To The Word – Day 45

₁Ka mo pukung ye go na le mantšu ao Moshe a a boditšego setšhaba sa Israele ge se le lešokeng ka bohlabela bja noka ya Jordane. Ba be ba le moeding wa Jordane kgauswi le Sufe, kgathe ga motse wa Parane ka lehlakoreng le lengwe, le motse wa Tofele, le wa Labane, le wa Hatserote, le wa Di-Sahaba ka go le lengwe. ₂Go tloga thabeng ya Sinai go fihla Kadeshe-Barnea ka tsela ya naga ya dithaba ya Edomo go tšea matšatši a lesome le le tee. ₃Ka letšatši la pele la kgwedi ya lesome le motšo o tee ya ngwaga wa masome a mane ka morago ga ge Baisraele ba tlogile Egepeta, Moshe o ile a ba botša tšohle tše Morena a mo laetšego gore a ba botše tšona. ₄Seo se diregile ka morago ga ge Moshe a fentše Kgoši Sihone wa Baamore, yo a bego a buša motseng wa Heshbone, le Kgoši Ogo wa Bashane, yo a bego a buša motseng wa Ashtarote le wa Edrei. ₅Ke mola setšhaba se sa le ka bohlabela bja Jordane, nageng ya Moaba, ge Moshe a thoma go hlatholla melao ya Morena le dithuto tša gagwe.

O ile a re: ₆“Ge re be re sa le kua thabeng ya Sinai, Morena Modimo wa rena o ile a re go rena: ‘Le dutše mo thabeng ye go lekane. ₇Hlahlamollang mešaša, le hudugeleng nageng ya dithaba ya Baamore le ditikologong tša moo ka moka – moeding wa Jordane, dithabeng le nagengtlase, seleteng sa ka borwa, le lebopong la Lewatle la Mediteraniene. Yaang nageng ya Kanana, le be le feteleng ka thoko yela ya thaba ya Lebanone go yo fihla nokeng ye kgolo ya Yufratese. ₈Yeo ke naga ye nna, Morena, ke enetšego borakgolokhukhu ba lena, Abrahama le Isaka le Jakobo, gore ke tla e fa bona le ditlogolo tša bona. Sepelang mme le e thopeng, ka gobane ke le gafetše yona.’ ”

₉Moshe a re go setšhaba: “Mola re sa le thabeng ya Sinai ke le boditše ka re: ‘Go le eta pele ke nnoši go a mpalela. ₁₀Morena Modimo wa lena o le atišitše la ba bjalo ka dinaledi tša legodimo. ₁₁Anke Morena, Modimo wa borakgolokhukhu ba lena, a le oketše gasekete, gomme a le šegofatše bjalo ka ge a le tshephišitše! ₁₂Bjale nna ke nnoši nka rwala bjang boikarabelo bja go le lamola?’ ₁₃Ke ile ka re kgethang banna ba bohlale le kwešišo le tsebo kgorong ye nngwe le ye nngwe, mme ke tla ba bea bahlokomedi ba lena. ₁₄La dumela gore seo e ka ba taba ye botse. ₁₅Ka gona ka tšea baetapele ba bohlale ba ba nago le tsebo ba le ba kgethilego dikgorong tša lena, ka ba bea bahlokomedi ba lena. Ba bangwe ba ile ba hlokomela batho ba sekete, ba bangwe ba hlokomela ba lekgolo, ba bangwe ba hlokomela ba masome a mahlano, mme ba bangwe ba hlokomela ba lesome. Ke beile le bahlankedi ba bangwe dikgorong ka moka.

₁₆“Mehleng yeo ke ile ka ba laela ka re: ‘Le theetšeng diphapano tše di tsogago gare ga batho ba gabolena. Phapanong ye nngwe le ye nngwe ye e amago batho ba gabolena goba bafaladi ba ba dulago gare ga lena le ahlole motho gabotse. ₁₇Le se ke la ahlola sepitša; le ahloleng yo mongwe le yo mongwe ka moo go lebanego, le se ke la lebelela gore ke wa maemo afe. Le se ke la boifa motho, ka gobane kahlolo ya lena e tšwa go Modimo. Ge go na le molato wo o le palelago, le o tlišeng go nna mme nna ke tla o ahlola.’ ₁₈Ka yona nako yeo ke ile ka le laela ditaba ka moka tše le bego le swanetše go di dira.”

₁₉“Re dirile seo Morena Modimo wa rena a re laetšego sona. Re tlogile thabeng ya Sinai, gomme ra putla lešoka lela le legolo la go boifiša tseleng ya go ya nageng ya dithaba ya Baamore. Ge re fihla Kadeshe-Barnea _20-21ka re go lena: ‘Bjale le fihlile nageng ya dithaba ya Baamore yeo Morena Modimo wa rena, Modimo wa borakgolokhukhu ba rena, a re fago yona. Yaang le e thopeng ka moo a laetšego ka gona, ka gobane o le gafetše yona. Le se ke la boifa goba la nolega moko.’

₂₂“Eupša le ile la tla go nna la re: ‘A re romeng banna go yo hlola naga yela, pele ga ge re eya, gore ba tle ba re botše tsela ye kaonekaone ye re ka tšeago ka yona, le gore ke metse ye mebjang yeo e lego fao.’

₂₃“Ke ile ka kwana le taba yeo, ka gona ka kgetha banna ba lesome le ba babedi, o tee kgorong ye nngwe le ye nngwe. ₂₄Ba ile ba ya nageng ya dithaba ba ba ba yo fihla moeding wa Eshkolo, ba e lekola. ₂₅Ba re tlela le dienywa tše dingwe tša naga yeo, gomme ba re begela gore naga yeo Morena Modimo wa rena a re fago yona e nonne kudu.

