To The Word – Day 6

₁Ge Abramo a na le mengwaga ye masome a senyane a metšo ye senyane, Morena o ile a iponagatša go yena mme a re: “Ke nna Modimo Ramaatlaohle. O ntheetše mme ka mehla o dire se se lokilego. ₂Ke tla dira kgwerano ya ka le wena, mme ka go fa ditlogolo tše ntšintši.” ₃Abramo a itahlela fase ka sefahlego, mme Modimo a re: ₄“Še kgwerano ye ke e dirago le wena: O tla ba tatagoditšhaba tše ntši. ₅Leina la gago e ka se hlwe e le Abramo, eupša e tla ba Abrahama, ka gore ke go dira tatagoditšhaba tše ntši. ₆Ke tla go fa ditlogolo tše ntšintši ya ba ditšhaba, gomme tše dingwe tša tšona e tla ba dikgoši.

₇“Ke tla dira kgwerano le wena le ditlogolo tša gago tša meloko ya ka moso, ya ba kgwerano ya neng le neng, ya go re ke tla ba Modimo wa gago le wa ditlogolo tša gago. ₈Ke tla fa wena le ditlogolo tša gago yona naga ye bjale o lego mofaladi go yona. Naga ka moka ya Kanana e tla ba ya ditlogolo tša gago go ya go ile, gomme ke tla ba Modimo wa bona.”

₉Modimo a re go Abrahama: “Le wena o botegele kgwerano ya ka le wena, wena gotee le ditlogolo tša gago tša meloko ya ka moso. ₁₀Sese sešupo sa kgwerano ya ka le wena, wena le ditlogolo tša gago: Motho mang le mang wa monna gare ga lena a bolotšwe. _11-12Go tloga bjale le bolotše lesea le lengwe le le lengwe la mošemane ge le na le matšatši a seswai, gotee le makgoba a a tswalwago malapeng a lena, le makgoba a le a rekago go bašele. Se e tla ba sešupo sa kgwerano ya ka le lena. ₁₃Yo mongwe le yo mongwe a bolotšwe. Leswao le la mmeleng e tla ba sešupo sa kgwerano ya ka le lena ya neng le neng. ₁₄Mošemane goba monna ofe le ofe yo a sego a bolotšwa e ka se hlwe e le yo mongwe wa setšhaba sa ka, ka gore ga se a botegela kgwerano ya ka.”

₁₅Modimo a re go Abrahama: “O se ke wa hlwa o bitša mosadi wa gago Sarai; go tloga bjale leina la gagwe ke Sara. ₁₆Ke tla mo šegofatša gomme ke tla go fa morwa ka yena. Ke tla mo šegofatša gomme e tla ba mmagoditšhaba, mme go tla ba le dikgoši gare ga ditlogolo tša gagwe.”

₁₇Abrahama a itahlela fase ka sefahlego a sega ka pelong a re: “Na monna wa mengwaga ye lekgolo a ka tswala ngwana? A Sara a ka ba le ngwana a na le mengwaga ye masome a senyane?” ₁₈Abrahama a re go Modimo: “Hle, a Ishmaele e no ba mojalefa wa ka.”

₁₉Eupša Modimo a re: “Aowa, mosadi wa gago, Sara, o tla go belegela morwa gomme o mo ree leina la Isaka. Ke tla botegela kgwerano ya ka le yena le ditlogolo tša gagwe. Ke kgwerano ya go ya go ile. ₂₀Ke kwele kgopelo ya gago mabapi le Ishmaele, ka fao ke tla mo šegofatša ka mo fa bana ba bantši le ditlogolo tše ntši. E tla ba tatagobabuši ba lesome le metšo ye mebedi, mme ke tla dira ditlogolo tša gagwe setšhaba se segolo. ₂₁Eupša ke tla botegela kgwerano ya ka le morwa wa gago, Isaka, yo a tlago belegwa ke Sara ka tšona nako tše ngwaga wo o tlago.” ₂₂Ge Modimo a feditše go bolela le Abrahama, o ile a mo tlogela, a rotoga.

₂₃Ka lona letšatši leo Abrahama a phetha taelo ya Modimo, a bolotša morwa wa gagwe, Ishmaele, le bašemane le banna ka moka ba lapa la gagwe, gotee le makgoba a a tswetšwego lapeng la gagwe, le ao a a rekilego. ₂₄Abrahama o be a na le mengwaga ye masome a senyane a metšo ye senyane ge a bolotšwa, ₂₅mme morwa wa gagwe, Ishmaele, o be a na le mengwaga ye lesome le ye meraro. ₂₆Bobedi bja bona ba boloditšwe ka letšatši le tee, ₂₇gotee le makgoba ohle a Abrahama.

