To The Word – Day 7

₁Morena o ile a šegofatša Sara, bjalo ka ge a be a holofeditše, ₂gomme Sara a ima, a belegela Abrahama morwa mola Abrahama a tšofetše. Mošemanyana a belegwa ka nako yeo Modimo a bego a boletše gore o tla belegwa ka yona. ₃Abrahama a mo rea leina la Isaka. ₄Ge lesea le na le matšatši a seswai Abrahama a le bolotša, bjalo ka ge Modimo a be a mo laetše. ₅Abrahama o be a na le mengwaga ye lekgolo ge Isaka a belegwa. ₆Sara a re: “Modimo o ntlholetše lesego. Yo mongwe le yo mongwe yo a kwago taba ye o tla sega le nna.” ₇A tlaleletša ka go re: “Ke mang yo a ka bego a boditše Abrahama a re Sara o tla antšha bana? Le ge go le bjalo, ke mmelegetše morwa mola a tšofetše.”

₈Ngwana a gola, gomme ka letšatši le a tshwešwago ka lona Abrahama a dira mokete wo mogolo.

_9-10Ka letšatši le lengwe Ishmaele yoo Hagare, Moegepeta, a bego a mmelegetše Abrahama, o be a bapala le morwa wa Sara, Isaka. Sara a ba bona gomme a re go Abrahama: “Raka lekgoba le la mosetsana le morwa wa lona. Morwa wa lekgoba le ga a swanela go ja bohwa gotee le morwa wa ka, Isaka.” ₁₁Taba yeo ya nyamiša Abrahama kudu, ka gobane Ishmaele le yena e be e le morwa wa gagwe. ₁₂Eupša Modimo a re go Abrahama: “O se ke wa tshwenyega ka mošemanyana le ka lekgoba la gago, Hagare. Dira se sengwe le se sengwe seo Sara a go botšago sona, ka gobane ke ka Isaka moo o tlago ba le ditlogolo. ₁₃Fela morwa wa lekgoba le la mosetsana le yena ke tla mo fa bana ba bantši, gore e tle e be setšhaba, ka gobane le yena ke morwa wa gago.”

₁₄Ka le le latelago Abrahama a tsoga e sa le bošego, a neela Hagare dijo le lekuka la meetse. A mmeleša ngwana, a mo fa tsela. Hagare a tloga a ralala le lešoka la Beresheba. ₁₅Ge a feletšwe ke meetse, a tlogela ngwana ka fase ga mohlašana, ₁₆a yo dula fase bokgole bjo e ka bago dimetara tše lekgolo. Ka pelong a re: “Nka se kgotlelele go bona ngwana a ehwa.” Mola a dutše fao a thoma go lla.

₁₇Modimo a kwa ngwana a lla, mme morongwa wa Modimo a bolela le Hagare a le legodimong a re: “A o tshwentšwe ke eng, Hagare? O se ke wa boifa. Modimo o kwele mošemanyana a lla. ₁₈Emelela, o ye o mo kuke, o mo homotše. Ke tla dira ditlogolo tša gagwe setšhaba se segolo.” ₁₉Ke moo Modimo a mmutšego mahlo, gomme a bona sediba. A ya a tlatša lekuka lela ka meetse, a noša mošemanyana. ₂₀Modimo a ba le mošemanyana yoo ge a gola; a phela lešokeng gomme ya ba setsebi sa mosebe. ₂₁Mmagwe a mo tšeela mosadi wa Moegepeta.

₂₂Yona mehleng yeo Abimeleke a ya le Pigole, molaodi wa madira a gagwe, go Abrahama a re: “Modimo o na le wena go tšohle tše o di dirago. ₂₃Ka gona nkenele fa pele ga Modimo gore o ka se nthadie, nna le bana ba ka le ditlogolo tša ka. Ke go botegetše, ka fao ena gore le wena o tla mpotegela wa botegela le naga ye o falaletšego go yona.”

₂₄Abrahama a re: “Ke a ena.”

₂₅Gomme Abrahama a ipelaetša go Abimeleke ka sediba se bahlanka ba Abimeleke ba bego ba se thopile. ₂₆Abimeleke a re: “Ga ke tsebe gore ke mang yo a dirilego taba yeo. Ga se wa ka wa mpotša, gomme ke la mathomo ke ekwa taba yeo.” ₂₇Ke moo Abrahama a neetšego Abimeleke dihuswane le dikgomo, gomme bobedi bja bona ba dira kwano. ₂₈Abrahama a hlaola dikwanyana tše di šupago tša ditshadi mohlapeng wa gagwe, ₂₉gomme Abimeleke a mmotšiša a re: “O diretšeng taba yeo?”

₃₀Abrahama a mo fetola a re: “Tšea dikwanyana tše di šupago tše. Ka go dira seo o dumela gore ke nna ke epilego sediba se.” ₃₁Ka gona felo fao gwa bitšwa Beresheba, ka gobane ke fao bobedi bja bona ba enelanego.

