To The Word – Day 8

₁Abrahama o ile a nyala mosadi yo mongwe yoo leina la gagwe e bego e le Ketura. ₂Yena a mmelegela Simrane le Jokoshane le Medane le Midiane le Jishbake le Shuage. ₃Jokoshane e bile tatagoSheba le Dedane, gomme ditlogolo tša Dedane e bile Baashure le Baletushe le Baleume. ₄Barwa ba Midiane e bile Efa le Efere le Enoko le Abida le Eldaa. Bao e bile ditlogolo tša Ketura.

₅Abrahama o tlogeletše Isaka tšohle tša gagwe, ₆eupša ge a sa phela, o ile a fa barwa bao metlabo ya gagwe e bego e mmelegetše bona dimpho. Ka morago a romela barwa bao nageng ye e lego ka bohlabela, kgole le morwa wa gagwe, Isaka.

_7-8Abrahama o hwile a tšofetše kudu a na le mengwaga ye lekgolo le masome a šupago le metšo ye mehlano. ₉Barwa ba gagwe, Isaka le Ishmaele, ba ile ba mmoloka ka leweng la Makapela, ka bohlabela bja Mamre, tšhemong yeo e bego e kile ya ba ya Efrone, morwa wa Tsohare, Mohete. ₁₀E be e le tšhemo yela Abrahama a bego a e rekile go Bahete; bobedi bja bona, Abrahama le mosadi wa gagwe, Sara, ba ile ba bolokwa fao. ₁₁Ka morago ga lehu la Abrahama Modimo o ile a šegofatša morwagwe Isaka, yo a bego a dula kgauswi le “Sediba sa Mophelaampona”.

₁₂Tše ke ditlogolo tša Ishmaele yoo Hagare, lekgobagadi la Moegepeta la Sara, a mmelegetšego Abrahama. ₁₃Šea maina a barwa ba Ishmaele ka tatelano ya matswalo a bona: Wa mathomo e bile Nebayote, gwa latela Kedara, Adbeele, Mibisamo, ₁₄Mishma, Duma, Masa, ₁₅Hadade, Tema, Jeture, Nafishe le Kedema. ₁₆Bona e bile baetapele ba dikgoro tše lesome le tše pedi, gomme maina a bona a fiwa metse ya bona le mafelo a go hloma mešaša. ₁₇Ishmaele o be a na le mengwaga ye lekgolo le masome a mararo a metšo ye e šupago ge a ehwa. ₁₈Ditlogolo tša Ishmaele di be di dutše nageng ye e lego gare ga Habila le Shure, ka bohlabela bja Egepeta, tseleng ya go ya Asiria. Bona ba ile ba phela ba hloile ditlogolo tše dingwe tša Abrahama.

₁₉Šedi ditaba tša Isaka, morwa wa Abrahama: ₂₀Isaka o be a na le mengwaga ye masome a mane ge a nyala Rebeka, kgaetšedi ya Labane, morwedi wa Bethuele, Moaramo wa Mesopotamia. ₂₁Ka ge Rebeka a be a se na bana, Isaka o ile a mo rapelela go Morena. Morena a kwa thapelo ya gagwe, gomme Rebeka a ima. ₂₂O ile a belega mafahla, gomme pele ga ge ba belegwa, ba šušumetšana ka teng ga gagwe. A re: “Ke go reng ke hlagelwa ke taba ya mohuta wo?” Ka gona a yo botšiša Morena.

₂₃Morena a re go yena:

₂₄Nako ya gore a belege ya fihla, gomme a ba le mafahla a bašemane. ₂₅Wa mathomo e be e le yo mohubetšwana mme letlalo la gagwe le swana le seaparo sa boya, ka gona a rewa leina la Esau. ₂₆Wa bobedi a belegwa a swere serethe sa Esau a se tiišitše, ka gona a rewa leina la Jakobo. Isaka o be a na le mengwaga ye masome a a selelago ge ba belegwa.

₂₇Bašemanyana ba gola, gomme Esau ya ba motsomi wa bokgoni, motho wa go rata bophelo bja lešoka, Jakobo yena ya ba motho wa go ikhomolela, wa go itlhwela gae. ₂₈Isaka o be a rata Esau ka gore a be a ipshina ka go ja diphoofolo tšeo Esau a bego a di bolaya, eupša Rebeka yena o be a rata Jakobo.

₂₉Ka letšatši le lengwe ge Jakobo a sa apeile setopša, Esau a goroga a tšo tsoma. O be a lapile kudu, ₃₀gomme a re go Jakobo: “Ke dikologa ka tlala; a ke fologetše selo seo se sehubedu.” Ke ka moo a ilego a rewa leina la Edomo.

₃₁Jakobo a mo fetola a re: “Nthekišetše tokelo ya bogolo bja gago pele.”

