To The Word – Day 39

₁Ka kgwedi ya mathomo setšhaba ka moka sa Israele sa fihla lešokeng la Tsine, mme sa hloma mešaša Kadeshe. Gona moo Miriamo a hlokafala gomme a bolokwa.

₂Fao go be go se na meetse, ka gona setšhaba sa bokanela Moshe le Arone ₃mme ba omanya Moshe ba re: “Go ka be go bile kaone ge re ka be re ikhwetše pele ga Tente ya Morena gotee le Baisraele ba gaborena. ₄O re tlišeditšeng mo lešokeng le? Gore re tle re hwele mo le diruiwa tša rena? ₅O re ntšheditšeng Egepeta wa re tliša mo nageng ye mpe ye? Ga go mabele, ga go mago, ga go diterebe, ga go digarenate. Go hlokega le wona meetse a go nwa!” ₆Moshe le Arone ba tloga pele ga setšhaba ba ya ba ema mojakong wa Tente. Ba itahlela fase ka difahlego, gomme ba bona seetša se se fahlago sa letago la Morena.

₇Morena a re go Moshe: ₈“Tšea lepara le le lego pele ga Polokelo ya Kgwerano, gomme wena le Arone le kgobokanyeng setšhaba ka moka. Moo pele ga bona ka moka o laele leswika lela, gore le tšwe meetse. Ka tsela ye o tla ntšhetša setšhaba meetse leswikeng, gore bona le diruiwa tša bona ba tle ba nwe.” ₉Moshe a yo tšea lepara lela, bjalo ka ge Morena a laetše.

₁₀Yena le Arone ba kgobokanya setšhaba ka moka pele ga leswika lela, gomme Moshe a re: “Theetšang, lena dinganga tenang! Kgane re le ntšhetše meetse leswikeng le?” ₁₁Ke moo Moshe a emišitšego lepara a itia leswika lela gabedi ka lona, gomme moela wo mogolo wa meetse wa phulega, mme setšhaba le diruiwa ka moka ba nwa.

₁₂Eupša Morena a omanya Moshe le Arone a re: “Ka gobane ga se la dumela go nna la ntlhompha pele ga setšhaba sa Israele ka ge ke le mokgethwa, le ka se ba goroše nageng ye ke ba holofeditšego yona.”

₁₃Se se diregile kua Meriba, moo Baisraele ba ilego ba omanya Morena, moo a ilego a ba laetša gore ke yo mokgethwa.

₁₄Moshe a roma banna ba tloga Kadeshe go ya go kgoši ya Edomo. Bona ba re: “Molaetša wo o tšwa go meloko yeno, Baisraele. O tseba mabothata a re bilego nao, ₁₅ka moo borakgolokhukhu ba rena ba ilego ba ya Egepeta moo re dutšego mengwaga ye mentši. Baegepeta ba tlaišitše borakgolokhukhu ba rena le rena, ₁₆gomme re lletše Morena gore a re thuše. O kwele sello sa rena gomme a roma morongwa yo a re ntšhitšego Egepeta. Bjale re mola Kadeshe, motse wo o lego mollwaneng wa naga ya lena. ₁₇Hle, re dumeleng go putla mo nageng ya lena. Rena le diruiwa tša rena re ka se aroge tsela le gatee, goba ra tsena mašemong a lena, goba dirapeng tša lena tša merara, le gona re ka se nwe meetse didibeng tša lena. Re tla fela re tšere ka tselakgolo ya kgoši go fihlela re etšwa nageng ya lena.”

₁₈Eupša Baedomo ba ba fetola ba re: “Re a gana go le lesa le putla naga ya rena! Ge le ka leka, re tla tšwa ra le hlasela.”

₁₉Baisraele ba re: “Re tla fela re swere tsela ye kgolo, gomme ge re ka nwa meetse a lena, rena goba diruiwa tša rena, re tla a lefela; se re se nyakago ke go iphetela fela.”

₂₀Baedomo ba boeletša ba re: “Re a gana!” Ke moo ba tšwilego ka madira a go tia go yo ba hlasela. ₂₁Ka gobane Baedomo ba ile ba gana go ba lesa ba putla nageng ya bona, Baisraele ba ile ba phamoga ba swara ye nngwe tsela.

