To The Word – Day 80

₁Gapegape Dafida a kgobokanya bahlabani ba ba kgethilwego mo Israele, ya ba banna ba dikete tše masome a mararo. ₂A ba eta pele ba ya Baala kua Juda go yo tšea Polokelo ya Kgwerano ya Modimo moo, ye e bego e abetšwe Morena Ramaatlaohle, yoo setulo sa gagwe sa bogoši se lego ka godimo ga bakerubi. ₃Ba ile ba e tšea lapeng la Abinadaba mmotong, gomme ba e bea ka koloing ye mpsha. Usa le Agio, barwa ba Abinadaba, ba be ba hlahla koloi, ₄Agio a e etile pele. ₅Dafida le Baisraele ka moka ba be ba bina ba opela ka mafolofolo go godiša Morena. Ba be ba letša diletšo tša dikgapa, diharepa, meropa, ditlhawatlhwadi le masenkana.

₆Ge ba fihla seboeng sa Nakone, dipholo tša thetšwa, gomme Usa a iša letsogo a swareletša Polokelo ya Kgwerano ya Modimo. ₇Gatee fela Morena Modimo a galefela Usa gomme a mmolaela go se hlomphe moo ga gagwe. Usa a hwela moo ka thoko ga Polokelo ya Kgwerano, ₈gomme felo fao gwa bitšwa Peretse-Usa go tloga mohlang woo. Dafida a ferekana ka gobane Morena a otlile Usa a galefile.

₉A boifa Morena mme a re: “A bjale Polokelo ya Kgwerano e tla tla go nna bjang?” ₁₀Ka gona a se hlwe a nyaka go e iša ga gagwe Jerusalema, eupša a e aroša tsela mme a e iša lapeng la Obede-Edomo, motho wa motse wa Gathe. ₁₁E ile ya dula moo dikgwedi tše tharo, gomme Morena a šegofatša Obede-Edomo le lapa la gagwe.

₁₂Kgoši Dafida a kwa gore ka lebaka la Polokelo ya Kgwerano, Morena o šegofaditše lapa la Obede-Edomo le tšohle tše e lego tša gagwe; ka gona a e tšea lapeng la Obede-Edomo a e iša Jerusalema ka lethabo le legolo. ₁₃Ka morago ga ge banna ba ba bego ba rwele Polokelo ya Kgwerano ba sepetše magato a a selelago, Dafida a ba emiša ge a sa direla Morena sehlabelo ka poo le namane ye e nonnego. ₁₄A bina ka mafolofolo go godiša Morena, a tšwere fela seaparo se sekgethwa lethekeng. ₁₅Gomme yena le Baisraele ka moka ba iša Polokelo ya Kgwerano Jerusalema ka megobo ya lethabo le mollo wa diphalafala.

₁₆Ge Polokelo e gorošwa motseng, Migale, morwedi wa Saulo, a lebelela ka lefasetere gomme a bona Kgoši Dafida a tšama a taboga a bina go hlompha Morena, mme a mo nyatša kudu. ₁₇Ba tsenya Polokelo, ba e bea madulong a yona ka tenteng yeo Dafida a e hlometšego yona. Ke moka a direla Morena dihlabelo tša go tšhungwa ka moka le dihlabelo tša kagišano. ₁₈Ge a feditše go dira dihlabelo tšeo, a šegofatša setšhaba ka leina la Morena Ramaatlaohle, ₁₉gomme a ba fa dijo ka moka ga bona. A fa monna le mosadi yo mongwe le yo mongwe mo Israele senkgwa, le nama ya go bešwa, le phaphathi ya makwapi a diterebe. Ke moka yo mongwe le yo mongwe a boela gae.

₂₀Ka morago ga moo, ge Dafida a eya gae go yo šegofatša ba lapa la gagwe, Migale a tšwa go tlo mo gahlanetša. A re: “Kgoši ya Israele lehono o itiretše leina le legolo! O itlhobotše a se ne dihlong bjalo ka setlaela mahlong a basetsana ba makgoba ba bahlankedi ba gagwe!”

₂₁Dafida a mo fetola a re: “Ke be ke bina go tumiša Morena yo a nkgethilego a mpea moetapele wa setšhaba sa gagwe sa Israele bakeng sa tatago le lapa la gagwe. Gomme ke tla fela ke bina go godiša Morena, ₂₂ka ikgoboša le go feta mo, ka ipona ke se selo, eupša basetsana bale o ba bolelago bona ba tla ntšeela godimo!”

