To The Word – Day 41

₁Morena o laetše Moshe ₂gore a botše Baisraele ba tlišetše Modimo dihlabelo le dikabelo ka dinako tše di beilwego e le dijo tša gagwe. Monkgo wa tšona o a mo tsefela.

₃Tše ke dihlabelo le dikabelo tše di swanetšego go tlišwa go Morena: sehlabelo sa go tšhungwa ka moka sa letšatši ka letšatši, sa dikgapana tše pedi tše di nago le ngwaga o tee tše di se nago bosodi. ₄Le dire sehlabelo ka kgapana ya mathomo mosong, mme mantšiboa le dire se sengwe ka ya bobedi, ₅se sengwe le se sengwe se dirwe le kabelo ya bupi ya kilokramo e tee ya bupi bjo bo hlakantšwego le litara e tee ya makhura a mohlware a a hlwekilego. ₆Se ke sehlabelo sa letšatši ka letšatši se se tšhungwago ka moka, se se dirilwego la mathomo thabeng ya Sinai e le monkgo wo o tsefelago Morena. ₇Le tšheleng litara e tee ya beine aletareng e le kabelo ya seno ya go sepela le kgapana ya mathomo. ₈Mantšiboa le dire sehlabelo ka kgapana ya bobedi ka yona tsela yela le dirilego sehlabelo sa mosong le kabelo ya sona ya seno. Monkgo wa sehlabelo se le wona o tsefela Morena.

₉Ka letšatši la Sabatha le dire sehlabelo ka dikgapana tše pedi tše di nago le ngwaga o tee tše di se nago bosodi; le abe le bupi bja dikilokramo tše pedi bjo bo hlakantšwego le makhura a mohlware e le kabelo ya bupi le kabelo ya seno. ₁₀Sehlabelo se sa go tšhungwa ka moka se dirwe Sabatha se sengwe le se sengwe go tlaleletša sehlabelo sa letšatši ka letšatši le kabelo ya sona ya seno.

₁₁Le direleng Morena sehlabelo sa go tšhungwa ka moka mathomong a kgwedi ye nngwe le ye nngwe ka diruiwa tše di latelago: dipowana tše pedi le kgapa e tee le dikgapana tše di šupago tše di nago le ngwaga o tee, ka moka e be tše di se nago bosodi. ₁₂Go dira kabelo ya bupi le abe bupi bjo bo hlakantšwego le makhura a mohlware: gotee le poo ye nngwe le ye nngwe le abe bupi bja dikilokramo tše tharo; gotee le kgapa le abe bja dikilokramo tše pedi, ₁₃gomme gotee le kgapana ye nngwe le ye nngwe le abe bja kilokramo e tee. Dihlabelo tše tša go tšhungwa ka moka ke tša monkgo wo o tsefelago Morena. ₁₄Kabelo ya seno ya dihlabelo tše ke beine ya dilitara tše pedi gotee le poo ye nngwe le ye nngwe, le litara le seripa gotee le kgapa, le litara e tee le kgapana ye nngwe le ye nngwe. Wo ke molawana wa sehlabelo sa go tšhungwa ka moka sa letšatši la mathomo la kgwedi ye nngwe le ye nngwe ngwaga ka moka. ₁₅Gomme go tlaleletša sehlabelo sa go tšhungwa ka moka sa letšatši ka letšatši le kabelo ya seno ye e sepelago le sona le dire sehlabelo sa tshwarelo ya dibe ka phooko e tee.

₁₆Monyanya wa Paseka wa go hlompha Morena o ketekwa ka letšatši la lesome le metšo ye mene la kgwedi ya mathomo. ₁₇Ka letšatši la lesome le metšo ye mehlano go thoma monyanya wo o tšeago matšatši a a šupago, woo ka wona go swanetšego go lewa fela dinkgwa tše di dirilwego ntle le komelo. ₁₈Ka letšatši la pele la monyanya wo le phuthegeleng tirelo, gomme le se ke la dira mediro ya lena ya mehleng. ₁₉Le direleng Morena sehlabelo sa go tšhungwa ka moka ka diruiwa tše di latelago: dipowana tše pedi le kgapa e tee le dikgapana tše di šupago tše di nago le ngwaga o tee, ka moka e be tše di se nago bosodi. ₂₀Gotee le sehlabelo se le abe bupi bjo bo hlakantšwego le makhura a mohlware e le kabelo ya bupi: gotee le poo ye nngwe le ye nngwe le abe bupi bja dikilokramo tše tharo; gotee le kgapa le abe bja dikilokramo tše pedi, ₂₁mme gotee le kgapana ye nngwe le abe bja kilokramo e tee. ₂₂Le dire le sehlabelo sa tshwarelo ya dibe ka phooko e tee, mme ka tsela ye setšhaba se boelanywe le Morena. ₂₃Le abeng tšeo go tlaleletša sehlabelo sa go tšhungwa ka moka sa mosong wa letšatši le lengwe le le lengwe. ₂₄Ka yona tsela yeo le abeleng Morena kabelo ya bupi matšatši a a šupago e le ya monkgo wo o mo tsefelago. Le abeng seo go tlaleletša sehlabelo sa letšatši ka letšatši sa go tšhungwa ka moka le kabelo ya seno ye e sepelago le sona. ₂₅Le phuthegeleng tirelo ka letšatši la bošupa, gomme le se ke la dira mediro ya lena ya mehleng.