₂₆“Eupša le ile la nyatša taelo ya Morena Modimo wa lena, mme la se nyake go tsena nageng yeo. ₂₇La ngongorega la re: ‘Morena o re hloile. O re ntšhitše Egepeta e le fela go tlo re gafela go Baamore ba, gore ba re fetše. ₂₈Ke naga mang ye re yago go yona? Re nolegile moko. Banna ba re bego re ba romile ba re botša gore batho ba moo ba tiile, ebile ke ba batelele go re feta, le gore ba dula metseng ye e ageleditšwego ka merako ye e fihlago legodimong. Ba bile ba bone ditšitširipa moo, ditlogolo tša Baanake!’

₂₉“Fela ke ile ka le botša ka re: ‘Le se ke la boifa goba la tšhaba batho bao. ₃₀Morena Modimo wa lena yo a le etilego pele o tla le lwela, bjalo ka ge le mmone a le lwela kua Egepeta ₃₁le mo lešokeng. Le bone ka moo a le sepedišitšego ka polokego tseleng ka moka go tlo fihla fa, bjalo ka ge monna a kuka morwa wa gagwe.’ ₃₂Eupša godimo ga tšeo ke di boletšego, le ile la fela le sa tshephe Morena Modimo wa lena, ₃₃yoo ka mehla a le etilego pele go yo le hweletša lefelo leo le ka hlomago mešaša go lona. O be a sepela pele ga lena ka thololo ya mollo bošego, le ka thololo ya leru mosegare go le laetša tsela.”

₃₄“Morena o ile a kwa dipelaelo tša lena mme a galefa. A ena a re: ₃₅‘Ga go le o tee wa lena wa moloko wo mobe wo yo a tlago goroga nageng ye e nonnego ye ke ennego go e fa borakgolokhukhu ba lena. ₃₆Ke Kalebe fela, morwa wa Jefune, yo a tlago goroga go yona. O ile a no fela a mpotegela, mme ke tla fa yena le ditlogolo tša gagwe naga yeo a e hlotšego.’ ₃₇Ka lebaka la lena Morena o ile a ba a galefela le nna, mme a re: ‘Le wena, Moshe, o ka se tsene nageng yeo. ₃₈Eupša mothuši wa gago, Joshua, morwa wa Nunu, yena o tla tsena go yona. Wena mo tutuetše, ka gobane ke yena a tlago eta Baisraele pele go thopa naga yeo.’

₃₉“Ke moo Morena a itšego go rena ka moka: ‘Bana ba lena ba e sa lego ba bannyane, ba sa tsebego botse le bobe, ke bona ba tlago goroga nageng yeo – bona bana bale le itšego ba tla thopša ke manaba a lena. Ke tla ba fa naga yeo gomme ba e thopa. ₄₀Eupša ge e le lena, gomang le boeleng lešokeng tseleng ya go ya kgogometšaneng ya Akaba.’ ”

₄₁“Le ile la fetola la re: ‘Moshe, re fošeditše Morena. Fela bjale re tla hlasela Baamore ka mo Morena Modimo wa rena a re laetšego.’ Ke moo yo mongwe le yo mongwe wa lena a itokišeditšego go lwa a gopola gore go šwahlela naga ya dithaba go tla ba bonolo.

₄₂“Fela Morena a re go nna: ‘Ba botše gore ba se ke ba hlasela, ka gobane nka se be le bona, gomme manaba a bona a tla ba fenya.’ ₄₃Ke ile ka le botša se Morena a se boletšego, eupša la se ke la ntheetša, la gana taelo ya Morena, mme ka boikgogomošo bja lena la šwahlela naga ya dithaba. ₄₄Baamore ba ba bego ba dula moo dithabeng tšeo ba le gahlanetša bjalo ka motšhitšhi wa dinose. Ba le rakediša mme ba le fenya kua Horma, nageng ya dithaba ya Edomo. ₄₅Ka gona ge le boa la llela Morena le nyaka thušo, fela yena a se ke a le theetša goba a le ela hloko.”

₄₆“E rile ge re feditše nako ye telele re dutše Kadeshe,

₂“Morena a re go nna: ₃‘Le tšere nako ye telele, le ralala le naga ye ya dithaba go lekane; bjale lebang leboa. ₄Botša setšhaba o re: Le batametše go putla naga ya dithaba ya Edomo, naga ya bomorwarragolena, ditlogolo tša Esau. Ba tla le boifa, ₅fela le itshware le se ke la lwa le bona, ka gobane nka se le fe le ge e le seripana sa naga ya bona. Naga ye ya Edomo ke e file ditlogolo tša Esau. ₆Le ka reka dijo le meetse go bona.’

₇“Gopolang ka moo Morena Modimo wa lena a le šegofaditšego go tšohle tše le di dirilego. O le hlokometše ge le ralala le lešoka le le legolo. O bile le lena mengwaga ye ye masome a mane, gomme le bile le tšohle tše le bego le di nyaka.

₈“Ka gona re tlogile go ditlogolo tša Esau, ra phamoga tsela ye e tšwago motseng wa Elate le wa Etsione-Gebere e yago moeding wa Jordane, gomme ra ya leboabohlabela go leba Moaba. ₉Gomme Morena a re go nna: ‘O se ke wa rumola batho ba Moaba, ditlogolo tša Lote, goba wa lwa le bona. Ke ba file motse wa Are, gomme nka se go fe seripa se sengwe sa naga ya bona.’ ”

₁₀Morafe wo mongwe wa maatla wa ditšitširipa wo o bego o bitšwa Baeme o be o dula Are. E be e le batho ba batelele bjalo ka Baanake, morafe wo mongwe wa ditšitširipa. ₁₁Go no swana le Baanake ba be ba tsebja le ka la Barafa, fela Bamoaba ba be ba ba bitša Baeme. ₁₂Bahori ba be ba dula Edomo, eupša ditlogolo tša Esau di ile tša ba raka moo, tša fediša setšhaba sa bona, gomme tša dula fao sebakeng sa bona, go no swana le ge Baisraele ka morago ba ile ba tla ba raka manaba a bona nageng yeo Morena a ba filego yona.