₂₃Migale, morwedi wa Saulo, a se ke a ba le ngwana go fihlela a ehwa.

₁Kgoši Dafida o be a dutše gabotse mošate, gomme Morena a dira gore manaba a gagwe ka moka a se ke a hlwa a mo tshwenya.

₂Ke moo kgoši a itšego go moprofeta Nathane: “Nnaena šefa ke dutše ka ngwakong wo o agilwego ka dikota tša mosedere, eupša Polokelo ya Kgwerano ya Modimo yona e beilwe ka tenteng!”

₃Nathane a mo fetola a re: “Dira se o se gopotšego, ka gobane Morena o na le wena.”

₄Eupša bošegong bjoo Morena a re go Nathane: ₅“Sepela o yo botša Dafida, mohlanka wa ka, gore ke re go yena: ‘Ga se wena o tlago nkagela tempele ye ke tlago dula ka go yona. ₆Go tloga ka nako yela ka go ntšha setšhaba sa Israele Egepeta go fihlela bjale, ga se ka ka ka dula ka tempeleng; ke raletše mo gohle ke le ka tenteng. ₇Mesepelong ya ka ka moka le setšhaba sa Israele ga se ka ka ka botšiša yo mongwe wa baetapele ba ke bego ke ba bea badiši ba setšhaba sa ka gore ke ka lebaka lang ba sa nkagele tempele ka dikota tša mosedere.’

₈“Ka gona botša Dafida, mohlanka wa ka, gore nna, Morena Ramaatlaohle, ke re go yena: ‘Ke go tšere o diša dinku madišong ka go bea mmuši wa setšhaba sa ka sa Israele. ₉Ke bile nago mo gongwe le mo gongwe mo o ilego wa ya gona, mme ke fentše manaba a gago ka moka ge o a hlasela. Ke tla go dira gore o tume bjalo ka baetapele ba bagolo mo lefaseng. _10-11Ke kgethetše setšhaba sa ka sa Israele naga gomme ka se tsema go yona, moo se kago dula ntle le go hlwa se tšhošetšwa. E sa le go tloga mola ba tsenago mo nageng ye mehleng yela ya baahlodi ba gatelelwa ke batho ba babe, eupša seo se ka se hlwe se direga. Ke go holofetša gore ke tla dira gore manaba a gago ka moka a se sa go tshwenya, mme ka go fa ditlogolo. ₁₂Ge o hlokafetše mme o bolokilwe le borakgolokhukhu ba gago, ke tla bea yo mongwe wa barwa ba gago kgoši mme ka tiiša mmušo wa gagwe. ₁₃Ke yena yo a tlago nkagela tempele, gomme ke tla hloma bogoši bja lešika la gagwe ka bo dira gore e be bja neng le neng. ₁₄Ke tla ba tatagwe, mme yena ya ba morwa wa ka. Ge a phoša ke tla mo otla bjalo ka tatagongwana ge a otla ngwana wa gagwe; ke tla šomiša batho go mo otla. ₁₅Eupša nka se lese go mmotegela bjalo ka ge ke ile ka lesa go botegela Saulo, yoo ke mo tlošitšego gore wena o tle o be kgoši. ₁₆O tla fela o na le ditlogolo, gomme ke tla dira gore mmušo wa gago e be wa neng le neng. Bogoši bjeno bo ka se tsoge bo fedile.’ ”

₁₇Nathane o ile a botša Dafida tšohle tše Modimo a mo utolletšego tšona.