₁Morena o ile a iponagatša go Abrahama mehlareng ye mekgethwa ya Mamre. Abrahama o be a dutše mojakong wa mošaša wa gagwe nakong ya ge letšatši le fiša tšhiritšhiri. ₂Ya re ge a iša mahlo a bona banna ba bararo ba eme moo. Ge a ba bona a kganyelela go ba gahlanetša. A obamela fase, ₃a re: “Barena, hle, se mpheteng, nna, mohlanka wa lena. ₄A ke yo le tšeela meetse le tle le hlape maoto; le ka khutša ka fase ga mohlare wo. ₅Ke tla ba ka le tlela le dijonyana tša go le lapološa, le tsebo tšwela pele le leeto la lena, ka gobane le fetile mo lapeng la mohlanka wa lena.”

Ba mo fetola ba re: “Go lokile.”

₆Abrahama a akgofela mošašeng a re go Sara: “Akgofa o tšee mokotlana wa bupi bja mathume, o bo dube, o apee dinkgwa.” ₇Ke moo a kitimetšego mohlapeng mme a kgetha namane ya lerojana ya go nona, a e neela mohlanka, mme yoo a itlhaganela a e hlaba. ₈Abrahama a tšea lebebe le maswi le nama a di bea pele ga banna bale ka moo fase ga mohlare, ba ja, yena a ba emaemela.

₉Ke moo ba mmotšišitšego ba re: “Mosadi wa gago, Sara, o kae?”

A ba fetola a re: “O ka mola mošašeng.”

₁₀Yo mongwe wa bona a re: “Ngwaga wo o tlago ka nako ye ke tla boa mo, gomme mosadi wa gago, Sara, o tla be a na le morwa.”

Sara o be a le ka morago ga gagwe, mojakong wa mošaša, a theeditše. ₁₁Abrahama le Sara ba be ba tšofetše kudu, gomme Sara o be a sa hlwe a bona kgwedi. ₁₂Ka gona Sara a itshegela a re: “Na nka re ke kgekotše ke le bjale ka hlwa ke sa kgona go ipshina ka go robala le monna? Monna wa ka le yena o tšofetše.”

₁₃Ke moo Morena a botšišitšego Abrahama a re: “Sara o reng a sega ge a re: ‘Na nka re ke tšofetše ka mokgwa wo ka hlwa ke sa ba le ngwana?’ ₁₄A go na le seo se ka šitago Morena? Bjalo ka ge ke boletše, ngwaga wo o tlago ka nako ye ke tla boa mo, mme Sara o tla be a na le morwa.”

₁₅Ka ge Sara a be a boifa o ile a latola a re: “Ga se ka sega.”

Morena a re: “Ee, o segile, hle.”

₁₆Ke moo banna bao ba tlogilego ba ya felo moo ba ka rego ge ba le gona ba okamela motse wa Sodoma, mme Abrahama a ba felegetša. ₁₇Gomme Morena ka pelong a re: “Na nka napa ka utela Abrahama seo ke tlilego go se dira? ₁₈Ditlogolo tša gagwe e tla ba setšhaba se segolo se maatla, gomme ditšhaba tša lefase ka moka di tla nkgopela go di šegofatša bjalo ka ge ke mo šegofaditše. ₁₉Ke mo kgethile gore a laye barwa ba gagwe le ditlogolo tša gagwe gore ba ntheetše, mme ba dire tše di swanetšego le tše di lokilego. Ge ba ka dira bjalo, ke tla mo direla tšohle tše ke mo holofeditšego tšona.”

₂₀Ke moo Morena a itšego go Abrahama: “Motse wa Sodoma le wa Gomora e begwa ka tše di šiišago, gomme sebe sa badudi ba gona ke se segolo kudu. ₂₁Ke swanetše go theoga go yo bona ge eba tše ke kwelego ba begwa ka tšona ke nnete; gomme ge e se nnete ke tla tseba.”

₂₂Ke moo banna ba babedi bao ba tlogilego ba leba Sodoma, Morena yena a šala le Abrahama. ₂₃Abrahama a batamela Morena, a mmotšiša a re: “A ruri o yo fediša batho ba ba se nago molato mmogo le bao ba nago le molato? ₂₄Ge go na le batho ba masome a fetšago seatla ba ba se nago molato motseng, a o ka fediša motse ka moka? A o ka se o swarele ka lebaka la bao ba masome a mahlano? ₂₅Hle, taba ye bjalo o se e dire, wa bolaya baloki le bakgopo gotee, wa swara baloki le bakgopo go swana. Hle, yeo taba o se ke wa e dira! Ga ke re Moahlodi wa lefase ka moka o swanetše go dira ka toka?”

