To The Word – Day 9

₁Jakobo a wela tsela a leba nageng ya bohlabela. ₂Ka bjako a bona sediba kua molaleng, le mehlape ye meraro ya dihuswane e robetše moo. Mehlape e be e nošwa sedibeng seo se bego se na le letlapa le legolo molomong. ₃Ge mehlape ka moka e kgobokantšwe fao, badiši ba be ba kgokološa letlapa, ba e noša. Ka morago ga fao ba be ba bušetša letlapa madulong.

₄Jakobo a ba botšiša a re: “Banabešo, a le tšwa kae?”

Ba mo fetola ba re: “Re tšwa Harane.”

₅A ba botšiša a re: “A le tseba Labane, morwa wa Nahoro?”

Ba re: “Ee, re a mo tseba.”

₆A ba botšiša a re: “A o sa phela gabotse?”

Ba mo fetola ba re: “O sa phela gabotse. Ebile Ragele, morwediagwe, šo o tla le dihuswane tša tatagwe.”

₇Jakobo a re: “Ka ge e sa le mosegare wo monana gomme e sešo ya ba nako ya go goroša mehlape, le reng le sa e noše mme la e bušetša phulong?”

₈Ba mo fetola ba re: “Re ka se kgone go dira bjalo mehlape ka moka e sešo ya ba mo, le letlapa la kgokološwa; ke gona re tlago noša mehlape.”

₉Ge Jakobo a sa bolela nabo, Ragele, yo a bego a diša dihuswane tša tatagwe, a fihla le mohlape. ₁₀Ge Jakobo a bona Ragele le mohlape wa Labane, malomeagwe, a ya sedibeng, a kgokološa letlapa, gomme a noša dihuswane. ₁₁Ka morago Jakobo a atla Ragele, a napa a hlaboša lentšu a lla. ₁₂A mmotša a re: “Ke nna motlogolo wa tatago, ke morwa wa Rebeka.”

Ragele a kitima a yo botša tatagwe, ₁₃gomme yena ge a ekwa tša Jakobo, motlogoloagwe, a kitimela go mo gahlanetša, a mo ubarela a mo atla a thabile, gomme a mo goroša ka lapeng. Ge Jakobo a botša Labane ditaba ka moka, ₁₄Labane a re: “Ee, ke therešo, o madi ešo.” Jakobo a dula ka ga gagwe kgwedi ka moka.

₁₅Labane a re go Jakobo: “Na o ka napa wa ntšhomela fela e le ka ge o le motlogolo wa ka! Mpotše gore ke go lefe bokae.” ₁₆Labane o be a na le barwedi ba babedi; yo mogolo e le Lea, yo monnyane e le Ragele. ₁₇Lea o be a na le mahlo a go tiba, Ragele yena a bopegile mme e le yo mobotse.

₁₈Jakobo o be a rata Ragele, ka gona a re: “Ke tla go šomela mengwaga ye e šupago gore ke tšee Ragele, morwediago yo monnyane.”

₁₉Labane a mo fetola a re: “Go kaone gore a tšewe ke wena go na le gore a tšewe ke yo mongwe; dula le nna.” ₂₀Jakobo a šoma mengwaga ye e šupago gore a tšee Ragele, gomme lebaka leo la ba bjalo ka matšatši a se makae go yena ka gore o be a rata Ragele.

₂₁Ke moo Jakobo a itšego go Labane: “Mengwaga yela e fedile. Mphe morwedi wa gago ke mo nyale.” ₂₂Ka gona Labane a dira monyanya gomme a laletša bohle motseng woo. ₂₃Eupša bošegong bjoo Labane a iša Lea go Jakobo, gomme Jakobo a robala naye. ₂₄Labane a tšea lekgoba la gagwe la mosetsana, Silpa, a le fa Lea, morwedi wa gagwe, gore e be mofepi. ₂₅Jakobo o ile a se ke a lemoga gore ke Lea go fihlela mesong ya le le latelago. O ile a ya go Labane mme a re: “Ke ka lebaka lang o ntirile taba ye? Ke šometše go nyala Ragele. Bjale o reng o nthadiile?”

₂₆Labane a mo fetola a re: “Ga se setlwaedi sa mo go nyadiša morwedi yo monnyane pele ga yo mogolo. ₂₇Letela go fihlela ge beke ya monyanya e fela, mme ke tla go fa Ragele, ge eba o tla ntšhomela mengwaga ye mengwe ye e šupago.”

