To The Word – Day 38

_1-2Korage, morwa wa Jitsara, wa kgorwana ya Lefi ya Kehate, o kile a ba le sebete sa go tsogela Moshe maatla. O be a na le maloko a mararo a kgoro ya Rubene – Datane le Abiramo, barwa ba Eliaba, le One, morwa wa Pelete – le Baisraele ba bangwe ba makgolo a mabedi le masome a mahlano, baetapele ba go tsebega bao ba bego ba kgethilwe ke setšhaba. ₃Ba ile ba kgobokana pele ga Moshe le Arone, gomme ba re go bona: “Le ya kudu! Batho ka moka ba setšhaba ke ba Morena, mme Morena o na le rena ka moka. Bjale ke ka lebaka lang ge lena le ipona ba bagolo setšhabeng sa Morena?”

₄Ge Moshe a ba kwa, a itahlela fase ka sefahlego gomme a rapela. ₅Ke moka a re go Korage le lekoko la gagwe: “Mosong wa la ka moswane Morena o tla re laetša gore ke mang yo e lego wa gagwe; gomme yena yoo o tla mmatametša go yena aletareng. _6-7Ka moswane wena le lekoko la gago le tšeeng dibjana, le tšheleng magala ka go tšona, mme godimo ga ona le tšheleng seorelo, gomme le tšeeng dibjana tšeo le di išeng aletareng. Ke moo re tlago bona gore ke mang wa rena yo Morena a mo kgethilego. Ke lena Balefi le yago kudu!”

₈Moshe a tšwela pele le go bolela le Korage a re: “Theetšang, lena Balefi! ₉A le re ke tabana ye nnyane ge Modimo wa Israele a le hlaotše setšhabeng ka moka, gore le tle le kgone go mmatamela, le direng mošomo wa lena ka Tenteng ya Morena, mme le emeng pele ga setšhaba le se direle? ₁₀O le batameditše go yena gotee le Balefi ba bangwe, mme bjale le nyaka go hwetša le bjona boprista! ₁₁Ge le ngongoregela Arone, gabotsebotse lena le lekoko la lena le tsogela Morena maatla, gobane ge e le Arone ke eng?”

₁₂Ke moo Moshe a itšego Datane le Abiramo ba bitšwe, eupša bona ba re: “Re ka se tle! ₁₃A ga go a lekana ge o re ntšhitše nageng ya mokhora le monono ya Egepeta go tlo re bolaya mo lešokeng? Godimo ga moo na go sa nyakega gore o hlwe o ipea mmuši wa rena? ₁₄Le gona ga se wa re goroša nageng ya mokhora le monono, goba wa re fa mašemo le dirapa tša merara, mme bjale o leka go re hlalefetša. Re ka se tle!”

₁₅Moshe a befelwa gomme a re go Morena: “O se amogele kabelo goba sehlabelo sefe le sefe se banna ba ba se tlišago. Ga se ka phošetša le o tee wa bona; ga se ka tšea le ge e ka ba pokolo e tee ya bona.”

₁₆Moshe a re go Korage: “Ka moswane wena le lekoko la gago lohle le tleng Tenteng ya bodulo bja Morena; Arone le yena o tla ba fao. ₁₇Yo mongwe le yo mongwe a tšee sebjana sa gagwe sa magala, a tšhele seorelo go sona, gomme a se iše pele ga Morena.” ₁₈Ka gona yo mongwe le yo mongwe a tšea sebjana sa gagwe, a tšhela magala le seorelo go sona, gomme a ema mojakong wa Tente le Moshe le Arone. ₁₉Ke moo Korage a kgobokantšego setšhaba ka moka gore se yo lwa le Moshe le Arone mojakong wa Tente. Ka bjako seetša se se fahlago sa letago la Morena sa bonwa ke setšhaba ka moka, ₂₀gomme Morena a re go Moshe le Arone: ₂₁“Itlhaoleng setšhabeng se, mme ke tla ba fediša gatee fela.”

₂₂Eupša Moshe le Arone ba itahlela fase ka difahlego mme ba re: “Wena Modimo, o mothopo wa bophelo ka moka. Ge motho o tee a dirile sebe, a o ka galefela setšhaba ka moka?”