₂₆Morena a mo fetola a re: “Ge nka hwetša baloki ba masome a mahlano kua Sodoma, ke tla swarela motse ka moka ka lebaka la bona.”

₂₇Abrahama a buša a re: “Hle, o ntshwarele ge ke fela ke bolela le wena, Mong wa ka. Ke nna motho fela, ga ke na tokelo ya go bolela selo. ₂₈Mohlomongwe go ka ba le baloki ba masome a mane le ba bahlano fela, e sego ba masome a mahlano. A o tla fediša motse ka moka ka gore go hlaelelwa ba bahlano?”

Morena a mo fetola a re: “Nka se fediše motse woo ge nka hwetša baloki ba masome a mane le ba bahlano.”

₂₉Abrahama a tšwela pele a re: “Mohlomongwe e tla ba ba masome a mane fela.”

Morena a mo fetola a re: “Nka se o fediše ge go na le ba masome a mane.”

₃₀Abrahama a re: “Hle, o se ke wa mpefelelwa, Mong wa ka, ge ke bolela gape. Mohlomongwe e tla ba ba masome a mararo fela.”

Morena a mo fetola a re: “Nka se o fediše ge nka hwetša ba masome a mararo.”

₃₁Abrahama a re: “Hle, o ntshwarele ge ke sa fela ke bolela nago, Mong wa ka. Mohlomongwe go ka ba le ba masome a mabedi fela.”

Morena a re: “Nka se fediše motse woo ge nka hwetša ba masome a mabedi fela.”

₃₂Abrahama a re: “Hle, o se ke wa mpefelelwa, Mong wa ka, mme ke tla bolela gatee fela. Mohlomongwe go ka hwetšwa ba lesome fela.”

Morena a re: “Nka se o fediše ge e le ba lesome.” ₃₃Ya re ge Morena a feditše go bolela le Abrahama a sepela, mme Abrahama a boela gae.

₁Ge barongwa bale ba babedi ba fihla Sodoma mantšiboa ao, Lote o be a dutše kgorong ya motse. Ge a ba bona a emelela a ya go ba gahlanetša. A obamela fase pele ga bona, ₂a re: “Barena, a re yeng ngwakong wa ka, nna, mohlanka wa lena. Le hlape maoto, le robale gona. E re ka moswane le tsogele tseleng.”

Bona ba mo fetola ba re: “Aowa, re tla robala mo kgorong ya motse.”

₃A fela a ba phegeletše, ba ba ba ya le yena ngwakong wa gagwe. A laela bahlanka ba gagwe gore ba ba apeele dijo le dinkgwa tše di se nago komelo, gomme baeng ba ja.

₄Pele ga ge baeng ba eya malaong, banna ba Sodoma ba dikanetša ngwako. Banna ka moka ba motse, masogana le bakgalabje, ba be ba le moo. ₅Ba goeletša Lote ba re: “Banna ba ba tlilego mo ga gago bošegong bjono ba kae? Ba ntšhe o ba tliše go rena gore re tle re ba robale!”

₆Lote a tšwa, gomme a tswalela lemati. ₇A bolela le bona a re: “Bagešo, ke a le rapela, le se ke la dira taba ye mpe ka tsela ye! ₈Bonang, ke na le barwedi ba babedi bao ba sego ba ke ba robala le monna. A ke le neeleng bona mme le ka dira seo le se ratago ka bona. Fela banna ba le se ke la ba dira selo; ke baeng ba lapa la ka, gomme ke swanetše go ba šireletša.”

₉Eupša bona ba re: “Re šuthelele, mofaladi tena! O mang wena o ka re botšago se re swanetšego go se dira? Šutha, go sego bjalo re tla go swara gampe go feta bona.” Ba kgorometša Lote, mme ba šuthela pele go pšhatla lemati. ₁₀Fela banna ba babedi bale ba ka gare ba ntšha matsogo mme ba gogela Lote ka ngwakong, ba tswalela lemati. ₁₁Ba napa ba foufatša banna ka moka ba ba lego ka ntle moo ba ilego ba šitwa ke go bona lemati.

₁₂Banna bao ba babedi ba re go Lote: “Ge eba o na le yo mongwe mo, e ka ba barwa, barwedi, bakgonyana, goba meloko ye mengwe mo motseng wo, ba ntšhe, ₁₃ka gobane re tlile go fediša felo fa. Morena o kwele tše di šiišago tše batho ba ba begwago ka tšona, mme o re romile go tlo fediša Sodoma.”

