To The Word – Day 5

₁Morena o ile a re go Abramo: “Tlogela naga ya geno le meloko ya geno le lapa la tatago mme o ye nageng ye ke tlilego go go laetša yona. ₂Ke tla go fa ditlogolo tše ntši, mme ya ba setšhaba se segolo. Ke tla go šegofatša mme ka dira gore leina la gago le tsebalege, gore ba bangwe ba tle ba šegofatšwe ka wena.

₄Ge Abramo a na le mengwaga ye masome a a šupago a metšo ye mehlano, o ile a tloga Harane ka moo Morena a mmoditšego ka gona; Lote o ile a tloga naye. ₅Abramo a tšea mosadi wa gagwe, Sarai, le Lote, morwa morwarragwe, le dithoto ka moka tšeo ba di kgobokantšego, le makgoba ohle ao ba bilego nao Harane, mme ba tloga ba leba nageng ya Kanana.

Ge ba fihla Kanana, ₆Abramo a phatša naga go fihlela a fihla mohlareng wo mogolo wa More, mo e lego felo mo gokgethwa kua Shekeme. Ka nako yeo Bakanana ba be ba sa dula nageng yeo. ₇Morena a iponagatša go Abramo mme a re go yena: “Ye ke naga ye ke tlilego go e fa ditlogolo tša gago.” Ya ba Abramo o agela Morena yo a iponagaditšego go yena aletare fao. ₈Ka morago ga moo a hudugela thoko ya borwa dithabeng tšeo di lego ka bohlabela bja motse wa Bethele, gomme a hloma mešaša ya gagwe gare ga Bethele ka bodikela, le Ai ka bohlabela. Moo le gona a aga aletare, a khunamela Morena. ₉Ka morago ga fao a fetela pele, a tloga mo a eya mola, a lebile thokong ya borwa bja Kanana.

₁₀Go ile gwa wa tlala nageng ya Kanana, gomme ya ba ye šoro mo Abramo a ilego a ba a theogela Egepeta go yo dula moo lebakanyana. ₁₁Ge a batametše go tshela mollwane go tsena ka Egepeta, a botša mosadi wa gagwe, Sarai, a re: “O mosadi yo mobotse. ₁₂Ge Baegepeta ba go bona ba tla re: ‘Ke mosadi wa Abramo’ – ka fao ba tla mpolaya mme wena ba go lesa wa phela. ₁₃O ba botše gore o kgaetšedi ya ka; ke moo ka lebaka la gago ba tlago ntesa ka phela mme ba ntshwara gabotse.” ₁₄Ge a tshela mollwane a tsena ka Egepeta, Baegepeta ba ile ba bona gore mosadi wa gagwe ke yo mobotse kudu. ₁₅Ba bangwe ba bakgomana ba mošate ba mmona, gomme ba botša kgoši ka moo e lego yo mobotse ka gona; ka fao a tšewa a išwa mošate. ₁₆Ka lebaka la gagwe kgoši a swara Abramo gabotse, mme a mo fa mehlape ya dihuswane le dikgomo le dipokolo le makgoba le dikamela.

₁₇Fela ka gore kgoši a be a tšere Sarai, Morena o ile a mo otla le ba lapa la gagwe ka dikotlo tše kgolo. ₁₈Ke moo kgoši a biditšego Abramo, a mmotšiša a re: “A o ntirile eng? Ke ka lebaka lang o se wa mpotša gore ke mosadi wa gago? ₁₉Ke kang o boletše gore ke kgaetšedi ya gago mme wa ntesa ka mo tšea ya ba mosadi wa ka? Mosadi wa gago šoo; mo tšee o tšwe!” ₂₀Kgoši ya laela banna ba yona go ntšha Abramo ka nageng, yena le mosadi wa gagwe le tšohle tše e bego e le tša gagwe.

₁Abramo o ile go tšwa Egepeta a ya leboa thokong ya borwa bja Kanana le mosadi wa gagwe le tšohle tše e bego e le tša gagwe, gomme Lote a ya naye. ₂Abramo e be e le monna wa mohumi kudu a na le diruiwa, gotee le silibera le gauta. ₃O ile a tloga moo gomme a aga mo le mola, a eya Bethele. A fihla kgathe ga Bethele le Ai, felo mola a ilego a hloma mešaša pele ₄a ba a aga aletare gona. Moo o ile a khunamela Morena.

