DOITERONOMIO 2

₂“Morena a re go nna: ₃‘Le tšere nako ye telele, le ralala le naga ye ya dithaba go lekane; bjale lebang leboa. ₄Botša setšhaba o re: Le batametše go putla naga ya dithaba ya Edomo, naga ya bomorwarragolena, ditlogolo tša Esau. Ba tla le boifa, ₅fela le itshware le se ke la lwa le bona, ka gobane nka se le fe le ge e le seripana sa naga ya bona. Naga ye ya Edomo ke e file ditlogolo tša Esau. ₆Le ka reka dijo le meetse go bona.’

₇“Gopolang ka moo Morena Modimo wa lena a le šegofaditšego go tšohle tše le di dirilego. O le hlokometše ge le ralala le lešoka le le legolo. O bile le lena mengwaga ye ye masome a mane, gomme le bile le tšohle tše le bego le di nyaka.

₈“Ka gona re tlogile go ditlogolo tša Esau, ra phamoga tsela ye e tšwago motseng wa Elate le wa Etsione-Gebere e yago moeding wa Jordane, gomme ra ya leboabohlabela go leba Moaba. ₉Gomme Morena a re go nna: ‘O se ke wa rumola batho ba Moaba, ditlogolo tša Lote, goba wa lwa le bona. Ke ba file motse wa Are, gomme nka se go fe seripa se sengwe sa naga ya bona.’ ”

₁₀Morafe wo mongwe wa maatla wa ditšitširipa wo o bego o bitšwa Baeme o be o dula Are. E be e le batho ba batelele bjalo ka Baanake, morafe wo mongwe wa ditšitširipa. ₁₁Go no swana le Baanake ba be ba tsebja le ka la Barafa, fela Bamoaba ba be ba ba bitša Baeme. ₁₂Bahori ba be ba dula Edomo, eupša ditlogolo tša Esau di ile tša ba raka moo, tša fediša setšhaba sa bona, gomme tša dula fao sebakeng sa bona, go no swana le ge Baisraele ka morago ba ile ba tla ba raka manaba a bona nageng yeo Morena a ba filego yona.

₁₃“Ke moka ra itokiša ra tshela nokana ya Serede bjalo ka ge Morena a re laetše. ₁₄E bile mengwaga ye masome a mararo a metšo ye seswai go thoma ka nako ye re tloga Kadeshe-Barnea go fihlela ge re tshela nokana ya Serede. Bahlabani ka moka ba thaka yeo ba be ba hwile, go bile bjalo ka ge Morena a be a ba enetše. ₁₅Morena o ile a fela a elwa le bona go fihlela ge a ba feditše ka moka setšhabeng.

₁₆“Ka morago ga ge bahlabani bao ka moka ba hwile, ₁₇Morena o ile a re go rena: ₁₈‘Lehono le swanetše go putla naga ya Moaba ka tsela ya Are. ₁₉Ke gona le tlago ba le le kgauswi le naga ya Baamone, ditlogolo tša Lote. Le se ke la ba rumola goba la lwa le bona, ka gobane nka se le fe seripa se sengwe sa naga ye ke ba filego yona.’ ”

₂₀Naga yeo e tsebja le ka la naga ya Barafa, batho bao pele ba bego ba dula moo, mme Baamone ba ba bitša Basamsume. ₂₁E be e le ba batelele bjalo ka Baanake; e le ba bantši, ebile e le setšhaba se maatla. Fela Morena o ile a ba fediša, ka gona Baamone ba thopa naga yeo mme ba dula go yona. ₂₂Seo ke se Morena a bego a se diretše Baedomo, ditlogolo tša Esau, ba ba bego ba dula nageng ya dithaba ya Edomo. O ile a fediša Bahori, mme Baedomo ba tšea naga ya bona ba dula go yona, moo ba sa dulago gona le bjale. ₂₃Batho ba ba tšwago sehlakahlakeng sa Krete ba ile ba fediša Baaba bao ba bego ba dula metseng ya go ya borwa go fihla motseng wa Gasa, mme ba dula go yona.

₂₄“Ka morago ga ge re putlile naga ya Moaba Morena a re go rena: ‘Itokišeng le thomeng leeto le tsheleng nokana ya Arnone. Ke gafela Sihone, Moamore, kgoši ya Heshbone, gotee le naga ya gagwe diatleng tša lena. Le mo hlaseleng, mme ka tsela yeo le thome go thopa naga ya gagwe. ₂₅Lehono ke tla thoma go dira gore batho mo gohle ba le boife. Yo mongwe le yo mongwe o tla thothomela ka poifo ge a ekwa ka maatla a lena.’

₂₆“E rile ge re le lešokeng la Kedemote ka roma batseta go Kgoši Sihone wa Heshbone ba iša molaetša wa khutšo wa go re: ₂₇‘Re dumelele re putle nageng ya gago. Re tla fela re swere tsela gomme re ka se phamoge. ₂₈Re tla lefela dijo tše re di jago le meetse a re a nwago. Se re se nyakago ke fela go iphetela nageng ya gago ₂₉go fihlela re tshela noka ya Jordane re tsena nageng ye Morena Modimo wa rena a re fago yona. Ditlogolo tša Esau tšeo di dulago Edomo, le Bamoaba bao ba dulago Are ba re dumeletše go putla nageng ya bona.’

₃₀“Fela Kgoši Sihone a gana go re dumelela go putla nageng ya gagwe. Morena Modimo wa lena a mo thatafatša, a mo ngangabatša gore a tle a mo fenye a tšee naga ya gagwe ye le bjale re sa e thopilego.

₃₁“Ke moo Morena a itšego go nna: ‘Bona, ke gafetše Kgoši Sihone le naga ya gagwe diatleng tša gago; thoma go thopa naga ya gagwe mme o dule go yona.’ ₃₂Sihone o ile a tšwa le bahlabani ba gagwe ka moka go tlo lwa le rena kgauswi le motse wa Jahatse, ₃₃fela Morena Modimo wa rena a mo gafela diatleng tša rena, gomme ra mmolaya gotee le barwa ba gagwe le bahlabani ba gagwe ka moka. ₃₄Ka yona nako yeo re ile ra fenya metse ka moka, ra e pšhatla, mme ra bolaya batho bohle – banna, basadi le bana. Ra se šadiše motho le o tee. ₃₅Ra thopa diruiwa, ra ba ra hula metse. ₃₆Morena Modimo wa rena o gafetše metse ka moka diatleng tša rena go tloga Aroere, ka thoko ga moedi wa nokana ya Arnone, le motseng wo o lego ka moeding, go fihlela Gileade; gwa se be le motse wo o tiilego, wa go ageletšwa, mo o kago re palela. ₃₇Fela ga se ra ka ra batamela naga ya Baamone, goba mabopong a nokana ya Jaboko, goba metse ya naga ya dithaba, goba nageng ye nngwe le ye nngwe yeo Morena Modimo wa rena a re laetšego gore re se ke ra ya go yona.”