₂₂Setšhaba ka moka sa Israele sa tloga Kadeshe gomme sa fihla thabeng ya Hore, ₂₃mollwaneng wa naga ya Edomo. Moo Morena a re go Moshe le Arone: ₂₄“Arone a ka se tsene nageng ye ke e holofeditšego Baisraele; o tlilo hwa, ka gobane lena ka babedi le nyaditše taelo ya ka kua Meriba. ₂₅Tšea Arone le morwa wa gagwe, Eleasara, o namele le bona thaba ya Hore, ₂₆gomme o apole Arone diaparo tša boprista o di apeše Eleasara. Arone o tla hlokafalela moo.” ₂₇Moshe a dira se Morena a mo laetšego sona. Ba namela thaba ya Hore ba lebeletšwe ke setšhaba ka moka, ₂₈gomme Moshe a apola Arone diaparo tša boprista mme a di apeša Eleasara. Gona moo godimo ga thaba Arone a hlokafala, gomme Moshe le Eleasara ba theoga. ₂₉Setšhaba ka moka sa kwa gore Arone o hlokafetše, gomme bohle ba mo ilela matšatši a masome a mararo.

₁Ge kgoši ya Bakanana ya Arade ka karolong ya borwa ya Kanana a ekwa gore Baisraele ba etla ba tšere ka tsela ya Atharime, o ile a ba hlasela mme a thopa ba bangwe ba bona. ₂Ke moo Baisraele ba ennego pele ga Morena ba re: “Ge o ka gafela setšhaba se diatleng tša rena, re tla go fela sona sa ruri le metse ya bona, mme ra ba fediša.” ₃Morena a ba kwa gomme a ba thuša go fenya Bakanana. Ka gona Baisraele ba ba bolaya, le metse ya bona ba e fediša taa, gomme ba rea felo fao leina la Horma.

₄Baisraele ba tloga thabeng ya Hore ka tsela ye e yago kgogometšaneng ya Akaba, gore ba tle ba potologe naga ya Edomo. Eupša mo tseleng setšhaba sa fela pelo ₅mme ba ngongoregela Modimo le Moshe ba re: “Ke ka lebaka lang o re ntšhitše Egepeta gore re tle re hwele mo lešokeng le, mo go sego dijo goba meetse? Re tennwe ke dijo tše mpe tše!” ₆Ke moo Morena a rometšego dinoga tša mpholo gare ga setšhaba, gomme Baisraele ba bantši ba longwa, ba hwa. ₇Setšhaba sa tla go Moshe sa re: “Re dirile sebe ge re ngongoregela Morena le wena. Bjale rapela Morena gore a tloše dinoga tše.” Ka gona Moshe a rapelela setšhaba. ₈Ke moo Morena a boditšego Moshe gore a dire noga ya mphiri a e fege koteng, gore yo mongwe le yo mongwe yo a longwago a kgone go e lebelela mme a fodišwe. ₉Ka gona Moshe a dira noga ya mphiri, a e fega koteng. Yo a lomilwego o be a lebelela noga yeo ya mphiri, mme a fodišwe.

₁₀Baisraele ba tšwela pele, gomme ba hloma mešaša kua Obote. ₁₁Ge ba tlogile Obote ba hloma mešaša maropeng a Abarime, lešokeng le le lego ka bohlabela bja naga ya Moaba. ₁₂Ba tloga moo mme ba hloma mešaša ka moeding wa Serede. ₁₃Go tloga moo ba sepela gape ba yo hloma mešaša ka thoko ya leboa ya nokana ya Arnone, lešokeng le le fihlago ka nageng ya Baamore. Nokana ya Arnone e be e le mollwane wa Bamoaba le Baamore. ₁₄Ke ka lebaka leo Puku ya Dintwa tša Morena e bolelago ka ga

₁₆Go tloga moo ba fetela pele felo fa go bitšwago Didiba, moo Morena a ilego a re go Moshe: “Bokanya setšhaba mme ke tla ba fa meetse.” ₁₇Ka nako yeo Baisraele ke ge ba opela koša ba re:

Ba tloga lešokeng ba ya Matana ₁₉gomme go tloga moo ba ya Nagaliele, mme go tloga Nagaliele ba ya Bamothe, ₂₀mme go tloga Bamothe ba ya moeding wo o lego ka nageng ya Bamoaba, ka fase ga malekeleke a thaba ya Pisga, go ukamela lešoka.