₂₃Morena a re go Moshe: ₂₄“Botša setšhaba gore se tloge mošašeng wa Korage le go wa Datane le go wa Abiramo.”

₂₅Ke moo Moshe a ilego go Datane le Abiramo a felegeditšwe ke baetapele ba Baisraele. ₂₆A re go setšhaba: “Hle, tlogang mešašeng ya banna ba babe ba, mme le se ke la kgwatha selo se e lego sa bona, gore le se tlo fedišwa le bona ka lebaka la dibe tšohle tša bona.” ₂₇Ka gona ba tloga mošašeng wa Korage le go wa Datane le go wa Abiramo.

Datane le Abiramo ba be ba tšwile mme ba eme mejakong ya mešaša ya bona, gotee le basadi ba bona le bana. ₂₈Moshe a re go setšhaba: “Šo mokgwa woo ka wona le tlago tseba gore Morena o nthomile go dira dilo tše ka moka, le gore ga ke di dire ka go ithatela. ₂₉Ge banna ba ba ka hwa lehu la tlhago bjalo ka batho ka moka, gona Morena ga se a nthoma. ₃₀Eupša ge Morena a ka dira se sengwe se se sego sa ka sa kwewa, gomme lefase la bulega la ba metša le tšohle tše e lego tša bona, gore ba tle ba theogele bodulabahu ba phela, gona le tla tseba gore banna ba ba ganne Morena.”

₃₁Ge a seno fetša go bolela, lefase la palega mo go emego Datane le Abiramo, ₃₂mme la ba metša le malapa a bona, gotee le balatedi ba Korage ka moka le tšohle tša bona. ₃₃Ka gona ba theogela bodulabahu ba phela, le dithoto tša bona. Lefase la ba khupetšega, gomme ba timelela. ₃₄Setšhaba ka moka sa Israele se se bego se le moo sa tšhaba ge se ekwa sello sa bona, mme ba goa ba re: “A re tšhabeng! Le rena lefase le ka re metša!”

₃₅Ke moo Morena a rometšego mollo wo o ilego wa tšhuma banna bale ba makgolo a mabedi le masome a mahlano ba ba bego ba tlišitše seorelo.

₃₆Ke moo Morena a itšego go Moshe: ₃₇“Botša Eleasara, morwa wa moprista Arone, gore a tloše dibjana tša magala tša mphiri meloreng ya batho bao ba tšhumilwego ke mollo, mme a gašanye mešidi ye e tšwago dibjaneng tšeo felo mo gongwe, gobane dibjana tšeo ke tše kgethwa. ₃₈E bile tše kgethwa mola di tlišwa pele ga ka. Ka gona tšea dibjana tša magala tša banna bao ba bolaetšwego sebe sa bona, o di kgatle e be diphaphathi, mme o dire sepipetši sa aletare ka tšona. E tla ba segopotšo go Baisraele.” ₃₉Ka gona moprista Eleasara a tšea dibjana tšeo tša magala, tša kgatlwa ya ba diphaphathi go dira sepipetši sa aletare. ₄₀Seo e bile segopotšo go Baisraele sa go re motho yo a se nago tokelo, yo e sego setlogolo sa Arone, a se ke a tla aletareng go tšhuma seorelo pele ga Morena, gore a se bolawe go swana le Korage le lekoko la gagwe. Tšohle tšeo Morena a bego a di laetše Eleasara ka Moshe di ile tša dirwa.

₄₁Ka letšatši le le latelago setšhaba ka moka sa ngongoregela Moshe le Arone sa re: “Lena le bolaile ba bangwe ba setšhaba sa Morena.” ₄₂Ya re ge ba kgobokane ba tsošetša Moshe le Arone tshele, ba lebelela Tenteng, gomme ba bona leru le e khupeditše mme seetša se se fahlago sa letago la Morena se bonagala. ₄₃Moshe le Arone ba ya ba ema pele ga Tente, ₄₄gomme Morena a re go Moshe: ₄₅“Šuthang le tlogeng go batho ba, ke ba feleletše ka ponyo ya leihlo!”