₂₈Jakobo a dumela, gomme ge beke ya monyanya e fedile, Labane a mo fa morwedi wa gagwe Ragele gore e be mosadi wa gagwe. ₂₉Labane a tšea lekgoba la gagwe la mosetsana, Bilha, a le fa Ragele, morwedi wa gagwe, gore e be mofepi. ₃₀Le Ragele Jakobo a robala naye, gomme a mo rata go feta Lea. A šomela Labane mengwaga ye mengwe ye e šupago.

₃₁Ge Morena a bona gore Lea ga a ratwe, a mo fa thari, Ragele yena a hloka bana. ₃₂Lea a ima, gomme a belega morwa, a re: “Morena o bone tlaišego ya ka, gomme bjale mogatšake o tla nthata”; ka gona a mo rea leina la Rubene. ₃₃A ima gape, gomme a belega morwa yo mongwe, a re: “Morena o mphile le morwa yo, ka gobane a kwele gore ke be ke sa ratwe”; ka gona a mo rea leina la Simeone. ₃₄A buša a ima, a belega morwa yo mongwe, a re: “Bjale mogatšake o tla nkgomarela ka gore ke mmelegetše barwa ba bararo”; ka gona a mo rea leina la Lefi. ₃₅Ka morago a ima gapegape, a belega morwa yo mongwe, a re: “Bjale ke tla reta Morena”; ka gona a mo rea leina la Juda. A emiša pelego.

₁Fela Ragele o be a se a belegela Jakobo bana, ka gona a tsebafela mogolwagwe gomme a re go Jakobo: “Mphe bana, go sego bjalo ke tla ikhwela.”

₂Jakobo a befelelwa Ragele a re: “A nka kgona go ema legatong la Modimo? Ke yena yo a go thibelago go ba le bana.”

₃Ragele a re: “Lekgoba la ka la mosetsana, Bilha, šo; robala naye a ntlhatswe dirope. Ka tsela yeo le nna ke tla ba mmagongwana ka yena.” ₄Ka fao a mo neela Bilha gore e be mosadi wa gagwe, gomme Jakobo a robala naye. ₅Bilha a ima, mme a belegela Jakobo morwa. ₆Ragele a re: “Modimo o nkahloletše. O kwele thapelo ya ka mme o mphile morwa”; ka gona a mo rea leina la Dane. ₇Bilha a ima gape, gomme a belegela Jakobo morwa wa bobedi. ₈Ragele a re: “Ke katane o šoro le mogolwake, fela ke fentše”; ka gona a mo rea leina la Naftali.

₉Ge Lea a bona gore o emišitše pelego, o ile a neela Jakobo lekgoba la gagwe la mosetsana, Silpa, gore e be mosadi wa gagwe. ₁₀Silpa a belegela Jakobo morwa. ₁₁Lea a re: “Ke bile le mahlatse”; ka gona a mo rea leina la Gade. ₁₂Silpa a belegela Jakobo morwa yo mongwe, ₁₃gomme Lea a re: “Ke thabile kudu! Bjale basadi ba tla mpitša yo a thabilego”; ka gona a mo rea leina la Asere.

₁₄Ge go bunwa korong Rubene a ya lešokeng gomme a hwetša dienywa tša meratišo, a di tliša go Lea, mmagwe. Ragele a re go Lea: “Hle, mphe dienywa tše dingwe tša morwago.”

₁₅Lea a mo fetola a re: “Na ga se wa kgotsofala ge o nkamogile monna? Bjale o nyaka go nkamoga le dienywa tša morwaka tša moratišo.”

Ragele a re: “Ge o ka mpha dienywa tšeo o ka no robala le Jakobo bošego bjo.”

₁₆Ge Jakobo a boa mašemong mantšiboa, Lea a tšwa a yo mo gahlanetša, a re: “O swanetše go robala le nna bošego bjo ka gore ke go rekile ka dienywa tša morwaka tša moratišo.” Ka gona Jakobo a robala le Lea bošego bjoo.

