To The Word – Day 32

₁Morena o boditše Moshe a re: ₂“Laela Baisraele gore ba tliše makhura a mohlware a a hlwekilego a mabotsebotse a mabone a ka Tenteng, gore mabone a fele a tuka bošego bjo bongwe le bjo bongwe. ₃Mantšiboa a mangwe le a mangwe Arone a a gotetše mme a tuke go fihlela mosong moo pele ga Morena ka ntle ga seširo pele ga Polokelo ya Kgwerano, yeo e lego ka Felong mo Gokgethwakgethwa. Molawana wo o phethwe le mabakeng ka moka a a tlago. ₄Arone a hlokomele mabone a a lego sehlomamaboneng sa gauta ye e sego ya tswakwa, mme a bone gore a fela a tuka bošego bjo bongwe le bjo bongwe moo pele ga Morena.”

₅“O tšee bupi bja dikilokramo tše lesome le tše pedi gomme o pake dinkgwa tše lesome le tše pedi. ₆O bee dinkgwa tšeo ka methaladi ye mebedi, tše di selelago mothalading wo mongwe le wo mongwe, tafoleng ye e manegilwego ka gauta ye e sego ya tswakwa, ye e lego pele ga Morena. ₇O bee seorelo se se sego sa tswakwa mothalading wo mongwe le wo mongwe, e le sešupo sa kabelo ya Morena go tšea sebaka sa dinkgwa. ₈Ka Sabatha se sengwe le se sengwe le dinakong tšohle tše di tlago dinkgwa di swanetše go bewa pele ga Morena. Wo ke molawana wa Baisraele go ya go ile. ₉Dinkgwa tšeo ke tša Arone le ditlogolo tša gagwe, gomme ba di je felong mo go kgethwa, ka gore se ke seripa se sekgethwakgethwa sa dikabelo tša baprista tše di abelwago Morena. Wo ke molawana wa go ya go ile.”

_10-11Setšhabeng sa Israele go be go na le monna yo mongwe yo tatagwe e bego e le Moegepeta gomme mmagwe e le Moisraele, a bitšwa Shelomite, morwedi wa Dibri wa kgoro ya Dane. Monna yo o ile a fapana le Moisraele mešašeng. Phapanong yeo monna yoo a rogaka Modimo; ka gona ba mo iša go Moshe, ₁₂ba mo diša gomme ba letela gore Morena a ba botše gore ba dire eng ka yena.

₁₃Morena a re go Moshe: ₁₄“Ntšhang monna yoo mešašeng. Yo mongwe le yo mongwe yo a mo kwelego a rogaka, a bee diatla tša gagwe godimo ga hlogo ya gagwe, gomme setšhaba ka moka se mmolaye ka maswika. ₁₅O botše Baisraele gore yo a rogakago Modimo, o swanetše go lefa ka setopo, ₁₆mme ka nnete a bolawe. Yo a rogakago Modimo, goba ke Moisraele goba ke mofaladi, a bolawe ke setšhaba ka moka ka maswika.

₁₇“Yo a bolayago motho, le yena a bolawe; ₁₈yo a bolayago seruiwa sa yo mongwe, a se lefe ka se sengwe. Molao ke go re bophelo bo lefša ka bophelo.

₁₉“Ge motho a gobaditše yo mongwe, le yena a dirwe se a se dirilego: ₂₀go roba go lefše ka go roba; leihlo ka leihlo; leino ka leino. Motho a gobatšwe ka moo a gobaditšego yo mongwe ka gona. ₂₁Yo a bolailego seruiwa, a se lefe ka se sengwe, yo a bolailego motho, yena a bolawe. ₂₂Molao wo o ama lena ka moka, Baisraele le bafaladi ba ba dulago gare ga lena, ka gobane ke nna Morena Modimo wa lena.”

₂₃Ka gona Moshe a botša batho ba Israele tše Morena a mmoditšego tšona, gomme ba ntšhetša monna yola ka ntle ga mešaša, ba mmolaya ka maswika. Ka tsela ye Baisraele ba dira se Morena a se laetšego Moshe.