₁₄Ke moo Lote a ilego go bakgonyana ba gagwe, a re go bona: “Itlhaganeleng le tšweng mo; Morena o tlile go fediša felo fa.” Eupša bona ba gopola gore o a swaswa.

₁₅Ka masa barongwa ba tutuetša Lote ba re: “Itlhaganele! Tšea mosadi le barwedi ba gago ka babedi o tšwe, gore le se ke la tla la bolawa ge motse o fedišwa.” ₁₆Lote a fela a diega. Le ge go le bjalo, Morena a mo šokela; ka gona banna bao ba ba tšea ka matsogo, yena le mosadi le barwedi ba gagwe ka babedi, mme ba ba ntšha motseng. ₁₇Ke moo yo mongwe wa barongwa a itšego: “Tšhabang le iphološe! Le se ke la lebelela morago goba la ema ka moeding. Le tšhabeleng dithabeng gore le se ke la tla la bolawa.”

₁₈Eupša Lote a mo fetola a re: “Aowa hle, mong wa ka, o se ke wa re kganyediša ka mokgwa woo. ₁₉Bona, o bile yo botho go nna, o ntšhoketše kudu mme wa mphološa. Fela nka se kgone go tšhabela kua dithabeng; nka welwa ke masetlapelo ka hwa pele ga ge ke fihla. ₂₀Motse šole o kgauswi mo e lego gore go wona nka fihla, ebile ke motsana wo monnyane. A ke tšhabele go wona – ga ke re ke motse wo monnyane – mme mola ke tla bolokega.”

₂₁Morongwa a re: “Go lokile. Nka se fediše motse woo. ₂₂Itlhaganele! Tšhaba! Nka se dire selo pele ga ge o fihla gona.”

Ka ge Lote a rile ke wo monnyane, motse woo o ile wa rewa leina la Tsoare.

₂₃Ge Lote a fihla Tsoare ke ge letšatši le hlaba. ₂₄Morena a neša tshebela ye e tukago godimo ga motse wa Sodoma le wa Gomora, ₂₅mme a e fiša le moedi ka moka, gotee le batho ba fao ka moka le tšohle tše di bego di metše nageng. ₂₆Mosadi wa Lote yena o ile a lebelela morago, mme a fetošwa sehlwaseeme sa letswai.

₂₇Ka letšatši le le latelago Abrahama a tsogela felo fale a bego a na le Morena gona. ₂₈Ge a iša mahlo Sodoma le Gomora le moeding ka moka a bona muši o thunya nageng, o le bjalo ka muši wo o tšwago moubelong wo mogolo. ₂₉Ge Modimo a fediša metse ya moeding moo Lote a bego a dula gona, o ile a gopola Abrahama, mme a tšhabiša Lote.

₃₀Ka ge Lote a be a boifa go dula Tsoare, yena le barwedi ba gagwe ka babedi ba ile ba rotogela dithabeng, gomme fao ba dula ka leweng. ₃₁Morwedi yo mogolo a re go ngwanabo: “Tatagorena o a tšofala, gomme ga go banna mo nageng ye ba ba tlago tla ba robala le rena bjalo ka ge e le setlwaedi lefaseng ka moka. ₃₂Tlaa re tagiše tatagorena beine, gore re tle re kgone go robala naye mme re be le bana le yena.” ₃₃Bošego bjoo ba mo noša beine, mme morwedi yo mogolo a robala naye; fela Lote a se tsebe taba yeo.

₃₄Ka letšatši le le latelago morwedi yo mogolo a re go ngwanabo: “Nna ke robetše naye bošego bja go feta; bjale a re mo tagiše beine gape bošego bjo, mme le wena o robale naye gore re be le bana le tatagorena.” ₃₅Ka gona le bošego bjoo ba mo tagiša beine, mme morwedi yo monnyane a robala naye. Gapegape a se tsebe taba yeo. ₃₆Ka tsela ye barwedi ba Lote ka bobedi ba imišwa ke tatagobona. ₃₇Morwedi yo mogolo a ba le morwa yo a ilego a mo rea leina la Moaba. Yena e bile rakgolokhukhu wa Bamoaba ba lehono. ₃₈Morwedi yo monnyane le yena a ba le morwa yo a ilego a mo rea leina la Bene-Ami. Yena e bile rakgolokhukhu wa Baamone ba lehono.

₁Abrahama o ile a tloga Mamre a ya seleteng sa ka borwa bja Kanana, mme a dula gare ga Kadeshe le Shure. Mola a falaletše Gerare ₂o ile a re mosadi wa gagwe, Sara, ke kgaetšedi ya gagwe. Ka gona, Kgoši Abimeleke wa Gerare a roma bahlanka ba tšea Sara. ₃Ya re bošego Modimo a iponagatša go yena ka toro a re: “O kgauswi le go hwa, ka gore o tšere mosadi yo; ke mosadi wa monna yo mongwe.”

