Mpherefere wa Sheba
1Moo Gilgale go be go na le monna yo mongwe yo mobe yo leina la gagwe e bego e le Sheba, morwa wa Bikri, wa kgoro ya Benjamene. O ile a letša phalafala, a goelela a re: “Ga re iše felo ka Dafida! Ga ra hlakanela selo le morwanyana yoo wa Isai! Banna ba Israele, a re ikeleng gae!”
2Ka gona banna ba Israele ba tlogela Dafida ba sepela le Sheba, eupša banna ba Juda bona ba fela ba botegela Dafida mme ba mo latela go tloga Jordane go yo fihla Jerusalema.
3Ge Dafida a fihla mošate ga gagwe kua Jerusalema, a tšea metlabo yela ye lesome ye a ilego a e tlogela gore e hlokomele mošate, gomme a e bea ka ngwakong wo o letilwego. A fela a ba hlokomela ka tše ba di nyakago, eupša a se ke a robala nabo. Ba ile ba dula thokwana bophelo bja bona ka moka, ba phela bjalo ka bahlologadi.
4Kgoši a re go Amasa: “Kgobokanya banna ba Juda mme o tle nabo mo go hlwa bosasa.” 5Amasa a yo ba bitša, eupša a se ke a boa ka nako yela kgoši a e beilego. 6Ka gona kgoši a re go Abishai: “Sheba o tla re swariša bothata bja go feta bjo Absalomo a bego a re swarišitše bjona. Tloga le banna ba ka o mo hlomare gore a se tsene metseng ye e ageleditšwego ka merako mme ya ba gona ge a re timeletše.” 7Ka gona banna ba Joaba le baleti ba kgoši le bahlabani ba bangwe ka moka ba tloga Jerusalema gore ba hlomare Sheba. 8Ge ba fihla lerakong le legolo kua Gibeone ba gahlana le Amasa. Joaba o be a apere tša ntwa le tšhoša e le ka segatleng sa yona se se tlemeletšwego lepanteng la gagwe. Ge a batamela Amasa tšhoša yela ya wa. 9Joaba a re go Amasa: “Go bjang, mogwerake?” Gomme a mo swara ka maledu ka seatla sa la go ja gore a mo atle. 10Amasa o be a se a gopola go phema tšhoša ye Joaba a bego a e swere ka seatla se sengwe, gomme Joaba a mo tsetsemetša dimpa ka yona, dikateng tša gagwe tša kgothogela fase. A hwa ka pelapela, mo e lego gore Joaba o ile a se ke a mmoeletša.
Ke moo Joaba le Abishai, morwarragwe, ba tšwetšego pele ba hlomara Sheba. 11Yo mongwe wa banna ba Joaba a ema kgauswi le setopo sa Amasa, a goelela a re: “Yo mongwe le yo mongwe yo a emego le Joaba le Dafida a a latele Joaba!” 12Setopo sa Amasa seo se bego se ripitla mading se be se rapaletše gare ga tsela. Monna yo mongwe wa Joaba a bona gore yo mongwe le yo mongwe o ema fao, ka gona a goga setopo seo moo tseleng a se iša ka thoko gomme a se pipa ka kobo. 13Ka morago ga ge setopo seo se tlošitšwe moo tseleng, yo mongwe le yo mongwe a latela Joaba go hlomara Sheba.
14Sheba o ile a putla dinaga tša dikgoro ka moka tša Israele gomme a fihla motseng wa Abele-Bethe-Maaka; batho ka moka ba kgorwana ya Bikri ba kgobokana mme ba mo šala morago ba tsena motseng. 15Banna ba Joaba ba fihla ba dikanetša motse woo. Ba kgobela dintotoma tša mobu go ipata le morako wa motse, ba ba ba thoma go epa morako woo go o uša. 16Go be go na le mosadi yo bohlale ka moo motseng yo a ilego a goa a le godimo ga morako a re: “Theetšang! Theetšang! Botšang Joaba a tle mo; ke nyaka go bolela le yena.” 17Joaba a batamela, gomme mosadi a mmotšiša a re: “A ke wena Joaba?”
Yena a mo fetola a re: “Ee, ke nnaena.”
Mosadi a re: “Theetša se nna, mohlanka wa gago, ke se bolelago.”
Joaba a mo fetola a re: “Ke theeditše.”
18Mosadi a re: “Kgale batho ba be ba tlwaetše go re: ‘Sepelang le yo kgopela maele motseng wa Abele’; e be e le ka mo ba hwetšago tharollo. 19Wo wa rena ke motse wo mogolo, ke wo mongwe wa metse ya khutšo le potego go fetišiša mo Israele. Ke ka lebaka lang o leka go o fediša? A o nyaka go pšhatla se e lego sa Morena?”
20Joaba a mo fetola a re: “Le gatee! Le gatee nka se ke ka pšhatlaganya motse wa lena ka o fediša! 21Ga go bjalo. Monna yo leina la gagwe e lego Sheba, morwa wa Bikri, yo a tšwago nageng ya dithaba ya Efraime, o tsošeditše Kgoši Dafida mpherefere. Re neeleng monna yoo a nnoši, gomme ke tla tloga mo motseng wo.”
Mosadi a re: “Re tla go lahlela hlogo ya gagwe ka morako.” 22Ke moo a ilego go batho ba motse ka leano leo la gagwe, gomme ba ripa Sheba hlogo ba e lahlela Joaba ka kua ga morako. Joaba a letša phalafala e le sešupo sa gore banna ba gagwe ba tlogele motse woo. Gomme a boela Jerusalema go kgoši.
Bahlankedi ba Dafida
23Joaba o be a laola madira a Israele; Benaya, morwa wa Joyada, o be a hlokometše baleti ba Dafida; 24Adoniramo o be a laola mediro ya kgapeletšo; Joshafate, morwa wa Ahilude, e be e le mongwaledi wa mmušo; 25Sheba e be e le mongwaledi wa kgoši; Tsadoko le Abiatare e be e le baprista, 26mme Ira wa motse wa Jaire le yena e le moprista wa Dafida.