₁₈Ke moka Kgoši Dafida a tsena ka Tenteng ya bodulo bja Morena, a dula fase mme a rapela a re: “Ga ke a swanela tše o šetšego o ntiretše tšona, Morena, Mong wa ka, le lona lapa la ka ga le a di swanela. ₁₉Le ge go le bjalo, tšeo ga se ya ba selo mahlong a gago, Morena, Mong wa ka; o tšwetše pele o bolela tše botse tša mehleng ye e tlago mabapi le ditlogolo tša ka, nna, mohlanka wa gago. Tšeo ke taba tše kgolo bjang go ka di holofetša motho, Morena, Mong wa ka! ₂₀Go feta moo a nka go botša eng? O a ntseba, nna, mohlanka wa gago. ₂₁O dirile dilo tše kgolo tše ka gobane o be o nkholofeditše tšona, le ka gore o be o rata gore o nthute. ₂₂Ka gona o yo mogolo bjang, Morena Yogodimodimo! Ga go yo a swanago le wena; go ya ka tšohle tše re di kwelego re a tseba gore ke wena o nnoši o lego Modimo. ₂₃Ga go setšhaba se sengwe lefaseng se se swanago le sa Israele, se o se phološitšego bokgobeng go tlo se dira setšhaba sa gago. Dilo tše kgolo tše di tšhošago tše o ba diretšego tšona di go tumišitše. O lelekile ditšhaba tše dingwe le medimo ya tšona ge setšhaba sa gago se goroga, setšhaba se o se lokolotšego Egepeta gore e be sa gago. ₂₄O dirile Baisraele setšhaba sa gago go ya go ile, gomme wena, Morena, wa ba Modimo wa bona.

₂₅“Bjale, Morena Modimo, phethagaletša sa ruri tše o di boletšego mabapi le nna, mohlanka wa gago, le ditlogolo tša ka, gomme o dire se o boletšego gore o tla se dira. ₂₆O tla tuma, gomme batho ka mehla ba tla re: ‘Morena Ramaatlaohle ke Modimo wa Israele.’ Gomme o tla boloka mmušo wa ka ka dinako ka moka. ₂₇Morena Ramaatlaohle, Modimo wa Israele, ke na le sebete sa go go rapela ka thapelo ye ka gobane o nkutolletše taba tše ka moka, nna, mohlanka wa gago, gomme o mpoditše gore o tla dira ditlogolo tša ka dikgoši.

₂₈“Bjale ge, Morena, Mong wa ka, ke wena Modimo; ka mehla o phetha dikholofetšo tša gago, gomme o nkholofeditše taba ye e makatšago ye. ₂₉Ke go kgopela gore o šegofatše ditlogolo tša ka gore di fele di ipshina ka botho bja gago. Wena, Morena, Mong wa ka, o rile o tla di šegofatša, gomme tšhegofatšo ya gago e tla ba go tšona go ya go ile.”

₁Ka morago ga lebaka Kgoši Dafida a hlasela Bafilista gape, a ba fenya, gomme a fediša mmušo wa bona nageng.

₂Ke moka a hlasela Bamoaba. A laela gore mathopša a patlame fase, gomme sehlopheng se sengwe le se sengwe sa ba bararo a bolaya ba babedi. Ka gona Bamoaba ya ba batho ba gagwe, gomme ba lefa metšhelo go yena.

₃A fenya le kgoši ya naga ya Tsoba, Hadade-Esere, morwa wa Rehobo, ge Hadade-Esere a sa le tseleng ya go yo tsošološa mmušo wa gagwe kua nokeng ya Yufratese. ₄Dafida a thopa bahlabani ba gagwe ba sekete le makgolo a a šupago ba go namela dipere, le ba dikete tše masome a mabedi ba maoto. A ripa dipere ka moka tša dikoloi tša ntwa mešifa, ge e se tše lekgolo.

₅Ge Baaramo ba Damaskose ba romela madira go tlo thuša kgoši Hadade-Esere, Dafida a ba hlasela, gomme a bolaya banna ba dikete tše masome a mabedi le tše pedi. ₆A hloma mešaša ya bahlabani moo nageng ya bona, gomme bona ya ba batho ba gagwe, ba lefa metšhelo go yena. Morena a dira gore Dafida a fenye mo gongwe le mo gongwe mo a lwago gona. ₇Dafida a thopa dikotse tša gauta tše di bego di swerwe ke bahlankedi ba Hadade-Esere, gomme a di iša Jerusalema. ₈A tšea le mphiri wo montšintši kua Tebage le Berothai, metse ye e bego e bušwa ke Hadade-Esere.

₉Kgoši Toi wa Hamate a kwa gore Dafida o fentše madira a Hadade-Esere ka moka. ₁₀Ka gona a roma morwa wa gagwe, Joramo, go yo dumediša Kgoši Dafida le go mo lebogiša ka ge a fentše Hadade-Esere yo Toi a lwelego naye gantši. Joramo a išetša Dafida dimpho tše di dirilwego ka gauta, silibera le mphiri. ₁₁Kgoši Dafida a di abela Morena, gotee le silibera le gauta ye a e tšerego ditšhabeng tše a di fentšego – ₁₂Baedomo, Bamoaba, Baamone, Bafilista le Baamaleke – gammogo le seripa sa thoto ye a e tšerego go Hadade-Esere.