₂₁Setšhaba sa Israele sa romile batseta go Sihone, kgoši ya Baamore, ba re: ₂₂“Re dumelele re putle nageng ya gago. Rena le diruiwa tša rena re ka se tšwe tseleng ra tsena mašemong a gago goba dirapeng tša gago tša merara, le gona re ka se nwe meetse didibeng tša gago, re tla fela re tšere ka tselakgolo ya kgoši go fihlela re etšwa nageng ya gago.” ₂₃Eupša Sihone a gana gore setšhaba sa Israele se putle naga ya gagwe. A bokanya madira a gagwe ka moka gomme a ya Jahatse kua lešokeng, mme a hlasela Baisraele. ₂₄Eupša Baisraele ba bolaya ba bantši ba manaba ao ntweng, gomme ba thopa naga ya bona go tloga nokaneng ya Arnone go ya leboa go fihla go ya Jaboko, ke go re go Baamone, ka gobane mollwane wa Baamone o be o šireleditšwe kudu. ₂₅Ka fao setšhaba sa Israele sa thopa metse ya Baamore ka moka, gotee le Heshbone le metse ka moka ya tikologo, mme ba dula go yona. ₂₆Heshbone e be e le mošate wa Sihone, kgoši ya Baamore, yo a bego a lwele le kgoši ya pele ya Bamoaba mme a thopa naga ya gagwe ka moka go fihlela nokaneng ya Arnone. ₂₇Ke ka fao direti di rego:

₃₁Ka gona setšhaba sa Israele sa dula nageng ya Baamore, ₃₂gomme Moshe a roma banna go yo hlola ka moo ba kago hlasela motse wa Jasere ka gona. Ka morago ga moo Baisraele ba o thopa le metse ya tikologo ya wona, gomme ba raka Baamore ba ba bego ba dula go yona.

₃₃Ke moka Baisraele ba phamoga mme ba tšea tsela ya go ya Bashane, gomme Kgoši Ogo wa Bashane a tla le madira a gagwe ka moka go ba hlasela kua Edrei. ₃₄Morena a re go Moshe: “O se ke wa mmoifa. Ke tla go dira gore o mo fenye gotee le setšhaba sa gagwe ka moka le naga ya gagwe. O mo dire se o se dirilego Sihone, kgoši ya Baamore, yo a bego a buša kua Heshbone.” ₃₅Ka gona Baisraele ba bolaya Ogo le barwa ba gagwe le setšhaba sa gagwe ka moka, ba se šadiše motho, gomme ba dula nageng ya gagwe.

₁Baisraele ba fetela pele, ba yo hloma mešaša melaleng ya Moaba, ka bohlabela bja Jordane go lebana le Jeriko.

₂Ge kgoši ya Moaba, Balaka, morwa wa Tsiporo, a ekwa se Baisraele ba se dirilego Baamore, ₃le gore Baisraele e be e le ba bantši, yena le setšhaba ka moka sa Moaba ba boifa kudu. ₄Bamoaba ba re go baetapele ba Bamidiane: “Lešaba le le kgauswi le go senya se sengwe le se sengwe mo tikologong ya rena, go swana le ge poo e garola bjang phulong.” Ka gona Kgoši Balaka ₅a roma batseta go yo bitša Bileamo, morwa wa Beore, yo a bego a le Petore kgauswi le noka ya Yufratese, nageng ya Amao. Ba mo išetša molaetša wa go re: “Ke go tsebiša gore go na le setšhaba se sengwe se se tšwago Egepeta; se aparetše naga mme se ipeile kgauswi le rena. ₆Ba re feta ka bontši; ka gona, hle, tlaa o nthogakele bona. Ke moo mohlomongwe re tlago kgona go ba fenya mme ra ba ntšha nageng. Ke tseba gore ge o šegofatša motho o a šegofala, le ge o mo rogaka e ba yo a rogakilwego.”