₃₂Esau a re: “Go lokile, ke kgauswi le go hwa; bogolo bo nkholang?”

₃₃Jakobo a mo fetola a re: “Nkenele pele.”

Esau a ena gomme a rekišetša Jakobo tokelo ya bogolo bja gagwe. ₃₄Ke moo Jakobo a mo filego senkgwa a ba a mo tšhelela le setopša sela. Esau a ja, a nwa, gomme a emelela a sepela. Ke ka moo a ilego a nyatša tokelo ya bogolo bja gagwe.

₁Go ile gwa wa tlala ye nngwe nageng, ntle le yela ya pele ya mehleng ya Abrahama. Ka gona Isaka a ya go Abimeleke, kgoši ya Bafilista, kua Gerare. ₂Morena o be a iponagaditše go Isaka mme a re: “O se ke wa ya Egepeta; dula nageng ye ke go botšago gore o dule go yona. ₃Dula mo o le mofaladi, gomme ke tla ba nago ka go šegofatša. Wena le ditlogolo tša gago ke tla le fa dinaga tše ka moka. Ke tla phetha se ke se enetšego Abrahama, tatago. ₄Ke tla dira gore o be le ditlogolo tše ntši bjalo ka dinaledi tša legodimo, ka ba fa dinaga tše ka moka. Ditšhaba tša lefase ka moka di tla nkgopela go di šegofatša bjalo ka ge ke šegofaditše ditlogolo tša gago. ₅Ke tlile go go šegofatša ka gobane Abrahama a ntheeditše, gomme a phetha melao le ditaelo tša ka ka moka.”

₆Ka gona Isaka a dula Gerare. ₇Ge batho ba moo ba mmotšiša mabapi le mosadi wa gagwe, o ile a re: “Ke kgaetšedi ya ka,” ka gobane a be a boifa go ba botša gore ke mosadi wa gagwe. O be a tšhaba gore banna ba moo ba tla mmolaya gore ba tšee Rebeka, ka gore e be e le yo mobotse. ₈Ge Isaka a bile fao lebaka, Kgoši Abimeleke a okamela ka ntle ka lefasetere gomme a bona Isaka le Rebeka ba bapadišana. ₉Abimeleke a laela gore Isaka a bitšwe, gomme a re go yena: “Ke bone gabotse gore yola ke mosadi wa gago! Ke ka lebaka lang o rile ke kgaetšediago?”

Isaka a mo fetola a re: “Ke be ke gopola gore ke tla bolawa ge nka re ke mosadi wa ka.”

₁₀Abimeleke a re: “O re dirile eng? Yo mongwe wa banna ba ka o be a ka no ithobalela le mosadi wa gago, gomme ya ba ge wena o re obišitše molato.” ₁₁Abimeleke a lemoša batho ka moka a re: “Yo a tlaišago monna yo goba mosadi wa gagwe o tla bolawa.”

₁₂Isaka a lema nageng yeo, gomme ngwageng woo kgetsi ya peu ya mmušetša dikgetsi tše lekgolo, ka gobane Morena o ile a mo šegofatša. ₁₃A huma, a atlega go iša pele gomme ya ba monna wa maemo. ₁₄Bafilista ba mo tsebafela ka gobane o be a na le mehlape ye mentši ya dihuswane le dikgomo, le bahlanka ba bantši. ₁₅Ka gona ba šiba didiba tšohle tšeo bahlanka ba Abrahama, tatagwe, ba di epilego mola Abrahama a sa phela.

₁₆Ke moo Abimeleke a itšego go Isaka: “Re tšwele nageng. O a re imela.” ₁₇Ka gona Isaka a tloga, gomme a hloma mešaša moeding wa Gerare, a dula gona. ₁₈A šibolla didiba tšela tša go epiwa mehleng ya Abrahama, tšela Bafilista ba di šibilego ka morago ga lehu la Abrahama. Isaka a rea didiba tšeo maina ale tatagwe a bego a di reile ona.

₁₉Bahlanka ba Isaka ba epa meetse ka moeding, gomme ba hwetša sediba sa meetse a a runyago. ₂₀Badiši ba Gerare ba fapana le badiši ba Isaka, gomme ba re: “Meetse a ke a rena.” Ka fao Isaka a rea sediba seo leina la “Phapano”.

₂₁Badiši ba Isaka ba epa sediba se sengwe, le sona seo ba se fapanela, ka fao a se rea leina la “Ngangišano”. ₂₂A tloga fao mme a epa sediba se sengwe. Gwa se be le ngangišano ka ga sona, ka gona a se rea leina la “Sebaka”. A re: “Bjale Morena o re file sebaka nageng ye, gomme mo re tla atlega.”