₁₃“Ke moka ra itokiša ra tshela nokana ya Serede bjalo ka ge Morena a re laetše. ₁₄E bile mengwaga ye masome a mararo a metšo ye seswai go thoma ka nako ye re tloga Kadeshe-Barnea go fihlela ge re tshela nokana ya Serede. Bahlabani ka moka ba thaka yeo ba be ba hwile, go bile bjalo ka ge Morena a be a ba enetše. ₁₅Morena o ile a fela a elwa le bona go fihlela ge a ba feditše ka moka setšhabeng.

₁₆“Ka morago ga ge bahlabani bao ka moka ba hwile, ₁₇Morena o ile a re go rena: ₁₈‘Lehono le swanetše go putla naga ya Moaba ka tsela ya Are. ₁₉Ke gona le tlago ba le le kgauswi le naga ya Baamone, ditlogolo tša Lote. Le se ke la ba rumola goba la lwa le bona, ka gobane nka se le fe seripa se sengwe sa naga ye ke ba filego yona.’ ”

₂₀Naga yeo e tsebja le ka la naga ya Barafa, batho bao pele ba bego ba dula moo, mme Baamone ba ba bitša Basamsume. ₂₁E be e le ba batelele bjalo ka Baanake; e le ba bantši, ebile e le setšhaba se maatla. Fela Morena o ile a ba fediša, ka gona Baamone ba thopa naga yeo mme ba dula go yona. ₂₂Seo ke se Morena a bego a se diretše Baedomo, ditlogolo tša Esau, ba ba bego ba dula nageng ya dithaba ya Edomo. O ile a fediša Bahori, mme Baedomo ba tšea naga ya bona ba dula go yona, moo ba sa dulago gona le bjale. ₂₃Batho ba ba tšwago sehlakahlakeng sa Krete ba ile ba fediša Baaba bao ba bego ba dula metseng ya go ya borwa go fihla motseng wa Gasa, mme ba dula go yona.

₂₄“Ka morago ga ge re putlile naga ya Moaba Morena a re go rena: ‘Itokišeng le thomeng leeto le tsheleng nokana ya Arnone. Ke gafela Sihone, Moamore, kgoši ya Heshbone, gotee le naga ya gagwe diatleng tša lena. Le mo hlaseleng, mme ka tsela yeo le thome go thopa naga ya gagwe. ₂₅Lehono ke tla thoma go dira gore batho mo gohle ba le boife. Yo mongwe le yo mongwe o tla thothomela ka poifo ge a ekwa ka maatla a lena.’

₂₆“E rile ge re le lešokeng la Kedemote ka roma batseta go Kgoši Sihone wa Heshbone ba iša molaetša wa khutšo wa go re: ₂₇‘Re dumelele re putle nageng ya gago. Re tla fela re swere tsela gomme re ka se phamoge. ₂₈Re tla lefela dijo tše re di jago le meetse a re a nwago. Se re se nyakago ke fela go iphetela nageng ya gago ₂₉go fihlela re tshela noka ya Jordane re tsena nageng ye Morena Modimo wa rena a re fago yona. Ditlogolo tša Esau tšeo di dulago Edomo, le Bamoaba bao ba dulago Are ba re dumeletše go putla nageng ya bona.’

₃₀“Fela Kgoši Sihone a gana go re dumelela go putla nageng ya gagwe. Morena Modimo wa lena a mo thatafatša, a mo ngangabatša gore a tle a mo fenye a tšee naga ya gagwe ye le bjale re sa e thopilego.

₃₁“Ke moo Morena a itšego go nna: ‘Bona, ke gafetše Kgoši Sihone le naga ya gagwe diatleng tša gago; thoma go thopa naga ya gagwe mme o dule go yona.’ ₃₂Sihone o ile a tšwa le bahlabani ba gagwe ka moka go tlo lwa le rena kgauswi le motse wa Jahatse, ₃₃fela Morena Modimo wa rena a mo gafela diatleng tša rena, gomme ra mmolaya gotee le barwa ba gagwe le bahlabani ba gagwe ka moka. ₃₄Ka yona nako yeo re ile ra fenya metse ka moka, ra e pšhatla, mme ra bolaya batho bohle – banna, basadi le bana. Ra se šadiše motho le o tee. ₃₅Ra thopa diruiwa, ra ba ra hula metse. ₃₆Morena Modimo wa rena o gafetše metse ka moka diatleng tša rena go tloga Aroere, ka thoko ga moedi wa nokana ya Arnone, le motseng wo o lego ka moeding, go fihlela Gileade; gwa se be le motse wo o tiilego, wa go ageletšwa, mo o kago re palela. ₃₇Fela ga se ra ka ra batamela naga ya Baamone, goba mabopong a nokana ya Jaboko, goba metse ya naga ya dithaba, goba nageng ye nngwe le ye nngwe yeo Morena Modimo wa rena a re laetšego gore re se ke ra ya go yona.”

₁“Ka morago ga moo ra leba leboa ka tsela ya go ya seleteng sa Bashane, gomme Kgoši Ogo a tšwa le bahlabani ba gagwe ka moka go tlo lwa le rena kgauswi le motse wa Edrei. ₂Morena a re go nna: ‘O se ke wa mmoifa. Ke tlilo mo gafela wena gotee le bahlabani ba gagwe le naga ya gagwe ka moka. O mo dire se o se dirilego Sihone, kgoši ya Baamore, yo a bego a buša Heshbone.’