Bona ba itahlela fase ka difahlego, ₄₆gomme Moshe a re go Arone: “Tšea sebjana sa gago sa magala, o tšhele magala a a tšwago aletareng go sona, o tšhele le seorelo go ona. O nape o itlhaganele o ye naso go setšhaba mme o se phethele tiro ya poelano. Itlhaganele! Morena o šetše a galefile, gomme bolwetši bja leuba bo šetše bo ba aparetše.” ₄₇Arone a dira se Moshe a mmotšago sona, a tšea sebjana sa gagwe sa magala, a kitimela ka gare ga batho bao ba bego ba kgobokane. Ge a bona gore bolwetši bo šetše bo thomile go ba aparela, a tšhela seorelo magaleng gomme a phethela setšhaba tiro ya poelano. ₄₈Seo sa emiša bolwetši, mme yena a šala a eme gare ga batho ba ba phelago le ba ba hwilego. ₄₉Batho ba ba ilego ba hwa e ile ya ba 14 700, go sa balwe le ba ba ilego ba hwa mpherefereng wa Korage. ₅₀Ge bolwetši bo eme, Arone a boela go Moshe mojakong wa Tente.

₁Morena a re go Moshe: ₂“Botša setšhaba sa Israele gore ba go fe mapara a lesome le a mabedi; go moetapele wa kgoro ye nngwe le ye nngwe go tšwe le tee. O ngwale leina la moetapele yo mongwe le yo mongwe lepareng la gagwe, ₃mme lepareng le le emelago Lefi o ngwale leina la Arone. Go be le lepara le tee la moetapele wa kgoro ye nngwe le ye nngwe. ₄O a bee fase ka Tenteng ya bodulo bja ka, pele ga Polokelo ya Kgwerano, moo ke gahlanago nago. ₅Gomme lepara la moetapele yo ke mo kgethilego le tla hloga. Ka tsela ye ke tla fediša dingongorego tše di sa felego tša Baisraele ba ge ba le tsošetša tshele.”

₆Ka gona Moshe a bolela le Baisraele, gomme moetapele yo mongwe le yo mongwe a mo fa lepara; gwa tšwa le tee kgorong ye nngwe le ye nngwe, mme ka moka ya ba a lesome le a mabedi. Lepara la Arone le lona le be le le gare ga ao a bona. ₇Moshe a bea mapara ao ka moka fase ka Tenteng pele ga Polokelo ya Kgwerano ya Morena.

₈Ka letšatši le le latelago, ge Moshe a tsena ka Tenteng, a hwetša lepara la Arone, le le emetšego kgoro ya Lefi, le hlogile. Le be le dirile mabue, le khukhušitše, mme le entšwe dialmone tše di budulego! ₉Moshe a tšea mapara ale ka moka a a laetša Baisraele. Ba bona se se diregilego, mme moetapele yo mongwe le yo mongwe a tšea lepara la gagwe. ₁₀Morena a re go Moshe: “Boetša lepara la Arone pele ga Polokelo ya Kgwerano. Le bewe moo e be segopotšo sa go gopotša Baisraele ba dinganga gore ba tla hwa ge ba ka se lese go ngongorega.” ₁₁Moshe a dira ka moo Morena a mo laetšego ka gona.

₁₂Baisraele ba re go Moshe: “Bjale gona ke gona ge re fedile! Ka moka ga rena re hwile! ₁₃Ge eba mang le mang yo a nogo batamela Tente o tla hwa, gona ka moka ke setšha re hwile!”