₂₃Go tloga moo Isaka a ya Beresheba. ₂₄Bošegong bjoo Morena a iponagatša go yena mme a re: “Ke nna Modimo wa Abrahama, tatago. O se ke wa boifa; ke na le wena. Ke tla go šegofatša ka ba ka go fa ditlogolo tše ntši ka lebaka la Abrahama, mohlanka wa ka.” ₂₅Isaka a aga aletare moo, a khunamela Morena. A hloma mešaša ya gagwe fao, gomme bahlanka ba gagwe ba epa sediba se sengwe.

₂₆Abimeleke a tla go Isaka a etšwa Gerare a na le Ahusate, moeletši wa gagwe, le Pigole, molaodi wa madira a gagwe. ₂₇Isaka a ba botšiša a re: “Le reng le tlile go nna etšwe le ntlhoile mme le nthakile nageng ya lena?”

₂₈Ba mo fetola ba re: “Bjale re lemoga gabotse gore Modimo o na le wena, mme re bona gore rena le wena re enelane, re kwane ₂₉gore o ka se re dire bošula, bjalo ka ge le rena re se ra ka ra go iša seatla. Re bile le botho go wena mme ra dira gore o tloge ka khutšo. Bjale go molaleng gore Morena o go šegofaditše.” ₃₀Isaka a ba direla monyanya, gomme ba ja, ba nwa. ₃₁Ka le le latelago ba tsoga e sa le bošego ba enelana. Isaka a ba felegetša gomme ba mo tlogela ba thabile.

₃₂Ka lona letšatši leo bahlanka ba Isaka ba tla ba mmotša ka ga sediba se ba se epilego. Ba re: “Re phutše meetse.” ₃₃A rea sediba seo leina la “Keno”. Ke ka fao motse wa Beresheba o reilwego leina la wona.

₃₄Ge Esau a na le mengwaga ye masome a mane, o ile a nyala basetsana ba babedi ba Bahete, Judite, morwedi wa Beeri, le Basemate, morwedi wa Elone. ₃₅Bona ba ile ba galakišetša Isaka le Rebeka bophelo.

₁Bjale Isaka o be a tšofetše kudu mme a foufetše. A laela gore Esau, morwagwe yo mogolo, a bitšwe mme a re go yena: “Ngwanaka!”

Esau a araba a re: “Tama!”

₂Isaka a re: “O a bona gore ke tšofetše gomme nka hwa nako efe le efe. ₃Tšea bora bja gago le mesebe, o ye nageng mme o ntsomele phoofolo. ₄O nkapeele dijo tšela tše bose ke di ratago, gomme o ntlišetše tšona. Ge ke di lle ke tla go šegofatša pele ke ehwa.”

₅Ge Isaka a bolela le Esau, Rebeka o be a theeditše. Ka gona ge Esau a etšwa a ilo tsoma, ₆Rebeka a re go Jakobo: “Ke sa tšo kwa tatago a re go Esau: ₇‘Ntlišetše phoofolo o nkapeele dijo tšela tše bose. Ge ke di lle ke tla go šegofatša pele ga Morena pele ke ehwa.’ ” ₈Rebeka a tšwela pele a re: “Bjale, ngwanaka, ntheetše gomme o dire se ke go botšago sona. ₉Sepela dihuswaneng, o hlaole diputšane tše pedi tša go nona gore ke tle ke apeele tatago dijo tšela a di ratago. ₁₀O tle o di iše go yena gore a di je, gomme yena o tla go šegofatša pele a ehwa.”

₁₁Jakobo a fetola mmagwe a re: “O a tseba gore Esau ke monna wa boya, eupša nna ke motho yo boreledi. ₁₂Mohlomongwe tate o tla mphophola gomme a tšea gore ke mo dira lešilo; ka gona ke tla itlišetša thogako bakeng sa tšhegofatšo.”

₁₃Mmagwe a re go yena: “A thogako yeo e wele godimo ga ka, ngwanake; eno dira bjalo ka ge ke go botša, o ye o ntšeele diputšane tšeo.” ₁₄Ka gona a yo di tšea a di tliša go yena, gomme mmagwe a apea dijo tšela tatagwe a di ratago. ₁₅Ka morago a tšea diaparo tše kaonekaone tša Esau, morwagwe yo mogolo, tše a bego a di beile ka ngwakong, a apeša Jakobo, morwagwe yo monnyane. ₁₆A mo tatetša matsogo le molaleng mo go sego moriri ka matlalo a diputšane tšela. ₁₇A mo neela dijo tšela tše bose, gotee le senkgwa se a se apeilego.

₁₈Ke moka Jakobo a ya go tatagwe a re: “Tate!”

Tatagwe a re: “Eye, o morwa wa ka ofe, ngwanaka?”