₁Morena o laetše Moshe thabeng ya Sinai ₂gore a fe Baisraele melawana ye e latelago. Ge le gorogile nageng ye Morena a le fago yona, le mo hlomphe ka go latša mašemo ngwaga wo mongwe le wo mongwe wa bošupa. ₃Le leme mašemo a lena, le thene merara ya lena, le bune le mašemo a lena mo mengwageng ye e selelago. ₄Eupša ngwaga wa bošupa e swanetše go ba ngwaga wa go khutšiša naga ka botlalo, ngwaga wo o abetšwego Morena. Le se ke la lema mašemo a lena goba la thena merara ya lena. ₅Le se ke la buna le ge e ka ba mabele ao a imelelago ka boona, goba la fula diterebe merareng ya lena ye e sego ya thenwa; ke ngwaga wa go khutšiša naga ka botlalo. ₆Le ge ngwageng woo naga e se ya lengwa e tla le fa dijo, lena le makgoba a lena le bathwalwa ba lena le bafaladi ba ba dulago le lena, ₇le diruiwa tša lena le diphoofolo tše di lego nageng ya lena. Se sengwe le se sengwe se naga e se medišago se ka lewa ke batho goba diphoofolo.

₈Le baleng mengwaga ye e šupago gašupa, ke go re mengwaga ye masome a mane le metšo ye senyane. ₉Gomme ka letšatši la lesome la kgwedi ya bošupa, e lego Letšatši la Poelano, go letšwe lepapata nageng ka moka. ₁₀Ka tsela ye le hlaole ngwaga wa masome a mahlano mme le bege tokologo ya badudi ka moka ba naga. Ke ngwaga wa tokologo: Ka ngwaga wo thoto ka moka ye e bego e rekišitšwe e boetšwe go beng ba yona ba pele, le motho yo mongwe le yo mongwe yo a bego a rekišitšwe e le lekgoba a boele kgorong ya gabo. ₁₁Le se ke la lema mašemo a lena, goba la buna mabele a a imelelago ka boona, goba la fula diterebe merareng ya lena ye e sego ya thenwa. ₁₂Ngwaga ka moka e be wo mokgethwa go lena; le jeng fela tše mašemo a di medišago ka boona.

₁₃Ka ngwaga wo thoto ka moka ye e bego e rekišitšwe e boetšwe go mong wa yona wa pele. ₁₄Ka gona ge o rekišetša Moisraelekawena naga, goba ge o reka naga go yena, o se ke wa mo pata. ₁₅Theko e bewe go ya ka palo ya mengwaga yeo ka yona naga e kago ntšha puno pele ga Ngwaga wa Poetšo wo o latelago. ₁₆Ge go sa šetše mengwaga ye mentši, theko e ye godingwana, eupša ge go šetše ye mennyane fela, theko e ye fasenyana, ka gore se se rekišwago ke tekanyo ya puno ye naga yeo e ka e ntšhago. ₁₇O se ke wa pata Moisraelekawena, eupša o boife Modimo; ke yena Morena Modimo wa gago.

₁₈Le phetheng melao le ditaelo tša Morena ka moka, gore le tle le dule le bolokegile mo nageng. ₁₉Naga e tla mediša dibjalo tša yona mme le tla ba le dijo ka bontši, gomme le tla dula ka polokego.

₂₀Fela le ka botšiša gore go tla lewa eng ka ngwaga wa bošupa ge go se na mašemo ao a lemilwego le tšeo di kago bunwa. ₂₁Morena o tla šegofatša naga ka ngwaga wa boselela gore e ntšhe dijo tše di lekanego mengwaga ye meraro. ₂₂Ge le lema mašemo a lena ka ngwaga wa seswai, le tla be le sa ja tšeo le di bunnego ka ngwaga wa boselela, gomme le tla ba le tša go ja tše di lekanego go fihlela ge dibjalo tše le di bjalago ka ngwaga woo di bunwa ka ngwaga wo o latelago.

₂₃Naga ya lena e se ke ya rekišetšwa sa ruri ka gore ga se ya lena; ke ya Modimo, gomme lena le bjalo ka bafaladi goba bafeti bao ba dumeletšwego go e šomiša.