₁₇Modimo a kwa thapelo ya Lea, mme Lea a ima, a belegela Jakobo morwa wa bohlano. ₁₈Lea a re: “Modimo o mphile moputso ka ge ke neetše mogatšake lekgoba la ka”; ka gona a rea morwa wa gagwe leina la Isakara. ₁₉Lea a ima gape, gomme a belegela Jakobo morwa wa boselela, ₂₀a re: “Modimo o mphile mpho ye botse. Bjale mogatšake o tla nkgotlelela, ka gobane ke mmelegetše barwa ba ba selelago”; ka gona a mo rea leina la Sebulone. ₂₁Ka morago Lea a belega morwedi, a mo rea leina la Dina.

₂₂Ke moo Modimo a gopotšego Ragele; a kwa thapelo ya gagwe gomme a mmula pelego. ₂₃A ima, a belega morwa, a re: “Modimo o ntlošitše dihlong. ₂₄A Morena a mphe morwa yo mongwe”; ka gona a mo rea leina la Josefa.

₂₅Ge Josefa a seno belegwa Jakobo a re go Labane: “E re ke boele gae. ₂₆Mphe basadi le bana bao ke ba šometšego, ke tloge gobane o a tseba ka moo ke go diretšego ka gona.”

₂₇Labane a re go yena: “Hle, a re kwane; ke be ke na le madimabe, gomme Morena o ntšhegofaditše ka lebaka la gago. ₂₈Mpotše gore ke go lefe bjang, gomme ke tla go lefa.”

₂₉Jakobo a mo fetola a re: “O tseba ka moo ke go šometšego ka gona, le ka moo mehlape ya gago e atlegilego ka gona e dišwa ke nna. ₃₀Leruo le lennyane le o bego o na le lona pele ke etla le oketšegile kudu, gomme Morena o go šegofaditše ka lebaka la ka. Bjale la ka lapa nna ke tla le šomela neng?”

₃₁Labane a mmotšiša a re: “Ke go fe eng?”

Jakobo a mo fetola a re: “Ga ke nyake tefo. Ke tla tšwela pele le go go dišetša mehlape ya gago ge o dumela taba ye: ₃₂A ke sepele le mohlape wa gago ka moka lehono ke kgethe kwanyana tšohle tše ntsho le tše swana, le dinku le dipudi tšohle tše kgwadi le tše kgwana. Tšohle tšeo e be wona moputso wa ka. ₃₃Ka moso o tla tla o bona ge eba ke ile ka botega. Ge e ka re ge o etla go lekodišiša dihuswane tša ka, wa hwetša pudi ye nngwe e se ye kgwadi goba ye kgwana, goba kwanyana ye nngwe e se ye ntsho goba ye swana, o tla tseba gore e utswitšwe.”

₃₄Labane a mo fetola a re: “Go lokile. A re dire bjalo ka ge o bolela.” ₃₅Eupša letšatši leo Labane a hlaola diphooko tše sega le tše kgwadi, le dipudi tšohle tše kgwana le tše segana, le tšohle tše di nago le bošweu; a hlaola le dikwanyana tšohle tše ntsho le tše swana. A laela barwa ba gagwe gore ba di diše, ₃₆gomme a tloga go Jakobo le dihuswane tšeo, a di gapa leeto la matšatši a mararo. Jakobo a šala a hlokometše dihuswane tše di šetšego tša Labane.

₃₇Jakobo a tšea dithupa tše meetse tša mopopoliri, le tša moalmone, le tša moplatane, gomme a di khuma ka mathoko tša ba le methaladi ye mešweu. ₃₈A bea dithupa tšeo pele ga dihuswane magopong a tšona a go nwela. A di bea fao ka gore di be di goelana ge di tlile go nwa. ₃₉Ka gona ge dipudi di goelane pele ga dithupa tšeo, di be di tswala diputšanyane tše segana le tše kgwadi le tše kgwana.

₄₀Jakobo a hlaola dinku dipuding mme a di lebanya le dihuswane tše nalana le tše ntsho tša mohlape wa Labane. Ka tsela ye a itirela mohlape wa gagwe a o hlaolela thoko, a se ke a o hlakanya le wa Labane.

₄₁Ge diruiwa tše di tiilego di goelana, Jakobo o be a bea dithupa tšela pele ga tšona kua magopong gore di tle di goelane moo gare ga tšona. ₄₂Eupša o ile a se ke a bea dithupa tšeo pele ga diruiwa tše di fokolago. Ka gona Labane a ba le diruiwa tše di fokolago, mola tša Jakobo e le tše di tiilego. ₄₃Ka tsela ye Jakobo a huma kudukudu. A ba le mehlape ye mentši le makgoba le dikamela le dipokolo.