₄Fela Abimeleke o be a sešo a robala naye, gomme a re: “Mong wa ka, ga ke na molato! A bjale o tla mpolaya le setšhaba sa ka? ₅Abrahama ke yena a itšego ke kgaetšedi ya gagwe, mme le yena mosadi a re Abrahama ke kgaetšedi ya gagwe. Ke dirile taba ye ke se na bomenetša, gomme ga ke ipone molato.”

₆Modimo a mo fetola torong yeo a re: “Ee, le nna ke a tseba gore o dirile taba yeo o se na bomenetša; ka fao ke go thibetše gore o se mphošetše ka go robala naye. ₇Bjale ge, mmušetše go monna wa gagwe. Yena ke moprofeta, mme o tla go rapelela gore o se ke wa hwa. Eupša ge o sa mmušetše, tseba gore o tlilo hwa, wena le setšhaba sa gago ka moka.”

₈Ka le le latelago Abimeleke a tsoga e sa le bošego a bitša bakgomana ba gagwe ka moka, a ba botša tšohle tšeo di hlagilego, mme ba tšhoga kudu. ₉Abimeleke a bitša Abrahama, a mmotšiša a re: “Ke taba mang ye o re dirilego yona ye? Ke go fošeditše ka eng ge e bile o hlolela nna le mmušo wa ka molato wo mokaaka? O ntirile taba ye e sa dirwego. ₁₀Ke ka lebaka lang o dirile taba ye?”

₁₁Abrahama a mo fetola a re: “Ke be ke gopola gore ga go na le motho yo a boifago Modimo mo, le gore ba tla mpolaya gore ba tšee mosadi wa ka. ₁₂Yena gabotsebotse ke kgaetšedi ya ka. Ke morwedi wa tate, fela e sego wa mme, gomme ke mo nyetše. ₁₃Ka gona, ge Modimo a nntšha lapeng la tate gore ke ralale le dinaga, ke ile ka re go mosadi wa ka: ‘Se o ka bontšhago ka sona gore o a nthata sese: Gohle mo re fihlago gona o re ke nna kgaetšedi ya gago.’ ”

₁₄Ke moo Abimeleke a bušeditšego Sara go Abrahama, a mo fa le dihuswane, dikgomo le makgoba. ₁₅A re go Abrahama: “Naga ya ka še; dula mo o go kganyogago.” ₁₆A re go Sara: “Ke fa kgaetšedi ya gago dipapetlana tša silibera tše sekete e le bohlatse go bohle ba ba nago le wena gore ga o ne molato; yo mongwe le yo mongwe o tla tseba gore ga go sebe se o se dirilego.”

_17-18Ka lebaka la seo se hlagetšego Sara, mosadi wa Abrahama, Morena o be a dirile gore mosadi yo mongwe le yo mongwe lapeng la Abimeleke a se kgone go ba le bana. Ka gona Abrahama a rapelela Abimeleke, mme Modimo a mo fodiša, a fodiša le mosadi wa gagwe le makgoba a basadi gore ba kgone go ba le bana.

₁Jesu a re: “Ruri, ruri, ke le botša gore yo a sa tsenego ka lešakeng la dinku ka lesoro, a namela ka go šele, ke lehodu ebile ke mohlakodi. ₂Yo a tsenago ka lesoro yena ke modiša wa dinku. ₃Moletalesoro o a mmulela; dinku di kwa lentšu la gagwe ge a bitša tše e lego tša gagwe ka maina, a di ntšha. ₄O re go di ntšha ka moka a di ete pele, gomme tšona di mo šale morago, ka gobane di tseba lentšu la gagwe. ₅Yo di sa mo tsebego yena di ka se tsoge di mo latetše, di tla mo tšhaba, ka gobane ga di tsebe lentšu la gagwe.”

₆Jesu ge a ba botša seswantšho seo ba ile ba se kwešiše gore o ra go reng.

₇A iša pele a re go bona: “Ruri, ruri, ke le botša gore ke nna lesoro la lešaka la dinku. ₈Bohle ba ba tlilego pele ga ka ke mahodu le bahlakodi, fela dinku ga se tša ba theeletša. ₉Lesoro ke nna. Yo a tsenago ka nna o tla phološwa; o tla fela a tsena a etšwa a hwetša dijo tše di khorišago. ₁₀Lehodu lona le tlela go utswa le go bolaya le go lobiša. Nna ke tletše gore dinku tša ka di phele – di phele bophelo bjo bo feletšego.