₂₄Ge naga e rekišwa, go gopolwe gore mong wa yona wa pele o sa na le tokelo ya go e rekolla. ₂₅Ge Moisraele a ka diila gomme a gapeletšega go rekiša naga ya gagwe, moloko wa gagwe wa kgauswikgauswi a e rekolle. ₂₆Motho yo a se nago moloko wa go e rekolla, a ka e rekolla ka morago ka boyena mola a na le sa gagwe. ₂₇Ge go le ka tsela yeo, o swanetše go lefa motho yo a e rekilego tšhelete ye e tlago lekana mengwaga ye e sa šetšego gore go fihle Ngwaga wa Poetšo wo o latelago; ke gona a kago hwetša naga ya gagwe. ₂₈Eupša ge a se ne tšhelete ye e lekanego go rekolla naga yeo, e tla fela e laolwa ke motho yo a e rekilego, go fihlela Ngwageng wa Poetšo wo o latelago. Ka ngwaga woo e tla boetšwa go mong wa yona wa pele.

₂₉Ge motho a ka rekiša ngwako motseng wo o ageleditšwego ka morako, o na le tokelo ya go o rekolla ngwageng wa mathomo wo o tletšego go tloga ka letšatši le a o rekišitšego ka lona. ₃₀Fela ge a sa o rekolle mo ngwageng woo, o lahlegelwa ke tokelo ya thekollo, gomme ngwako e ba wa moreki le ditlogolo tša gagwe go ya go ile; o ka se bušwe ka Ngwaga wa Poetšo. ₃₁Fela mengwako ye e lego metsaneng ye e sego ya ageletšwa ka morako e swanetše go tšewa bjalo ka mašemo; beng ba yona ba mathomo ba na le tokelo ya go e rekolla, gomme e swanetše go boetšwa go beng ka Ngwaga wa Poetšo. ₃₂Le ge go le bjalo, Balefi bona ba na le tokelo ya go rekolla mengwako ya bona ka nako ye nngwe le ye nngwe metseng ye ba e filwego. ₃₃Ge ngwako wa motseng woo o rekišitšwe ke Molefi gomme o se wa rekollwa, o swanetše go boetšwa go mong ka Ngwaga wa Poetšo, ka gobane mengwako ye e lego ya Balefi metseng ke ya bona go ya go ile gare ga batho ba Israele. ₃₄Fela naga ya phulo go dikologa metse ya Balefi e se ke ya tsoga e rekišitšwe; ke ya bona go ya go ile.

₃₅Ge Moisraelekawena yo a dulago le wena a ka diila mme a se kgone go iphediša, o mo thuše bjalo ka ge o be o tla thuša mofaladi goba motho yo a go šomelago, gore a tle a kgone go tšwela pele le go dula le wena. ₃₆O se ke wa mo lefiša mašokotšo a tše o mo adimago, goba wa dira gore o boelwe, eupša o boife Modimo mme o lese Moisraelekawena a dule le wena. ₃₇O se ke wa mo adima tšhelete e le ge o nyaka mašokotšo a yona, le gona o se ke wa ba le poelo dijong tše o mo rekišetšago tšona. ₃₈Ye ke taelo ya Morena Modimo wa lena yo a le ntšhitšego Egepeta gore a tle a le fe naga ya Kanana, le gore e tle e be Modimo wa lena.