₁Jakobo a kwa gore barwa ba Labane ba re: “Jakobo o tšere tšohle tše e bego e le tša tatagorena. Lehumo la gagwe ka moka le tšwa go tše e bego e le tša tatagorena.” ₂A bona le gore Labane ga a sa mo thabela go swana le pele. ₃Ke moo Morena a itšego go Jakobo: “Boela nageng ya botatago go meloko ya geno. Ke tla ba le wena.”

₄Ka gona Jakobo a romela Ragele le Lea molaetša wa go re ba tle ba gahlane naye nageng, moo mehlape ya gagwe e bego e le gona. ₅Yena a re go bona: “Ke lemogile gore tatagolena ga a sa nthabela go swana le pele; eupša Modimo wa tate o bile le nna. ₆Lena le a tseba gore ke šometše tatagolena ka maatla a ka ka moka. ₇Le ge go le bjalo o nthadiile, gomme o fetošitše moputso wa ka galesome. Fela Modimo ga se a ka a mo lesa gore a nkgone. ₈Ge Labane a itše: ‘Dipudi tše kgwana e tla ba mogolo wa gago,’ mohlape ka moka o be o tswala diputšanyane tše kgwana. Ge a itše: ‘Dipudi tše segana e tla ba moputso wa gago,’ mohlape ka moka o be o tswala diputšanyane tše segana. ₉Modimo o amogile tatagolena mehlape, a e fa nna.

₁₀“Ka nako ya ge di goelana, ke ile ka lora ke bona diphokwana tše di bego di di goela e le tše sega le tše kgwadi le tše thamaga. ₁₁Morongwa wa Modimo a mpitša torong a re: ‘Jakobo!’ Ka araba ka re: ‘Iše!’ ₁₂Yena a tšwela pele a re: ‘Bona, diphokwana ka moka tšeo di goelago ke tše sega le tše kgwadi le tše thamaga, ka gore ke bone tšohle tše Labane a go dirago tšona. ₁₃Ke nna Modimo yo a iponaditšego go wena kua Bethele, moo o tšhetšego makhura a mohlware godimo ga letlapa lela la segopotšo, gape o nkenetšego. Bjale itokiše, o tloge nageng ye, o boele nageng ya geno.’ ”

₁₄Ragele le Lea ba fetola Jakobo ba re: “Ga go sa na le seo se sa re šaletšego se tatagorena a ka re abelago sona. ₁₅O re swara bjalo ka batho bašele. O re rekišitše, gomme bjale o lle tšhelete ka moka yeo a re rekišitšego ka yona. ₁₆Go bjalo, mahumo a ka moka ao Modimo a a amogilego tatagorena ke a rena le a bana ba rena. Wena dira tšohle tše Modimo a go boditšego tšona.”

_17-18Ka gona Jakobo a itokišetša go boela go tatagwe nageng ya Kanana. A nametša bana le basadi ba gagwe dikamela mme a gapa mehlape ya gagwe ka moka, gotee le tšohle tše a di hweditšego Mesopotamia. ₁₉Labane o be a sa ile go kota dinku tša gagwe, mme ya re a sa ile Ragele a utswa medimo ya lapa la tatagwe. ₂₀Jakobo a radia Labane ka go se mo tsebiše gore o a sepela. ₂₁A tšea tšohle tše e bego e le tša gagwe gomme a tloga ka potlako. A tshela noka ya Yufratese, a leba dithabeng tša Gileade.

₂₂Ka morago ga matšatši a mararo Labane a botšwa gore Jakobo o tšhabile. ₂₃A tloga le bomorwarragwe gomme a rakediša Jakobo matšatši a a šupago, go fihlela ge a mo swara dithabeng tša Gileade. ₂₄Bošegong bjoo Modimo a tla go Labane, a mmotša ka toro a re: “O itshware, o se ke wa re selo go Jakobo.” ₂₅Jakobo o be a hlomile mešaša thabeng, gomme Labane a hlomile ya gagwe le bomorwarragwe dithabeng tša Gileade.