₃₂Ka morago ga ge ba enelane bjalo fao Beresheba, Abimeleke le Pigole ba boela Filistia. ₃₃Abrahama a bjala mohlare wa motamariske moo Beresheba, gomme a khunamela Morena, Modimo wa go sa felego. ₃₄Abrahama o dutše moo Filistia lebaka le letelele.

₁Ka morago ga lebaka Modimo a leka Abrahama; a mmitša a re: “Abrahama!” Yena a araba a re: “Ke nna yo!”

₂Modimo a re: “Tšea morwa wa gago, yo e lego yena a nnoši, Isaka, yo o mo ratago kudu, o ye nageng ya Moria. Fao o ntirele sehlabelo sa go tšhungwa ka moka ka yena thabeng ye ke tlago go laetša yona.”

₃Ka le le latelago e sa le bošego Abrahama a phapha dikgong tša sehlabelo, a saletša pokolo ya gagwe, gomme a tloga le Isaka le bahlanka ba babedi. Ba leba felo fao Modimo a mmoditšego gona. ₄Ka letšatši la boraro Abrahama a bona felo fao a sa le kgojana. ₅Ke moo a itšego go bahlanka: “Šalang mo le pokolo ye. Nna le mošemanyana re tla fetela mola go yo rapela, mme ka morago ra boela mo go lena.”

₆Abrahama a rweša Isaka dikgong tša sehlabelo, gomme yena a swara thipa le magala a go gotša mollo. Ge bobedi bja bona ba swere tsela mmogo, ₇Isaka a re go tatagwe: “Tate!”

Tatagwe a araba a re: “Eye, ngwanaka.”

Isaka a mmotšiša a re: “Mollo le dikgong šedi, kwanyana ya sehlabelo yona e kae?”

₈Abrahama a mo fetola a re: “Modimo o tla inyakela yona, ngwanaka.” Gomme bobedi bja bona ba fela ba swere tsela mmogo.

₉Ge ba fihla felo fao Modimo a mmoditšego gona, Abrahama a aga aletare, gomme a beakanya dikgong godimo ga yona. A tlema morwa wa gagwe gomme a mmea aletareng godimo ga dikgong. ₁₀Ke moka a tšea thipa gore a mmolaye. ₁₁Eupša morongwa wa Morena a mmitša a le legodimong a re: “Abrahama, Abrahama!”

Yena a araba a re: “Ke nna yo.”

₁₂Morongwa a re: “O se gobatše mošemanyana yoo goba wa mo dira selo. Bjale ke a tseba gore o boifa Modimo, ka gobane ga se wa gana go mo neela morwa wa gago a nnoši.”

₁₃Abrahama ge a lebelela a bona kgapa e tantšwe ka sethokgwaneng ka dinaka. A ya a e tšea mme a dira sehlabelo sa go tšhungwa ka moka ka yona legatong la morwa wa gagwe. ₁₄Abrahama a rea felo fao leina la “Morena o a fa.” Gomme le lehono batho ba sa re: “Thabeng ya Morena o a fa.”

₁₅Morongwa wa Morena a bitša Abrahama la bobedi a le legodimong a re: ₁₆“Morena o re: ‘Ke ena ka nna mong gore ka ge o dirile taba ye gomme o se wa ntima morwa wa gago a nnoši, ₁₇ke tla go šegofatša kudu, ka go fa le ditlogolo tše ntši bjalo ka dinaledi tša legodimo goba dithorwana tša lešabašaba lebopong la lewatle. Ditlogolo tša gago di tla fenya manaba a tšona. ₁₈Ditšhaba tša lefase ka moka di tla nkgopela go di šegofatša bjalo ka ge ke šegofaditše ditlogolo tša gago, ka gobane o phethile taelo ya ka.’ ” ₁₉Abrahama a boela go bahlanka ba gagwe, gomme ba tloga mmogo ba ya Beresheba, mme Abrahama a dula fao.

₂₀Ka morago ga lebaka Abrahama a kwa gore le Milka o belegetše Nahoro, ngwanabo, bana: ₂₁Utse, wa mathomo, le Buse, ngwanabo, le Kemuele, tatagoAramo, ₂₂le Kesede le Haso le Pildashe le Jidelafo le Bethuele, ₂₃tatagoRebeka. Milka o belegetše Nahoro, ngwanaboAbrahama, barwa bao ba seswai. ₂₄Reuma, motlabo wa Nahoro, yena o belege Tebage le Gahama le Tahashe le Maaka.

₁Sara o ile a phela mengwaga ye lekgolo le masome a mabedi le metšo ye e šupago. ₂O hwetše Kiriate-Arba, e lego Hebrone, nageng ya Kanana, mme Abrahama a mo ilela.

₃O ile a tloga felo fao setopo sa mosadi wa gagwe se bego se le gona, gomme a ya go Bahete a re: ₄“Ke nna mošele le mofaladi gare ga lena; nthekišetšeng naga gore ke kgone go boloka mosadi wa ka.”