₃₉Ge Moisraelekawena yo a dulago le wena a ka diila mme a ithekiša go wena ya ba lekgoba la gago, o se ke wa mo šomiša mešomo ya makgoba. ₄₀A dule nago e le mothwalwa wa gago le mofeti, gomme a go hlankele go fihlela Ngwaga wa Poetšo wo o latelago. ₄₁Ka nako yeo yena le bana ba gagwe ba tloge go wena mme ba boele kgorong ya gabobona, gomme yena a boele nageng ya borakgolokhukhu ba gagwe. ₄₂Baisraele ke makgoba a Morena, mme o ba ntšhitše Egepeta; ga ba swanelwa go rekišwa ya ba makgoba. ₄₃O se ke wa ba swara gampe, eupša o boife Modimo. ₄₄Ge o nyaka makgoba, o ka a reka go ditšhaba tše di le dikologilego. ₄₅O ka reka le bana ba bafaladi bao ba dulago gare ga lena. Bana ba babjalo bao ba tswetšwego nageng ya lena e ka ba ba gago, ₄₆gomme o ka ba tlogelela barwa ba gago go ba bohwa bja bona, mme bana bao ba ka ba hlankela ge ba sa phela. Fela Moisraelekawena yena o se ke wa mo swara gampe.

₄₇Ge mofaladi goba motho yo a dutšego le wena lebakanyana a ka huma, mola Moisraelekawena a diila, gomme a ithekiša go mofaladi yoo goba motho yoo ya ba lekgoba la gagwe, ₄₈o sa na le tokelo ya go rekollwa. Yo mongwe wa banababo, ₄₉goba rangwane wa gagwe, goba ramogolo wa gagwe, goba morwarragwe, goba yo mongwe wa meloko yabo ya kgauswikgauswi ka madi a ka mo rekolla; goba ge yena ka boyena a ka ba le tšhelete ye e lekanego, a ka ithekolla. ₅₀O swanetše go boledišana le yo a mo rekilego, mme ba bale mengwaga go tloga ka nako yela a ithekišitšego ka yona go fihlela ka Ngwaga wa Poetšo wo o latelago, mme ba bee theko ya tokollo ya gagwe go ya ka mogolo wo o lefiwago motho yo a thwetšwego. _51-52O swanetše go mo lefa seripa sa theko go ya ka palo ya mengwaga ye e sa šetšego, ₅₃bjalo ka ge nke o be a thwalwa ngwaga ka ngwaga. Mong wa gagwe a se ke a mo swara gampe. ₅₄Ge a sa lokollwe ka ye nngwe ya ditsela tše, yena le bana ba gagwe ba lokollwe ka Ngwaga wa Poetšo wo o latelago. ₅₅Moisraele e ka se be lekgoba go ya go ile, ka gobane Baisraele ke makgoba a Morena. O ba ntšhitše Egepeta; ke yena Morena Modimo wa bona.

₁Morena o rile: “Le se ke la dira medimo ya diswantšho, goba la tsema dihlwadieme, goba dikokwane tša matlapa, goba matlapa a a betlilwego gore le di obamele, ka gobane Modimo wa lena ke nna, Morena. ₂Le keteke menyanya ya sedumedi, gape le hlompheng felo ga ka mo gokgethwa. Ke nna Morena.

₃“Ge le phela go ya ka melao ya ka mme le phetha ditaelo tša ka, ₄ke tla le nešetša pula ka nako ya gona, gore naga e tle e mediše dibjalo, le mehlare e enywe. ₅Le tla be le sa fola mabele ge nako ya go fula diterebe e fihla, mme le tla be le sa fula diterebe ge nako ya go bjala mabele e fihla. Le tla ba le dijo ka bontši, le gona le tla dula le bolokegile nageng ya lena.

₆“Ke tla le fa khutšo nageng ya lena, le gona le tla robala le sa tšhoge motho. Ke tla tloša dibata nageng ya lena, le dintwa di ka se sa ba gona. ₇Le tla hlomara manaba a lena la a fenya ka tšhoša; ₈ba bahlano ba lena ba tla kgona go hlomara ba lekgolo, mme ba lekgolo ba tla kgona go hlomara ba dikete tše lesome ba ba fenya ka tšhoša. ₉Ke tla le šegofatša, ka le fa le bana ba bantši; ke tla botegela kgwerano ye ke e dirilego le lena. ₁₀Le tla be le sa ja tša ngwagola, la ba la di tloša tša šuthela tše mpsha. ₁₁Ke tla dula gare ga lena ka tenteng ya ka ye kgethwa, gomme nka se tsoge ke le hlanogetše. ₁₂Ke tla ba le lena; ke tla ba Modimo wa lena, gomme lena le tla ba setšhaba sa ka. ₁₃Nna, Morena Modimo wa lena, ke le ntšhitše Egepeta gore le se ke la hlwa le le makgoba. Ke fedišitše maatla a bagateledi ba lena, ka le hlakodiša.”