₁₁“Ke nna modiša wa go loka. Gomme modiša wa go loka o ikgafela go hwela dinku tša gagwe. ₁₂Mothwalwa yena, yo e sego modiša ebile e se mong wa dinku, o re go bona phiri e etla a tlogele dinku, a tšhabe, gomme phiri e di sware e di phatlalatše. ₁₃Mothwalwa o a tšhaba ka gobane e le mothwalwa, a se na taba le dinku. ₁₄Nna ke modiša wa go loka. Ke tseba dinku tša ka le tšona di a ntseba, ₁₅bjalo ka ge Tate a ntseba le nna ke a mo tseba; gomme ke ikgafela go hwela dinku tša ka. ₁₆Ke sa na le tše dingwe dinku tše e sego tša lešaka le. Le tšona ke swanetše gore ke di tliše; di tla kwa lentšu la ka, gomme go tla ba mohlape o tee le modiša o tee.

₁₇“Gape se Tate a nthatelago sona ke ge ke ikgafela go bolawa, e le gore ke tle ke boele ke phele. ₁₈Ga go yo a kago nkamoga bophelo ke sa rate; ke nna mong ke ikgafelago go bolawa. Ke na le maatla a go ikgafela go bolawa le a go itsoša bahung. Ke sona se Tate a ntaetšego.”

₁₉Bajuda ba buša ba ngangišana ka seo a se bolelago. ₂₀Ba bantši ba re: “O tsenwe ke modemone! O a gafa! Le reng le mo theeletša?”

₂₁Fela ba bangwe ba re: “Motho yo a tsenwego ke modemone a ka se bolele ka mokgwa wo! Na modemone a ka kgona go foufolla difofu?”

₂₂E be e le marega, gomme go ketekwa Monyanya wa go šegofatša Tempele motseng wa Jerusalema. ₂₃Jesu a re a sepelasepela Tempeleng mo mathuding ale a go bitšwa mathudi a Solomone, ₂₄a bokanelwa ke Bajuda, ba mmotšiša ba re: “Na o tla re swariša kota go fihla neng, wena? Ge eba ke wena Mesia, re botše phatlalatša.”

₂₅Jesu a ba fetola a re: “Ke šetše ke le boditše, fela ga le nkgolwe. Tše ke di dirago ke laetšwe ke Tate di a mpolelela; ₂₆lena ge le sa nkgolwe bjale, ke ka gobane le se dinku tša ka. ₂₇Ba e lego dinku tša ka ba theeletša se ke se bolelago; le gona nna ke a ba tseba, gomme bona ba a ntatela. ₂₈Ke ba fa bophelo bjo bo sa felego, gomme ba ka se tsoge ba lahlegile. Ga go yo a tlago nkubula bona. ₂₉Bao Tate a mphilego bona ke ba bohlokwa go feta bohle, gomme a ka se ba ubulwe ke motho. ₃₀Nna le Tate re selo se tee.”

₃₁Moo Bajuda ba topa maswika gape ba re ba mmolaya ka ona. ₃₂Jesu a re go bona: “Ke le bontšhitše mediro ye mentši ye mebotse ye ke e dirilego ke laetšwe ke Tate. Etse ke ofe wo le nyakago go mpolaela wona ka maswika?”

₃₃Bona ba mo fetola ba re: “Ga re nyake go go bolaela modiro wo mobotse wo o o dirilego, re nyaka go go bolaela ge o nyefola Modimo, o re o le motho wa nama, wa itira Modimo.”

₃₄Jesu a ba fetola a re: “Ga ke re go ngwadilwe ka melaong ya lena gore Modimo o rile: ‘Ke lena medimo’? ₃₅Bjale ge ešita bao Modimo a ba begetšego molaetša wa gagwe a re ke medimo, gomme Mangwalo a Makgethwa a ka se fetošwe, ₃₆nna yo ke kgethilwego ke Tate mme a nthometšego lefaseng, le ka nama la re ke nyefola Modimo, ge ke re ke nna Morwa wa Modimo? ₃₇Ge eba ke sa dire mediro ye ke e laetšwego ke Tate, gona le se ke la ntumela; ₃₈eupša ge eba ke e dira, le ge nna le sa ntumele, upšang le dumele yona mediro, gore le tle le lemoge mme le tsebe gore Tate o mo go nna, le nna ke mo go yena.”

₃₉Ba buša ba leka go mo swara, eupša a ba tšwa ka diatleng.