₃“Ka gona Kgoši Ogo le setšhaba sa gagwe le bona Morena Modimo wa rena a ba gafela diatleng tša rena, gomme ra ba bolaya ka moka, ra se šadiše motho. ₄Ka yona nako yeo ra ba ra thopa metse ya gagwe ka moka – gwa se be le o tee wo re sa o tšeego. Metse ka moka ye re e thopilego e bile ye masome a a selelago – e le ya selete ka moka sa Argobe moo Kgoši Ogo wa Bashane a bego a buša ntshe. ₅Metse ye ka moka e be e ageleditšwe ka merako ya go ya godimo, le ka dikgoro le mapheko a go di tswalela, go bile go na le metse ye mentši ye e se nago merako. ₆Re ile ra pšhatla metse ka moka mme ra bolaya banna ka moka le basadi le bana, ka wona mokgwa woo re dirilego metseng ye e bego e le ya Kgoši Sihone wa Heshbone. ₇Ra thopa diruiwa ra ba ra hula metse.

₈“Ka nako yeo re ile ra tšea naga ya ka bohlabela bja noka ya Jordane, go tloga nokaneng ya Arnone go fihla thabeng ya Hermone, go dikgoši tšeo tše pedi tša Baamore. ₉Basidone ge ba bitša thaba ya Hermone ba re ke Sirione, Baamore bona ba re ke Senire. ₁₀Re tšere naga ka moka ya Kgoši Ogo wa Bashane: metse ya dinaga tše di phagamego, dilete tša Gileade le Bashane, go ya bohlabela go yo fihla metseng ya Salka le Edrei.”

₁₁Kgoši Ogo e bile yena wa mafelelo wa Barafa. Lepokisi leo setopo sa gagwe se bolokilwego ka lona le be le dirilwe ka letlapa. E be e le la botelele bja dimetara tše nne, le bophara bjo e ka bago dimetara tše pedi, go ya ka tekanyo ye e tlwaelegilego ya mehleng yeo. Le sa bonwa motseng wa Baamone wa Raba.

₁₂“Ge re thopile naga yeo, ke ile ka arolela kgoro ya Rubene le ya Gade naga ye e lego ka leboa la motse wa Aroere kgauswi le nokana ya Arnone, le seripa sa naga ya dithaba ya Gileade gotee le metse ya yona. ₁₃Ka arolela seripa sa kgoro ya Manase naga ya Gileade ye e bego e sa šetše, gammogo le naga ya Bashane ka moka moo Ogo a bušitšego ntshe, ke go re selete ka moka sa Argobe.”

Bashane ka moka e be e tsebja gore ke naga ya Barafa. ₁₄Jaire, wa kgoro ya Manase, o tšere selete ka moka sa Argobe, ke go re Bashane, go yo fihla mollwaneng wa Geshure le Maaka. A reela metse yeo leina la gagwe, gomme e sa tsebja e le metse ya Jaire.

₁₅“Ke file kgorwana ya Makire le kgoro ya Manase naga ya Gileade. ₁₆Gomme kgoro ya Rubene le ya Gade ka di fa naga ya go tloga Gileade go fihla nokaneng ya Arnone. Bogare bja nokana e bile mollwane wa bona wa ka borwa, mme mollwane wa bona wa ka leboa ya ba nokana ya Jaboko, yeo seripa sa yona se bego se dira mollwane wa Baamone. ₁₇Ka bodikela naga ya bona e be e fihla nokeng ya Jordane, go tloga letsheng la Genesarete ka leboa go theogela Lewatleng le le Hwilego ka borwa, le go yo fihla patogeng ya thaba ya Pisga ka bohlabela.

₁₈“Ka yona nako yeo ke ile ka ba laela ka re: ‘Morena Modimo wa lena o le file naga ye ya ka bohlabela bja Jordane gore le e thope. Bjale hlamang bahlabani ba lena, le ba romeleng mošola wa Jordane ba thake dikgoro tše dingwe tša Baisraele pele. ₁₉Bao ba šalago metseng ye ke le aroletšego yona e be fela basadi ba lena, le bana ba lena, le diruiwa tša lena; ke a tseba gore le na le dikgomo tše ntši. ₂₀Le thuše Baisraele ba gabolena ntweng go fihlela ba thopa naga ye Morena a ba fago yona ka bodikela bja Jordane, gomme Morena a ba dudiša moo ka khutšo, bjalo ka ge le lena a le dudišitše. Ka morago ga moo le ka boela mono nageng ye ke le aroletšego yona.’

₂₁“Ke moo ke laetšego Joshua ka re: ‘O bone se Morena Modimo wa gago a se dirilego magoši ale a mabedi, Sihone le Ogo; gomme sona seo ke se a tlago se dira mebušo yohle ye le e šwahlelago. ₂₂O se ke wa ba boifa, ka gobane Morena Modimo wa gago o tla go lwela.’

₂₃“Ka nako yeo ke ile ka rapela ke tiišitše ka re: ₂₄‘Morena, Mong wa ka, o sa ntaeditše fela mathomo a dilo tše kgolo tše di makatšago tše o tlilego go di dira. Ga go modimo legodimong goba lefaseng yo a ka dirago dilo tše kgolo tše o di dirilego! ₂₅A ke tshele noka ya Jordane, Morena, mme ke bone naga ye e nonnego ya ka mošola wa yona, naga ye botse ya dithaba le dithaba tša Lebanone.’