₂₆Labane a re go Jakobo: “Ke go reng o nthadiile wa gapa barwedi ba ka bjalo ka basadi ba ba thopilwego ntweng? ₂₇Ke ka lebaka lang o nngwegetše, wa nthadia, wa se mpotše? Ge o ka be o mpoditše nkabe ke go laetše ka lethabo le ka dikoša, ka meropa le ka dikgapa. ₂₈Ga se wa ka wa mpha le sebaka sa go atla ditlogolo tša ka le barwedi ba ka, ka laelana nabo. O dirile taba ya botlaela! ₂₉Ke na le maatla a go ka go kweša bohloko, fela bošegong bja go feta Modimo wa tatago o mpoditše gore ke itshware ke se ke ka re selo go wena. ₃₀Bjale go tloga gona šemo o tlogile, ka gobane o be o tloge o hlologetše go boela gageno, bjale ke ka lebaka lang o utswitše medimo ya ka?”

₃₁Jakobo a mo fetola a re: “Ke be ke boifa, ka gobane ke ile ka gopola gore o tla nkamoga barwedi ba gago. ₃₂Fela ge o ka hwetša yo mongwe mo a swere medimo ya gago, a bolawe. Nke o nyake se sengwe le se sengwe seo e lego sa gago bomorwarragorena ba lebeletše, gomme o se tšee.” Jakobo o be a sa tsebe gore Ragele o utswitše medimo ya Labane.

₃₃Labane a ya a putuka mošaša wa Jakobo; a fetela ka go wa Lea, le ka go ya makgoba ale a mabedi a basadi, eupša a se ke a hwetša medimo ya gagwe. Ke moo a tsenego mošašeng wa Ragele. ₃₄Ragele o be a tšere medimo yeo ya lapa a e beile ka mokotleng wa sala ya kamela, mme a dutše godimo ga yona. Labane a putuka gohle ka mošašeng, eupša a se ke a e hwetša. ₃₅Ragele a re go tatagwe: “O se ke wa mpefelelwa, mong wa ka, ka gobane ga ke kgone go emelela o le gona; ke bone kgwedi.” Labane a nyaka eupša a se ke a hwetša medimo ya lapa la gagwe.

₃₆Ke moo Jakobo a befetšwego, a omanya Labane a re: “Ke molato ofe wo ke o obilego? Ke phošo efe ye ke e dirilego ye e go dirago gore o ntšhale morago ka mokgwa wo? ₃₇Bjale ka gore o putukile dilong tša ka ka moka, ke eng sa lapa la gago se o se hweditšego? Se ntšhe o se bee mo gore meloko yešo le meloko yeno ba se bone mme ba re ahlolele, nna le wena. ₃₈Ke bile le wena mengwaga ye masome a mabedi; dinku le dipudi tša gago ga se tša ka tša folotša le gona ga se ka ka ka ja kgapa ya mohlape wa gago. ₃₉Ge nku e bolailwe ke dibata ke be ke sa e tliše go wena, tshenyegelo e be e eba ya ka. O be o nyaka gore ke lefe ye nngwe le ye nngwe ye e utswitšwego bošego goba mosegare. ₄₀Ke be ke hlwa ke tšhungwa ke letšatši mosegare, ke lala ke bolawa ke phefo bošego, ke bile ke hlobega boroko. ₄₁Go bile ka tsela yeo mengwaga ye masome a mabedi yeo ke bilego nago. Ke go šometše mengwaga ye lesome le ye mene gore o nnee barwedi ba gago ba babedi, le mengwaga ye e selelago gore o mphe dihuswane tša gago. Le ge go bile bjalo, o fetošitše mogolo wa ka galesome. ₄₂Ge nkabe Modimo wa botate, Modimo wa Abrahama, yo Isaka a bego a mo hlompha, a se ke a ba le nna, nkabe o ile wa nthaka ke se na selo. Eupša Modimo o bone bothata bja ka le mošomo wo ke o dirilego, gomme bošegong bja go feta a go kgala.”

₄₃Labane a fetola Jakobo a re: “Basetsana ba ke barwedi ba ka, bana ba bona ke ba ka, le mehlape ye ke ya ka. Gabotsebotse se sengwe le se sengwe se o se bonago fa ke sa ka. Fela bjalo ka ge go sa hlwe go le se nka se direlago barwedi ba ba ka le barwa ba bona, ₄₄nna le wena a re kwane, gomme re dire mokgobo wa matlapa go re gopotša kwano yeo ya rena.”