₁₃Dafida a fela a tuma go iša pele ge a tšo bolaya Baedomo ba dikete tše lesome le tše seswai Moeding wa Letswai. ₁₄A hloma mešaša ya bahlabani nageng ya Edomo ka moka, gomme batho ba gona ya ba ba gagwe. Morena a dira gore Dafida a fenye mo gongwe le mo gongwe mo a lwago gona.

₁₅Dafida o bušitše Israele ka moka gomme a hlokomela gore setšhaba sa gagwe ka mehla se swarwe ka tshwanelo le ka toka. ₁₆Joaba, yo mmagwe e bego e le Tseruya, e be e le molaodi wa madira; Joshafate, morwa wa Ahilude, e le mongwaledi wa mmušo; ₁₇Tsadoko, morwa wa Ahitube, le Ahimeleke, morwa wa Abiatare, e be e le baprista; Seraya e be e le mongwaledi wa kgoši; ₁₈Benaya, morwa wa Joyada, e be e le mohlokomedi wa baleti ba Dafida, gomme barwa ba Dafida e le baprista.

₁Ka letšatši le lengwe Dafida o ile a botšiša a re: “A go sa na le yo mongwe yo a šetšego wa lapa la Saulo? Ge eba o gona, ke nyaka go mo dira ka botho ka lebaka la Jonathane.”

₂Go be go na le mošomedi wa lapa la Saulo yo leina la gagwe e bego e le Tsiba, gomme yena a botšwa gore a ye go Dafida. Kgoši a mmotšiša a re: “A ke wena Tsiba?”

Tsiba a mo fetola a re: “Ee, mong wa ka.”

₃Kgoši a mmotšiša a re: “A go sa na le yo mongwe yo a šetšego wa lapa la Saulo yo nka mo dirago ka botho, bjalo ka ge ke tshephišitše Modimo?”

Tsiba a mo fetola a re: “Go sa na le morwa wa Jonathane. O golofetše maoto.”

₄Kgoši a mmotšiša a re: “A o kae?”

Tsiba a mo fetola a re: “O lapeng la Makire, morwa wa Amiele, kua Lo-Dabare.” ₅Ka gona Kgoši Dafida a roma batseta gore ba yo mo tšea.

₆Ge Mefiboshete, morwa wa Jonathane, yena setlogolo sa Saulo, a fihla, o ile a obama, a itahlela fase ka sefahlego. Dafida a re go yena: “Mefiboshete!” Yena a araba a re: “Ke nna yo, mohlanka wa gago.”

₇Dafida a re go yena: “O se ke wa boifa. Ke tla ba yo botho go wena ka lebaka la Jonathane, tatago. Ke tla go bušetša naga ka moka ye e bego e le ya rakgolwago, Saulo, gomme ka mehla re tla jela mogopong o tee.”

₈Mefiboshete a obama gape a re: “Nna, mohlanka wa gago, ke lefeelafeela, ke no ba mpša ye e hwilego! Ke go reng o le yo botho go nna ka mokgwa wo?”

₉Kgoši a bitša Tsiba, mohlanka wa Saulo, a re go yena: “Ke fa Mefiboshete, setlogolo sa mong wa gago, se sengwe le se sengwe se e bego e le sa Saulo le lapa la gagwe. ₁₀Wena le barwa ba gago le bahlanka ba gago le mo lemele mašemo a e bego e le a lapa la mong wa gago, Saulo, gomme le gorošeng puno gore ba lapa la gagwe ba tle ba be le dijo. Eupša Mefiboshete yena ka mehla o tla jela mogopong o tee le nna.”

Tsiba o be a na le barwa ba lesome le ba bahlano le bahlanka ba masome a mabedi.

₁₁Tsiba a mo fetola a re: “Ke tla dira tšohle tše kgoši a ntaelago tšona.”

Ka gona Mefiboshete a ja le kgoši mo nkego le yena ke morwa wa kgoši. ₁₂O be a na le ngwana wa mošemane yo leina la gagwe e bego e le Mika. Batho ka moka ba lapa la Tsiba ya ba bahlanka ba Mefiboshete. ₁₃Ka gona Mefiboshete, yo a bego a golofetše maoto, a dula Jerusalema, gomme a ja le kgoši ka mehla.