₅Bona ba mo fetola ba re: ₆“Hle, re theetše, morena. O mokgomana yo maatla gare ga rena; boloka mosadi wa gago lebitleng le le phalago mabitla a re nago le ona. Mo gare ga rena ga go yo a ka se thabelego go go fa lebitla gore o boloke mohu wa gago.”

₇Ke moo Abrahama a obamilego pele ga bona, ₈a re: “Ge le ntumelela gore ke boloke mosadi wa ka mo, hle, mpoleleleng le Efrone, morwa wa Tsohare, ₉gore a nthekišetše lewa la Makapela leo le lego ka lešing la tšhemo ya gagwe. Le mo kgopeleng gore a nthekišetše lona ka theko ye e le lekanego le le gona mo, gore e tle e be felo ga ka ga polokelo.”

₁₀Efrone yena o be a dutše le Bahete ba bangwe kgorong ya motse; a fetola a kwewa ke yo mongwe le yo mongwe fao a re: ₁₁“Theetša, morena, ke tla go fa tšhemo ka moka le lewa leo le lego go yona. Mo pele ga batho ba gešo ke tla go fa yona gore o kgone go boloka mosadi wa gago.”

₁₂Eupša Abrahama a obama pele ga badudi ba moo, ₁₃a araba Efrone bohle ba ekwa a re: “Hle, anke o ntheetše. Ke nyaka go e reka. Amogela tefelo ya ka, gomme ke tla boloka mosadi wa ka moo.”

₁₄Efrone a mo fetola a re: ₁₅“Morena, nke o ntheetše. Na re ka napa ra hlwa re ngangišana ka tšhemo ye e jago fela dipapetlana tša silibera tše makgolo a mane? Boloka mosadi wa gago go yona.” ₁₆Abrahama a dumela, mme a ela tšhelete ye Efrone a e boletšego a kwewa ke batho – dipapetlana tša silibera tše makgolo a mane, go ya ka dikeloboima tša semmušo tše di šomišwago ke bagwebi.

₁₇Ke ka moo tšhemo yela e bego e le ya Efrone kua Makapela, ka bohlabela bja Mamre, e bilego ya Abrahama ka gona. E be e le tšhemo le lewa leo le bego le le go yona le mehlare ka moka go fihlela lešing la tšhemo. ₁₈Thekišetšano yeo e ile ya phethwa pele ga Bahete ka moka bao ba bego ba le gona kgorong.

₁₉Ka morago ga moo Abrahama a yo boloka mosadi wa gagwe, Sara, ka leweng leo nageng ya Kanana. ₂₀Ka gona tšhemo yeo e bego e le ya Bahete le lewa le le lego go yona ya ba serapa sa Abrahama sa go bolokela bahu.

₁Bjale Abrahama o be a tšofetše kudu, gomme Morena o be a mo šegofaditše dilong ka moka. ₂A bolela le mohlanka wa gagwe yo mogolo yo a bego a hlokometše tšohle tše a bego a na le tšona a re: “Nke o tsenye seatla sa gago gare ga dirope tša ka, o ene. ₃Ke nyaka go go eniša ka Morena, Modimo wa legodimo le lefase, gore o ka se kgethele morwa wa ka mosadi gare ga batho ba ba mo Kanana. ₄O boele nageng ye ke tswetšwego go yona, gomme o tšeele morwa wa ka, Isaka, mosadi melokong yešo.”

₅Eupša mohlanka a mmotšiša a re: “Bjale ge mosetsana yoo a ka se dumele go tloga ga gabo go tla le nna nageng ye, na ke bušetše morwa wa gago nageng yela o tšwago go yona?”

₆Abrahama a mo fetola a re: “Morwa wa ka yena o se ke wa ba wa leka go mmušetša kua! ₇Morena, Modimo wa legodimo, o nntšhitše lapeng la tate le nageng ya gešo, gomme a nkenela gore o tla neela ditlogolo tša ka naga ye. O tla roma morongwa wa gagwe a go etelela pele, gore o nyalele morwa wa ka mosadi fao. ₈Ge mosetsana yoo a ka gana go tla le wena, o tla bofologa kenong ye. Morwa wa ka yena o se ke wa ba wa mmušetša kua.” ₉Ka fao mohlanka yoo a bea seatla gare ga dirope tša Abrahama, mong wa gagwe, gomme a ena gore o tla dira seo Abrahama a se kgopetšego.

₁₀Mohlanka yoo a tšea dikamela tše lesome tša mong wa gagwe, a tšea le dimpho tša mehutahuta, gomme a ya motseng wa gaboNahoro kua Mesopotamia. ₁₁Ge a fihla a khunamiša dikamela sedibeng ka ntle ga motse. E be e le ka merithi ye megolo, nako yeo basadi ba bego ba etla go ga meetse ka yona. ₁₂A rapela a re: “Morena, Modimo wa mong wa ka, Abrahama, mphe mahlatse lehono mme o botegele mong wa ka. ₁₃Ke nna yo mo sedibeng seo makgarebe a motse wo a tlago tla go ga meetse. ₁₄Ke tla re go yo mongwe wa bona: ‘Hle, sekamiša moeta wa gago gomme o nnoše meetse.’ Ge a ka re: ‘Nwaa, gomme ke tla gela le dikamela tša gago meetse,’ a e be yena yoo o mmeetšego mohlanka wa gago, Isaka. Ge taba ye e ka direga, ke tla tseba gore o botegetše mong wa ka.”