₅Lote le yena o be a na le diruiwa le la gagwe lapa le bahlanka. ₆Naga e be e sa lekane gore bobedi ba ka dula mmogo, ka gore ba be ba na le leruo le lentši kudu. ₇Ka gona go ile gwa tsoga diphapano gare ga badiši ba diruiwa tša Abramo le badiši ba diruiwa tša Lote. Ka nako yeo Bakanana le Baperise ba be ba sa dula nageng yeo.

₈Ke moo Abramo a itšego go Lote: “A nna le wena re se lwe, badiši ba ka le ba gago le bona ba se lwe, ka gobane re bana ba motho. ₉Ka gona a re arogane. Kgetha karolo ye o e nyakago ya naga. O ye go yona mme nna ke tla ya thoko ye nngwe.”

₁₀Ke moo Lote a ilego a lealea, gomme a bona gore moedi ka moka wa Jordane go fihlela Tsoare o na le meetse a mantši, go swana le serapa sa Morena, goba go swana le naga ya Egepeta. E be e le pele ga ge Morena a fediša motse wa Sodoma le wa Gomora. ₁₁Lote a ikgethela moedi wa Jordane ka moka mme a leba thoko ya bohlabela. Ke ka moo banna ba babedi bao ba aroganego ka gona. ₁₂Abramo o ile a dula nageng ya Kanana, Lote yena a dula metseng ya ka moeding, mme a hloma mešaša kgauswi le Sodoma. ₁₃Badudi ba Sodoma e be e le ba babe, mme ba fošetša Morena kudu.

₁₄Ka morago ga ge Lote a sepetše, Morena o ile a re go Abramo: “Nke o iše mahlo ka gohle o le moo o lego gona. ₁₅Naga ka moka ye o e bonago ke tla e fa wena le ditlogolo tša gago, gomme e tla ba ya gago go ya go ile. ₁₆Ke tla dira gore ditlogolo tša gago di lekane le lerole la lefase ka bontši; ge eba go na le motho yo a kago bala lerole la lefase, le ditlogolo tša gago a ka di bala. ₁₇Eya o sepele le naga yohle, ka gobane ke tlile go go fa yona.” ₁₈Ka fao Abramo a hlahlamolla mešaša ya gagwe a yo dula kgauswi le mehlare ye mekgethwa ya Mamre kua Hebrone, gomme moo a agela Morena aletare.

₁Amrafele, kgoši ya Babilonia, le Arioko, kgoši ya Elasara, le Kedore-Laomere, kgoši ya Elamo, le Tidale, kgoši ya Goime, ₂di ile tša yo lwa le Bera, kgoši ya Sodoma, le Birsha, kgoši ya Gomora, le Shinabe, kgoši ya Adma, le Semebere, kgoši ya Tseboime, le kgoši ya Bela, goba Tsoare. ₃Dikgoši tše tlhano tše di be di dirile seboka gomme tša kopanya madira a tšona ka moeding wa Sidime, woo bjale e lego Lewatle le le Hwilego. ₄Ba be ba hlanketše Kedore-Laomere mengwaga ye lesome le metšo ye mebedi, eupša ka ngwaga wa lesome le metšo ye meraro ba mo tsogela maatla. ₅Ka ngwaga wa lesome le metšo ye mene Kedore-Laomere le seboka sa gagwe ba tla ka madira a bona, gomme ba fenya Barafa kua Ashterote-Karnaime, le Basuse kua Hamo, le Baeme molaleng wa Kiriathaime, ₆le Bahori dithabeng tša Seire; ba ba rakediša go fihla Ele-Parane, mathomong a lešoka. ₇Ke moka ba gomela Kadeshe, yeo e bego e tsebja ka la Ene-Mishpate, ba thopa naga ka moka ya Baamaleke mme ba fenya Baamore bao ba bego ba dula Hatsetsone-Thamare.