₄₅Ka gona Jakobo a tšea letlapa a le tsema gore e be segopotšo. ₄₆A laela ba lapa la gagwe gore ba thothe matlapa ba a dire mokgobo. Ka morago ga fao ba ja dijo ka thoko ga mokgobo woo wa matlapa. ₄₇Labane a o rea leina la Jegare-Sahaduta, mola Jakobo a o rea leina la Galede. ₄₈Labane a re go Jakobo: “Mokgobo wo wa matlapa e tla ba segopotšo go rena ka babedi.” Ka lebaka leo felo fao go ile gwa rewa leina la Galede. ₄₉Labane o ile a ba a re: “A Morena a re hlapetše ge re arogane.” Ka gona felo fao gwa rewa le leina la Mitsepa. ₅₀Labane a tšwela pele a re: “Ge o ka swara barwedi ba ka gampe, goba wa nyala basadi ba bangwe, le ge nka se tsebe taba tšeo, o gopole gore Modimo o re lebeletše. ₅₁Šo mokgobo wo ke o kgobokantšego gare ga rena, le letlapa la segopotšo šele. ₅₂Mokgobo wo le letlapa le ke digopotšo. Nka se tsoge ke tshetše mokgobo wo go tlo go hlasela, gomme le wena o se ke wa tsoga o o tshetše, goba o tshetše letlapa le la segopotšo go tlo ntlhasela. ₅₃Modimo wa Abrahama, yena Modimo wa Nahoro, o tla re ahlolela.” Ka gona Jakobo a ena ka leina la Modimo yo Isaka, tatagwe, a bego a mmoifa gore o tla phetha keno ya gagwe. ₅₄O ile a dira sehlabelo thabeng, gomme a laletša meloko yeo yabo gore ba tle dijong. Ka morago ga ge ba lle, ba robala moo thabeng.

₁Eitše e sa le bošego ka letšatši le le latelago, Labane a atla ditlogolo tša gagwe le barwedi ba gagwe, a ba šadiša gabotse, a tloga a boela gae.

₂Ge Jakobo a le tseleng, a gahlanetšwa ke barongwa ba Modimo. ₃Ge a ba bona a re: “Mo ke mešaša ya Modimo”; ka gona a rea felo fao leina la Mahanaime.

₄Jakobo a roma batseta ba mo eta pele go yo gahlana le Esau, mogolwagwe, nageng ya Edomo, seleteng sa Seire. ₅A ba laela gore ba mmotše ba re: “Nna, Jakobo, mohlanka wa gago, ke begela Esau, mong wa ka, gore ke be ke falaletše go Labane, ka itulela fao go fihlela bjale. ₆Ke na le dikgomo, dipokolo, dihuswane le makgoba. Ke go begela bjalo, mong wa ka, gore ke lebelelwe ka botho.”

₇Ge batseta bale ba boela go Jakobo, ba ile ba re go yena: “Re fihlile go Esau, mogolwago, gomme o šetše a le tseleng go tlo go gahlanetša. O tla le banna ba makgolo a mane.” ₈Jakobo a tšhoga kudu, a tlalelwa. A aroganya batho ba ba bego ba na le yena le dihuswane le dikgomo le dikamela ka dihlopha tše pedi. ₉Ka pelong a re: “Ge Esau a ka tla a hlasela sehlopha sa pele, sehlopha se sengwe se tla kgona go tšhaba.”

₁₀Ke moo Jakobo a rapetšego a re: “Modimo wa rakgolo Abrahama, Modimo wa tate Isaka, o mpoditše, Morena, gore ke boele nageng ya gešo le go meloko ya gešo, gomme o tla dira gore tšohle di ntshepelele gabotse. ₁₁Ga ke swanelwe ke botho bjohle le potego ye o ntiretšego yona, nna, mohlanka wa gago. Ke tshetše Jordane ke se ne selo ge e se lepara fela, gomme bjale ke boile le dihlopha tše pedi tše. ₁₂Ke a rapela, mphološe go Esau, mogolwake. Ke boifa gore o tlilo re hlasela gomme a re fediša ka moka, le bona basadi le bana. ₁₃Gopola gore o nkholofeditše gore tšohle di tla ntshepelela gabotse, le gore o tla mpha ditlogolo tše ntši go feta tše motho a ka di balago, tše ntši bjalo ka dithorwana tša lešabašaba lebopong la lewatle.”