₄₀A boela ka mošola wa noka ya Jordane, moo Johanese a bego a be a kolobetša gona, gomme a dula fao. ₄₁Batho ba bantši ba tla go yena ba re: “Johanese o be a sa dire mehlolo, fela tšohle tše a di boletšego ka motho yo ke nnete.” ₄₂Gomme ba bantši moo ba dumela go yena.

₁Go be go na le monna yo mongwe a lwala ba re ke Lasarose, a dula Bethania, motsaneng wa gaboMaria le Marta, ngwanabo. ₂Maria yo ke yola wa go ka a tlotša Morena ka senkgabose, a mo phumola maoto ka moriri. Ke yena yo kgaetšedi ya gagwe, Lasarose, a bego a lwala. ₃Bona ba roma motho go Jesu ba re a fihle a mmotše a re: “Morena, yola o mo ratago o a lwala.”

₄Jesu ge a ekwa a re: “Lehu e ka se be pheletšo ya bolwetši bjoo, e tla ba gore go tumišwe Modimo, le gore ka bjona Morwa wa Modimo a retwe.”

₅Gape Jesu o be a rata Marta le ngwanabo le Lasarose. ₆Fela o rile go kwa ka bolwetši bja Lasarose, a no fetša matšatši a mabedi moo a bego a le gona, ₇ya ba gona a botšago barutiwa ba gagwe a re: “A re boeleng Judea.”

₈Barutiwa ba gagwe ba re go yena: “Moruti, e ka re malobanyana mo Bajuda ba be ba nyaka go go bolaya ka maswika, wa be o sa re o boela kua?”

₉Jesu a re: “Na ga ke re diiri tša letšatši ke tše lesome le tše pedi? Ge motho a sepela mosegare ga a kgopše, ka gobane o bonegelwa ke seetša sa lefase le. ₁₀Eupša ge a sepela bošego o a kgopša, ka gobane a se na seetša se se mmonegelago.” ₁₁Ya re go ba a realo a re: “Lasarose, mogwerarena, o robetše, gomme ke ya go mo tsoša.”

₁₂Barutiwa ba gagwe ba mo fetola ba re: “Morena, ge a robetše o tla no tsoga.”

₁₃Jesu o be a era gore Lasarose o hlokafetše, gomme bona ba gopola gore o ra gore o robetše boroko. ₁₄Ka gona a ba botša phaa a re: “Lasarose o hlokafetše, ₁₅fela se se nthabišago ka lebaka la lena ke ge ke be ke se na le yena, gore le tle le dumele. Bjale ge, a re yeng go yena.”

₁₆Thomase yo a bitšwago Lefahla a re go barutiwakayena: “Le rena a re yeng gore re yo hwa naye!”

₁₇Jesu ge a fihla Bethania a kwa gore e šetše e le matšatši a mane Lasarose a bolokilwe. ₁₈Bethania e be e le kgauswi le Jerusalema, dikilometara tše e nyakilego go ba tše tharo, ₁₉gomme Bajuda ba bantši ba be ba tlile ga gaboMarta le Maria go ba emela ka lehu la kgaetšedi ya bona.

₂₀Marta ge a ekwa gore Jesu o etla, a ya go mo gahlanetša, Maria yena a šala a dutše ka gae. ₂₁Marta a fihla a re go Jesu: “Morena, etse ge o ka be o be o le gona, kgaetšedi ya ka a ka be a se a hwa. ₂₂Fela le gonabjale ke a tseba gore se o ka se kgopelago go Modimo, Modimo o tla go fa sona.”

₂₃Jesu a re go yena: “Kgaetšedi ya gago o tla tsoga bahung.”

₂₄Marta a mo fetola a re: “Ke a tseba gore o tla tsoga bahung ka tšatši la mafelelo, mola batho ka moka ba tsoga.”

₂₅Jesu a re: “Ke nna Mophedišabahu le Mobaphedišetšasaruri. Yo a dumelago go nna o tla phela le ge a ka hwa; ₂₆le yo a phelago a dumela go nna a ka se tsoge a hwetše sa ruri. Na taba ye o a e dumela?”

₂₇Marta a re: “Ee, Morena, nna ke a dumela gore ke wena Mesia, Morwa wa Modimo, yo go boletšwego gore o tla tla lefaseng.”

₂₈Marta ge a seno realo, a yo bitša Maria, ngwanabo, ka sehebehebe a re: “Moruti o tlile, o a go bitša.” ₂₉Maria ge a ekwa a realo, a nanoga a ya go Jesu. ₃₀Jesu ke ge a sešo a tsena motseng, a sa le mola Marta a mo gahlaneditšego gona. ₃₁Bajuda ba ba bego ba na le Maria ka ntlong go tlo mo emela, ba rile go bona a re feu a tšwela ka ntle, ba mo šala morago ba gopola gore o yo llela lebitleng.