₁₉Jakobo a mo fetola a re: “Ke nna Esau, morwago wa leitšibolo; ke dirile ka moo o ntaetšego ka gona. Hle, tsoga o dule, o je nama ya phoofolo ye ke go tlišeditšego yona gore o tle o ntšhegofatše.”

₂₀Isaka a re go morwagwe: “Go tlile bjang gore o e hwetše ka pela ka tsela ye, ngwanaka?”

Jakobo a mo fetola a re: “Morena Modimo wa gago o nkgahlantše nayo.”

₂₁Isaka a re go Jakobo: “Hle, batamela ke go phophole, ngwanaka, gore ke kwe ge eba ke wena morwa wa ka, Esau.” ₂₂Jakobo a batamela, mme Isaka a mo phophola a re: “Lentšu la gago le kwagala bjalo ka la Jakobo, eupša matsogo ona a kwega bjalo ka a Esau.” ₂₃O ile a se lemoge Jakobo, ka gore matsogo a gagwe a be a na le boya bjalo ka a Esau. Ke ka lebaka leo mafelelong a ilego a mo šegofatša. ₂₄Gomme a mmotšiša a re: “Na ruri ke wena Esau?”

Jakobo a mo fetola a re: “Ke nna.”

₂₅Isaka a re: “Ntlišetše nama yeo ya phoofolo ke je, ngwanaka, gore ke go šegofatše.” Jakobo a e tliša go yena, gomme a ja; a mo tlišetša le beine gore a nwe. ₂₆Ka morago tatagwe a re: “Hle, batamela o nkatle, ngwanaka.” ₂₇Ge a batamela a mo atla, Isaka a dupa diaparo tša gagwe; a napa a mo šegofatša a re:

₃₀Isaka a fetša go šegofatša Jakobo, gomme ge Jakobo a seno tloga, Esau, mogolwagwe, a tsena a tšo tsoma. ₃₁Le yena a apea dijo tše bose mme a di iša go tatagwe a re: “Hle, tate, tsoga o je nama ya phoofolo ye ke go tlišeditšego yona, gore o tle o ntšhegofatše.”

₃₂Isaka a mmotšiša a re: “Ke wena mang?”

Esau a mo fetola a re: “Ke nna Esau, morwa wa gago wa leitšibolo.”

₃₃Isaka a thothomela kudu, a mmotšiša a re: “Bjale ke mang yo a bolailego phoofolo a ntlišetša yona? Ke e lle pejana ga ge o etla. Ke mo šegofaditše, gomme o šegofaditšwe go ya go ile.”

₃₄Ge Esau a ekwa taba yeo, a hlaboša lentšu a lla gabohloko kudu a re: “Le nna ntšhegofatše, tate!”

₃₅Isaka a mo fetola a re: “Ngwaneno o tlile fa ka boradia, a tšea tšhegofatšo ya gago.”

₃₆Esau a re: “Le ke la bobedi ge a nthadia. Ga go makatše ge leina la gagwe e le Jakobo. O nkamogile bogolo, mme bjale šemo o nkamogile le tšhegofatšo. A ga go na tšhegofatšo ye o ntšhadišeditšego yona?”

₃₇Isaka a mo fetola a re: “Ke šetše ke mo dirile mong wa gago, mme ke dirile meloko ka moka yabo bahlanka ba gagwe. Ke mo file mabele le beine. Bjale ga go sa le selo se nka go direlago sona, ngwanaka!”

₃₈Esau a kgopela tatagwe a re: “A o ne tšhegofatšo e tee fela, tate? Tate, le nna ntšhegofatše!” A hlaboša lentšu a lla.

₃₉Ke moo Isaka a itšego go yena:

₄₁Esau a tsota Jakobo ka gobane tatagwe a mo šegofaditše. A rera ka pelong a re: “Nako ya go llela tatagorena e a batamela; ka morago ga moo ke tla bolaya Jakobo.”

₄₂Eupša Rebeka a kwa ka maano a Esau, a laela gore Jakobo a bitšwe, gomme a re go yena: “Theetša, Esau, mogolwago, o ikemišeditše go itefetša ka go go bolaya. ₄₃Bjale ngwanaka, dira se ke go botšago sona. Itlhaganele o tšhabele go kgaetšedi ya ka, Labane, kua Harane. ₄₄O dule le yena lebakanyana go fihlela ngwaneno a buša pelo, ₄₅a lebala se o mo dirilego sona. Ke moo ke tlago roma motho a tla a go bitša. Ga ke nyake go tlo lahlegelwa ke lena ka bobedi ka letšatši le tee.”

₄₆Rebeka a re go Isaka: “Ke lapile wa go hwa ka basadi ba šele ba Esau. Ge Jakobo le yena a ka nyala yo mongwe wa basetsana ba ba mo ba Bahete, go tla re ke ikhwele.”