₂₆Ka letšatši la pele la Monyanya wa Puno, ge le tliša kabelo ya mabele a mafsa go Morena, le phuthegeleng tirelo, gomme le se ke la dira mediro ya lena ya mehleng. ₂₇Le dire sehlabelo sa go tšhungwa ka moka e le sa monkgo wo o tsefelago Morena ka diruiwa tše di latelago: dipowana tše pedi le kgapa e tee le dikgapana tše di šupago tše di nago le ngwaga o tee, ka moka e be tše di se nago bosodi. ₂₈Gotee le sehlabelo se le abe bupi bjo bo hlakantšwego le makhura a mohlware e le kabelo ya bupi: gotee le poo ye nngwe le ye nngwe le abe bupi bja dikilokramo tše tharo; gotee le kgapa le abe bja dikilokramo tše pedi, ₂₉gomme gotee le kgapana ye nngwe le ye nngwe le abe bja kilokramo e tee. ₃₀Le direng le sehlabelo sa tshwarelo ya dibe ka phooko e tee, mme ka tsela ye setšhaba se boelanywe le Morena. ₃₁Le abeng tšeo le kabelo ya seno go tlaleletša sehlabelo sa go tšhungwa ka moka sa letšatši ka letšatši le kabelo ya bupi.

₁Ka letšatši la pele la kgwedi ya bošupa le phuthegeleng tirelo, mme le se ke la dira mediro ya lena ya mehleng. Ka letšatši leo diphala di letšwe. ₂Le direleng Morena sehlabelo sa go tšhungwa ka moka sa monkgo wo o mo tsefelago ka diruiwa tše di latelago: powana e tee le kgapa e tee le dikgapana tše di šupago tše di nago le ngwaga o tee, ka moka e be tše di se nago bosodi. ₃Gotee le sehlabelo se le abe bupi bjo bo hlakantšwego le makhura a mohlware e le kabelo ya bupi: gotee le poo le abe bupi bja dikilokramo tše tharo; gotee le kgapa le abe bja dikilokramo tše pedi, ₄gomme gotee le kgapana ye nngwe le ye nngwe le abe bja kilokramo e tee. ₅Le dire le sehlabelo sa tshwarelo ya dibe ka phooko e tee, mme ka tsela ye setšhaba se boelanywe le Morena. ₆Le direng dihlabelo tšeo go tlaleletša sehlabelo sa go tšhungwa ka moka sa letšatši le lengwe le le lengwe la pele la kgwedi gotee le kabelo ya sona ya bupi, le sehlabelo sa go tšhungwa ka moka sa letšatši ka letšatši le kabelo ya sona ya bupi ya monkgo wo o tsefelago Morena.

₇Le phuthegeleng tirelo ka letšatši la lesome la kgwedi ya bošupa; le ikokobetšeng ka go se je dijo, le gona le se ke la dira mediro ya lena ya mehleng. ₈Le direleng Morena sehlabelo sa go tšhungwa ka moka sa monkgo wo o mo tsefelago ka diruiwa tše di latelago: powana e tee le kgapa e tee le dikgapana tše di šupago tše di nago le ngwaga o tee, ka moka e be tše di se nago bosodi. ₉Gotee le sehlabelo se le abeng bupi bjo bo hlakantšwego le makhura a mohlware e le kabelo ya bupi: gotee le poo le abe bupi bja dikilokramo tše tharo; gotee le kgapa le abe bja dikilokramo tše pedi, ₁₀gomme gotee le kgapana ye nngwe le ye nngwe le abe bja kilokramo e tee. ₁₁Le dire le sehlabelo sa tshwarelo ya dibe ka phooko e tee go tlaleletša sehlabelo sa tshwarelo ya dibe seo ka sona go phethwago tiro ya poelano, le sehlabelo sa go tšhungwa ka moka sa letšatši ka letšatši le kabelo ya sona ya bupi le ya seno.