₁Morena a re go Arone: “Wena le barwa ba gago le Balefi le tla otlelwa molato ofe le ofe wa go tšhilafatša Tente ya bodulo bja ka; eupša wena le barwa ba gago ke lena fela le tlago otlelwa diphošo tša baprista. ₂O tle le meloko ya gago, kgoro ya Lefi, gore ba tle ba šome nago ba go thuše mola wena le barwa ba gago le šoma Tenteng. ₃Ba phethe mediro ye o ba fago yona le mešomo ya bona ya Tente, eupša ba se ke ba batamela selo sefe goba sefe se sekgethwa ka Felo mo Gokgethwa, goba ba batamela aletare. Ge ba ka batamela, lena le bona le tla bolawa. ₄Ba šome nago gomme ba phethe mešomo ya bona medirong ka moka ya ka Tenteng, fela motho yo a se nego tokelo a se ke a šoma nago. ₅Ke wena le barwa ba gago ba le swanetšego go dira mešomo ya lena ya Felo mo Gokgethwa le ya aletare, gore ke se ke ka tsoga ke galefetše setšhaba sa Israele gape. ₆Ke nna yo ke kgethilego meloko ya lena, Balefi, go Baisraele gore e be mpho ya lena. Ba abetšwe nna, gore ba tle ba phethagatše mediro ya bona ka Tenteng. ₇Eupša ke wena le barwa ba gago fela ba le swanetšego go phetha mešomo ka moka ya baprista yeo e amago aletare le tše di lego ka Felo mo Gokgethwakgethwa. Mediro ye ke boikarabelo bja lena, ka gobane ke le file mpho ya boprista. Motho ofe le ofe yo a se nago tokelo yo a batamelago dilo tše kgethwa a bolawe.”

₈Morena a re go Arone: “Ke go beile mohlokomedi wa dikabelo ka moka tše ke di fiwago. Dikabelo tšohle tše Baisraele ba nkabelago tšona ke di fa wena le ditlogolo tša gago, e le karolo ye le e abetšwego go ya go ile. ₉Mo go dihlabelo le dikabelo tše kgethwakgethwa tše di sa tšhungwego aletareng, tše di latelago ke tša gago: dikabelo tša bupi le dihlabelo tša tshwarelo ya dibe le tša tefelo ya tšona. Se sengwe le se sengwe se se tlišwago go nna e le sehlabelo goba kabelo ye kgethwakgethwa ke sa gago le barwa ba gago. ₁₀Le jeleng dilo tše Felong mo Gokgethwa, mme e be banna fela ba ba di jago; ke tše kgethwa go lena.

₁₁“Dikabelo goba dimpho dife le dife tšeo Baisraele ba mphago tšona ka tsela ye e itšeng le tšona e tla ba tša gago. Ke di fa wena le barwa ba gago le barwedi ba gago bophelong bja lena ka moka. Leloko le lengwe le le lengwe la lapa la gago le le hlwekilego le ka di ja.

₁₂“Ke go fa ka moka tše kaonekaone tšeo Baisraele ba di bunago pele tše ba mphago tšona ngwaga ka ngwaga: makhura a mohlware le beine le mabele. ₁₃Ka moka ke tša gago. Leloko le lengwe le le lengwe la lapa la gago le le hlwekilego le ka di ja.

₁₄“Se sengwe le se sengwe mo go Baisraele se se fetšwego nna sa ruri ke sa gago.

₁₅“Leitšibolo le lengwe le le lengwe la motho goba la seruiwa le Baisraele ba le tlišago go nna ke la gago. Eupša o swanetše go tloga o amogela tefo ya go rekolla leitšibolo le lengwe le le lengwe la motho; o amogele le tefo ya go rekolla leitšibolo le lengwe le le lengwe la seruiwa se se tšhilafetšego. ₁₆Bana ge ba na le kgwedi ba rekollwe ka theko ye e beilwego ya dipapetlana tše tlhano tša silibera ye e etšwego go ya ka boima bja papetlana ya silibera ya ka Felo mo Gokgethwa. Papetlana yeo e swanetše go ba ya boima bjo e ka bago dikramo tše lesome le motšo o tee. ₁₇Fela maitšibolo a dikgomo le a dinku le a dipudi a se ke a rekollwa; ke a makgethwa go nna, gomme go swanetše go dirwa dihlabelo ka ona. O foke aletare ka madi a ona, gomme o tšhume makhura a ona e le sehlabelo, e be monkgo wo o ntsefelago. ₁₈Nama ya ona ke ya gago, go swana le leumo le serope sa la go ja sa mpho ye e fiwago nna ka tsela ye e itšeng.