₁₄Morena o rile: “Fela ge le sa ntheetše, le sa phethe ditaelo tša ka, le tla otlwa. ₁₅Ge le gana go phetha melao ya ka, le nyatša ditaelo tša ka gomme le lahla kgwerano ye ke e dirilego le lena, ₁₆ke tla le otla. Ke tla le tlišetša madimabe – bolwetši bja mafahla le bja letadi la go foufatša le go le fokotša la ba la hwa. Le tla bjala dibjalo tša lena, eupša go ka se le hole selo, ka gobane manaba a lena a tla di ja. ₁₇Ke tla le hlanamela la ba la fenywa, gomme la bušwa ke ba ba le hloilego; le tla no tšhaba le ge le sa rakedišwe ke motho.

₁₈“Ge le ka no se ntheeletše le ge ke le dirile tše ka moka, ke tla oketša kotlo ya lena gašupa. ₁₉Ke tla fediša maatla a le ikgodišago ka ona; leratadima le ka se le nešetše pula, ka gona naga ya lena e tla omelela, ya thatafala bjalo ka mphiri. ₂₀Le ge le ka šoma gaboima le ka se holege ka selo, ka gobane naga ya lena e ka se mediše dibjalo, le mehlare e ka se enywe.

₂₁“Ge le ka no fela le nngangabalela mme la se ntheetše, ke tla oketša kotlo ya lena gašupa gape. ₂₂Ke tla le romela dibata tše di tlago bolaya bana ba lena, tša fediša le diruiwa tša lena, gomme tša le fokotša mo ditsela tša lena di tlago wela kgwahlana.

₂₃“Ge le ka morago ga kotlo ye le ka fela le sa ntheetše mme la tšwela pele la ntwantšha, ₂₄gona le nna ke tla le lwantšha mme ka le otla gašupa gabohloko go feta pele. ₂₅Ke tla le tsošetša dintwa go itefeletša ka ge le lahlile kgwerano ya ka le lena, gomme le ge le ka bokana metseng ya lena gore le itote, ke tla le romela bolwetši bja leuba la ba la gapeletšega go ineela go manaba a lena. ₂₆Ke tla le hlokiša dijo mo e lego gore basadi ba lesome ba tla apea dinkgwa ka ontong e tee. Ba tla di ngwathelana, gomme la re go di ja la no fela le sa swerwe ke tlala.

₂₇“Ge le ka morago ga kotlo tšeo le ka no fela le tšwela pele le go se ntheetše mme la ntwantšha, ₂₈gona le nna ke tla le lwantšha ke befetšwe, ka le otla gape gašupa gabohloko le go feta pele. ₂₉Tlala e tla le golela la ba la ja bana ba lena. ₃₀Ke tla phušola dintotoma tše le khunamelago medimo ya diswantšho go tšona, ka kgereša dialetare tša lena tša seorelo, ka lahlela ditopo tša lena godimo ga medimo ya lena ya diswantšho ye e welego. Ke tla le šišingwa, ₃₁ka fetoša metse ya lena marope, ka senya mafelo ao le khunamelago go ona, ka ba ka gana dihlabelo tša lena. ₃₂Ke tla senya naga ya lena mo e lego gore manaba a a tlago dula go yona a tla tšhošwa ke go senyega ga yona. ₃₃Ke tla tliša manaba gore a lwe le lena, ka le šwalalanya le ditšhaba. Naga ya lena e tla fetoga lešoka, le metse ya lena e tla šala e le marope. _34-35Ke gona naga e tlago ba le mengwaga ya go khutša ye le bego le gana go e fa yona; e tla dula e tlogetšwe gomme ya hwetša khutšo ya yona mola lena le le nageng ya manaba a lena.