₁₂Le phuthegeleng tirelo ka letšatši la lesome le metšo ye mehlano la kgwedi ya bošupa. Le ketekeng monyanya wo matšatši a a šupago go hlompha Morena, mme le se ke la dira mediro ya lena ya mehleng. ₁₃Ka la pele la matšatši a a šupago a le direle Morena sehlabelo sa go tšhungwa ka moka sa monkgo wo o mo tsefelago. Le hlabe diruiwa tše di latelago: dipowana tše lesome le tše tharo, dikgapa tše pedi, le dikgapana tše lesome le tše nne tše di nago le ngwaga o tee, ka moka e be tše di se nago bosodi. ₁₄Gotee le sehlabelo se le abe bupi bjo bo hlakantšwego le makhura a mohlware e le kabelo ya bupi: gotee le poo ye nngwe le ye nngwe le abe bupi bja dikilokramo tše tharo; gotee le kgapa ye nngwe le ye nngwe le abe bja dikilokramo tše pedi, ₁₅gomme gotee le kgapana ye nngwe le ye nngwe le abe bja kilokramo e tee. Tšeo ka moka di sepele le dikabelo tše di nyakegago tša dino. ₁₆Le dire le sehlabelo sa tshwarelo ya dibe ka phooko e tee. Le direng dihlabelo le dikabelo tšeo go tlaleletša sehlabelo sa go tšhungwa ka moka sa letšatši ka letšatši le kabelo ya sona ya bupi le ya seno.

₁₇Ka letšatši la bobedi le dire sehlabelo ka dipowana tše lesome le tše pedi, dikgapa tše pedi, le dikgapana tše lesome le tše nne tše di nago le ngwaga o tee, ka moka e be tše di se nago bosodi. _18-19Gotee le tšona le dire dihlabelo le dikabelo tše dingwe ka moka tše di nyakegago letšatšing la mathomo.

₂₀Ka letšatši la boraro le direng sehlabelo ka dipowana tše lesome le e tee, dikgapa tše pedi, le dikgapana tše lesome le tše nne tše di nago le ngwaga o tee, ka moka e be tše di se nago bosodi. _21-22Gotee le tšona le dire dihlabelo le dikabelo tše di nyakegago letšatšing la mathomo.

₂₃Ka letšatši la bone le dire sehlabelo ka dipowana tše lesome, dikgapa tše pedi, le dikgapana tše lesome le tše nne tše di nago le ngwaga o tee, ka moka e be tše di se nago bosodi. _24-25Gotee le tšona le dire dihlabelo le dikabelo tše dingwe ka moka tše di nyakegago letšatšing la mathomo.

₂₆Ka letšatši la bohlano le dire sehlabelo ka dipowana tše senyane, dikgapa tše pedi, le dikgapana tše lesome le tše nne tše di nago le ngwaga o tee, ka moka e be tše di se nago bosodi. _27-28Gotee le tšona le dire dihlabelo le dikabelo tše dingwe ka moka tše di nyakegago letšatšing la mathomo.

₂₉Ka letšatši la boselela le dire sehlabelo ka dipowana tše seswai, dikgapa tše pedi, le dikgapana tše lesome le tše nne tše di nago le ngwaga o tee, ka moka e be tše di se nago bosodi. _30-31Gotee le tšona le dire dihlabelo le dikabelo tše dingwe ka moka tše di nyakegago letšatšing la mathomo.

₃₂Ka letšatši la bošupa le dire sehlabelo ka dipowana tše di šupago, dikgapa tše pedi, le dikgapana tše lesome le tše nne tše di nago le ngwaga o tee, ka moka e be tše di se nago bosodi. _33-34Gotee le tšona le dire dihlabelo le dikabelo tše dingwe ka moka tše di nyakegago letšatšing la mathomo.

₃₅Ka letšatši la seswai le phuthegeleng tirelo mme le se ke la dira mediro ya lena ya mehleng. ₃₆Le dire sehlabelo sa go tšhungwa ka moka sa monkgo wo o tsefelago Morena ka diruiwa tše di latelago: powana e tee, kgapa e tee, le dikgapana tše di šupago tše di nago le ngwaga o tee, ka moka e be tše di se nago bosodi. _37-38Gotee le tšona le dire dihlabelo le dikabelo tše dingwe ka moka tše di nyakegago letšatšing la mathomo.