₁₉“Ka dinako tšohle tše di tlago ke fa wena le barwa ba gago le barwedi ba gago dikabelo ka moka tše Baisraele ba mphago tšona ka tsela ye e itšeng. Ye ke kgwerano ya go ya go ile ye ke e dirilego le wena le ditlogolo tša gago.”

₂₀Morena a re go Arone: “O se amogele thoto efe goba efe ye e ka bago bohwa, gomme go se be le seripa sa naga ya Israele se se abelwago wena. Kabelo ya gago le bohwa mo go Baisraele ke nna.”

₂₁Morena a re: “Ke file Balefi karolo ya lesome ya se sengwe le se sengwe seo Baisraele ba se tlišago go nna. Wo ke moputso wa bona ka ge ba šoma go hlokomela Tente ya bodulo bja ka. ₂₂Baisraele ba se sa batamela Tente, ba ithweša kotlo ya lehu. ₂₃Go tloga bjale ke Balefi fela ba ba swanetšego go hlokomela Tente, mme ba ba le boikarabelo go yona ka botlalo. Wo ke molao wa neng le neng wo o amago le tšona ditlogolo tša lena. Balefi ba ka se be le naga mo go Baisraele, ₂₄ka gobane ke ba file karolo ya lesome ye Baisraele ba e tlišago go nna e le kabelo ye e fiwago nna ka tsela ye e itšeng. Ke ka lebaka leo ke ba boditšego gore ba ka se be le naga mo go Baisraele.”

₂₅Morena o laetše Moshe ₂₆gore a botše Balefi a re: “Ge le amogela go Baisraele karolo ya lesome ye Morena a le fago yona e etšwa go bona, le tliše karolo ya lesome ya yona e le kabelo ye e fiwago Morena ka tsela ye e itšeng. ₂₇Kabelo yeo e tla tšewa gore e lekana le kabelo ye molemi a e ntšhago ya mabele a mafsa le beine ye mpsha. ₂₈Ka tsela ye le lena le tliše kabelo ye e fiwago Morena ka tsela ye e itšeng go dikarolo tša lesome tša lena ka moka tše le di amogelago go Baisraele. Le neele moprista Arone kabelo yeo e fiwago Morena ka tsela ye e itšeng. ₂₉Le e ntšheng go tše kaonekaone tša tšohle tšeo le di amogelago e le mpho ye kgethwa. ₃₀Ka gona, ge le tlišitše karolo ye ye kaonekaone, le ka itshwarela se se šetšego, bjalo ka ge molemi a itshwarela se se šetšego ka morago ga ge a ntšhitše kabelo ya gagwe. ₃₁Lena le ba malapa a lena le ka se ja mo gongwe le mo gongwe, ka gobane ke moputso wa lena wa ge le šoma ka Tenteng. ₃₂Le ka se be le molato ge le se ja, ge e le gore le tlišitše se se kaonekaone sa sona go Morena. Le se ke la kgotlela dimpho tše kgethwa tša Baisraele ka go ja se sengwe sa dimpho pele ga ge karolo ye ye kaonekaone e abja, gore le se bolawe.”

₁Morena o laetše Moshe le Arone ₂gore ba fe Baisraele melawana ye e latelago. “Le tliše kgomo ye khunwana ye e se nago bosodi gape ye e sego ya ka ya panwa, ₃le e neele moprista Eleasara. E ntšhwe mešašeng mme e bolawe pele ga gagwe. ₄Ka morago Eleasara a tšee madi a mangwe a yona a a foke ka monwana gašupa go lebana le bokapele bja Tente. ₅Seruiwa seo ka moka – mokgopa le nama le madi le mošwang – se tšhungwe moprista a lebeletše. ₆Ke moka a tšee kotana ya mosedere, motšitlo wa hisopo, le thapo ye khubedu, gomme a di lahlele moo mollong. ₇Ka morago ga moo a hlatswe diaparo tša gagwe, a hlape mmele ka meetse; a kgone a tsena ka mešašeng, eupša o tla no ba a tšhilafetše go fihlela mantšiboa. ₈Monna yoo a tšhumilego kgomo yeo le yena a hlatswe diaparo tša gagwe, a hlape mmele ka meetse, eupša le yena o tla no ba a tšhilafetše go fihlela mantšiboa. ₉Monna yo a hlwekilego a olele melora ya kgomo yela, mme a e bee felo mo go hlweketšego tirelo ka ntle ga mešaša, moo e swanetšego go bolokelwa setšhaba sa Israele gore e tle e dirišwe ge go lokišwa meetse a go tloša sešila. Tiro ye ke ya sehlabelo sa tshwarelo ya dibe. ₁₀Monna yoo a olelago melora yeo o swanetše go hlatswa diaparo tša gagwe, eupša o tla no ba a tšhilafetše go fihlela mantšiboa. Molawana wo ke wa mehla ka moka go Baisraele gotee le bafaladi ba ba dulago gare ga bona.