_14-16Jakobo o ile a lala a robetše fao, gomme mosong wa le le latelago a kgethela Esau, mogolwagwe, diloba diruiweng tša gagwe: dipudi tša ditshadi tše makgolo a mabedi le diphooko tše masome a mabedi, ditshelau tše makgolo a mabedi, le dikgapa tše masome a mabedi, dikamela tše di amušago tše masome a mararo le bana ba tšona, dikgomo tša ditshadi tše masome a mane le dipoo tše lesome, dipokolo tša ditshadi tše masome a mabedi le tša dipholo tše lesome. ₁₇A di arola mehlape mme a bea bahlanka go hlokomela mohlape wo mongwe le wo mongwe. A re go bona: “Nketeng pele mme le tlogeleng sebaka gare ga mohlape wo mongwe le wo mongwe.” ₁₈A laela mohlanka wa mathomo a re: “Ge Esau, mogolwake, a gahlana le wena gomme a go botšiša a re: ‘Mong wa gago ke mang? O ya kae? Diruiwa tše di lego pele ga gago ke tša mang?’ ₁₉wena o mo fetole o re: ‘Ke tša mohlanka wa gago, Jakobo. O di rometše gore e be seloba go Esau, mong wa gagwe. Jakobo yena o re šetše morago.’ ” ₂₀A laela mohlanka wa bobedi ka wona mokgwa woo, le go wa boraro a realo, le bahlanka ka moka bao ba bego ba hlokometše mehlape ya gagwe a re: “Le realo ge le gahlana le Esau. ₂₁Le re: ‘Mohlanka wa gago, Jakobo, o re šetše morago.’ ” Jakobo o ile a gopola a re: “Ke tla mo utswa pelo ka diloba tše, gomme ya re ge ke gahlana naye mohlomongwe a ntebalela.” ₂₂A etiša diloba tšeo pele gomme bošego bjoo a lala mešašeng.

₂₃Bjona bošego bjoo Jakobo a tsoga, a tšea basadi ba gagwe ka babedi, le makgoba a gagwe a basadi ka mabedi, le bana ba gagwe ba lesome le o tee, gomme a tshela nokana ya Jaboko ka letšibogong. ₂₄Ge a seno ba tshediša, a tshediša le thoto yohle ya gagwe, ₂₅yena a šala ka mošola a le noši.

Ke moka monna yo mongwe a tla a katana le yena go fihlela letšatši le nyako hlaba. ₂₆Ge monna yoo a bona gore Jakobo o a mo palela, a mo itia noka gomme ya tšwa madulong. ₂₇Monna yoo a re: “Ntese ke sepele; letšatši le a hlaba.”

Jakobo a mo fetola a re: “Nka se go lese ge o sa ntšhegofatše.”

₂₈Monna yoo a mmotšiša a re: “A leina la gago ke wena mang?”

Jakobo a mo fetola a re: “Ke nna Jakobo.”

₂₉Monna yoo a re: “Leina la gago e ka se sa ba Jakobo. O katane le Modimo le batho mme o ba fentše; ka gona leina la gago e tla ba Israele.”

₃₀Jakobo a re: “Bjale mpotše la gago leina.”

Eupša monna yoo a mo fetola a re: “Ke ka lebaka lang o rata go tseba leina la ka?” Ke moka a šegofatša Jakobo.

₃₁Jakobo a re: “Ke bone Modimo ke lebantše sefahlego le yena, fela ke sa phela”; ka gona a rea felo fao leina la Penuele. ₃₂Letšatši la hlaba ge Jakobo a tloga Penuele, gomme o be a hlotša ka lebaka la noka. ₃₃Go fihlela le lehono ditlogolo tša Israele ga di je mošifa wo o lego magahlanong a noka, ka gobane ke mo mošifeng wo moo Jakobo a iteilwego gona.