₃₉Yeo ke melawana mabapi le dihlabelo tša go tšhungwa ka moka, dikabelo tša bupi, dikabelo tša dino, le dihlabelo tša kagišano tšeo le swanetšego go di direla Morena menyanyeng ya lena ye e beilwego. Tše di tlaleletša dihlabelo tše le di dirago go phethagatša dikeno, goba e le dikabelo tša boithaopo.

₄₀Ka gona Moshe a botša setšhaba sa Israele tšohle tše Morena a mo laetšego tšona.

₁Moshe o ile a fa baetapele ba dikgoro tša Israele ditaelo tše di latelago tša Morena. ₂Ge motho a enne go fa Morena se sengwe goba go ikona se sengwe, a se ke a tshela keno ya gagwe, eupša a dire se sengwe le se sengwe se a itšego o tla se dira.

₃Ge kgarebe ye e sa dulago lapeng la tatagoyona e enne go fa Morena se sengwe goba e tshephišitše gore e tla ikona se sengwe, ₄e swanetše go dira tšohle tše e di ennego goba e di holofeditšego, ge e se ge tatagoyona a ka gana ge a ekwa taba yeo. ₅Fela ge tatagwe a ka mo ganetša go phethagatša keno ya gagwe ge a e ekwa, gona ga se a tlemega go e phetha. Morena o tla mo lebalela, ka gobane tatagwe o mo ganeditše go phethagatša keno ya gagwe.

₆Ge mosadi yo a sego a nyalwa a enne, a ikemišeditše goba a se a ikemišetša, goba a tshephišitše go ikona se sengwe, mme ka morago a nyalwa, ₇o swanetše go dira tšohle tše a di ennego goba a di tshephišitšego, ge e se ge monna wa gagwe a ka gana ge a ekwa taba yeo. ₈Fela ge monna wa gagwe a ka mo ganetša go phethagatša keno ya gagwe ge a e ekwa, ga se a tlemega go e phethagatša. Morena o tla mo lebalela.

₉Mohlologadi goba mosadi yo a hladilwego o swanetše go phethagatša keno ye nngwe le ye nngwe ye a e dirilego goba tshephišo ya go ikona se sengwe.

₁₀Ge mosadi yo a nyetšwego a enne goba a tshephišitše go ikona se sengwe, ₁₁o swanetše go dira tšohle tše a di ennego goba a di tshephišitšego, ge e se ge monna wa gagwe a ka gana ge a ekwa taba yeo. ₁₂Fela ge monna wa gagwe a ka mo ganetša go phethagatša keno ge a e ekwa, ga se a tlemega go e phethagatša. Monna wa gagwe o mo thibetše go phethagatša keno ya gagwe; Morena o tla mo lebalela. ₁₃Monna wa gagwe o na le tokelo ya go dumela goba go gana keno goba tshephišo ye nngwe le ye nngwe yeo mosadi a e dirilego. ₁₄Eupša ge ka letšatši le le latelago leo monna wa gagwe a kwelego keno yeo ka lona, a se a ba a e gana, mosadi o swanetše go dira tšohle tše a di ennego goba a di tshephišitšego. O dumetše keno yeo ka go se e gane ka letšatši le a e kwelego ka lona. ₁₅Fela ge a ka gana keno yeo ka morago, o tla otlelwa ge mosadi wa gagwe a se phethagatše keno ya gagwe.

₁₆Ye ke melao ye Morena a e filego Moshe mabapi le dikeno tše di dirilwego ke mosadi yo a nyetšwego, goba mosadi yo a sego a nyalwa yo a sa dulago ka lapeng labo.

₁Morena a re go Moshe: ₂“Otla Bamidiane ka lebaka la seo ba se dirilego setšhaba sa Israele. Ka morago ga moo o tla ithobalela.”

₃Ka gona Moshe a re go setšhaba: “Itokišetšeng ntwa gore le tle le hlasele Midiane, mme le otlele batho ba yona se ba se dirilego Morena. ₄Kgorong ye nngwe le ye nngwe ya Baisraele le ntšhe banna ba sekete ba ye ntweng.”