₁₁“Yo a ka kgwathago motho yo a hwilego o tla tšhilafala matšatši a a šupago. ₁₂O swanetše go itlhwekiša ka meetse a tlhwekišo ka letšatši la boraro le ka letšatši la bošupa, ke moo a tlago hlweka. Eupša ge a ka se itlhwekiše ka letšatši la boraro le la bošupa a ka se hlweke. ₁₃Yo a ka kgwathago setopo mme a se ke a itlhwekiša o tla fela a tšhilafetše, ka gobane ga se a fokwa ka meetse a tlhwekišo. O kgotlela Tente ya Morena, gomme a kgaolwe setšhabeng sa Israele.

₁₄“Molawana wa ge motho a ka hwela ka tenteng šo: Yo a lego ka moo tenteng ka nako yeo ya lehu goba yo a ka tsenago ka moo o tla tšhilafala matšatši a a šupago. ₁₅Sebjana se sengwe le se sengwe se se sego sa khurumelwa, goba pitša ye e sego ya khurumelwa le yona e a tšhilafala. ₁₆Ge motho a ka re a le nageng a kgwatha motho yo a bolailwego, goba yo a ikhwetšego ka boyena, goba a kgwatha lešapo la motho, goba lebitla, o tla tšhilafala matšatši a a šupago.

₁₇“Ge go hlwekišwa motho wa mohuta woo, go ntšhwe molora wa kgomo yela ya go tšhungwa e le sehlabelo sa tshwarelo ya dibe, o tšhelwe ka pitšeng, mme go tšhelwe meetse a noka go wona. ₁₈Lekgeng la pele, yo mongwe yo a hlwekilego a tšee motšitlo wa hisopo, a o ine ka meetseng, gomme a foke tente le tšohle tše di lego go yona, le batho ba ba lego moo. Lekgeng la bobedi, yo mongwe yo a hlwekilego a foke motho yoo a kgwathilego lešapo la motho, goba setopo, goba lebitla, ka meetse ao. ₁₉Ka letšatši la boraro le ka la bošupa motho yoo a hlwekilego a foke motho yoo a tšhilafetšego ka meetse ao. Ka letšatši la bošupa a hlwekiše motho yoo. E tla re ge a hlatswitše diaparo tša gagwe mme a hlapile ka meetse, ya ba gona a hlwekago mantšiboa.

₂₀“Yo a tšhilafetšego mme a se itlhwekiše o tla fela a tšhilafetše, ka gobane ga se a fokwa ka meetse a tlhwekišo. O kgotlela Tente ya Morena, gomme a kgaolwe setšhabeng. ₂₁Le phethe molawana wo le ka dinako tšohle tše di tlago. Motho yo a fokago ka meetse a tlhwekišo le yena a hlatswe diaparo tša gagwe; yo a kgwathago meetse ao o tla fela a tšhilafetše go fihlela mantšiboa. ₂₂Se sengwe le se sengwe se motho yo a tšhilafetšego a se kgwathago le sona se tšhilafetše, le yo a kgwathago selo seo o tla fela a tšhilafetše go fihlela mantšiboa.”