₁Isaka a bitša Jakobo, a mo šegofatša, gomme a mo laya a re: “O se ke wa nyala mosetsana wa Mokanana. ₂Itokiše o ye seleteng sa ka leboa sa Mesopotamia, lapeng la Bethuele, rakgolwago. O nyale kgarebe ye nngwe ka fao, yo mongwe wa barwedi ba malomeago, Labane. ₃A Modimo Ramaatlaohle a šegofatše lenyalo la gago mme a go fe bana ba bantši, gore o tle o be tatagoditšhabatšhaba. ₄A a šegofatše wena le ditlogolo tša gago bjalo ka ge a šegofaditše Abrahama, gomme o tle o tšee naga ye o falaletšego go yona, naga ye Modimo a e filego Abrahama.” ₅Isaka a roma Jakobo kua Mesopotamia go Labane, morwa wa Bethuele, Moaramo. Labane e be e le kgaetšedi ya Rebeka, mmagoJakobo le Esau.

₆Esau a kwa gore Isaka o šegofaditše Jakobo a ba a mo roma Mesopotamia go yo nyala mosadi fao. A kwa le gore ge Isaka a mo šegofatša, o mo laile gore a se ke a nyala mosadi wa Mokanana. ₇A lemoga gore Jakobo o phethile taelo ya tatagwe le mmagwe o ile Mesopotamia. ₈Ke moo Esau a bonego gore Isaka, tatagwe, ga a rate basadi ba Bakanana. ₉Ka gona a ya go Ishmaele, morwa wa Abrahama, gomme a nyala Mahalate, morwediagwe, yo e bego e le kgaetšedi ya Nebayote, ya ba mosadi wa gagwe yo mongwe.

₁₀Jakobo a tloga Beresheba, a leba Harane. ₁₁A fihla felo mo gokgethwa gomme a lala fao, ka gobane letšatši le be le diketše. A tšea letlapa moo, a robala a le sametše. ₁₂A lora a bona manamelo a tloga lefaseng a fihla legodimong, gomme barongwa ba namela ba theoga godimo ga wona. ₁₃A bona Morena a eme godimodimo ga manamelo gomme a re go Jakobo: “Ke nna Morena, Modimo wa botatago Abrahama le Isaka. Naga ye o robetšego go yona ke tla e fa wena le ditlogolo tša gago. ₁₄Ditlogolo tša gago e tla ba tše ntši bjalo ka lerole la lefase. Ba tla ikala go ya mathokong ohle, gomme ditšhaba tša lefase ka moka di tla nkgopela gore ke di šegofatše bjalo ka ge ke šegofaditše wena le ditlogolo tša gago. ₁₅Bona, ke tla ba le wena ka go šireletša gohle mo o yago, ka tla ka go bušetša mo nageng ye. Nka se go tlogele; ke tla ba ka phetha tšohle tše ke go boditšego tšona.”

₁₆Jakobo a phafoga gomme a re: “Ruri, Morena o gona felo fa, nna ke be ke sa tsebe!” ₁₇A boifa, mme a re: “Felo fa go boifiša bjang! Mo ke bjona bodulo bja Modimo, ke kgoro ya legodimo.”

₁₈Jakobo a tsoga e sa le bošego ka le le latelago, a tšea letlapa le a bego a le sametše, a le hloma ya ba letlapa la segopotšo. A tšhela makhura a mohlware godimo ga lona. ₁₉A rea felo fao leina la Bethele. Pele motse woo o be o bitšwa Luse. ₂₀Ke moka Jakobo a enela Morena a re: “Ge o ka ba le nna, wa ntšhireletša mo leetong le ke le tšeago, wa mpha dijo le diaparo, ₂₁ka ba ka boela ngwakong wa tate ke bolokegile, gona o tla ba Modimo wa ka. ₂₂Letlapa le la segopotšo le ke le hlomilego e tla ba felo fao o tlago khunamelwa ntshe, gomme ke tla go fa karolo ya lesome ya tšohle tše o mphago tšona.”

₁“Le se ferekane; le dumele go Modimo, le nna le dumele go nna. ₂Ka ntlong ya Tate go na le madulo a mantši; ge go ka be go se bjalo, na nkabe ke le botša gore ke ya go le lokišetša madulo? ₃Ge ke ile go le lokišetša madulo, ke tla boa ka tla ka le tšea gore le lena le yo ba mo ke lego gona. ₄Tsela ya go ya mo ke yago gona le a e tseba.”

₅Thomase a re go yena: “Morena, re ka re re sa tsebe mo o yago, tsela ya go ya gona yona ra e tseba?”

₆Jesu a mo fetola a re: “Tsela ya gona le therešo le bophelo ke nna. Ga go yo a yago go Tate ge e se ka nna. ₇Ge eba nna le a ntseba le Tate le tla mo tseba, gomme go thoma gonabjale le a mo tseba ebile le mmone.”