₅Ka gona kgorong ye nngwe le ye nngwe gwa kgethwa banna ba sekete, ya ba banna ba dikete tše lesome le tše pedi ba ba itlhametšego ntwa. ₆Moshe a ba romela ntweng ba na le Finease, morwa wa moprista Eleasara, yo a bego a hlokometše dilo tše kgethwa le diphala tša go hlaba mokgoši wa ntwa. ₇Ba hlasela Midiane ka moo Morena a laetšego Moshe, mme ba bolaya banna ba gona ka moka, ₈gotee le dikgoši tše tlhano tša Midiane: Ebi, Rekeme, Tsure, Hure le Reba. Ba bolaya le Bileamo, morwa wa Beore.

₉Madira a Baisraele a thopa basadi le bana ba Midiane, a tšea dikgomo le dihuswane tša bona, a thopa le mahumo a bona ka moka, ₁₀mme ba tšhuma metse le mešaša ya bona yohle. ₁₁Ba tšea thoto ka moka ye ba e thopilego, gotee le dibofša le diruiwa, ₁₂mme ba di tliša go Moshe le Eleasara le go setšhaba sa Israele, seo se bego se le mešašeng melaleng ya Moaba, mošola wa Jordane go lebana le Jeriko.

₁₃Moshe le Eleasara le baetapele ba bangwe ka moka ba setšhaba ba tšwa mešašeng go yo gahlanetša madira. ₁₄Moshe a galefela balaodi ba madira, balaodi ba ba sekete le ba ba lekgolo, bao ba bego ba boa ntweng. ₁₅A ba botšiša a re: “Ke ka lebaka lang le lesitše basadi ka moka ba phela? ₁₆Gopolang gore ke basadi ba ba phethilego ditaelo tša Bileamo mme ba dira gore setšhaba se se tshephegele Morena kua Peore. Ke seo se tlišitšego bolwetši bja leuba setšhabeng sa Morena. ₁₇Bjale ge, bolayang bašemane ka moka, le bolayeng le mosadi yo mongwe le yo mongwe yo a kilego a robala le monna, ₁₈fela le lese basetsana le basadi ka moka ba ba sego ba ka ba robala le monna ba phele e be ba lena. ₁₉Bohle ba le ilego la bolaya motho goba la kgwatha motho yo a bolailwego, le swanetše go dula ka ntle ga mešaša matšatši a a šupago. Ka letšatši la boraro le ka letšatši la bošupa le itlhwekišeng, le be le hlwekišeng le basadi ba le ba thopilego. ₂₀Le hlwekišeng le diaparo ka moka le tšohle tše di dirilwego ka mokgopa, goba ka boya bja pudi, goba ka kota.”

₂₁Moprista Eleasara a re go banna bao ba bego ba boile ntweng: “Šedi ditaelo tše Morena a di filego Moshe. _22-23Se sengwe le se sengwe se se sa swego, bjalo ka gauta goba silibera goba mphiri goba tshipi goba lesenke goba morodi, le se hlwekiše ka go se putliša mollong, le ka go se hlatswa ka meetse a tlhwekišo. Ge e le tše dingwe tšona di hlwekišwe ka go hlatswiwa ka meetse a tlhwekišo fela. ₂₄Ka letšatši la bošupa le hlatswe diaparo tša lena; ke moo le tlago hlweka mme la dumelelwa go tsena mešašeng.”

₂₅Morena a re go Moshe: ₂₆“Wena le Eleasara le baetapele ba bangwe ba setšhaba le baleng tšohle tše di thopilwego, gotee le dibofša le diruiwa. ₂₇O arole tše di tšogo thopša diripa tše pedi tše di lekanago, se sengwe e be sa banna ba ba tšwago ntweng, mme se sengwe e be sa setšhaba ka moka. ₂₈Mo karolong ye e lego ya madira o ntšhe sebofša se tee dibofšeng tše dingwe le tše dingwe tše makgolo a mahlano gore e be motšhelo wa Morena, mme o dire bjalo mo go dikgomo le dipokolo le dihuswane. ₂₉O di fe moprista Eleasara e le kabelo ye e fiwago Morena ka tsela ye e itšeng. ₃₀Mo go karolo ye e fiwago setšhaba ka moka o tšee sebofša se tee go dibofša tše dingwe le tše dingwe tše masome a mahlano, mme o dire bjalo le mo go dikgomo le dipokolo le dihuswane. O di fe Balefi ba ba hlokometšego Tente ya Morena.” ₃₁Moshe le Eleasara ba dira se Morena a se laetšego.