₁Ge e le nna, banabešo, ke be ke sa kgone go bolela le lena wa go bolela le batho ba ba laolwago ke Moya wa Modimo; ke be ke bolela le lena wa go bolela le batho ba nama, wa go bolela le lena mo nkego le bana mo go tša tumelo ya Sekriste. ₂Ke be ke le fepa ka lebese, e sego ka dijo tše di tiilego, ka gobane le be le sešo la di lokela. Ešita le gonabjale ga sešo la di lokela, ₃gobane le sa phela bjalo ka batho ba nama. Ge le tsebafelana ebile le fapana, na ga se gona go bontšha gore le sa le batho ba nama, ba ba phelago ka mokgwa wa ba lefase? ₄Ge yo mongwe a re: “Nna ke wa Paulose,” mongwe a re: “Nna ke wa Apolose,” na ga se gona ge le le batho ba nama?

₅Etse Apolose yo ke mang? Paulose yena? Ke bahlanka ba Modimo ba le dumetšego ka bona, go ya ka mo Morena a filego yo mongwe le yo mongwe wa bona ka gona. ₆Nna ke bjetše peu, Apolose a e nošetša; eupša wa go e mediša e bile Modimo. ₇Ka gona, wa go e bjala le wa go e nošetša ga ba balwe, go balwa Modimo, ka gobane ke yena a e medišago. ₈Yo a bjalago le yo a nošetšago ba a swana; mongwe le mongwe o tla putsetšwa ke Modimo mošomo wo a dirilego. ₉Gobane rena re badirišani mošomong wa Modimo, gomme lena le tšhemo ya Modimo, ebile ke lena moago wa Modimo.

₁₀Go ya ka mpho ye Modimo a mphilego yona ka kgaugelo ya gagwe ke dirile bjalo ka moagi wa bokgoni ka bea motheo, gomme yo mongwe o aga godimo ga wona. Fela mongwe le mongwe a hlokomele ka mo a agago ka gona, ₁₁gobane ga go yo a ka beago motheo wo mongwe ka ntle le wo o beilwego wo, e lego yena Jesu Kriste. ₁₂Ba bangwe ba ka aga motheong wo ka gauta goba ka silibera goba ka magakabje; ba bangwe ba ka aga ka dikota goba ka mabjang goba ka mahlaka. ₁₃Modiro wa yo mongwe le yo mongwe o tla bonagala mohla Letšatši la Kriste le o utolla. Gobane ka Letšatši leo mollo o tla utolla modiro wa motho yo mongwe le yo mongwe; mollo o tla lekola mediro ya batho wa bontšha boyona bja yona. ₁₄Ge se se agilwego motheong wo se ka palela mollo, moagi wa sona o tla fiwa moputso. ₁₅Eupša ge se ka swa, gona moagi wa sona o tla loba, eupša yena mong o tla phologa, fela go phologa ga gagwe gwa ba bjalo ka ge nke o hlakodišitšwe a eswa.

₁₆Kgane ga le tsebe gore ke lena tempele ya Modimo, le gore Moya wa Modimo o dula ka go lena? ₁₇Gape motho ge a senya tempele ya Modimo, le yena Modimo o tla mo senya. Gobane tempele ya Modimo ke ye kgethwa, gomme lena ke lena tempele yeo.

₁₈Motho a se ke a iphora. Ge mo gare ga lena go na le yo a itsebago e le sehlalefi go ya ka tša lefase, a a itire lešilo, gore e tle e be sehlalefi sa mmannete. ₁₉Gobane se batho ba lefase ba bonago e le sa bohlale, Modimo yena o bona e le sa bošilo. A ke re le Mangwalo a Makgethwa a re: “Modimo o tanya bahlale ka mahlajana a bona”? ₂₀Gape a re: “Morena o tseba ge megopolo ya bahlale e le lefeela.” ₂₁Ka gona, go se be le yo a kgantšhago mediro ya batho, gobane dilo tšohle ke tša lena, ₂₂le ge e ka ba Paulose goba Apolose goba Kefase goba lefase, goba bophelo goba lehu, goba tša gonabjale goba tša ka moso – tšeo ka moka ke tša lena, ₂₃gomme lena le ba Kriste, mola Kriste e le wa Modimo.