₇Ka gona baetapele ba Bamoaba le ba Bamidiane ba tšea seloba se ba yago go lefela thogako yeo ka sona, ba ya go Bileamo gomme ba mmotša molaetša wa Balaka. ₈Bileamo a re go bona: “Robalang mo, gomme ka moswane ke tla le begela se Morena a mpotšago sona.” Ka fao baetapele ba Bamoaba ba lala ga Bileamo.

₉Modimo a tla go Bileamo a mmotšiša a re: “Banna ba ba tlilego ga gago ke bomang?”

₁₀Bileamo a mo fetola a re: “Ba romilwe ke Kgoši Balaka wa Moaba go tlo mpotša ₁₁gore setšhaba se sengwe se se tšwago Egepeta se aparetše naga ka moka. O nyaka gore ke tle ke mo rogakele sona, mohlomongwe ke gona a ka kgonago go se lwantšha mme a se raka.”

₁₂Modimo a re go Bileamo: “O se ke wa sepela le banna ba, le gona o se ke wa rogaka setšhaba sa Israele, ka gobane ke ba šegofaditše.”

₁₃Mosong wa le le latelago Bileamo a ya go batseta ba Balaka a re: “Boelang gae; Morena o ganne gore ke sepele le lena.” ₁₄Ka gona ba boela go Balaka, ba fihla ba mmotša gore Bileamo o ganne go tla le bona.

₁₅Ke moo Balaka a romilego baetapele ba go feta ba pele ka bontši le ka go hlomphega. ₁₆Ba ya go Bileamo ba fihla ba mmotša gore Balaka o re: “Hle, o se ke wa thibelwa ke selo go tla go nna! ₁₇Ke tla go putsa kudu mme ka dira se sengwe le se sengwe se o mpotšago sona. Ka gona, hle, etla o nthogakele setšhaba se.”

₁₈Eupša Bileamo a ba fetola a re: “Le ge Balaka a ka be a mphile silibera le gauta ka moka ya mošate wa gagwe, ke be nka se tshele taelo ya Morena Modimo wa ka, ešita le tabeng ye nnyane kudu. ₁₉Eupša hle, le lena robalang mo gore ke tle ke kwe ge eba Morena o na le se sengwe gape se a tlago mpotša sona.”

₂₀Bošegong bjoo Modimo a tla go Bileamo a re: “Ge eba banna ba ba tletše go go kgopela gore o sepele le bona, itokiše o sepele nabo, eupša o dire fela se ke go botšago sona.” ₂₁Ka gona mosong wa le le latelago Bileamo a saletša pokolo ya gagwe ya tshadi, a sepela le baetapele ba Bamoaba.

₂₂Modimo a befelwa ge Bileamo a eya, gomme ya re ge Bileamo a le tseleng a nametše pokolo ya gagwe a felegeditšwe ke bahlanka ba gagwe ba babedi, morongwa wa Morena a ema tseleng go mo thibela. ₂₃Ge pokolo e bona morongwa a eme fao a emišitše tšhoša, ya phamoga tsela ya hlahlatha le naga. Bileamo a itia pokolo yela a e gomišetša tseleng. ₂₄Ke moo morongwa a ilego a ema mo tsela e pitlagantšwego ke dirapa tše pedi tša merara, ka mathoko a tsela go le morako. ₂₅Ge pokolo e bona morongwa ya ipatagantšha le morako, ya kgobola Bileamo leoto ka wona. Bileamo a itia pokolo yela gape. ₂₆Morongwa yola a ya pele gape gomme a ema mo go pitlaganego moo go bego go se mo go ka fetwago ka mathoko ga tsela. ₂₇Lekga le, ge pokolo e bona morongwa, ya robala. Bileamo a befelwa mme a thoma go itia pokolo ka lepara la gagwe. ₂₈Ke moo Morena a dirilego gore pokolo e bolele, gomme ya re go Bileamo: “Ke go dirile eng ge o mphethile gararo bjale?”

₂₉Bileamo a e fetola a re: “O ntirile setlatla! Ge nkabe ke swere tšhoša, nkabe ke go bolaya gonabjale.”