₈Ke moo kgoši ya Sodoma le ya Gomora le ya Adma le ya Tseboime le ya Bela di ilego tša hlamela madira a tšona ntwa ka moeding wa Sidime, mme tša lwa ₉le kgoši ya Elamo le ya Goime le ya Babilonia le ya Elasara, dikgoši tše tlhano tša lwa le dikgoši tše nne. ₁₀Moedi o be o tletše dikoti tša sekontiri, gomme ge kgoši ya Sodoma le ya Gomora di leka go tšhaba ntweng tša wela ka moo; fela dikgoši tše dingwe tše tharo tša tšhabela dithabeng. ₁₁Dikgoši tšela tše nne tša tšea se sengwe le se sengwe Sodoma le Gomora, gotee le dijo, tša tloga natšo. ₁₂Lote, morwa wa ngwanaboAbramo, o be a dula Sodoma, ka gona le yena ba mo tšea le tšohle tše e lego tša gagwe.

₁₃Eupša monna yo mongwe a phonyokga gomme a bega ditaba tše go Abramo, Moheberu. Abramo yena o be a dula kgauswi le mehlare ye mekgethwa ye e bego e le ya Mamre, Moamore. Yena le bomorwarragwe, Eshkolo le Anere, e be e le bathuši ba Abramo. ₁₄Ge Abramo a ekwa gore morwa wa ngwanabo o thopilwe, a kgoboketša banna ba ba itlhamilego mešašeng ya gagwe, ba makgolo a mararo le ba lesome le metšo ye seswai, mme a wela mohlaleng wa dikgoši tšela tše nne go fihla Dane. ₁₅Fao a arola banna ba gagwe dihlopha, a hlasela manaba bošego mme a ba fenya. A ba rakediša go fihla Hoba, ka leboa la Damaskose, ₁₆mme a buša thoto ka moka ye e bego e thopile. A ba a buša le morwa wa ngwanabo, Lote, le tše e bego e le tša gagwe, gotee le basadi le mathopša a mangwe.

₁₇Ge Abramo a boa go fenya Kedore-Laomere le dikgoši tšela tše dingwe, kgoši ya Sodoma ya tšwa go yo mo gahlanetša kua moeding wa Shabe, woo gape o bitšwago Moedi wa Kgoši. ₁₈Melkitsedeke, yo e bego e le kgoši ya Saleme gape e le moprista wa Modimo Yogodimodimo, a tliša senkgwa le beine go Abramo, ₁₉a mo šegofatša a re: “A Modimo Yogodimodimo, yo a dirilego legodimo le lefase, a šegofatše Abramo! ₂₀A Modimo Yogodimodimo a tumišwe, yoo a go fentšhišitšego manaba a gago!” Gomme Abramo a mo fa karolo ya lesome ya thoto yeo.

₂₁Kgoši ya Sodoma ya re go Abramo: “Itšeele thoto mme o mpušetše batho ba ka ka moka.”

₂₂Abramo a fetola a re: “Ke ena ke tiišitše pele ga Morena, Modimo Yogodimodimo, Mohlodi wa legodimo le lefase, ₂₃gore ga go le se tee sa gago se ke tlago itšeela sona, le ge e le tlhale, goba leralana la seeta. Ke moo o ka se tsogego o rile: ‘Ke nna ke humišitšego Abramo.’ ₂₄Nka se itšeele selo. Sa ka e tla ba fela tšeo banna ba ka ba šetšego ba di lle. Fela o lese bathuši ba ka, Anere le Eshkolo le Mamre, ba tšee dikarolo tša bona.”

₁Ka morago ga tšeo Abramo a bona pono gomme a kwa Morena a bolela le yena a re: “O se ke wa boifa, Abramo. Ke tla go phemela kotsing, mme ka go fa moputso wo mogolo.”

₂Eupša Abramo a re: “Morena, Mong wa ka, moputso woo o tla nkholang, ka gobane ga ke na bana? Mojalefa wa ka ke Eliesere wa Damaskose a nnoši. ₃Ga se wa mpha bana, gomme yo mongwe wa makgoba a ka o tlile go ja bohwa bja ka.”

₄Morena a re go yena: “Lekgoba le le ka se ke la ja lefa la gago; yo e lego morwa wa gago tiitii e tla ba yena mojalefa wa gago.” ₅Morena a mo ntšhetša ntle a re: “Lebelela legodimong mme o bale dinaledi, ge o kgona; ditlogolo tša gago di tla ba kaalo.”

₆Abramo a dumela go Morena, gomme ka lebaka la tumelo ya gagwe Morena a mmona e le moloki.