₁₅A sešo a fetša go rapela, Rebeka a fihla a beile moeta wa meetse legetleng. Yena e be e le morwedi wa Bethuele, yo e bego e le morwa wa ngwanaboAbrahama, Nahoro, le mosadi wa gagwe, Milka. ₁₆E be e le mosetsana yo mobotse kudu, gomme a se a ke a robala le monna. A theogela sedibeng, a tlatša moeta wa gagwe mme a rotoga. ₁₇Mohlanka yola a kganyelela go mo gahlanetša gomme a re: “Hle, nnoše meetse moeteng wa gago.”

₁₈Mosetsana a re: “O ka nwa, morena,” gomme ka bjako mosetsana a rola moeta legetleng mme a o swareletša ge mohlanka a enwa. ₁₉Ge a kgotšwe, mosetsana a re: “Ke tla gela le dikamela tša gago meetse gore di nwe di kgolwe.” ₂₀Ka bjako a tšhollela meetse ka legopong la diruiwa mme a kganyelela sedibeng go yo di gela gape, go fihlela a nošitše dikamela tša mohlanka yola ka moka. ₂₁Monna yoo a fela a mo lebeletše a homotše go bona ge e ka ba Morena o mo atlile leetong la gagwe.

₂₂Ge mosetsana a feditše, monna yola a ntšha mphiri wa nko wa gauta wa theko ye kgolo, a o khwamela nkong ya mosetsana, a mo rweša le maseka a mabedi a magolo a gauta matsogong. ₂₃A re go mosetsana yoo: “Hle, mpotše gore o morwedi wa mang. A go na le marobalo ngwakong wa tatago moo re ka robalago gona?”

₂₄Mosetsana a mo fetola a re: “Ke nna morwedi wa Bethuele, morwa wa Nahoro le Milka. ₂₅Go na le ditlhaka le furu ye ntši ka gešo, le marobalo a gona.”

₂₆Ke moo monna yoo a obamego, a khunamela Morena ₂₇a re: “A go retwe Morena, Modimo wa mong wa ka, Abrahama, yo a botegetšego go phetha se a se tshephišetšego mong wa ka. Morena o ntlišitše go meloko ya mong wa ka.”

₂₈Mosetsana a kganyelela ngwakong wa mmagwe, a yo ba botša ditaba tšeo. ₂₉Rebeka o be a na le kgaetšedi yo leina la gagwe e bego e le Labane, gomme yena Labane a kganyelela ka ntle a ya sedibeng seo mohlanka wa Abrahama a bego a le go sona. ₃₀O be a bone mphiri wola wa nko le maseka matsogong a kgaetšediagwe, gomme a mo kwele ge a bolela tšeo monna yoo a mmoditšego tšona. A ya go mohlanka wa Abrahama yoo a bego a eme moo dikameleng tša gagwe sedibeng, ₃₁gomme a re: “A re ye le nna ka gae, wena mošegofatšwa wa Morena. O reng o eme ka ntle? Ke go lokišeditše ka ngwakong wa ka, le sebaka sa dikamela tša gago ke se lokišitše.”

₃₂Ka gona monna yoo a tsena ka ngwakong, gomme Labane a fološa merwalo dikameleng, a di fa mahlaka le furu. Ka morago ga moo a tlišetša mohlanka wa Abrahama le banna ba gagwe meetse a go hlapa maoto. ₃₃Ge ba mo tlišetša dijo a re: “Nka se je ke sešo ka bolela se ke se tletšego.”

Labane a re: “Se bolele.”

₃₄Monna yoo a re: “Ke nna mohlanka wa Abrahama. ₃₅Morena o šegofaditše mong wa ka kudu, gomme ya ba mohumi. O mo file mehlape ya dihuswane, le ya dikgomo, silibera, gauta, makgoba a banna le a basadi, dikamela le dipokolo. ₃₆Sara, mosadi wa mong wa ka, o mmelegetše morwa mola yena Sara a šetše a tšofetše. Mong wa ka o file morwa yoo tšohle tše e lego tša gagwe. ₃₇Mong wa ka o ile a nkeniša gore ke phethe taelo ya gagwe mme a re: ‘O se ke wa nyalela morwa wa ka mosadi go basetsana ba naga ye ya Kanana, ₃₈eupša o ye go batho ba gabotate, go meloko ya gešo, mme fao o nyalele morwa wa ka mosadi.’ ₃₉Ka botšiša mong wa ka ka re: ‘Ke direng ge mosetsana a ka se dumele go tloga le nna?’ ₄₀Yena a mphetola a re: ‘Morena yo ke mo theetšego ka mehla o tla roma morongwa wa gagwe a ya le wena, mme a go fa mahlatse. O tla tšeela morwa wa ka mosadi go batho ba gešo, go lapa la tate. ₄₁Ge o ka ya go meloko ya gešo gomme bona ba gana go go neela mosadi, gona o tla bofologa go yona.’