₃₀Pokolo ya mo fetola ya re: “A ga se nna pokolo ya gago ye o e nametšego ka mehla go fihlela lehono? Kgane nkile ka tlwaela go go swara ka mokgwa wo?”

Bileamo a e fetola a re: “Aowa.”

₃₁Ke mo Morena a dirilego gore Bileamo a bone morongwa yola a eme fao a emišitše tšhoša; mme Bileamo a obama, a itahlela fase ka sefahlego. ₃₂Morongwa a mmotšiša a re: “Ke ka lebaka lang o bethile pokolo ya gago gararo ka tsela ye? Ke tlile go go thibela tsela, ka gore ga wa swanela go tšea leeto le. ₃₃Eupša pokolo ya gago e mpone mme ya šikologa gararo. Ge e ka be e se ya šikologa, nkabe ke go bolaile mme yona ka e lesa ya phela.”

₃₄Bileamo a mo fetola a re: “Ke dirile sebe. Ke be ke sa tsebe gore o nkeme tseleng; eupša bjale ge o bona gore ke phošo gore ke tšwele pele, ke tla gomela gae.”

₃₅Fela morongwa a re: “Tšwela pele le banna ba, eupša o bolele fela se ke go botšago sona.” Ka gona Bileamo a tšwela pele le bona.

₃₆Ge Balaka a ekwa gore Bileamo o etla, o ile a yo mo gahlanetša motseng wo o lego mollwaneng wa Moaba, nokaneng ya Arnone. ₃₇Balaka a re go Bileamo: “O be o reng o sa tle mola ke romile batho la mathomo go tlo go bitša? Kgane o be o gopola gore nka se kgone go go putsa?”

₃₈Bileamo a mo fetola a re: “Ga ke re šemo ke tlile? Fela nka se ipolele se ke se ratago; ke tla bolela fela se Morena a mpotšago sona.” ₃₉Ka gona Bileamo a ya le Balaka motseng wa Kiriate-Hutsote, ₄₀moo Balaka a fihlilego a dira dihlabelo ka dikgomo le dihuswane, gomme a re Bileamo le baetapele ba ba bego ba na le yena ba išetšwe dibego tša dinama tšeo.

₄₁Mosong wa le le latelago Balaka a rotoga le Bileamo a mo iša mebotong ya Baale. Ge ba le moo Bileamo o be a kgona go bona karolo ya setšhaba sa Israele.

₁A re go Balaka: “Nkagele dialetare tše di šupago mo, mme o hlabe dipoo tše di šupago le dikgapa tše di šupago.”

₂Balaka a dira ka moo a boditšwego ka gona, gomme yena le Bileamo ba dira sehlabelo ka poo le kgapa aletareng ye nngwe le ye nngwe. ₃Ke gona Bileamo a itšego go Balaka: “Šala o eme mo kgauswi le sehlabelo sa gago sa go tšhungwa ka moka, ge nna ke sa ile go bona ge eba Morena a ka nkgahlanetša. Ke tla boa ke go botša se sengwe le se sengwe se a ka nkutollelago sona.” Ka gona a namelela godimo mo go sego mehlare, ₄mme Modimo a mo gahlanetša. Bileamo a re go yena: “Ke agile dialetare tše di šupago mme ka dira sehlabelo ka poo le kgapa go ye nngwe le ye nngwe ya tšona.”

₅Morena a botša Bileamo molaetša wa gagwe, gomme a re a boele morago a yo o botša Balaka. ₆Ka gona a boela morago mme a hwetša Balaka a sa eme kgauswi le sehlabelo sa gagwe sa go tšhungwa ka moka a na le baetapele ka moka ba Moaba.

₇Bileamo a hlaba sereto a re:

₁₁Ke moo Balaka a itšego go Bileamo: “A o ntirile eng? Ke go tlišitše mo gore o tle o rogake manaba a ka, bjale wena o ba šegofaditše.”

₁₂Bileamo a mo fetola a re: “Gape ke swanetše go bolela fela se Morena a mpotšago gore ke se bolele.”