₇Ke moo Morena a itšego go yena: “Ke nna Morena yo a go ntšhitšego Ure kua Babilonia go tlo go fa naga ye gore e be bohwa bja gago.”

₈Eupša Abramo a re: “Morena, Mong wa ka, nka tseba bjang gore e tla ba ya ka?”

₉Morena a mo fetola a re: “Ntlišetše kgomo ya tshadi le pudi le kgapa, ka moka e be tša mengwaga ye meraro, le mokuru le leeba.” ₁₀Abramo a tliša diruiwa tšeo go Modimo, a di ripa ka bogare, mme a tšea mephapha a e bea ka go lebana ka methaladi ye mebedi; fela ge e le dinonyana tšela tšona a se ke a di ripaganya. ₁₁Manong a theogela moo dibelebeleng tšeo, fela Abramo a a raka.

₁₂Ge letšatši le dikela, Abramo a swarwa ke boroko bjo bogolo, mme a tlelwa ke poifo le letšhogo. ₁₃Morena a re go yena: “Tseba gore ruri ditlogolo tša gago e tla ba bafaladi nageng e šele; e tla ba makgoba moo gomme ba tla gatelelwa mengwaga ye makgolo a mane. ₁₄Eupša ke tla otla setšhaba seo se ba dirago makgoba, gomme ba tla tšea mahumo a mantši ge ba tloga moo nageng yeo. ₁₅Ge e le wena, o tla ithobalela ka khutšo wa bolokwa o phetše galelele. ₁₆Ba ba tlago boela mo ke moloko wa gago wa bone, mme ka nako yeo ke mo bokgopo bja Baamore bo tlago ba bo gaketše mo ba tlago ba ba swanela gore ke ba otle.”

₁₇Ge letšatši le diketše, leswiswi le swere, ka bjako sebešo se se kuelelago muši le serumola se se laumago mollo tša rotoga mme tša feta gare ga mephapha yela ya diruiwa. ₁₈Gona moo Morena a dira kgwerano le Abramo a re: “Ke tla fa ditlogolo tša gago naga ye go tloga mollwaneng wa Egepeta go fihlela nokeng ya Yufratese, ₁₉go akaretša naga ya Bakene le ya Bakenase le ya Bakadmone ₂₀le ya Bahete le ya Baperise le ya Barafa ₂₁le ya Baamore le ya Bakanana le ya Bagirgashe le ya Bajebuse.”

₁Mosadi wa Abramo, Sarai, o be a se a belegela Abramo bana. Fela o be a na le lekgoba la mosetsana la Moegepeta leo leina la lona e bego e le Hagare, ₂ka gona Sarai a re go Abramo: “Nna Morena o ntimile thari. O reng o sa robale le lekgoba la ka la mosetsana? Mohlomongwe a ka mpelegela ngwana.” Abramo a dumela kgopelo ya Sarai. ₃Ka gona Sarai a mo neela Hagare gore e be mosadi wa gagwe. Ke ge go fetile mengwaga ye lesome Abramo a dutše nageng ya Kanana. ₄Abramo a robala le Hagare, mme Hagare a ima. Ge a lemoga gore o imile, a thoma go nyatša Sarai.

₅Ke moo Sarai a itšego go Abramo: “Ke molato wa gago ge Hagare a nnyatša. Ke nna ka bonna ke go neetšego yena, gomme e sa le go tloga mola a lemogago gore o imile o a nnyatša. A Morena a ahlole gore nna le wena wa phošo ke mang.”

₆Abramo a mo fetola a re: “Go lokile, ke lekgoba la gago mme o laolwa ke wena; dira se o se ratago ka yena.” Ke moka Sarai a swara Hagare gasehlogo, Hagare a ba a tšhaba.

₇Morongwa wa Morena a gahlanetša Hagare mothopong kua lešokeng tseleng ya go ya Shure, ₈gomme a re: “Hagare, lekgoba la Sarai, a o tšwa kae, mme o ya kae?”

A mo fetola a re: “Ke tšhabela mong wa ka, Sarai.”