₄₂“Ge ke fihla sedibeng lehono, ke ile ka rapela ka re: ‘Morena, Modimo wa mong wa ka, Abrahama, hle, mphe mahlatse go seo ke se dirago. ₄₃Ke nna yo mo sedibeng. Ge kgarebe e tlilo ga meetse, ke tla re go yona: “Hle, nnoše meetse moeteng wa gago.” ₄₄Ge a ka mphetola a re: “O ka nwa mme ke tla gela le dikamela tša gago meetse,” a e be yena yo o mmeetšego go ba mosadi wa morwa wa mong wa ka.’ ₄₅Ke sešo ka fetša go rapela ka pelong, Rebeka a fihla a beile moeta legetleng, a theogela sedibeng go yo ga meetse. Ka re go yena: ‘Hle, nnoše meetse.’ ₄₆Ka bjako a rola moeta wa gagwe legetleng a re: ‘O ka nwa, mme ke tla noša le dikamela tša gago.’ Ke ile ka nwa, gomme yena a noša dikamela. ₄₇Ka mmotšiša ka re: ‘O morwedi wa mang?’ Yena a mphetola a re: ‘Ke nna morwedi wa Bethuele, morwa wa Nahoro le Milka.’ Ke moka ka mo rweša mphiri nkong le maseka matsogong. ₄₈Ka obama, ka khunamela Morena. Ka reta Morena, Modimo wa mong wa ka, Abrahama, yo a ntshepedišitšego ka tsela ye e lokilego gore ke tle go moloko wa mong wa ka, moo ke hweditšego morwedi wa gagwe yo a tlago ba mosadi wa morwa wa mong wa ka. ₄₉Bjale, ge le ikemišeditše go direla mong wa ka lerato le ka potego, hle, mpotšeng; ge le se la ikemišetša, le gona mpotšeng, gomme nna ke tla bona gore ke tla dira eng.”

₅₀Labane le Bethuele ba fetola ba re: “Ka ge taba ye e etšwa go Morena, e ka se be rena re tšeago sephetho. ₅₁Rebeka šo; mo tšee o sepele le yena, e be mosadi wa morwa wa mong wa gago, bjalo ka ge Morena a boletše.” ₅₂Ge mohlanka wa Abrahama a ekwa taba ye, o ile a itahlela fase a khunamela Morena. ₅₃A ntšha dikgabišo tša silibera le tša gauta, le diaparo, a di fa Rebeka. A fa le kgaetšediagwe le mmagwe dimpho tša theko ye kgolo.

₅₄Ka morago ga fao mohlanka wa Abrahama le banna ba ba bego ba na le yena ba ja, ba nwa, gomme ba robala moo. Ge ba tsoga e sa le bošego a re: “A ke boele go mong wa ka.”

₅₅Fela kgaetšedi ya Rebeka le mmagwe ba re: “A mosetsana a dule le rena matšatši a e ka bago a lesome, a kgone a sepela.”

₅₆Eupša mohlanka a re: “Le se ke la re diegiša. Morena o atlegišitše leeto la ka; a ke boele go mong wa ka.”

₅₇Ba fetola ba re: “A re bitšeng mosetsana gomme re kweng gore yena o reng.” ₅₈Ka gona ba bitša Rebeka, ba mmotšiša ba re: “A o nyaka go sepela le monna yo?”

A ba fetola a re: “Ee.”

₅₉Ke moo ba lesitšego Rebeka le mofepi wa gagwe ba tloga le mohlanka wa Abrahama le banna ba gagwe. ₆₀Gomme ba šegofatša Rebeka ba re:

₆₂Isaka o be a tlile lešokeng la “Sediba sa Mophelaampona”, gomme o be a dula seleteng sa ka borwa bja Kanana. ₆₃O be a tšwetše mašemong e šetše e le mantšiboa a ikotlolla dinao, gomme a bona dikamela di rotoga. ₆₄Ge Rebeka a bona Isaka, a fologa kamela ya gagwe ka pela, ₆₅a botšiša mohlanka wa Abrahama a re: “Monna yola a lego mašemong a tlago go rena ke mang?”

Mohlanka a mo fetola a re: “Ke mong wa ka.” Ka gona Rebeka a tšea lešira la gagwe a ikhurumetša sefahlego.

₆₆Mohlanka a botša Isaka tšohle tše a di dirilego. ₆₇Ke moo Isaka a tsentšego Rebeka ka mošašeng woo Sara, mmagwe, a bego a dula ka go wona, gomme Rebeka ya ba mosadi wa gagwe. Isaka a rata Rebeka, mme a homotšega ka ge a be a lahlegetšwe ke mmagwe.