₈Filipi a re go yena: “Morena, re bontšhe Tatago, ke mo re tlago wa pelo.”

₉Jesu a mo fetola a re: “Filipi, nka re ke dutše le lena nako ye kaaka wa se ntsebe? Gape yo a bonego nna o bone Tate. Bjale wena o reng o re ke le bontšhe Tate? ₁₀Kgane ga o dumele gore nna ke mo go Tate, le Tate o mo go nna? Tše ke le botšago tšona tše ga se tša ka, ke tša go dirwa ke Tate yo a dulago a le mo go nna. ₁₁Ntumeleng ge ke re ke mo go Tate, le Tate o mo go nna. Ge le sa dumele ka lebaka la tše ke di bolelago, le upše le dumele ka lebaka la tše ke di dirago. ₁₂Ruri, ruri, ke le botša gore yo a dumelago go nna o tla kgona go dira dimakatšo go swana le tše di dirwago ke nna, a dira le tša go feta tšona, ka gobane ke ya go Tate. ₁₃Gomme se le kago nkgopela sona le le ba ka, ke tla se dira, gore batho ba bone letago la Tate ka nna, Morwagwe. ₁₄Ge le nkgopela selo ka ge le le ba ka, ke tla se phetha.”

₁₅“Ge le nthata, le tla phetha melao ya ka. ₁₆Ke tla kgopela Tate a le fa Mothuši yo mongwe wa go tlo dulela le lena sa ruri. ₁₇Ke yena Moya wa go utolla therešo, wo batho ba lefase ba sa kgonego go o amogela, ka ge ba sa o bone ebile ba sa o tsebe. Lena le a o tseba ka gobane o dula le lena, ebile o tla no ba mo go lena.

₁₈“Nka se le tlogele le le ditšhiwana, ke sa tlilo boela mo go lena. ₁₉Go šetše lebakanyana, ya ba batho ba lefase ga ba sa mpona, fela lena le tla mpona; gomme ka ge ke phela, le lena le tla phelela sa ruri. ₂₀Mohlang woo ke gona le tlago tseba gore nna ke mo go Tate le gore le lena le mo go nna, bjalo ka ge le nna ke le mo go lena.

₂₁“Yo a amogelago melao ya ka mme a e phetha, ke yena yo a nthatago. Gomme yo a nthatago ke yena yo a tlago ratwa ke Tate. Le nna ke tla mo rata, ka ikutollela yena.”

₂₂Judase – e sego Judase Iskariote – a mmotšiša a re: “Morena, o tla be o reng o ikutollela rena, o sa ikutollele batho ba lefase?”

₂₃Jesu a mo fetola a re: “Yo a nthatago o phetha tše ke di bolelago. Tate o tla mo rata, gomme re tla tla go yena ra dula mmogo le yena. ₂₄Yo a sa nthatego yena ga a phethe tše ke di bolelago. Gape mantšu a le kwago ke a bolela a ga se a ka, ke a Tate yo a nthomilego.

₂₅“Taba tše ke le botša tšona ke sa na le lena. ₂₆Mothuši, e lego wona Moya wo Mokgethwa, wo Tate a tlago o roma a kgopetšwe ke nna, o tla le ruta dilo ka moka, a le gakolla tšohle tše ke le rutilego tšona.

₂₇“Ke le tlogelela khutšo; ke khutšo ya ka ye ke le fago yona. Ga ke le tlogelele yona bjalo ka batho ba lefase. Le se ke la ferekana, le se ke la boifa. ₂₈Le nkwele ge ke le botša ke re: ‘Ke a sepela, eupša ke tla boela mo go lena.’ Ge le ka be le nthata le ka be le thabela ge ke eya go Tate, ka gobane yena o a mpheta. ₂₉Ke le botša ditaba tše di sešo tša hlaga, gore mohla di hlaga le dumele. ₃₀Nka se sa bolela le lena go iša kae, ka gobane mmuši wa lefase le o etla, fela nna ga a ntaole. ₃₁Eupša batho ba lefase le ba swanetše ba tsebe gore ke rata Tate. Ke ka lebaka leo ke dirago tšohle ka mo a ntaetšego ka gona.

“Emelelang, re tlogeng mo.”

₁“Ke nna morara wa mmakgonthe, gomme Tate ke molemi. ₂Lekala le lengwe le le lengwe le le lego mo go nna le sa enywe o a le rema, le lengwe le le lengwe le le enywago o a le kgotha, gore le hlweke le tle le enywe le go feta. ₃Lena le šetše le hlwekišitšwe ka tše ke le rutilego tšona. ₄Dulang le le ba tee le nna, gomme le nna ke tla dula ke le o tee le lena. Lekala ga le kgone go enywa ka bolona, le kgona fela ge le kopane le morara. Ka wona mokgwa woo le lena le ka se kgone go enywa dikenywa ge le sa dule le le ba tee le nna.