₁Ka morago ga lebaka Kgoši Nahashe wa Amone a hwa, gomme morwa wa gagwe, Hanune, ya ba kgoši. ₂Kgoši Dafida a re: “Ke nyaka go kwana le Hanune bjalo ka ge Nahashe, tatagwe, a be a kwana le nna.” Ka gona Dafida a roma batseta gore ba ye maemong.

Ge ba fihla Amone, ₃baetapele ba Baamone ba re go kgoši: “A o gopola gore ke gona go hlompha tatago ge Dafida a romile batho ba go tlo go lliša? Aowaowaa! O ba romile mo go tlo hlola motse le go o lekola gore a tle a o pšhatle!”

₄Hanune a swara batseta ba Dafida, a ba boola maledu ka thoko, a ripa diaparo tša bona mathekeng, mme a ba šupa tsela. ₅Ba ile ba lewa ke dihlong kudu go ka boela gae. Ge Dafida a ekwa seo se diregilego, a laela batseta gore ba ba botše gore ba dule Jeriko gomme ba se ke ba boa go fihlela maledu a bona a hlogile gape.

₆Baamone ba lemoga gore ba rumotše Dafida, ka gona ba thwala bahlabani ba go sepela ka maoto ba Basiria ba dikete tše masome a mabedi ba Bethe-Rehobo le Tsoba, le banna ba dikete tše lesome le tše pedi ba Tobe, le kgoši ya Maaka le banna ba gagwe ba sekete. ₇Dafida a kwa taba yeo gomme a romela Joaba go yo lwa le bona ka madira, e le bahlabani ba bogale ka moka. ₈Baamone ba tšwa motseng wa bona gomme ba ipeakanya kgorong. Ba bangwe bona, e lego Basiria le banna ba Tobe le ba Maaka, ba ema thoko ye nngwe kua nageng.

₉Joaba a bona gore madira a manaba a tlile go mo hlasela ka pele le ka morago, ka gona a kgetha bahlabani ba bogalegale ba Baisraele, a ba emiša go lebana le Basiria. ₁₀Madira a a šetšego a a nea Abishai, morwarragwe, gore a a laole, gomme Abishai a a emiša go lebana le Baamone. ₁₁Joaba a re go yena: “Ge o bona gore Basiria ba a mphenya, o tle o nthuše, gomme ge Baamone ba go fenya, ke tla tla ka go thuša. ₁₂O tie gomme re lwele setšhaba sa gaborena le metse ya Modimo wa rena ka bogale. Gomme a Morena a dire se a se nyakago!”

₁₃Joaba le banna ba gagwe ba batamela gore ba hlasele, gomme Basiria ba hlanola direthe. ₁₄Ge Baamone ba bona Basiria ba tšhaba, le bona ba tšhaba Abishai mme ba boela motseng. Joaba a tlogela Baamone a gomela Jerusalema.

₁₅Basiria ba lemoga gore ba fentšwe ke Baisraele, ka gona ba bokanya madira a bona. ₁₆Kgoši Hadade-Esere a laela gore Basiria ba ba bego ba le ka bohlabela bja noka ya Yufratese ba bitšwe, gomme ba fihla Helamo ba laolwa ke Shobake, molaodi wa madira a Kgoši Hadade-Esere. ₁₇Ge Dafida a ekwa taba yeo, a bokanya madira ka moka a Baisraele, a tshela noka ya Jordane gomme a ya Helamo, moo Basiria ba bego ba ipeakantše ba lebane le yena. Ntwa ya thoma, ₁₈gomme Basiria ba tšhaba Baisraele. Dafida le banna ba gagwe ba bolaya basepediši ba dikoloi tša ntwa tša Basiria ba makgolo a a šupago, le banamedi ba dipere ba dikete tše masome a mane, gomme ba gobatša Shobake, molaodi wa madira a manaba, yoo a ilego a hwela moo lebaleng la ntwa. ₁₉Ge magoši a e bego e le a Hadade-Esere a lemoga gore a fentšwe ke Baisraele, a kwana le bona gore naga e lale mme ya ba batho ba bona. Gomme Basiria ba tšhaba go hlwa ba thuša Baamone.