₂₆“Eupša ka lebaka la lena Morena o be a nkgalefetšwe mme a se ke a ntheetša. A re: ‘Go lekane! O se sa nkgopela seo gape! ₂₇Namelela ntlhohlong ya thaba ya Pisga, o lebelele bodikela, le leboa, le borwa, le bohlabela. O lebeledišiše gabotse se o se bonago, ka gobane o ka se tsoge o tshetše noka ya Jordane. ₂₈Botša Joshua se a swanetšego go se dira. Mo tutuetše, o mo tiiše, ka gobane o tla eta setšhaba pele a se tshediša noka go yo dula nageng ye o e bonago.’

₂₉“Ka gona re ile ra fela re dutše moeding go lebana le motse wa Bethe-Peore.”

₁Moshe a re go setšhaba: “Le phethe melao ka moka ye ke le fago yona, mme le tla phela la dula nageng ye Morena, Modimo wa borakgolokhukhu ba lena, a le fago yona. ₂Le se ke la oketša tše ke le laelago tšona, goba la di fokotša. Le phethe ditaelo tša Morena Modimo wa lena tše ke le fago tšona. ₃Le iponetše ka bolena se Morena a se dirilego thabeng ya Peore. O fedišitše bohle ba ba bego ba khunamela Baale moo, ₄eupša lena bao le bego le botegela Morena Modimo wa lena le sa phela le lehono.

₅“Ke le file melao ka moka, bjalo ka ge Morena Modimo wa ka a mpoditše gore ke le fe yona. Le e phetheng le nageng ye le batametšego go e šwahlela le go dula go yona. ₆Le e phetheng, le e latele, gomme seo se tla laetša ditšhaba tše dingwe gore le ba bohlale bjang. Ge ba ekwa ka melao ye ka moka, ba tla kgotsa ba re: ‘Setšhaba se segolo se se na le bohlale le kwešišo bjang!’

₇“Ga go setšhaba se sengwe se segolo se se nago le modimo yo a lego kgauswi le sona bjalo ka ge Morena Modimo wa rena a le kgauswi le rena nako ye nngwe le ye nngwe ge re mo kgopela thušo. ₈Ga go setšhaba se sengwe se segolo se se nago le melao le melawana ye e lokilego bjalo ka ye ke le filego yona lehono. ₉Le itlhokomeleng! Le kgonthišišeng gore le se ke la tsoga le lebetše se le se bonego ka mahlo a lena. Le botšeng bana ba lena le ditlogolwana tša lena ₁₀ka tša letšatši lela le eme pele ga Morena Modimo wa lena kua thabeng ya Sinai mola a re go nna: ‘Bokanya setšhaba. Ke nyaka gore ba kwe se ke tlago se bolela, gore ba tle ba ithute go mpoifa bophelong bja bona ka moka, le gore ba tle ba rute le bana ba bona go mpoifa.’

₁₁“Le laodišetšeng bana ba lena ka moo le ilego la batamela thabeng la ema patogeng ya thaba ye e bego e pipeditšwe ke maru a dipipa a muši wo mosomoso, le mollo woo o laumelago legodimong. ₁₂Le ba botšeng ka moo Morena a boletšego le lena a le gare ga mollo, ka moo le mo kwelego a bolela eupša la se mmone sebopego. ₁₃O le boditše se le swanetšego go se dira go botegela kgwerano ye a e dirilego le lena – le swanetše go phetha Melao ye Lesome yeo a e ngwadilego matlapeng a mabedi. ₁₄Morena o mpoditše gore ke le fe melao le melawana ka moka ye le swanetšego go e phetha nageng ye le batametšego go e šwahlela le go dula go yona.”

₁₅“Ge Morena a bolela le lena a le ka gare ga mollo thabeng ya Sinai, ga se la bona sebopego sa gagwe. Gore le tle le bolokege, gona le itišeng ₁₆le se dire sebe ka go itirela modimo wa seswantšho sa sebopego se sengwenyana – e ka ba sa monna goba sa mosadi, ₁₇sa phoofolo goba sa nonyana, ₁₈sa segagabi goba sa hlapi. ₁₉Le se ke la lekega mme la obama la direla tše le di bonago legodimong – letšatši, ngwedi le dinaledi. Morena Modimo wa lena o file ditšhaba ka moka dilo tše gore ba di khunamele. ₂₀Eupša lena Morena o le phološitše Egepeta, mouba wola o fišago wa go tološa tshipi. O le ntšhitše fao gore le tle le be setšhaba sa gagwe, bjalo ka ge le le ba gagwe le lehono. ₂₁Ka lebaka la lena Morena Modimo wa rena o ile a nkgalefela mme a ena gore nka se tshele noka ya Jordane ka tsena nageng ye botse ye a le fago yona. ₂₂Ke tla hwela mo nageng ye, nka se tsoge ke tshetše noka ye, fela lena le tla tshela la yo dula nageng yeo ye botse. ₂₃Le hlokomeleng gore le se lebale kgwerano ye Morena Modimo wa lena a e dirilego le lena. Le phetheng taelo ya gagwe ya gore le se ke la itirela modimo wo mongwenyana wa seswantšho, ₂₄ka gobane Morena Modimo wa lena o bjalo ka mollo wo o tukago; ga a kgotlelele tirelo ya medimo ye mengwe.