₅“Morara ke nna, makala ke lena. Yo a dulago e le o tee le nna, le nna ke le o tee le yena, o enywa dikenywa tše dintši, gobane ka ntle le nna le ka se kgone selo. ₆Yo a sa dulego e le o tee le nna o a lahlwa a omelela go etša lekala ge le lahlilwe la omelela; gomme makala a a omeletšego a a topša a lahlelwa mollong, a swa. ₇Ge le dula le le ba tee le nna gomme le theeletša tše ke le boditšego tšona, le ka kgopela se le se nyakago, mme le tla se fiwa. ₈Se se tumišago Tate ke ge le enywa dikenywa tše dintši ebile le le barutiwa ba ka.”

₉“Ke le rata bjalo ka ge Tate a nthata. Dulang le le ba tee le nna gore ke dule ke le rata. ₁₀Ge le phetha melao ya ka ke tla dula ke le rata, go swana le nna ge ke phethile melao ya Tate, gomme a dula a nthata.

₁₁“Ditaba tše ke le boditše tšona gore le be le lethabo le ke nago le lona, le gona lethabo la lena e be le le feletšego. ₁₂Molao wa ka ke wa gore le rataneng bjalo ka ge le nna ke le rata. ₁₃Lerato la go feta la ge motho a ka hwela bagwera ba gagwe ga le gona. ₁₄Gomme lena le bagwera ba ka ge le dira tše ke le laelago tšona. ₁₅Ga ke sa le bitša bahlanka, ka gobane mohlanka ga a tsebe se mong wa gagwe a se dirago. Lena ke le bitša bagwera ka gobane ke le begetše tšohle tše ke di boditšwego ke Tate. ₁₆Ga se lena le nkgethilego, ke nna ke kgethilego lena ka le dira gore le enywe dikenywa tša go swarelela, gore se le kago se kgopela Tate ka ge le le ba ka, a le fe sona. ₁₇Bjale ge, se ke le laelago sona ke gore le rataneng.”

₁₈“Ge batho ba lefase ba le hloya, tsebang gore pele ba be ba hloile nna. ₁₉Ge le ka be le le ba lefase, batho ba lefase ba ka be ba le rata, ba le tšea le le ba gabobona. Eupša ba le hloile ka ge ke le kgetholotše go bona gomme le se sa le ba gabobona. ₂₀Gopolang sela ke le boditšego sona ka re mohlanka ga a fete mong wa gagwe. Ge nna ba be ntlhomere, le lena ba tlilo le hlomara. Ge ba be ba phetha tše ke bego ke ba botša tšona, tše ba di botšwago ke lena le tšona ba tla di phetha. ₂₁Tšohle tše ba ntirilego tšona le lena ba tla le dira tšona ka ge le le ba ka, gobane yo a nthomilego yena ga ba mo tsebe. ₂₂Ge nkabe ke se tle ka bolela le bona, ba ka be ba se na molato; eupša bjale ga ba na se ba ka itatolago sebe ka sona. ₂₃Yo a ntlhoilego, o hloile Tate. ₂₄Ge nkabe ke se ka ka ka dira mediro mo gare ga bona ye e sego ya ka ya dirwa ke motho, ba ka be ba se na molato; eupša le ge ba di bone bjale, ba ntlhoile, le Tate ba mo hloile. ₂₅Fela go be go swanetše go ba bjalo, gore go phethege se se ngwadilwego ka melaong ya bona mo go thwego: ‘Ba ntlhoetše lefeela.’

₂₆“Ke tla re ke le go Tate ka le romela Mothuši, wona Moya wa go utolla therešo, wona wa go tšwa go Tate, gomme ge o fihla o tla ntlhatsela. ₂₇Le lena le tla ntlhatsela, ka gobane le bile le nna go tloga mathomong.

₁“Ke le boditše ditaba tše gore le se tlo kgeloga. ₂Le tlilo rakwa disinagogeng. Go tla ba gwa tla nako ya gore ge motho a le bolaya a hlome nke ke gona ge a direla Modimo. ₃Ba tla le hloriša ka mokgwa woo ka ge ba sa tsebe nna goba Tate. ₄Ke le boditše ditaba tšeo gore ge nako ya tšona e fihla, le elelwe gore ke ile ka le botša.