₁Jesu ge a seno realo, a lebelela legodimong a re: “Tate, bjale ke nako. Utollela batho letago la ka, nna Morwago, gore le nna ke tle ke ba utollele la gago, ₂gobane o mphile maatla a go buša batho bohle, gore bohle ba o mphilego bona ke tle ke ba fe bophelo bjo bo sa felego. ₃Etse bophelo bjo bo sa felego bjo ke go tseba wena, Modimo o nnoši wa mmakgonthe, le go tseba Jesu Kriste, yo o mo romilego. ₄Ke utolletše ba lefaseng letago la gago ka go phetha modiro wo o bego o ntaetše gore ke o phethe. ₅Tate, bjale a e be wena o utollelago batho la ka letago o le gona moo o lego gona, lona letago lela ke bego ke na le lona le wena mola lefase le sešo la hlolwa.

₆“Ke go tsebagaditše go ba o mphilego bona o ba kgetholotše go ba lefase. E be e le ba gago, wa mpha bona. Ba phethile tše o bego o ba laetše tšona, ₇gomme bjale ba a tseba gore tšohle tše o mphilego tšona ka nnete ke tša go tšwa go wena. ₈Ke ba boditše tše o rilego ke ba botše tšona, gomme ba dumela; ba a tseba gore ka nnete ke tšwa go wena, ebile ba a dumela gore ke wena o nthomilego.

₉“Ke rapelela bona; ga ke rapelele ba lefase, ke rapelela ba o mphilego bona ba, ka gobane bona ke ba gago. ₁₀Etse bohle ba e lego ba ka ke ba gago, le wena bohle ba e lego ba gago ke ba ka, gomme ke tumišwa ka bona. ₁₁Nna bjale ke tla go wena; kgauswinyana ke tla be ke se sa le mo lefaseng, fela bona ba sa le mo lefaseng. Tate yo mokgethwa, o ba lote ka maatla a gago, maatla a o mphilego ona, gore ba fele ba le selo se tee boka rena. ₁₂Mola ke sa na le bona ke be ke ba lotile ka maatla a gago, maatla a o mphilego ona. Ke be ke ba šireleditše, gomme gwa se lahlege le o tee mo go bona, ge e se yo morwatahlego, gore go phethege Mangwalo a Makgethwa. ₁₃Bjale ke tla go wena, gomme ditaba tše ke di bolela ke sa le mo lefaseng, gore ba tle ba thabe thabang go etša nna. ₁₄Ke ba boditše tše o rilego ke ba botše tšona, gomme ba hloiwa ke batho ba lefase ka ge bona e se ba lefase, ba etša nna ge ke se wa lefase. ₁₅Ga se gore ke kgopela gore o ba tloše mo lefaseng; se ke se kgopelago ke gore o ba phemele go Yomobe. ₁₆Bjalo ka ge nna ke se wa lefase, le bona ga se ba lefase. ₁₇Ikgethwafaletše bona ka mantšu a gago, ona e lego a therešo; gape tše di bolelwago ke wena ke yona therešo. ₁₈Ke ba roma lefaseng boka wena mola o nthoma lefaseng. ₁₉Ka lebaka la bona ke ineela wena, gore le bona ba tle ba ineele wena ka botlalo.

₂₀“Ga ke rapelele bona fela, ke rapelela le ba ba tlago dumela go nna ka lebaka la tše ba tlago mpolela ka tšona, ₂₁gore bohle e be selo se tee. Nke ba be mo go rena, Tate, bjalo ka ge wena o le mo go nna, le nna ke le mo go wena, gore batho ba lefase ba tle ba dumele gore ke wena o nthomilego. ₂₂Ke ba file letago lela o mphilego lona, gore ba tle ba be selo se tee go etša rena ge re le selo se tee: ₂₃nna ke le mo go bona, mme wena o le mo go nna, gore ba be selo se tee ka botlalo, batho ba lefase ba tle ba tsebe ge ke romilwe ke wena, le gore ba o ba rata bjalo ka ge o rata nna.

₂₄“Tate, o mphile bona, gomme ke nyaka gore mo ke lego gona le bona ba be gona, ba bone letago la ka le o mphilego lona, gobane o nthatile lefase le sešo la hlolwa. ₂₅Tate yo a lokilego, batho ba lefase ga ba go tsebe, fela nna ke a go tseba, gomme le ba ba a tseba gore ke wena o nthomilego. ₂₆Ke ba tsebišitše wena, ebile ke tla no fela ke ba tsebiša wena, gore lerato le o nthatago ka lona le bona le ba fihlele, le nna ke be selo se tee le bona.”