Kgwerano ya Modimo le Abramo
1Ka morago ga tšeo Abramo a bona pono gomme a kwa Morena a bolela le yena a re: “O se ke wa boifa, Abramo. Ke tla go phemela kotsing, mme ka go fa moputso wo mogolo.”
2Eupša Abramo a re: “Morena, Mong wa ka, moputso woo o tla nkholang, ka gobane ga ke na bana? Mojalefa wa ka ke Eliesere wa Damaskose a nnoši. 3Ga se wa mpha bana, gomme yo mongwe wa makgoba a ka o tlile go ja bohwa bja ka.”
4Morena a re go yena: “Lekgoba le le ka se ke la ja lefa la gago; yo e lego morwa wa gago tiitii e tla ba yena mojalefa wa gago.” 5Morena a mo ntšhetša ntle a re: “Lebelela legodimong mme o bale dinaledi, ge o kgona; ditlogolo tša gago di tla ba kaalo.”
6Abramo a dumela go Morena, gomme ka lebaka la tumelo ya gagwe Morena a mmona e le moloki.
7Ke moo Morena a itšego go yena: “Ke nna Morena yo a go ntšhitšego Ure kua Babilonia go tlo go fa naga ye gore e be bohwa bja gago.”
8Eupša Abramo a re: “Morena, Mong wa ka, nka tseba bjang gore e tla ba ya ka?”
9Morena a mo fetola a re: “Ntlišetše kgomo ya tshadi le pudi le kgapa, ka moka e be tša mengwaga ye meraro, le mokuru le leeba.” 10Abramo a tliša diruiwa tšeo go Modimo, a di ripa ka bogare, mme a tšea mephapha a e bea ka go lebana ka methaladi ye mebedi; fela ge e le dinonyana tšela tšona a se ke a di ripaganya. 11Manong a theogela moo dibelebeleng tšeo, fela Abramo a a raka.
12Ge letšatši le dikela, Abramo a swarwa ke boroko bjo bogolo, mme a tlelwa ke poifo le letšhogo. 13Morena a re go yena: “Tseba gore ruri ditlogolo tša gago e tla ba bafaladi nageng e šele; e tla ba makgoba moo gomme ba tla gatelelwa mengwaga ye makgolo a mane. 14Eupša ke tla otla setšhaba seo se ba dirago makgoba, gomme ba tla tšea mahumo a mantši ge ba tloga moo nageng yeo. 15Ge e le wena, o tla ithobalela ka khutšo wa bolokwa o phetše galelele. 16Ba ba tlago boela mo ke moloko wa gago wa bone, mme ka nako yeo ke mo bokgopo bja Baamore bo tlago ba bo gaketše mo ba tlago ba ba swanela gore ke ba otle.”
17Ge letšatši le diketše, leswiswi le swere, ka bjako sebešo se se kuelelago muši le serumola se se laumago mollo tša rotoga mme tša feta gare ga mephapha yela ya diruiwa. 18Gona moo Morena a dira kgwerano le Abramo a re: “Ke tla fa ditlogolo tša gago naga ye go tloga mollwaneng wa Egepeta go fihlela nokeng ya Yufratese, 19go akaretša naga ya Bakene le ya Bakenase le ya Bakadmone 20le ya Bahete le ya Baperise le ya Barafa 21le ya Baamore le ya Bakanana le ya Bagirgashe le ya Bajebuse.”