₃₆“Ke tla dira gore mašaledi a lena ao a lego nageng ya manaba a ona a tšhošwe le ke mogwaša wa matlakala ao a itšeelwago ke phefo, ba tšhabe. Ba tla tšhaba mo nkego ba hlomerwe ntweng, ba wa mola go se lenaba le le ba lelekišago. ₃₇Ba tla thetšana ba sa rakedišwe ke motho, gomme ba ka se be le maatla a go lwa le manaba a lena. ₃₈Ba tla hwa e le mathopša, ba metšwa ke naga ya manaba a bona. ₃₉Mašaledi a lena nageng ya manaba a lena a tla fokotšega a ehwa ka lebaka la sebe sa lena le sa borakgolokhukhu ba lena.

₄₀“Ditlogolo tša lena tšona di tla dumela gore tšona le borakgolokhukhu ba tšona bao ba sa mpotegelego gomme ba ntwantšhago ba dirile dibe, ₄₁mme ba ntira gore ke ba lwantšhe ke be ke ba romele bothopša nageng ya manaba a bona. Mafelelong, ge ditlogolo tša lena tše di ngangabetšego di kokobeditšwe gomme di lefile molato wa bokgopo bja bona, ₄₂ke tla gopola kgwerano ya ka le Jakobo le Isaka le Abrahama, mme ka gopola le naga ya lena. ₄₃Fela pele, batho ba swanetše go tlošwa nageng gore naga e tle e ipshine ka go khutša, mme ba swanetše go lefa molato wa bona ka botlalo wa ge ba ganne melao ya ka mme ba hlaswitše ditaelo tša ka. ₄₄Le ge go le bjalo, ge ba sa le nageng ya manaba a bona, nka se ba tlogelele sa ruri, goba ka ba feleletša sa ruri. Seo se ka fediša kgwerano ya ka le bona, gobane ke nna Morena Modimo wa bona. ₄₅Ke tla mpshafatša kgwerano ye ke e dirilego le borakgolokhukhu ba bona ge ke laetša ditšhaba ka moka maatla a ka ka go ba ntšha Egepeta, gore nna, Morena, ke tle ke be Modimo wa bona.”

₄₆Tše ka moka ke melao le ditaelo tša setšhaba sa Israele tše Morena a di filego Moshe thabeng ya Sinai.

₁Morena o file Moshe ₂melawana ye e latelago ya Baisraele. Ge motho a neetšwe Morena e le go phethagatša keno ye e itšeng, motho yoo a ka lokollwa ka go lefa ditefo tše di latelago, _3-7go ya ka papetlana ya silibera ye e etšwego go ya ka boima bja papetlana ya silibera ya ka Felo mo Gokgethwa:

₈Ge motho yo a ennego a diila mo a palelwago ke tefo ye e beilwego, a tliše motho yoo go moprista, gomme moprista a mmeele theko ye a ka e kgonago.

₉Ge eba se a ikannego ka sona ke seruiwa se se ka amogelwago ke Morena e le sehlabelo, seruiwa seo sa go abelwa Morena e tla ba se sekgethwa, ₁₀gomme motho yoo a ennego a se ke a šupa seruiwa se sengwe sebakeng sa seo. Ge a ka dira bjalo, diruiwa tšeo tše pedi di abelwe Morena. ₁₁Eupša ge keno ye bjalo e le mabapi le seruiwa se se tšhilafetšego, se se sa amogelegego go ba sehlabelo go Morena, motho yoo a iše seruiwa seo go moprista. ₁₂Moprista a bee theko ya sona, go ya ka moo e lego se se lokilego goba se se solegago, gomme theko yeo e eme gona moo. ₁₃Ge motho yoo a nyaka go se rekolla, o swanetše go ntšha theko yeo, a be a tlaleletše ka karolo ya bohlano ya theko yeo.

₁₄Ge motho a abela Morena ngwako wa gagwe, moprista a bee theko ya wona go ya ka moo ngwako o lokilego goba o solegago ka gona, mme theko yeo e eme gona moo. ₁₅Ge yoo a abetšego Morena ngwako a nyaka go o rekolla, o swanetše go ntšha theko yeo, a be a tlaleletše ka karolo ya bohlano ya theko yeo.