₁₃Ke moo Balaka a itšego go Bileamo: “A re ye felo mo gongwe moo o tlago bona fela karolo ya Baisraele. O nthogakele bona o le moo.” ₁₄A mo iša felo ga bahlodi godimodimo ga thaba ya Pisga. Moo le gona a aga dialetare tše di šupago, mme a dira sehlabelo ka poo le kgapa aletareng ye nngwe le ye nngwe ya tšona.

₁₅Bileamo a re go Balaka: “Šala o eme mo kgauswi le sehlabelo sa gago sa go tšhungwa ka moka, ge nna ke sa ile go gahlanetša Modimo mola.”

₁₆Morena a gahlanetša Bileamo, a mmotša se a swanetšego go se bolela, gomme a re a gomele go Balaka go yo bolela molaetša woo. ₁₇Ka gona Bileamo a boela morago mme a hwetša Balaka a sa eme kgauswi le sehlabelo sa gagwe sa go tšhungwa ka moka a na le baetapele ba Moaba. Balaka a mmotšiša gore Morena o boletše eng, ₁₈gomme Bileamo a hlaba sereto a re:

₂₅Ke moo Balaka a itšego go Bileamo: “Ge o gana go rogaka setšhaba sa Israele, o lese le go se šegofatša!”

₂₆Bileamo a mo fetola a re: “A ga se ka go botša gore ke swanetše go dira tšohle tše Morena a mpoditšego tšona?”

₂₇Balaka a re: “Hle, tlaa ke go iše lefelong le lengwe. Mohlomongwe fao Modimo o tla go dumelela wa nthogakela bona.” ₂₈Ka gona a iša Bileamo godimodimo ga thaba ya Peore ye e okametšego lešoka. ₂₉Bileamo a re go yena: “Nkagele dialetare tše di šupago mo, mme o hlabe dipoo tše di šupago le dikgapa tše di šupago.” ₃₀Balaka a dira ka moo a botšwago ka gona, a dira sehlabelo ka poo le kgapa aletareng ye nngwe le ye nngwe.

₁Go kwagala gore moo go lena bohlola bo a šiiša, bohlola bjo le go baditšhaba bo sego gona, bja ge motho a robala le mosadi wa tatagwe. ₂Lena le ikgantšha ka taba ye, kganthe e be e swanetše go le nyamiša. Motho yo a dirago taba ye bjalo a rakwe phuthegong. _3-4Nnaena le ge ka setopo ke le kgole le lena, ka pelo gona ke na le lena, gomme motho yo a dirago taba ya mohuta woo ke šetše ke mo ahlotše ka maatla a ke a filwego ke Morena wa rena, Jesu Kriste, go no swana le ge nkabe ke le moo. Ge le kopane mmogo le nna ka pelo ke kopane le lena, le maatla a Morena wa rena, Jesu, a le mo go rena, ₅motho yoo a gafelwe Sathane gore mmele wa gagwe o fedišwe, gore moya wa gagwe o tle o phološwe ka Letšatši la Morena.

₆Go ikgantšha ga lena ga go botse. Kgane ga le tsebe gore komelo ye nyenyane e bediša hlama yohle? ₇Lahlang hlama ya kgale, e lego sebe, gore le tle le be ba ba hlwekilego. Ke mo le tlago ba bjalo ka hlama ye mpsha ye e se nago komelo, ye le bjale le lego yona. Gobane Kriste, Kwanyana ya rena ya Paseka, o hlabilwe. ₈Ka gona, a re bineng Monyanya wa rena wa Paseka e sego ka go ja senkgwa se se nago le komelo ya kgale ya sebe le bokgopo, eupša ka go ja senkgwa se se hlokago komelo, e lego nnete le therešo.

₉Ka lengwalo le nkilego ka le ngwalela lona ke ile ka le botša gore le se ke la ikopanya le difebe. ₁₀Ga se gore ke be ke era baditšhaba ba difebe, goba ba megabaru, goba ba bahlakodi, goba ba go khunamela medingwana. Ge nkabe ke be ke era bona, nkabe e le setšha ke be ke re le tloge mo lefaseng. ₁₁Se ke bego ke se bolela ke gore le se ke la ikopanya le motho yo a ipitšago modumedi, etšwe e le sefebe goba sejato goba sekhunamelamedingwana goba mpheane goba setagwa goba mohlakodi. Wa mohuta woo yena le go ja naye le se ke la ja naye.