_32-35Lenaneo la tše di thopilwego go tlaleletša tše ba itšeetšego tšona šele: dihuswane tše 675 000, dikgomo tše 72 000, dipokolo tše 61 000, le basadi ba ba sego ba ka ba robala le monna ba 32 000. _36-40Karolo ye e filwego madira e bile dihuswane tše 337 500, mme motšhelo wa Morena ya ba 675; dikgomo tše 36 000 tša madira, mme tše 72 ya ba motšhelo wa Morena; dipokolo tše 30 500 tša madira, mme tše 61 ya ba motšhelo wa Morena; basadi ba ba sego ba ka ba robala le monna ba 16 000 ba madira, mme ba 32 ya ba motšhelo wa Morena. ₄₁Ka gona Moshe a fa Eleasara motšhelo woo e le kabelo ye e fiwago Morena ka tsela ye e itšeng, ka moo Morena a laetšego.

_42-46Karolo ye e filwego setšhaba e be e lekana le ya madira: dihuswane tše 337 500, dikgomo tše 36 000, dipokolo tše 30 500, le basadi ba ba sego ba ka ba robala le monna ba 16 000. ₄₇Mo go karolo ye Moshe o ile a ntšha sebofša se tee go dibofša tše dingwe le tše dingwe tše masome a mahlano, le mo go diruiwa, mme bjalo ka ge Morena a laetše, a di fa Balefi ba ba bego ba hlokometše Tente ya Morena.

₄₈Ke moo balaodi ba ba laotšego madira ba ilego go Moshe, ₄₉ba mmegela ba re: “Rena, bahlanka ba gago, re badile bahlabani ba re ba laolago, mme ga go le o tee yo a sego gona. ₅₀Ka gona re tliša dikgabišo tša gauta e lego maseka a maoto, maseka a matsogo, dipalamonwana, mangina le dipheta tše yo mongwe le yo mongwe wa rena a bego a itšeetše tšona. Re di abela Morena gore ka tšona re boelanywe le yena.” ₅₁Moshe le Eleasara ba amogela gauta yeo, ye ka moka ga yona e bego e le dikgabišo. ₅₂Kabelo ka moka ye e tšwilego go balaodi ba madira e be e le ya boima bjo e ka bago dikilokramo tše 191. ₅₃Bao e bego e se balaodi ba ile ba itshwarela tše ba itšeetšego tšona. ₅₄Ka gona Moshe le Eleasara ba iša gauta yeo Tenteng, gore Morena a tle a šireletše setšhaba sa Israele.

₁Kgane nna ga ke molokologi? Kgane ga ke moapostola? Kgane ga se ka bona Jesu, Morena wa rena? Ga ke re lena le badumedi ka lebaka la modiro wa ka wo ke o diretšego Morena? ₂Le ge ba bangwe ba sa ntsheme moapostola, lena le ntshema yena. Ka ge le phela le le ba tee le Morena, lena ka bolena le dihlatse tša gore ke nna moapostola.

₃Ge batho ba ntshekiša ke fetola ka go re: ₄Na ga ke na tokelo ya go ja le go nwa? ₅Kgane ga ke na tokelo ya go šika le mosadi wa modumedi e le mogatšaka, ka etša baapostola ba bangwe le bana ba boMorena le Petrose? ₆Na ke nna le Barnabase fela ba re swanetšego go šomela tša go re phediša? ₇Na mohlabani ke ofe yo a itefelago tše a phelago ka tšona ntweng? Ke mang yo a rego go bjala merara a se tle a ja diterebe tša yona? Modiša yena ke ofe yo a sa jego maswi a mohlape wo a o dišago?

₈Ge ke realo ga se gore ke bolela fela tše di tsebjago ke mang le mang, gobane le molao wa Moshe o realo. ₉Ka molaong woo go ngwadilwe go re: “Ge o fola mabele ka pholo o se e bofe molomo.” Etse dipholo Modimo o iša kae ka tšona? ₁₀Ga ke re gabotse ge a realo o ra rena? Gape taba ye e ngwaletšwe rena. Sa molemi ke go lema a holofetše puno, le mmuni sa gagwe ke go buna a gabile go ja mabele a gagwe. ₁₁Etse go le begela Ebangedi ga rena e bile go bjala peu ya tša go le phediša moyeng. Na e ka ba phošo bjang ge bjale re buna mo go lena tša go re phediša? ₁₂Ge eba ba bangwe ba loketšwe ke go holega mo go lena, gona rena re loketšwe le go ba feta.

Fela ga se ra ka ra dira go ya ka mo re loketšwego ka gona. Re ile ra no kgotlelela tšohle, gore Taba ye Botse ya Kriste re se e šitiše ka mokgwa ofe le ofe. ₁₃Ga ke re le a tseba gore ba ba šomago ka Tempeleng ba ja tša ka Tempeleng, le ba ba dirago dihlabelo aletareng ba abelwa tšona tša aletareng? ₁₄Agaa, babegi ba Ebangedi le bona Morena o laetše gore ba phele ka yona Ebangedi.