₉Morongwa a re: “Boela go yena gomme o ikokobetše go yena.” ₁₀Ke moo a itšego: “Ke tla go fa ditlogolo tše ntši mo e lego gore ga go yo a ka di balago. ₁₁O tlile go ba le morwa mme o mo ree Ishmaele, ka gobane Morena o kwele sello sa gago sa tlaišego. ₁₂Fela morwa wa gago e tla ba monna wa go se tlwaetšege, a etša pitsi; o tla lwa le mang le mang, mme mang le mang o tla lwa naye. O tla phela a hloile meloko ya gabo ka moka.”

₁₃Hagare a ipotšiša a re: “Na e ka ba ruri ke bone Modimo mme ka fela ke phela?” Ka gona a rea Morena yo a boletšego le yena leina la “Modimo yo a bonago”. ₁₄Ke ka lebaka leo batho ba bitšago sediba seo se lego gare ga Kadeshe le Berede “Sediba sa Mophelaampona”.

₁₅Hagare a belegela Abramo morwa, mme Abramo a mo rea leina la Ishmaele. ₁₆Abramo o be a na le mengwaga ye masome a seswai le metšo ye e selelago ka nako yeo.

₇Ge ba ntše ba phegeletše go mmotšiša, a inamologa, a re go bona: “Yo a se nago sebe mo go lena a e be yena a thomago go mo foša ka leswika.” ₈A boela a inama a ngwala fase. ₉Ge ba ekwa a realo ba tloga ka o tee ka o tee, gwa tloga ba bagolo pele. Ba tlogela Jesu le mosadi yola a sa eme moo. ₁₀Jesu a inamologa, a botšiša mosadi yola a re: “Mmagorena, ba kae bona? Na ga go yo a go tšwilego?”

₁₁Mosadi yola a re: “Ga a gona, Morena.”

Jesu a re: “Gona le nna ga ke go tšwe. Sepela, fela o se sa dira sebe.”]

₁₂Jesu a buša a botša Bafarisei a re: “Ke nna seetša sa ba ba lego lefaseng. Yo a ntatelago a ka se phele leswiswing, o tla ba le seetša se se phedišago.”

₁₃Bafarisei ba re go yena: “Wena o a itlhatsela, ka gona bohlatse bja gago ga bo amogelege.”

₁₄Jesu a ba fetola a re: “Le ge ke itlhatsela, se ke se bolelago ke nnete ka gore mo ke tšwago le mo ke yago gona ke a go tseba. Lena ga le tsebe mo ke tšwago le mo ke yago gona. ₁₅Le ahlola ka tebelelo ya mahlo; nna ga ke ahlole motho. ₁₆Fela le ge nkabe ke ahlola, kahlolo ya ka e ka be e le ya nnete, ka gobane ga ke tee, ke na le Tate yo a nthomilego. ₁₇Ga ke re mo molaong wa lena go ngwadilwe gore bohlatse bja batho ba babedi ke bja nnete? ₁₈Bjale nna šemo ke a itlhatsela, gomme ke hlatselwa le ke Tate yo a nthomilego.”

₁₉Ke mo ba mmotšišitšego ba re: “Tatago o kae?”

Jesu ge a ba fetola a re: “Ga le ntsebe, le Tate ga le mo tsebe. Ge le ka be le ntseba, le ka be le tseba le Tate.”

₂₀Ditaba tšeo Jesu o di boletše ge a ruta batho Tempeleng, ka phapošing yeo go yona go bego go beilwe mapokisi a dikabelo. Gomme gwa se be le yo a mo swarago, ka gobane e be e sešo ya ba nako ya gagwe.

₂₁Jesu a ba botša gape a re: “Ke a sepela, gomme le tla šala le nnyaka, eupša le tla hwela dibeng tša lena. Mo ke yago gona lena le ka se kgone go fihla.”

₂₂Bajuda ba re: “Kgane o ya go ipolaya, ge a re mo a yago gona rena re ka se kgone go fihla?”

₂₃Jesu a re: “Gape lena le ba mono fase, kganthe nna ke wa kua godimo. Lena le ba lefase le, fela nna ga ke wa lona. ₂₄Ke ka lebaka leo ke le botšago gore le tla hwela dibeng tša lena. Gomme dibeng tša lena gona le tla hwela, ge le sa dumele gore ke ‘KE NNA’.”

₂₅Bona ba mmotšiša ba re: “Etse o mang?”

