ka se ke se kgethilego.”

₁Molaodi wa madira a Asiria o ile a hlasela motse wa Bafilista wa Ashdode, a laetšwe ke Sargone, kgoši ya Asiria, gomme a o fenya. ₂Mengwageng ye meraro pele ga moo Morena o be a laetše Jesaya, morwa wa Amotse, gore a role dieta, a apole le seaparo sa go ilela se a bego a se apara. Yena a dira bjalo, gomme a sepela a hlobotše a sa rwale le dieta. ₃Ya re ge Ashdode e thopilwe, Morena a re: “E šetše e le mengwaga ye meraro mohlanka wa ka, Jesaya, a sepela a se a rwala dieta. Se ke sešupo sa tše di tlago hlagela Egepeta le Etopia. ₄Kgoši ya Asiria e tla gapa mathopša a dinaga tšeo e a hlobodišitše. Ba bagolo le ba bannyane ba tla sepela ba hlobotše, ba se ba rwala le dieta, le marago a bona a le kgakala, gomme ba goboša Egepeta. ₅Bao ba bego ba botile Etopia ba bile ba ikgantšha ka Egepeta ba tla gakanega, ba lewa ke dihlong. ₆Ge nako yeo e fihla batho ba ba dulago lebopong la Filistia ba tla re: ‘Bonang se se hlagetšego batho bale re bego re botile gore ba tla re šireletša go kgoši ya Asiria! A bjale rena re ka phologa bjang?’ ”