1 BAKORINTE 3

₁Ge e le nna, banabešo, ke be ke sa kgone go bolela le lena wa go bolela le batho ba ba laolwago ke Moya wa Modimo; ke be ke bolela le lena wa go bolela le batho ba nama, wa go bolela le lena mo nkego le bana mo go tša tumelo ya Sekriste. ₂Ke be ke le fepa ka lebese, e sego ka dijo tše di tiilego, ka gobane le be le sešo la di lokela. Ešita le gonabjale ga sešo la di lokela, ₃gobane le sa phela bjalo ka batho ba nama. Ge le tsebafelana ebile le fapana, na ga se gona go bontšha gore le sa le batho ba nama, ba ba phelago ka mokgwa wa ba lefase? ₄Ge yo mongwe a re: “Nna ke wa Paulose,” mongwe a re: “Nna ke wa Apolose,” na ga se gona ge le le batho ba nama?

₅Etse Apolose yo ke mang? Paulose yena? Ke bahlanka ba Modimo ba le dumetšego ka bona, go ya ka mo Morena a filego yo mongwe le yo mongwe wa bona ka gona. ₆Nna ke bjetše peu, Apolose a e nošetša; eupša wa go e mediša e bile Modimo. ₇Ka gona, wa go e bjala le wa go e nošetša ga ba balwe, go balwa Modimo, ka gobane ke yena a e medišago. ₈Yo a bjalago le yo a nošetšago ba a swana; mongwe le mongwe o tla putsetšwa ke Modimo mošomo wo a dirilego. ₉Gobane rena re badirišani mošomong wa Modimo, gomme lena le tšhemo ya Modimo, ebile ke lena moago wa Modimo.

₁₀Go ya ka mpho ye Modimo a mphilego yona ka kgaugelo ya gagwe ke dirile bjalo ka moagi wa bokgoni ka bea motheo, gomme yo mongwe o aga godimo ga wona. Fela mongwe le mongwe a hlokomele ka mo a agago ka gona, ₁₁gobane ga go yo a ka beago motheo wo mongwe ka ntle le wo o beilwego wo, e lego yena Jesu Kriste. ₁₂Ba bangwe ba ka aga motheong wo ka gauta goba ka silibera goba ka magakabje; ba bangwe ba ka aga ka dikota goba ka mabjang goba ka mahlaka. ₁₃Modiro wa yo mongwe le yo mongwe o tla bonagala mohla Letšatši la Kriste le o utolla. Gobane ka Letšatši leo mollo o tla utolla modiro wa motho yo mongwe le yo mongwe; mollo o tla lekola mediro ya batho wa bontšha boyona bja yona. ₁₄Ge se se agilwego motheong wo se ka palela mollo, moagi wa sona o tla fiwa moputso. ₁₅Eupša ge se ka swa, gona moagi wa sona o tla loba, eupša yena mong o tla phologa, fela go phologa ga gagwe gwa ba bjalo ka ge nke o hlakodišitšwe a eswa.

₁₆Kgane ga le tsebe gore ke lena tempele ya Modimo, le gore Moya wa Modimo o dula ka go lena? ₁₇Gape motho ge a senya tempele ya Modimo, le yena Modimo o tla mo senya. Gobane tempele ya Modimo ke ye kgethwa, gomme lena ke lena tempele yeo.

₁₈Motho a se ke a iphora. Ge mo gare ga lena go na le yo a itsebago e le sehlalefi go ya ka tša lefase, a a itire lešilo, gore e tle e be sehlalefi sa mmannete. ₁₉Gobane se batho ba lefase ba bonago e le sa bohlale, Modimo yena o bona e le sa bošilo. A ke re le Mangwalo a Makgethwa a re: “Modimo o tanya bahlale ka mahlajana a bona”? ₂₀Gape a re: “Morena o tseba ge megopolo ya bahlale e le lefeela.” ₂₁Ka gona, go se be le yo a kgantšhago mediro ya batho, gobane dilo tšohle ke tša lena, ₂₂le ge e ka ba Paulose goba Apolose goba Kefase goba lefase, goba bophelo goba lehu, goba tša gonabjale goba tša ka moso – tšeo ka moka ke tša lena, ₂₃gomme lena le ba Kriste, mola Kriste e le wa Modimo.