Jesu a ba fetola a re: “Go thušang go bolela le lena? ₂₆Ke na le tše dintši tše nka le bolelago ka tšona le tše nka le tšwago ka tšona. Fela yo a nthomilego ke yo a rerešago, gomme nna tše ke di botšago lena ba mono lefaseng ke fela tše ke di boditšwego ke yena.”

₂₇Bona ba be ba sa lemoge gore o bolela ka Tatagwe. ₂₈Ka gona a re go bona: “Go ba le nkadietša, nna Morwamotho, le tla tseba gore ke ‘KE NNA’; ke gona le tlago lemoga gore ga go se ke se dirago ka bonna, ke bolela fela se ke se laetšwego ke Tate. ₂₉Gomme yena yo a nthomilego o na le nna; ga a ntlogele ke nnoši, ka gobane ke phela ke dira se se mo kgahlago.”

₃₀Ge a bolela ditaba tše ba bantši ba ile ba dumela go yena.

₃₁Jesu a botša Bajuda ba ba dumelago go yena a re: “Ge le phetha tše ke le rutago tšona, gona le barutiwa ba ka ka nnete; ₃₂le tla tseba nnete, gomme nnete ke yona e tlago le lokolla.”

₃₃Bona ba mo fetola ka go re: “Rena re ditlogolo tša Abrahama, ebile ga se ra ka ra ba makgoba a motho. O ra go reng ge o re re tla lokollwa?”

₃₄Jesu a ba fetola ka go re: “Ruri, ruri, ke le botša gore mang le mang yo a dirago dibe ke lekgoba la sebe. ₃₅Gomme lekgoba ga se la ka lapeng leo le dulago ka go lona; wa ka lapeng leo ke morwa wa ka moo. ₃₆Ge le ka lokollwa ke Morwa wa Modimo, gona le tla lokologa ka nnete. ₃₇Ke a tseba gore le ditlogolo tša Abrahama. Fela le nyaka go mpolaya, ka gobane le gana go amogela tše ke le rutago tšona. ₃₈Nna ke le botša tše ke di bonego go Tate, kganthe lena le dira tše le di laetšwego ke tatagolena.”

₃₉Ba mo fetola ba re: “Gape rena tatagorena ke Abrahama.”

Jesu a re: “Ge Abrahama e ka be e le tatagolena ka nnete, le ka be le dira tše a bego a di dira. ₄₀Ge bjale le nyaka go mpolaya, nna ke le botšago nnete ye ke e kwelego go Modimo, le dira se Abrahama a bego a ka se se dire. ₄₁Le dira tša yena tatagolena.”

Bona ba mo fetola ka go re: “Gape rena ga se ra tswalwa ka bootswa – tatagorena ke o tee fela, e lego Modimo.”

₄₂Jesu a re: “Ge Modimo e ka be e le yena Tatagolena, le ka be le nthata, ka gobane ke tšwa go Modimo, gomme ke mono. Ga se ka itlela, ke romilwe ke yena. ₄₃Ke ka lebaka lang le sa kwešiše molaetša wa ka? Etse ke ka gobane le gana go theeletša tše ke di bolelago. ₄₄Gape ke lena bana ba yola tatagolena, Diabolose, gomme sa lena ke go dira tše di kganyogwago ke yena yoo tatagolena. E sa le e eba mmolai go tloga mohlamonene, ebile ga se a ka a emela nnete, ka gobane yena nnete yona ga a nayo. Ge a bolela maaka, o bolela se se mo lebanego, ka gobane ka boyena ke mpheane, ke ramaaka. ₄₅Gomme nna ge le sa ntumele bjale, ke ka gobane ke bolela nnete. ₄₆Ke mang mo go lena yo a ka mponago molato wa sebe? Bjale ge e le gore ke bolela nnete, le reng le sa ntumele? ₄₇Gape yo e lego wa Modimo o theeletša mantšu a Modimo. Fela lena, ka ge le se ba Modimo, ga le theeletše.”

₄₈Bajuda ba re go Jesu: “Ga ke re re rerešitše ge re re o Mosamaria, le gona o tsenwe ke modemone?”

₄₉Jesu a ba fetola a re: “Nna ga se ka tsenwa ke modemone. Taba ke gore ke hlompha Tate, eupša lena le a ntlhompholla. ₅₀Nna ga ke inyakele tlhompho, go na le yo a nnyakelago yona, gomme ke yena Moahlodi. ₅₁Ruri, ruri, ke le botša gore yo a phethago tše ke di rutago batho a ka se hwe le gatee.”