₁Motho a a re bone re le bahlanka ba Kriste, ba ba beilwego balebeledi ba diphihlo tša Modimo. ₂Se segolo se se nyakegago go balebeledi ba ke gore motho a tshepege. ₃Ge e le nna, go ahlolwa ke lena goba ke kgoro ye nngwe, ga se taba ye e ntshwenyago; ga ke re le nna mong ga ke ikahlole? ₄Ga ke bone phošo ye nka bago ke e dirile, fela ka go realo ga se gore ke re ke lokile. Yo a nkahlolago ke Morena. ₅Ka gona, le se ke la ahlola motho pele ga ge nako ya gona e fihla, pele Morena a etla, yena a tlago utolla tše di utilwego ka leswiswing, tše di lego ka dipelong tša batho a di tšweletša nyanyeng. Ya ba gona motho mang le mang a retwago ke Modimo ka mo go mo lebanego.

₆Banabešo, ditaba tše ke di swantšhitše ka nna le Apolose go hola lena, gore le ithute ka rena se se šupšago ke polelo ye e rego: “Go se ke gwa fetišwa se se ngwadilwego ka Mangwalong a Makgethwa.” Motho wa lena a se ke a ikgantšha ka yo mongwe, a nyatša yo mongwe. ₇Kgane ke mang yo a rilego o phala ba bangwe? Ke eng se o nago le sona se o sego wa se fiwa ke Modimo? Bjale ge o se filwe o reng o ikgantšha, mo nkego ga se wa se fiwa?

₈Ga ke re tšohle tše le di nyakago le šetše le na le tšona? Gape le šetše le humile. Dikgoši ke lena, e sego rena! Nke nkabe ka nnete le le dikgoši, gore le rena re tle re be dikgoši le lena! ₉Gobane ke bona nke rena baapostola Modimo o re beile ba moragorago, mo nkego re batho ba ba ahloletšwego lehu, re bogwa ke barongwa le batho ka moka ba lefase. ₁₀Rena re mašilo ka lebaka la Kriste, kganthe lena le ba bohlale ka go ba ba tee le Kriste! Rena re a fokola, mola lena le tiile! Lena le a hlompšha, mola rena re nyatšwa! ₁₁Le gonabjale re sa bolawa ke tlala le lenyora; re hlagaletšwe; re a bethwa; re ebela le naga; ₁₂re itapiša ka go šoma ka diatla. Ge batho ba re senya maina, re a ba šegofatša; ge ba re hlomara, re a kgotlelela; ₁₃ge ba re roga, re a ithapeletša. Re bjalo ka thogorogo ya lefase; go fihlela le gonabjale re etša ditlakala tša lefase.

₁₄Ditaba tše ga ke le ngwalele tšona go le hlabiša dihlong, eupša ke le ngwalela tšona go le ruta bjalo ka bana ba ka ba ke ba ratago. ₁₅Gobane le ge le ka ba le baruti ba diketekete mo bophelong bja lena bja Sekriste, ga le na le botatagolena ba bantši. Gobane bophelong bja lena bja Sekriste tatagolena ke nna, ka ge ke le begetše Taba ye Botse. ₁₆Ka gona, ke le kgopela gore le nkekiše. ₁₇Ke ka lebaka leo ke le rometšego Timotheose, yo go tša Bokriste e lego morwa wa ka yo ke mo ratago, gape yo a botegago. Yena o tla le gopotša tša maitshwaro a ka ka ge ke le wa Kriste Jesu, ao ke a rutago diphuthego tšohle mo gohle.

₁₈Ba bangwe ba lena ba a ikgantšha mo nkego nka se sa tlo le etela. ₁₉Fela ge Morena a ratile, kgauswinyana ke tla be ke le etela, gomme ke tla nyakišiša ka bonna se bona ba kgonago go se dira, e sego fela go se bolela. ₂₀Gobane motho ge a bušwa ke Modimo o bonagala ka tše a di dirago, e sego ka tše a di bolelago. ₂₁Na lena le kganyogang? Le kganyoga gore ke tle go lena ka thupa, goba ke tle ka moya wa lerato le wa boleta?