₂₅“Le ge le dutše moo nageng yeo nako ye telele mme le bile le bana le ditlogolwana, le se ke la dira sebe ka go itirela modimo wa seswantšho wa sebopego se sengwenyana. Bjoo ke bobe pele ga Morena, gomme bo tla mo kgopiša. ₂₆Lehono ke dira legodimo le lefase dihlatse tša ka gore ge le sa ntheeletše, le tla timelela nageng yeo. Le ka se phele nako ye telele nageng yela ya ka mošola wa Jordane ye le batametšego go e thopa. Le tla feleletšwa taa. ₂₇Morena o tla le šwalalanya gare ga ditšhaba tše dingwe moo go tlago phologa fela ba mmalwa. ₂₈Fao le tla khunamela medimo ye e dirilwego ke batho, medimo ya dikota le ya matlapa, medimo ye e sa bonego goba e sa kwego, ye e sa kgonego go ja goba go dupa. ₂₉Moo le tla nyaka Morena Modimo wa lena, gomme ge le ka mo nyaka ka dipelo tša lena ka moka, le tla mo hwetša. ₃₀Eupša ge le le bothateng mme dilo tše ka moka di le hlagela, ke gona mafelelong le tlago retologela go Morena mme la mo theeletša. ₃₁Ke Modimo wa kgaugelo. A ka se le lahle goba a le fediša, le gona a ka se lebale kgwerano yela yena a e dirilego le borakgolokhukhu ba lena.

₃₂“Nyakišišang tša mehleng ye e fetilego, nako yela le sešo la belegwa, go thoma ka nako yela Modimo a bopa motho mo lefaseng. Lekodišišang lefase lohle. A go na le selo se sengwe se segolo se se kilego sa direga sa go swana le se? A go na le yo a kilego a kwa taba ye e swanago le ye? ₃₃A go na le setšhaba seo se kilego sa phela ka morago ga ge se kwele modimo a bolela le sona a le gare ga mollo, bjalo ka ge lena le mo kwele? ₃₄A go na le modimo yo a kilego a ba le sebete sa go ya go ntšha setšhaba setšhabeng se sengwe mme a se dira sa gagwe, bjalo ka ge Morena Modimo wa lena a le diretše kua Egepeta? O dirišitše maatla a gagwe a magolo le go tia ga gagwe, a tliša dikotlo le ntwa, a dira mehlolo le dimakatšo, a ba a hlagiša tše di šiišago mahlong a lena. ₃₅Morena o le laeditše seo gore le tle le tsebe gore yena a nnoši ke Modimo, le gore ga go yo mongwe modimo. ₃₆O le kwešitše lentšu la gagwe le etšwa legodimong gore a le rute; le mo lefaseng o dirile gore le bone mollo wo mogolo wa gagwe, gomme a bolela le lena a le go wona. ₃₇Ka gobane o ratile borakgolokhukhu ba lena o kgethile lena ditlogolo tša bona, gomme ka maatla a gagwe a magolo a le ntšha Egepeta ka boyena. ₃₈Ge le etla o rakile ditšhaba tše kgolo le tše maatla go le feta, gore a tle a le goroše mme a le fe naga ya tšona, naga ye le lehono e sa lego ya lena. ₃₉Ka gona, lehono gopolang, le se ke la lebala gore Morena ke Modimo legodimong le lefaseng. Ga go modimo yo mongwe. ₄₀Le phethe melao le melawana ya gagwe ka moka ye ke le filego yona lehono, gore tšohle di tle di le atle, lena le ditlogolo tša lena. Le tla fela le dula nageng ye Morena Modimo wa lena a le felago yona sa ruri.”

₄₁Moshe a kgetha metse ye meraro ka bohlabatšatši bja Jordane ₄₂gore yo a bolailego motho ka phošo e se lenaba la gagwe a tšhabele go wo mongwe wa yona gore a se ke a bolawa. ₄₃Kgoro ya Rubene e ile ya abelwa motse wa Betsere, nagathoteng ya lešoka; kgoro ya Gade yona ya abelwa Ramote, nageng ya Gileade; ge e le kgoro ya Manase yona ya abelwa Golane, nageng ya Bashane.

₄₄Moshe o ile a fa setšhaba sa Israele melao le dithuto tša Modimo. _45-46Ke ka morago ga ge ba tšwile Egepeta, ba le ka bohlabela bja noka ya Jordane ka moeding, go lebana le motse wa Bethe-Peore, ge a ba fa melao ye. Moo e be e le nageng ya Kgoši Sihone wa Baamore, yo a bego a buša a le motseng wa Heshbone. Moshe le setšhaba sa Israele ba ile ba mo fenya ge ba etšwa Egepeta. ₄₇Ba dula nageng ya gagwe le nageng ya Kgoši Ogo wa Bashane. Tšeo e be e le dikgoši tše pedi tša Baamore tše di bego di dula ka bohlabela bja Jordane. ₄₈Naga yeo e be e tloga motseng wa Aroere, lebopong la nokana ya Arnone, go yo fihla thabeng ya Sirione, ke go re thaba ya Hermone. ₄₉E be e akaretša le moedi ka moka ka bohlabela bja noka ya Jordane go yo fihla Lewatleng le le Hwilego le patogeng ya thaba ya Pisga.

₁Taba ye Botse ya Jesu Kriste, Morwa wa Modimo, e thoma ka mokgwa wo:

₂Ka pukung ya moprofeta Jesaya go ngwadilwe go re:

₄Ka gona Johanese Mokolobetši a ya lešokeng a botša batho gore ba sokologe dibeng tša bona, ba kolobetšwe, gomme Modimo o tla ba lebalela tšona. ₅Batho ka moka ba naga ya Judea le ba motse wa Jerusalema ba ya go Johanese. Ba ipolela dibe tša bona mme yena a ba kolobetša ka nokeng ya Jordane.

₆Johanese yo o be a apara seaparo sa boya bja kamela, a ipofa letheka ka lerala la mokgopha, gomme a eja ditšie le todi ya dinose. ₇A begela batho a re: “Yo a tlago ntlhatlama o mpheta ka maatla. Ga se ka swanela le go inama ka mmofolla marala a dieta. ₈Nna ke le kolobeditše ka meetse, eupša yena o tla le kolobetša ka Moya wo Mokgethwa.”