₅₂Bona ba re go yena: “Bjale gona re na le nnete ya gore o tsenwe ke modemone. Abrahama o hwile, le baprofeta ba hwile, fela wena o re yo a phethago tše o di rutago batho a ka se hwe le gatee. ₅₃O ra gore wena o feta tatagorena Abrahama yo a hwilego? Baprofeta le bona ba hwile. Wena o itira mang?”

₅₄Jesu a ba fetola a re: “Ge nkabe ke ikgodiša, bogolo bja ka e ka be e se bja selo. Yo a nkgodišago ke Tate – yena le rego ke Modimo wa lena. ₅₅Le ge le sa mo tsebe, nna ke a mo tseba. Ge nka re ga ke mo tsebe, ke tla be ke le mpheane bjalo ka lena. Nna ke a mo tseba, gomme ke phetha taelo ya gagwe. ₅₆Abrahama, tatagolena, o ile a thabela go tlo bona nako ya go tla ga ka; a e bona, gomme a thakgala.”

₅₇Ya ba ba re go yena: “O ka re le masome a mahlano a mengwaga o se nao, wa re o bone Abrahama?”

₅₈Jesu a ba fetola a re: “Ruri, ruri, ke le botša gore pele Abrahama a tswalwa nna ke be ke ntše ke le gona.”

₅₉Ba nama ba topa maswika gore ba mmolaye ka ona, fela yena a ba khutela, a tloga Tempeleng.

₁Jesu ge a ntše a sepela, a bona motho yo a tswetšwego a foufetše. ₂Barutiwa ba gagwe ba mmotšiša ba re: “Moruti, motho yo ge a tla tswalwa e le sefofu, ke ka lebaka la sebe sa mang – ke ka lebaka la sa gagwe, goba sa batswadi ba gagwe?”

₃Jesu a ba fetola a re: “Ga se ka lebaka la sebe sa gagwe goba sa batswadi ba gagwe, eupša e le gore ka yena ditiro tša Modimo di tle di bonagatšwe. ₄Gape ge e sa le mosegare re swanetše go dira mediro ya yo a nthomilego. Bošego bo etla bjo go bjona motho a ka se kgonego go šoma. ₅Ge ke sa le mo lefaseng, ke nna seetša sa ba ba lego lefaseng.”

₆A re go realo, a tshwela mare fase a duba seretse ka ona, gomme a tlotša sefofu seo mahlo ₇a re: “Sepela o yo hlapa ka bodibeng bja Siloamo.” Seo ke go re “Moromiwa”. Ke moka motho yola a ya, a fihla a hlapa, a boa a bona.

₈Ke ge baagišani ba gagwe le ba ba mmonego mola e sa le mokgopedi ba botšiša ba re: “Na motho yo ga se yola a bego a hlwa a dutše a kgopela?”

₉Ba bangwe ba re: “Ke yena!” Bangwe ba re: “Ga se yena, o dio swana naye!”

Yena mong a re: “Ke nna!”

₁₀Ba mmotšiša ba re: “Go tlile bjang gore bjale o kgone go bona?”

₁₁A ba botša a re: “Monna yola ba rego ke Jesu o dubile seretse, a ntlotša mahlo, a mpotša gore ke yo hlapa ka bodibeng bja Siloamo. Ka ya, ka re go hlapa ka napa ka bona.”

₁₂Ba mmotšiša ba re: “O kae yena?”

Yena a re: “Ga ke tsebe.”

₁₃Ke moka ba tšea monna yoo wa go foufollwa ba mo iša go Bafarisei. ₁₄Tšatši leo Jesu a dubilego seretse ka lona a foufolla sefofu e be e le la Sabatha. ₁₅Bafarisei le bona ba botšiša monna yoo ka mo a foufolotšwego ka gona. Yena a ba botša a re: “O ntloditše seretse mo mahlong, ka yo hlapa, gomme bjale ke a bona.”

₁₆Ba bangwe Bafarisei ba re: “Motho yoo ga a tšwe go Modimo, ka gobane ga a hlomphe letšatši la Sabatha.”

Bangwe ba re: “Motho yo e lego modiradibe a ka kgona bjang go dira mehlolo ya mohuta wo?” Gwa tsoga phapano mo go bona.