₃₂Ge a fihla mo Jesu a lego gona, a re go mmona a itahlela fase maotong a gagwe, a re: “Morena, etse ge o ka be o be o le gona, kgaetšedi ya ka a ka be a se a hwa.”

₃₃Jesu ge a bona a lla, ebile go lla le Bajuda ba ba mo feleseditšego, a huduega moyeng a hlomogile pelo, ₃₄a ba botšiša a re: “Le mmolokile kae?”

Bona ba re: “Morena, a re ye o yo bona.”

₃₅Jesu a rothiša meokgo. ₃₆Ya ba Bajuda ba re: “Bonang gore o be a mo rata bjang!”

₃₇Ba bangwe ba bona ba botšišana ba re: “Motho yo ge a kgonne go foufolla sefofu sela, go thibela lehu la yo gona go be go ka nama gwa mo palela?”

₃₈Jesu a re go huduega moyeng gape, a ya lebitleng. Lebitla la gona e be e le lewa le le tswaletšwego ka leswika. ₃₉A fihla a re: “Tlošang leswika leo.”

Marta, yena kgaetšedi ya mohu, a re: “Morena, o šetše a nkga, ka gore e šetše e le matšatši a mane a bolokilwe.”

₄₀Jesu a re go yena: “Na ga ke re ke go boditše gore ge o dumela o tla bona letago la Modimo?” ₄₁Ke ge ba tloša leswika lela. Jesu a lelala a re: “Tate, ke a go leboga, ka ge o nkwele. ₄₂Ke a tseba gore o ntheeletša ka mehla. Ge ke realo ke no direla gore batho ba ba ntikaneditšego ba ba dumele gore ke wena o nthomilego.” ₄₃A re go realo a goelela a re: “Lasarose, etšwa!” ₄₄Ke ge yo a bego a hwile a etšwa a tatilwe maoto le matsogo ka mašela, a tatilwe le sefahlego ka lešela. Jesu a re: “Mo tatolleng le mo lese a sepele.”

₄₅Bajuda ba bantši ba ba bego ba tlile go emela Maria ba rile go bona tše Jesu a di dirago, ba dumela go yena. ₄₆Eupša ba bangwe bona ba ya go Bafarisei, ba fihla ba ba botša tše Jesu a di dirilego. ₄₇Baprista ba bagolo le Bafarisei bao ba napa ba rapa pitšo ya Kgorokgolo ya Bajuda, ba botšiša ba re: “Na go ka dirwang? Gape motho yo o dira mehlolo ye mentši. ₄₈Ge re ka mo lesa a no tšwela pele ka mokgwa wo, bohle ba tla dumela go yena, gomme Baroma ba tla ba re kgerešetša Tempele, ba fediša le setšhaba sa gaborena!”

₄₉Yo mongwe wa bona, e lego Khayafase, yo e bego e le yena Moprista yo Mogologolo ka ngwaga woo, a re: “Lena ga le tsebe selo! ₅₀Na kgane ga le bone go le kaone gore motho o tee a hwele setšhaba, go na le gore go fedišwe setšhaba ka moka?” ₅₁Etse ge a realo o be a sa ipolediše. Ka ge e be e le yena Moprista yo Mogologolo ngwageng woo, o be a porofeta gore Jesu o tlilo hwela setšhaba sa Bajuda, ₅₂le gona e sego sona fela, eupša le go kgoboketša batho ba Modimo ba ba phatlaletšego a ba dira batee.

₅₃Go tloga ka lona tšatši leo baetapele ba Bajuda ba lakana gore ba ya go bolaya Jesu. ₅₄Ka gona Jesu a se sa sepela pepeneneng le Bajuda, a tloga a ya felo mo gongwe kgauswi le lešoka, motseng wo ba rego ke Efraime, a dula gona le barutiwa ba gagwe.

₅₅Ke ge go batametše monyanya wa Bajuda wo ba rego ke Paseka. Batho ba go tšwa dinagamagaeng ba be ba eya Jerusalema ka bontši gore ba yo itlhwekiša monyanya o sešo wa fihla. ₅₆Ba be ba nyaka Jesu, gomme ge ba ntše ba eme Tempeleng, ba fela ba botšišana ba re: “Lena le bona bjang? Afa le re o tla tla monyanyeng?” ₅₇Baprista ba bagolo le Bafarisei ba be ba laetše gore ge motho a ka tseba mo Jesu a lego gona a bolele, gore ba tle ba ye go mo swara.