₁E rile ge go šetše matšatši a a selelago gore Monyanya wa Paseka o fihle, Jesu a ya Bethania, motsaneng wa gaboLasarose yola Jesu a bego a mo tsošitše bahung. ₂Gona moo ba mo apeela dijo, gomme Marta a solela baeng. Lasarose e be e le yo mongwe wa bao ba bego ba dutše le Jesu dijong. ₃Ke ge Maria a ntšha sedibelo sa senkgabose se se sego sa tswakwa sa theko ye kgolo sa narete, a tšhela Jesu maoto ka sona, a mo phumola ka moriri. Ntlo yohle ya tlala monkgo wa senkgabose seo. ₄Yo mongwe wa barutiwa ba Jesu yo ba rego ke Judase Iskariote, yena yola a bego a eya go mo eka, a re: ₅“Ke eng senkgabose se se sa ka sa rekišwa dipapetlana tše makgolo a mararo tša silibera, gomme tšhelete ya gona ya fiwa badiidi?” ₆Etse ge a realo e be e se gore badiidi o na le taba nabo, e be e le ka lebaka la ge e le lehodu. Sekhwama sa tšhelete se be se swarwa ke yena, gomme a fela a iša seatla ka go sona.

₇Jesu a re: “Mo tlogele! Senkgabose se e be e le sa go tlo ntlotša mohla ke bolokwa. ₈Gobane badiidi le na le bona ka mehla; nnaena le ka se be le nna ka mehla.”

₉Bajuda ba bantši ba ile ba kwa gore Jesu o Bethania, gomme ba ya gona, e sego ka lebaka la Jesu fela, eupša le gore ba bone Lasarose yo Jesu a bego a mo tsošitše bahung. ₁₀Ka gona baprista ba bagolo ba lakana gore ba tle ba bolaye le Lasarose, ₁₁ka gobane Bajuda ba bantši ba be ba šetše ba ba tlogela, ba dumela go Jesu.

₁₂Ka tšatši le le latelago lešaba le lentši le le bego le tlile Monyanyeng wa Paseka la kwa gore Jesu o tla mono Jerusalema. ₁₃Ke moka ba rema makala a mepalema ba ya go mo gahlanetša, ba phepela ba re: “A go tumišwe Modimo! A go retwe yo a tlago a romilwe ke Morena! A go retwe yena Kgoši ya Israele!”

₁₄Jesu a re go bona pokolwana a e namela, bjalo ka ge go ngwadilwe ka Mangwalong a Makgethwa gwa thwe:

₁₆Ka nako yeo barutiwa ba gagwe taba tše ba be ba sa di kwešiše; fela e rile ge a seno tsoga bahung a rotogetše legodimong, ya ba gona ba elelwago gore se batho ba mo diretšego sona ke se se ngwadilwego ka Mangwalong a Makgethwa.

₁₇Batho bale ba bego ba na le Jesu ge a goelela Lasarose ka lebitleng a mo tsoša a hwile ba be ba ile ba bega taba ye. ₁₈Ke ka lebaka leo lešaba le mo gahlaneditšego, e le ge le kwele gore o dirile mohlolo woo. ₁₉Ke moka Bafarisei ba botšana ba re: “Gape le ka se mo kgone. Bonang, batho ka moka ba mo šetše morago!”

₂₀Mo go ba ba bego ba tlile Jerusalema go khunamela Modimo ka nako ya monyanya go be go na le Bagerike ba bangwenyana. ₂₁Bona bao ba ya go Filipi wa go dula Betsaida kua Galilea, ba mo kgopela ba re: “Morena, re nyaka go bona Jesu.”

₂₂Filipi a ya go botša Andrease, gomme Andrease le Filipi ba ya go botša Jesu. ₂₃Ke ge Jesu a ba fetola a re: “Bjale nako ya gore letago la Morwamotho le bonagale e fihlile. ₂₄Ruri, ruri, ke le botša gore ge thoro ya lebele e ka se re go lahlelwa ka mobung ya hwa, e tla no šima e le tee. Fela ge e ka hwa e tla tšwa dithoro tše dintši. ₂₅Yo a ithatago go feta ka mo a ratago nna, o tla lahlega; eupša yo a sa ithatego mo lefaseng go feta ka mo a ratago nna, yena o tla ba le bophelo bjo bo sa felego. ₂₆Yo a ratago go ntlhankela, a ntatele, gomme ka ge e le mohlanka wa ka, mo ke lego gona le yena o tla ba gona. Ge motho a ntlhankela Tate o tla mo godiša.”

₂₇“Bjale ke ikwa ke huduegile moyeng; fela ke ge nka reng? Kgane nka re: ‘Tate, mphološe mo nakong ye’? Fela a ke se realo, ka gobane ke sona se ke se tletšego – go hlokofatšwa ka yona nako ye. ₂₈Tate, bonagatša letago la gago!”

Gwa nama gwa kwagala lentšu le etšwa legodimong le re: “Ke le bonagaditše, ebile ke sa tlilo le bonagatša.”