₁₇Bafarisei ba botšiša sefofu sela gape ba re: “Bjale wena o reng ka yena, ka ge a go foufolotše?”

Yena a re: “Ke moprofeta.”

₁₈Baetapele ba Bajuda bona ba be ba sa kgolwe gore pele e be e le sefofu mme bjale o foufologile, ba ba ba bitša batswadi ba gagwe, ₁₉ba ba botšiša ba re: “Na motho yo ke morwa wa lena yo le rego o tswetšwe e le sefofu? Go tlile bjang gore bjale a bone?”

₂₀Batswadi ba gagwe ba fetola ba re: “Gore ke morwa wa rena, le gore o tswetšwe e le sefofu, re a tseba. ₂₁Se re sa se tsebego ke gore na go tlile bjang gore a bone, le gore na go foufollwa gona o foufolotšwe ke mang. Botšišang yena mong; o godile, o tla ipolelela.”

₂₂Batswadi ba gagwe ge ba bolela ka mokgwa woo e be e le ka lebaka la go tšhaba baetapele ba Bajuda, gobane baetapele bao ba be ba kwane gore yo a ka rego o dumela gore Jesu ke yena Mesia o swanetše go rakwa sinagogeng. ₂₃Ke ka lebaka leo batswadi ba lesogana le ba rilego: “Botšišang yena mong, o godile!”

₂₄Ba mmitša la bobedi ba re go yena: “Godiša Modimo o bolele nnete. Rena re tseba ge motho yola a go foufolotšego e le modiradibe.”

₂₅Yena a ba fetola a re: “Ge e le modiradibe nnaena ga ke tsebe; se ke se tsebago ke gore ke be ke le sefofu, gomme bjale ke a bona.”

₂₆Ba mmotšiša gape ba re: “O go dirileng? O go foufolotše bjang?”

₂₇A ba fetola a re: “Ga ke re ke sa tšo le botša gomme la se ntheeletše? Le reng le nyaka go botšwa gape? Kgane le lena le nyaka go ba barutiwa ba gagwe?”

₂₈Bona ba mo fotlela ba re: “Morutiwa wa gagwe ke wena! Rena re barutiwa ba Moshe. ₂₉Re tseba ge Modimo a boletše le Moshe. Ge e le moisana yo yena, le mo a tšwago gona ga re go tsebe.”

₃₀Monna yoo a ba fetola a re: “Gomme go a makatša ge le sa tsebe mo a tšwago gona etšwe a mphoufolotše. ₃₁Etse re a tseba gore badiradibe Modimo ga a ba theeletše, o theeletša ba ba mo mmoifago, ba ba phethago thato ya gagwe. ₃₂E sa le go tloga le go tloga ga se gwa ka gwa kwagala gore motho yo a tswetšwego e le sefofu o foufolotšwe. ₃₃Ge motho yola e ka be e se wa go tšwa go Modimo a ka be a sa kgone selo.”

₃₄Ba mo fetola ba re: “Mmalo! Wa re o tswetšwe o le modiradibe wa mafelelo wa re o ka re ruta?” Gomme ba mo raka sinagogeng.

₃₅Jesu a kwa gore ba mo rakile. A re go mo hwetša a mmotšiša a re: “Na o dumela go Morwamotho?”

₃₆Motho yoo a re: “Mpotše gore ke ofe, Morena, gore ke tle ke dumele go yena.”

₃₇Jesu a re go yena: “O šetše o mmone, ebile ke yena yo a bolelago le wena gonabjale.”

₃₈Motho yoo a re: “Ke a dumela, Morena!” Gomme a khunama pele ga Jesu a mo lotšha.

₃₉Jesu a re: “Gape se ke se tletšego mo lefaseng ke go dira gore batho ba kgone go ikgethela mabapi le nna. Ke mo ba ba foufetšego ba tlago bona, gwa re ba ba bonago ba foufala.”

₄₀Ba bangwe ba Bafarisei ba ba bego ba na le yena ba mo kwa ge a realo, gomme ba mmotšiša ba re: “Kgane o ra gore le rena re foufetše?”

₄₁Jesu a ba fetola ka go re: “Ge le ka be le foufetše, le ka be le se na molato; eupša ka ge le re le a bona, molato le tla no šima le na le wona.”