“Ga se ka le botša ditaba tše mathomong, ka gobane ke be ke sa na le lena. ₅Eupša bjale ke ya go yo a nthomilego, fela ga go le o tee mo go lena yo a mpotšišago gore na ke ya kae. ₆Gomme bjale ka gore ke le boditše, le nyamile kudu. ₇Ke le botša nnete ge ke re: Go tloga ga ka go a le hola, ka gobane ge nka se tloge Mothuši a ka se tle go lena. Fela ge nka sepela, ke tla mo roma a tla go lena. ₈Gomme ge a tlile o tla kgodiša batho ba lefase gore tše ba di naganago mabapi le sebe, le mabapi le toka, le mabapi le kahlolo ga se tšona. ₉Ga se tšona mabapi le sebe, ka gobane ga ba dumele go nna; ga se tšona mabapi le toka, ₁₀ka gobane ke ya go Tate, gomme le ka se sa mpona; ₁₁ga se tšona mabapi le kahlolo, ka gobane mmuši wa lefase le o šetše a ahlotšwe.

₁₂“Ke sa na le taba tše dintši tše nka le botšago tšona, fela gonabjale le ka se di kgone. ₁₃E tla re ge go tlile wona Moya wa go utolla therešo, wa le tsebiša therešo ka moka. Gape o tla be o sa ipolelele, o tla be o bolela tše o di kwago; o le begela le tše di sa tlilogo hlaga. ₁₄O tla nkgodiša, ka gobane tše o tlago be o le botša tšona e tla be e le tše di tšwago go nna. ₁₅Tšohle tše Tate a nago le tšona ke tša ka; ke ka lebaka leo ke rego tše Moya o tlago le botša tšona e tla be e le tše di tšwago go nna.”

₁₆“Ka morago ga lebakanyana le ka se sa mpona, ya re ka morago ga lebakanyana la buša la mpona.”

₁₇Ba bangwe ba barutiwa ba gagwe ba botšišana ba re: “O ra go reng ge a re ka morago ga lebakanyana re ka se sa mmona, ya re ka morago ga lebakanyana ra buša ra mmona, le ge a re ke ka gobane a eya go Tatagwe? ₁₈O ra eng ge a re ‘lebakanyana’? Rena ga re tsebe gore o bolela ka eng.”

₁₉Jesu a lemoga gore ba nyaka go mmotšiša, ka gona a re go bona: “Na le botšišana taba ye ke le boditšego yona ka re ka morago ga lebakanyana le ka se sa mpona, ya re ka morago ga lebakanyana la buša la mpona? ₂₀Ruri, ruri, ke le botša gore le tla lla la golola, eupša batho ba lefase bona ba tla thaba; le tla nyama, fela manyami a lena a tla fetoga lethabo. ₂₁Mosadi ge a belega o kwa bohloko, ka ge nako ya gagwe e fihlile; fela e re ge a seno belega a lebale bohloko bjola, ka lebaka la go thabela motho yo a tlilego lefaseng. ₂₂Le lena gonabjale le nyamile, eupša ke tla le bona gape gomme le tla thaba; lethabo leo la lena le ka se le amogwe ke motho.

₂₃“Mohlang woo le ka se mpotšiše selo. Ruri, ruri, ke le botša gore se le kago se kgopela Tate ka ge le le ba ka o tla le fa sona. ₂₄Go fihlela bjale ga se la ka la kgopela selo le le ba ka. Kgopelang, gomme le tla fiwa, gore lethabo la lena e be le le feletšego.”

₂₅“Ditaba tše ke le boditše tšona ka go swantšha. Nako e etla ye ka yona nka se sa le botšago ka go swantšha, ke tlago bolela le lena phaa ka Tate. ₂₆Mohlang woo le tla kgopela Tate ka ge le le ba ka; ke ka lebaka leo ke sa rego nna ke tla le kgopelela go yena, ₂₇gobane yena ka noši o a le rata. O le rata ka gobane le lena le nthata, le gona le dumela gore ke tšwa go yena. ₂₈Ke tšwa go Tate ka tla lefaseng, gomme bjale ke tlogela lefase ke ya go Tate.”

₂₉Ke mo barutiwa ba gagwe ba rilego go yena: “Bjale gona o bolela phaa, e sego ka go swantšha. ₃₀Bjale re a tseba gore o motsebi wa tšohle; ga go nyakege gore o hlwe o botšišwabotšišwa. Ke sona se se dirago gore re dumele gore o tšwa o le go Modimo.”

₃₁Jesu a ba fetola a re: “Eya, bjale le a dumela? ₃₂Nako e etla, ebile e šetše e fihlile, mo bohle le tlilogo gašaganywa, mongwe le mongwe a ya ga gabo, la ntlogela ke le noši. Fela ga se gore ke noši, ka gobane Tate o na le nna. ₃₃Ditaba tše ke le boditše tšona gore le beege dipelo ka ge le le ba tee le nna. Mo lefaseng le tla hlorišwa, fela le bete dipelo; nna lefase ke le paletše!”