₂₉Lešaba la batho ba ba bego ba eme moo ge le ekwa lentšu leo la re: “E a duma!” Ba bangwe ba re: “Ke morongwa o bolela le yena!”

₃₀Jesu a re go bona: “Ga se ka lebaka la ka ge lentšu le le kwagala, ke ka lebaka la lena. ₃₁Bjale ke nako ya go ahlolwa ga batho ba lefase; bjale mmuši wa lefase le o tlilo rakwa. ₃₂Ge ke phagamišwa mo lefaseng, ke tla gogela batho bohle go nna.” ₃₃Ge a realo o be a šupa lehu le a yago go le hwa.

₃₄Lešaba la mo fetola la re: “Rena mo melaong ya Moshe re kwa gore Mesia o tla phela go ya go ile. Bjale wena o reng o re Morwamotho o swanetše go phagamišwa? Kgane Morwamotho yo ke mang?”

₃₅Jesu a ba fetola ka go re: “Le sa tlilo ba le seetša sebakanyana. Ka gona, phelang go sona se sa le mo go lena, gore le se tlo welwa ke leswiswi, gobane mophatšaleswiswi ga a tsebe mo a yago gona. ₃₆Ka fao, dumelang go Mohlolaseetša a sa le mo go lena, gore le be batho ba ba phelago seetšeng.”

Jesu ge a seno realo a tloga a yo iphihlela bona.

₃₇Le ge a be a dirile mehlolo ye mekaaka ba mo lebeletše, ba ile ba no se dumele go yena; ₃₈e le gore go phethege tše di boletšwego ke moprofeta Jesaya mola a re:

₃₉Ke ka lebaka leo ba paletšwego ke go dumela, gobane Jesaya o boletše le go re:

₄₁Jesaya ge a realo e be e le ka ge a bona letago la Jesu mme a bolela ka yena.

₄₂Le ge go le bjalo, batho ba bantši, ešita le mo go baetapele ba Bajuda, ba be ba dumela go Jesu, fela ka lebaka la Bafarisei ba be ba sa ipege, gore ba se rakwe ka sinagogeng. ₄₃Ba be ba kganyoga go kgahla batho go feta go kgahla Modimo.

₄₄Jesu a bolelela godimo a re: “Yo a dumelago go nna ga se gore o dumela go nna, o dumela go yo a nthomilego. ₄₅Yo a bonago nna o bona yo a nthomilego. ₄₆Ke tlile mo lefaseng ke le seetša, gore mang le mang yo a dumelago go nna a se ke a dula leswiswing. ₄₇Ge motho a ka re a kwele tše ke di boletšego a se di phethe, nna nka se mo tšwe, gobane ga se ka tlela go tšwa batho ba lefase, ke tletše go ba phološa. ₄₈Yo a nkganago, a ganago le tše ke di bolelago, o šetše a na le se se tlago mo tšwa: tše ke di boletšego ke tšona tše di tlago mo tšwa ka tšatši la mafelelo. ₄₉Gobane ga se ka bolela tše ke ithometšego tšona, eupša ke boletše tše ke di laetšwego ke Tate yo a nthomilego. ₅₀Gomme ke a tseba gore tše a di laetšego di fa motho bophelo bjo bo sa felego. Ka gona tše ke di bolelago ke tše ke di laetšwego ke Tate.”

₁Pele ga ge Monyanya wa Paseka o lewa ke ge Jesu a šetše a tseba gore nako ya gore a tloge mo lefaseng a ye go Tatagwe e fihlile. Ka mehla o be a be a rata ba gagwe ba mo lefaseng, gomme o ile a fela a ba rata go fihlela mafelelong.

₂Ge ba le dijong tša go lalela ke ge Sathane a šetše a thetsitše Judase, morwa wa Simone Iskariote, gore a eke Jesu. ₃Jesu yena o be a tseba gore Tatagwe o gafetše dilo ka moka diatleng tša gagwe; o be a tseba le gore o tšwa go Modimo gomme bjale o boela go yena. ₄A emelela ba le dijong, a apola seaparo sa gagwe, a tšea lešela a ipofa letheka ka lona. ₅A tšhela meetse ka lešapelong, a thoma go hlapiša barutiwa ba gagwe maoto, a a phumola ka lešela lela a ipofilego letheka ka lona. ₆Ge a fihla go Simone Petrose, Simone Petrose a mmotšiša a re: “Morena, na nna nka nama ka hlapišwa ke wena maoto?”

₇Jesu a mo fetola a re: “Gonabjale se ke dirago ga o se kwešiše, o tla se lemoga ka morago.”

₈Petrose a re: “Nna o ka se tsoge o ntlhapišitše maoto le ka mohla!”

Jesu a mo fetola a re: “Ge ke sa go hlapiše maoto, o ka se sa ba morutiwa wa ka.”

₉Simone Petrose a mo fetola a re: “Morena, gona se ntlhapiše maoto fela; ntlhapiše le diatla le hlogo!”