₉Ka tšona nako tšeo Jesu a tla a etšwa Nasaretha, nageng ya Galilea, gomme a kolobetšwa ke Johanese ka nokeng ya Jordane. ₁₀Ge Jesu a seno tšwa ka meetseng, a bona leratadima le gagoga gomme Moya wa Modimo o theogela godimo ga gagwe o le bjalo ka leeba. ₁₁Gwa kwagala lentšu le etšwa legodimong le re: “O Morwa wa ka yo ke mo ratago, yo a nkgahlago kudu.”

₁₂Ke moka Moya wa akgofa wa iša Jesu lešokeng, ₁₃moo a ilego a dula matšatši a masome a mane a lekwa ke Sathane, a dutše le diphoofolo, barongwa bona ba mo hlankela.

₁₄Ge Johanese a seno lahlelwa ka kgolegong, Jesu a ya Galilea gomme a begela batho Taba ye Botse ya Modimo. ₁₅A re: “Nako e fihlile, le mmušo wa Modimo o batametše. Sokologang dibeng tša lena, le dumele Taba ye Botse!”

₁₆Ya re ge Jesu a sepela lebopong la letsha la Galilea, a bona barei ba dihlapi ba babedi, Simone le Andrease, ngwanabo, ba rea dihlapi ka malokwa ka letsheng. ₁₇Jesu a re go bona: “Ntateleng, gomme ke tla le dira barei ba batho.” ₁₈Ba akgofa ba tlogela malokwa a bona, ba mo latela.

₁₉A fetela pejana gomme a bona barwa ba Sebediose, e lego Jakobose le Johanese, ngwanabo. Ba be ba lokiša malokwa a bona ba le ka leselawatleng. ₂₀Ge Jesu a ba bona, a ba bitša; ba tlogela tatagobona Sebediose le bathwalwa ka leselawatleng, gomme ba latela Jesu.

₂₁Jesu le barutiwa ba gagwe ba fihla motseng wa Kapernaume, gomme ka letšatši la Sabatha Jesu a tsena ka sinagogeng, a thoma go ruta batho. ₂₂Batho ba makatšwa ke mokgwa wo a rutago ka wona, gobane o be a sa rute bjalo ka boramangwalo, eupša a ruta e le yo a sa ipelaelego.

₂₃Ka yona nako yeo ke ge go goeletša monna yo mongwe ka sinagogeng yo a bego a tsenwe ke moya wo mobe, ₂₄a re: “O nyakang mo go rena, wena Jesu wa Nasaretha? A o tlile go re fediša? Nna ke a go tseba – o Mokgethwa wa Modimo!”

₂₅Jesu a laela moya woo wo mobe a re: “Homola, o tšwe go motho yo!”

₂₆Moya wo mobe woo wa mo akga, wa goeletša kudu, mme wa tšwa go yena. ₂₇Batho ka moka ba tlabega mo ba ilego ba botšišana ba re: “Ke dilo mang tše? Gape ye ke thuto ye mpsha, ya maatla a magolo. Le meoya ye mebe o a e laola, gomme e a mo kwa.”

₂₈Setumo sa Jesu sa akgofa sa phatlalala gohle le naga ya Galilea.

₂₉Ge Jesu le barutiwa ba gagwe ba tloga ka sinagogeng, ba ile ba ya ga gaboSimone le Andrease ba na le Jakobose le Johanese. ₃₀Mmatswale wa Simone o be a robetše a swerwe ke letadi; Jesu a botšwa ka ga yena. ₃₁A ya go yena, a mo tsoša a mo swere ka seatla. Molwetši a fola letadi, gomme a ba apeela.

₃₂Ge letšatši le diketše, swahlane e šetše e swere, ba tliša go yena bohle ba ba babjago le ba ba tsenwego ke bademone. ₃₃Batho ka moka ba motse ba tla ba bokana pele ga ngwako. ₃₄A fodiša ba bantši ba malwetši a mehutahuta, a leleka le bademone ba bantši. A se ke a ba dumelela go bolela selo ka yena, gobane ba be ba tseba gore ke yena mang.

₃₅Ka letšatši le le latelago a tsoga e sa le bošego. A tloga a ya felo mo go se nago motho, a fihla a rapela. ₃₆Simone le bao a bego a na le bona ba tšwa ba ya go mo nyaka. ₃₇Ge ba mo hweditše ba mmotša ba re: “Batho bohle ba a go nyaka.”

₃₈Jesu a ba fetola a re: “A re yeng mo gongwe metsaneng ye e lego fa kgauswi, gore le gona ke yo ruta batho, gobane ke sona se ke se tletšego.”

₃₉Gomme a tšama a ruta batho ka disinagogeng tša Galilea yohle, a leleka le bona bademone mo bathong.

₄₀Monna yo mongwe yo a bego a swerwe ke bolwetši bja letlalo bja go mo tšhilafatša a tla go Jesu, a khunama pele ga gagwe a re: “Morena, etse ge o rata o ka mphodiša ka hlweka!”

₄₁Jesu a mo šokela, a otlolla letsogo a mo kgwatha a re: “Ke a rata; hlweka!” ₄₂A sa tšo realo ke ge monna yola a fodile, a le gabotse. ₄₃Jesu a mo fa tsela le semeetseng ge a seno mo laya tsebegokwa ₄₄ka go re: “Bona, o se ke wa botša motho ka taba ye, eupša eya go moprista a go bone, gomme o dire sehlabelo se se laetšwego ke Moshe, gore e be bohlatse go batho bja gore o hlwekile.”