_12-13Bao e sego badumedi bona ke tla be ke ba ahlolelang? Gape yo a tlago ba ahlola ke Modimo. Ga ke re badumedi ba phuthego ya lena bona go lebane gore le ba ahlole? Gape Mangwalo a Makgethwa a re: “Tlošang yo mobe mo go lena.”

₁Ge yo mongwe wa lena a fapane le modumedikayena, o reng a yo ahlolwa ke baahlodi ba baditšhaba, a sa ahlolwe ke badumedikayena? ₂Kgane ga le tsebe gore badumedi ke bona ba tlago ahlola lefase? Gomme ge eba le tlilo ahlola lefase, melatwana ye menyenyane yona e ka napa ya le palela? ₃Kgane ga le tsebe gore le barongwa ba tlilo ahlolwa ke rena? Ge e le go ahlola tša lefase gona, ga re sa go bolela. ₄Na ruri le ka nama la re ge go hlagile taba tša mohuta wo la yo lamolwa ke batho ba ba nyatšwago ke phuthego? ₅Ruri ga le na dihlong! Le ra gore moo gare ga lena go hlokega le o tee yo bohlale yo a kago le lamola ge modumedi a fapane le mongwekayena? ₆Bjale modumedi o reng a iša mongwekayena tshekong mme ba ahlolwa ke baditšhaba?

₇Gabotsebotse go išana tshekong moo ga lena go bontšha gore le a palelwa. Le reng le sa upše la dumela go fošetšwa? Le reng le sa upše la dumela go hlakolwa? ₈Bjale šemoo ge, ke lena le fošago gape le hlakolago, gomme seo le se dira badumedikalena. ₉Na ga le tsebe gore yo mobe a ka se ye legodimong? Le se ke la iphora; difebe le bakhunamelamedingwana le diotswa le banna ba go robala bannakabona ₁₀le mahodu le dijato le ditagwa le bafeane le bahlakodi ba ka se ye legodimong. ₁₁Etse ba bangwe ba lena ba be ba le bjalo. Eupša le hlwekišitšwe, le kgethwafaditšwe, le lokafaditšwe ka Morena Jesu Kriste le ke Moya wa Modimo wa rena.

₁₂Go thwe: “Ke dumeletšwe tšohle.” Go bjalo; fela ga se gore tšohle di na le mohola. Le ge ke dumeletšwe tšohle, nka se dumele go laolwa ke se sengwe sa tšona. ₁₃Gape go thwe: “Dijo ke tša mpa, mpa le yona ke ya dijo.” Gona go bjalo; fela Modimo o tlilo fediša dijo le mpa bobedi. Mmele ga se wa bofebe, ke wa go hlankela Morena; gomme mmele o laolwa ke yena Morena. ₁₄Modimo o tsošitše Morena bahung, gomme le rena o tla re tsoša ka maatla a gagwe.

₁₅Kgane ga le tsebe gore mebele ya lena ke ditho tša Kriste? Na bjale nka dira ditho tša Kriste ditho tša segwebakathobalo? Le go leka! ₁₆Afa le a tseba gore motho yo a kgomanago le segwebakathobalo e ba mmele o tee le sona? Gape Mangwalo a Makgethwa a re: “Monna le mosadi ka babedi e tla ba mmele o tee.” ₁₇Eupša yo a ikopanyago le Morena e ba o tee le yena ka moya.

₁₈Tšhabang bofebe. Tše dingwe dibe ka moka tše motho a di dirago ga di amane le mmele wa gagwe, eupša yo a febago yena o senyetša mmele wa gagwe. ₁₉Kgane ga le tsebe ge mebele ya lena e le tempele ya Moya wo Mokgethwa wo o phelago mo go lena, wo le o filwego ke Modimo? Gape ga le sa le ba lena beng, ₂₀Modimo o le rekile, gomme bjale le ba gagwe. Ka gona mebele ya lena le e šomišetše go tumiša Modimo.