₁₀Jesu a re: “Yo a hlapilego mmele o hlwekile hlwekihlweki, gomme ga go nyakege gore a hlape gape a sa tšo hlapa, ge e se maoto. Lena le hlwekile, fela e sego ka moka.” ₁₁Ge a realo e be e le ge a tseba gore ke mang yo a tlilogo mo eka. Ke ka lebaka leo a rilego: “Ga se la hlweka ka moka.”

₁₂Ge a seno ba hlapiša maoto, a buša a apara seaparo sela sa gagwe, a boela madulong a gagwe dijong, gomme a ba botšiša a re: “Na se ke sa tšogo le dira sona le a se kwešiša? ₁₃Etse le mpitša Moruti le Morena. Gomme ge le realo le a rereša, ka gobane ke nnaena. ₁₄Bjale ge nna ke lego Morena le Moruti wa lena ke le hlapišitše maoto, le lena go a swanela gore le hlapišane maoto. ₁₅Gape ke napile ke le bontšhitše tsela gore le lena le tle le dire se ke le dirilego sona. ₁₆Ruri, ruri, ke le botša gore ga go mohlanka yo a fetago mong wa gagwe, le moromiwa ga a gona yo a fetago moromi wa gagwe. ₁₇Bjale ka gore šemo taba tše le a di tseba, ge le ka di phetha le tla be le le ba lehlogonolo.

₁₈“Ga ke re lena ka moka; gape ba ke ba kgethilego ke a ba tseba. Fela Mangwalo a Makgethwa a a rego: ‘Yo a jago le nna dijo o ntlhanametše,’ a swanetše go phethega. ₁₉Taba ye ke le botša yona gonabjale e sešo ya direga, gore mohla e direga le dumele gore ke ‘KE NNA’. ₂₀Ruri, ruri, ke le botša gore yo a amogelago yo ke mo romilego, le nna o a nkamogela; le yo a amogelago nna, o amogela le yo a nthomilego.”

₂₁Jesu ge a seno realo a ikwa a huduegile moyeng, gomme a bolela phaa a re: “Ruri, ruri, ke le botša gore yo mongwe mo go lena o tlilo nkeka.”

₂₂Barutiwa ba gagwe ba lebelelana, ba tlabilwe ke gore na o ra mang. ₂₃Yo mongwe wa bona, yo Jesu a bego a mo rata kudu, o be a dutše kgauswi le yena. ₂₄Simone Petrose a mo kgwatša, a re a botšiše Jesu gore na o ra mang.

₂₅Morutiwa yoo ke ge a sekamela go Jesu, a mmotšiša a re: “E ka ba ke mang, Morena?”

₂₆Jesu a mo fetola a re: “Ke yo ke tla rego go hlosa ka nthathana ya senkgwa ka mo nea.” Ka gona a tšea nthathana ya senkgwa, a hlosa morong ka yona, a e nea Judase, morwa wa Simone Iskariote. ₂₇Judase ge a seno tšea nthathana yeo, Sathane ke ge a mo tsena. Jesu a re go yena: “Se o se dirago itlhaganele o se dire!” ₂₈Ga go le o tee wa bao ba bego ba le moo dijong yo a ilego a kwešiša gore Jesu o mmoletšang bjalo. ₂₉Ka ge Judase e be e le yena a ba swarelago tšhelete, barutiwa ba bangwe ba Jesu ba ile ba hloma nke Jesu o mmoditše gore a ye go reka tše ba tlago di nyaka monyanyeng, goba a fe bahloki se sengwenyana.

₃₀Judase o rile go tšea nthathana yeo ya senkgwa a tšwela ka ntle. E be e le bošego.

₃₁Ge Judase a seno tšwa, Jesu a re: “Bjale ke gona batho ba tlilogo utollelwa letago la Morwamotho; ba tlilo utollelwa le letago la Modimo ka yena Morwamotho. ₃₂Gomme ge letago la Modimo le utollwa ka yena, gona Modimo o tla utollela batho letago la yena Morwamotho ka yena mong, a ba utollela lona gonabjale. ₃₃Bana ba ka, nka se sa ba le lena go iša kae. Le tla nnyaka, gomme gonabjale ke le botša se ke se boditšego baetapele ba Bajuda ka re: ‘Mo ke yago gona lena le ka se kgone go fihla.’ ₃₄Ke le fa molao wo mofsa, wa gore le ratane. Bjalo ka ge ke le ratile, le lena le rataneng. ₃₅Ge le ratana ke mo batho ba tlago tseba gore le barutiwa ba ka.”

₃₆Simone Petrose a mmotšiša a re: “Morena, o ya kae?”

Jesu a mo fetola a re: “Ga bjale mo ke yago gona o ka se ntatele, o tla ntatela ka moso.”

₃₇Petrose a mmotšiša a re: “Morena, gonabjale ke tla be ke šitišwa ke eng go go latela? Nna ke ikemišeditše le go go hwela.”

₃₈Jesu a re: “O ra gore ka nnete o ikemišeditše go nkhwela? Ruri, ruri, ke go botša gore pele ga ge mokoko o lla o tla be o ntatotše gararo.”