₁₅Nnaena le e tee ya ditokelo tšeo ga se ka ka ka ikhola ka yona; le gona ga se gore ditaba tše ke di ngwalela gore go tle go holege nna ka ditokelo tšeo. Ebile go ka ba kaone gore ke hwe! Le go itheta ga ka nka se go amogwe ke motho! ₁₆Go bega Ebangedi ga ka ga se taba ye nka ithetago ka yona, ka gobane ke tlemegile go e bega. Gomme nka ba yo madimabe kudu ge nka se e bege. ₁₇Ge nkabe ke dira mošomo wo ka go rata ga ka gona nkabe ke nyaka moputso; eupša ke o dira ke tlemegile, ka gobane ke o filwe ke Modimo. ₁₈Bjale moputso wa ka ke eng? Moputso wa ka ke gona go bega Taba ye Botse ye ntle le tefo, ntle le go nyaka go ikhola ka mošomo wo wa ka wa go e bega.

₁₉Le ge ke le molokologi, ke se lekgoba la motho, ke itirile lekgoba la bohle, gore ke tle ke sokollele ba bantši go Kriste. ₂₀Ge ke na le Bajuda ke phela bjalo ka Mojuda, gore ke ba sokolle; gomme le ge nna ke sa bušwe ke melao ya Moshe, ge ke le gare ga bao ba bušwago ke yona, ke phela bjalo ka ge nke ke bušwa ke yona, gore ke tle ke ba sokolle. ₂₁Ka yona tsela yeo, ge ke na le bao ba sa bušwego ke melao ya Moshe, ke phela bjalo ka yo a sa bušwego ke melao yeo, gore ke tle ke sokolle bao ba sa bušwego ke yona. Ka go realo ga se gore ga ke phethe melao ya Modimo; gabotsebotse ke bušwa ke molao wa Kriste. ₂₂Ge ke na le bafokodi tumelong, le nna ke itira mofokodi, gore ke ba sokolle. Ke dira gore batho bohle ba mpone ke swana le bona, e le ge ke gabile gore ka mo go kgonegago go be le ba ke ba phološago.

₂₃Tše ka moka ke di dira ka lebaka la Ebangedi, gore le nna ke tle ke be yo mongwe yo a kgathilego tema mo mošomong wo.

₂₄Ga ke re le a tseba gore ba ba šianago mokatong ba kitima ka moka, eupša sefoka se tšewe ke o tee? Le lena bophelong bja lena bja sedumedi katanang le etše mokati yo a gakalago, gomme le tla thopa sefoka. ₂₅Mang le mang yo a itlwaetšago go šiana o itima tše dintši, a gabile go tlo thopa sefoka se se senyegago; kganthe rena re itima tše dintši re gabile go tlo thopa sefoka se se sa senyegego. ₂₆Ka lebaka leo, nna ga ke kitime wa go tlaruma; ga ke lwe wa go kgeila phefo ka matswele. ₂₇Ke laola mmele wa ka ka o tlwaetša, gore ke se re ke rutile ba bangwe bophelo bja sedumedi, nna mong ka tla ka hwetšwa ke ronwa ke bophelo bjoo.

₁Banabešo, le se ke la lebala gore borakgolokhukhu bohle ba rena ba ile ba šireletšwa ke leru, bohle ba ile ba tshela lewatle ba bolokegile. ₂Bohle ba ile ba kolobetšwa ka lerung le ka lewatleng gore e be balatedi ba Moshe. ₃Bohle ba ile ba ja sejo se tee sa semoya, ₄ba nwa le seno se tee sa semoya. Ba ile ba nwa seno sa go tšwa leswikeng la semoya le le bego le sepela nabo, gomme leswika leo e be e le Kriste. ₅Le ge go le bjalo, bontši bja bona bo ile bja se kgahle Modimo, gomme ba hwa ba gašagana lešokeng.