₁₆Ge motho a abela Morena karolo ya tšhemo ya gagwe ye e lego bohwa bja gagwe, theko ya yona e bewe go ya ka bontši bja peu yeo e gašwago moo; theko ya garase ye e imelago dikilokramo tše lekgolo e be dipapetlana tše masome a mahlano tša silibera. ₁₇Ge a ka aba tšhemo yeo ge Ngwaga wa Poetšo o seno feta, go bewe theko ye e tletšego. ₁₈Ge a ka e aba nakong ye nngwe ka morago, moprista a bee theko ya yona ya tšhelete go ya ka palo ya mengwaga ye e sa šetšego gore go fihle Ngwaga wa Poetšo wo o latelago, mme a fokotše theko ya yona ye e tletšego, go ya ka mengwaga yeo. ₁₉Ge motho yo a abilego tšhemo a nyaka go e rekolla, o swanetše go lefa theko yeo, a be a tlaleletše ka karolo ya bohlano ya yona. ₂₀Ge a ka rekišetša yo mongwe tšhemo yeo a se a e rekolla go Morena pele, o lahlegelwa ke tokelo ya go e rekolla. ₂₁Ka Ngwaga wa Poetšo wo o latelago tšhemo yeo e abelwe Morena go ya go ile; e be ya baprista.

₂₂Ge motho a ka abela Morena tšhemo ye a e rekilego, ₂₃moprista a bee theko ya yona go ya ka palo ya mengwaga go fihlela go Ngwaga wa Poetšo wo o latelago, gomme motho yoo o swanetše go lefa theko yeo ka lona letšatši leo; tšhelete yeo ke kabelo ye kgethwa go Morena. ₂₄Ka Ngwaga wa Poetšo tšhemo yeo e boele go mong wa yona wa pele, goba go ditlogolo tša gagwe.

₂₅Ditheko ka moka di bewe go ya ka papetlana ya silibera ye e etšwego go ya ka boima bja papetlana ya silibera ya ka Felo mo Gokgethwa. Papetlana yeo e swanetše go ba ya boima bjo e ka bago dikramo tše lesome.

₂₆Leitšibolo la seruiwa, e ka ba namanyana goba kwanyana goba putšane, ke la Morena ka matswalo, ka gona go se be le yo a mo abelago lona. ₂₇Leitšibolo la seruiwa se se tšhilafetšego lona le ka rekollwa ka theko ye e beilwego e tlaleleditšwe ka karolo ya bohlano ya yona. Ge e sa rekollwe e ka rekišetšwa yo mongwe ka theko ye e beilwego.

₂₈Eupša motho a se ke a rekiša goba a rekolla seo a se fetšego Morena sa ruri, e ka ba motho goba seruiwa goba tšhemo. Dilo tše bjalo ka moka ke tše kgethwakgethwa go Morena. ₂₉Le motho yoo a abetšwego Morena sa ruri a ka se rekollwe; o swanetše go bolawa.

₃₀Karolo ya lesome ya tšohle tše di bunnwego ka mašemong, e ka ba mabele goba dikenywa, ke ya Morena. Ke ye kgethwa go yena. ₃₁Ge motho a nyaka go rekolla seripa sa karolo ya lesome ya gagwe, o swanetše go lefa theko ye e beilwego mme a tlaleletše ka karolo ya bohlano ya yona. ₃₂Karolo ya lesome ya diruiwa tša gago ka moka o e ntšhe ka tsela ye: Ge diruiwa di balwa, ye nngwe le ye nngwe ya lesome e abelwe Morena. ₃₃Mong a se ke a tshwenyega ge eba ke diruiwa tše di se nago bosodi goba tše di nago le bjona tše di tlago kgethwa, mme a se ke a dira gore tše dingwe di tšee sebaka sa tše dingwe. Ge a ka dira bjalo, gona diruiwa tšeo tše pedi di abelwe Morena gomme di se ke tša rekollwa.

₃₄Tše ke ditaelo tša Baisraele tše Morena a di filego Moshe thabeng ya Sinai.