₄₅Eupša monna yola ge a tloga a tšama a gaša taba yeo mo gohle. A e phatlalatša mo Jesu a bego a bile a palelwa le ke go tsena metseng a bonwa, a dula ntle mašokeng, gomme batho ba etla go yena ba etšwa thoko tšohle.

₁Ge go fetile matšatši a se makae Jesu a boela motseng wa Kapernaume, gomme gwa tsebega gore o mo gae. ₂Batho ba kgobokana ka bontši mo go ilego gwa hlokega sebaka, le gona pele ga mojako. Jesu a ba begela molaetša wa Modimo. ₃Gwa fihla banna ba bane ba rwadišane motho wa go repha ditho, ba mo tliša go Jesu. ₄E rile ge ba šitwa ke go batamela Jesu ka lebaka la bontši bja batho, ba phula lešoba tlhakeng go lebana le mo Jesu a bego a le gona. Ge ba seno phula lešoba ba fološetša leako leo morephaditho a bego a robaditšwe go lona ka lona. ₅Ge Jesu a bona ka moo ba dumelago go yena ka gona, a botša morephaditho a re: “Ngwanaka, o lebaletšwe dibe tša gago.”

₆Boramangwalo ba bangwe ba ba bego ba dutše moo ba re ka dipelong tša bona: ₇“Motho yo o reng a realo? O nyefola Modimo. Ke mang yo a ka lebalelago batho dibe ntle le Modimo?”

₈Jesu a lemoga ka pela se ba se naganago, ka gona a re go bona: “Le reng le nagana ka mokgwa wo? ₉Se bonolo ke sefe, go re go morephaditho: ‘O lebaletšwe dibe tša gago,’ goba go re: ‘Emelela o rwale leako la gago o sepele’? ₁₀Bjale ge, ke nyaka go le bontšha gore Morwamotho o na le maatla a go lebalela batho dibe mo lefaseng.” Ka gona a re go morephaditho: ₁₁“Ke re go wena: Emelela, o rwale leako la gago o ye gae.”

₁₂Yena a emelela, a napa a rwala leako la gagwe, a tšwa a sepela bohle ba mo lebeletše. Ka moka ba makala, gomme ba tumiša Modimo ba re: “Tša mohuta wo ga se ra ka ra di bona!”

₁₃Jesu a buša a boela kua letsheng la Galilea; lešaba le legolo la tla go yena, mme a ba ruta. ₁₄Ka morago ge a feta a bona Lefi, morwa wa Alfeose, a dutše ngwakong wa lekgetho. A re go yena: “Ntatele!” Lefi a emelela a mo latela.

₁₅Ya re ge Jesu a le dijong ka ngwakong wa Lefi, balekgetho ba bantši le badiradibe ba bangwe ba tla ba ja le yena gotee le barutiwa ba gagwe, ka ge ba be ba dula ba mo šala morago ka bontši. ₁₆Ge boramangwalo ba bangwe ba e bego e le Bafarisei ba bona Jesu a eja le badiradibe le balekgetho, ba botšiša barutiwa ba gagwe ba re: “O reng a eja le batho ba mohuta wo?”

₁₇Jesu a ba kwa gomme a ba fetola a re: “Ngaka ga e nyakwe ke ba ba phedilego gabotse, e nyakwa ke ba ba babjago. Ga se ka tlela go botša baloki gore ba sokologe, ke tletše go botša badiradibe.”

₁₈Barutiwa ba Johanese Mokolobetši le ba Bafarisei ba kile ba re ba ikona dijo gwa tla batho ba bangwe go Jesu, ba mmotšiša ba re: “Barutiwa ba Johanese le ba Bafarisei ba reng ba ikona dijo, mola barutiwa ba gago bona ba sa ikone?”

₁₉Jesu a ba fetola a re: “Kgane bagwera ba monyadi ba ka ikona dijo monyadi a sa na le bona? Ge monyadi a sa na le bona ba ka se ikone. ₂₀Fela nako e tla tla yeo ka yona monyadi a tlago tlošwa go bona; ya ba gona ba ikonago.

₂₁“Ga go motho yo a pharago segaswa se sefsa seaparong sa kgale, ka gobane se ka gagola seaparo sa kgale sa godiša lešoba. ₂₂Le gona ga go motho yo a tšhelago beine ye e sa tšogo hlotlwa ka makukeng a kgale, ka gobane e ka a paleša, mme gwa loba beine le ona makuka. Beine ye e sa tšogo hlotlwa e tšhelwa ka makukeng a mafsa.”

₂₃E kile ya re ge Jesu a putla ka mašemong a korong ka letšatši la Sabatha, barutiwa ba gagwe ba tšama ba ekga diako. ₂₄Bafarisei ba botšiša Jesu ba re: “Barutiwa ba gago ba reng ba dira se se sego sa dumelelwa ka letšatši la Sabatha?”

₂₅Jesu a ba fetola a re: “Na ga se la ka la bala se Dafida a kilego a se dira mola a hloka sa go ja, mola yena le banna ba ba bego ba na le yena ba swerwe ke tlala – ₂₆ka mo a ilego a tsena ka ngwakong wa Modimo mehleng ya ge Abiatare e le Moprista yo Mogologolo, mme a ja dinkgwa tše di bego di abetšwe Modimo, tše go bego go se motho yo a dumeletšwego go di ja ge e se moprista, a di ngwathelana le bao ba bego ba na le yena?”

₂₇Jesu a fetša ka go re: “Letšatši la Sabatha le diretšwe motho, ga se motho yo a diretšwego letšatši la Sabatha. ₂₈Ge go le bjalo, Morwamotho o na le tokelo ya go laetša ge eba melao ya Sabatha e swanetše go latelwa.”