₆Tšeo ka moka di diregile go re laya gore re se dume dilo tše mpe go etša bona. ₇Le gona le se ke la khunamela medingwana boka ba bangwe ba bona, bjalo ka ge Mangwalo a Makgethwa a re: “Setšhaba sa dulela go ja le go nwa, sa feleletša ka go bina tša go se tsebalege.” ₈Rena re se ke ra feba, ra etša ba bangwe ba bona ba ba ilego ba feba, gomme ka tšatši le tee gwa bolawa ba dikete tše masome a mabedi le tše tharo. ₉Re se ke ra leka Kriste, ra etša ba bangwe ba bona ba ba ilego ba mo leka, gomme ba bolawa ke dinoga. ₁₀Le se ke la ngongorega, la etša ba bangwe ba bona ba ba ilego ba ngongorega, gomme ba bolawa ke Morongwammolai.

₁₁Tšeo ka moka di ile tša ba hlagela e le go laya ba bangwe, gomme tša ngwalelwa go re lemoša, rena re phelago nakong ya kgauswi le bofelo bja lefase.

₁₂Ka gona, yo a ikwago a sa tekateke tumelong, a itote gore a se we. ₁₃Ga se la ka la tlelwa ke moleko wo o palelago batho. Modimo o a botega, gomme a ka se le lese le lekwa ka tše di kago le palela. Ge le wetšwe ke moleko, yena o tla le fa maatla a go o kgotlelela, ya ba gona go le kgontšha go o fenya.

₁₄Bjale ge, banabešo, le tlogele go khunamela medingwana. ₁₅Ke bolela le lena ke le tšea le le batho ba ba kwešišago; lebeledišišang se ke se bolelago. ₁₆Kgane senwelo se re se nwago Selalelong sa Morena, se re tumišago Modimo gape re mo lebogago ka lebaka la sona, ge re se nwa na ga se gona ge re eba ba tee ka madi a Kriste? Le sona senkgwa se re se ngwathago, na ge re se ja ga se gona ge re eba ba tee ka mmele wa Kriste? ₁₇Ka ge senkgwa e le se setee, rena ka moka, le ge re le ba bantši, re mmele o tee, ka gobane ka moka re abelana sona senkgwa se tee se.

₁₈Bonang setšhaba sa Israele: Ga ke re ge ba eja dihlabelo e ba ba tee le Modimo yo a direlwago aletareng? ₁₉Na e ka ba ge ke realo ke ra gore modingwana goba dihlabelo tše di direlwago wona di na le mohola? ₂₀Le gatee! Se ke se bolelago ke go re dihlabelo tše baditšhaba ba di dirago, ba di direla bademone, e sego Modimo. Gomme ga ke nyake gore le gwerane le bademone. ₂₁Le ka se nwe senwelo sa Morena la ba la nwa le sa bademone; le ka se je tša tafola ya Morena la ba la ja le tša bademone. ₂₂Na e ka ba re nyaka go rumola Modimo? Kgane re mo feta ka maatla?

₂₃Yo mongwe motho a ka re: “Ke dumeletšwe tšohle.” Go bjalo; fela ga se gore tšohle di na le mohola. A ka re: “Ke dumeletšwe tšohle.” Ke nnete, eupša ga se gore tšohle di tiišetša motho tumelo. ₂₄Gape motho ga se a swanela go nyaka tša go ikhola, eupša o swanetše go nyaka tša go hola ba bangwe.

₂₅Tšohle tše di rekišwago borekišetšong bja nama le ka no di ja le sa botšiše mo di tšwago gona, gore le se kokonelwe. ₂₆Gobane Mangwalo a Makgethwa a re: “Lefase ke la Morena, le tšohle tše di lego mo go lona.”

₂₇Ge motho wa go se dumele a le memile mme le rata go ya, le je tšohle tše a le fago tšona, le sa botšiše mo di tšwago gona, gore le se kokonelwe. ₂₈Fela ge motho a ka le botša a re: “Nama ye ke ya sedimo,” gona le se ke la e ja, le e lese ka lebaka la yoo wa go le botša le ka lebaka la go hlompha letswalo, ₂₉ke ra la gagwe, e sego la gago.

Yo mongwe a ka botšiša a re: “Na nka napa ka šitišwa ke letswalo la motho yo mongwe go dira se ke se ratago? ₃₀Ge ke leboga Modimo ka lebaka la dijo tše a mphago tšona ke tla be ke rogelwang mabapi le tše ke di lebogago?”

₃₁Ka gona, ge le eja goba le enwa goba le dira se sengwe, tšohle le di direle go tumiša Modimo. ₃₂Le se ke la kgopiša Bajuda goba bao e sego Bajuda goba phuthego ya Modimo. ₃₃Le etše nna: nna ke leka go kgahla batho ka moka mo go tšohle tše ke di dirago, ke sa gabe go ikhola, eupša ke gaba go hola batho bohle, gore ba phologe.