Pesalome 17

₁Morena, nkwe ge ke llela toka;

ela sello sa ka hloko.

Nkwe ge ke go rapela ke hlokofetše.

₂O nkahlole ka go nkemelela;

o bone se e lego nnete.

₃Le ge o ka ntekola ka pelong,

wa ntlhahloba bošego,

wa mphetleka,

o ka se hwetše ke nagana tše mpe.

Ga se nke ka bolela tše mpe

₄bjalo ka ba bangwe.

Ke phethile taelo ya gago;

ga se ka dira tša bokebeka.

₅Ke sepetše tseleng ya gago ka mehla,

mme ga se ka ka ka aroga go yona.

₆Modimo, nna ke a go rapela,

gobane ke wena o nkarabago.

Ka gona ntshekegele tsebe,

o theetše mantšu a ka.

₇Re bontšhe lerato la gago le le makatšago,

wena Mophološi wa ba ba tšhabelago manaba go wena.

₈Ntšhireletše bjalo ka ge o šireletša tlhaka ya leihlo la gago;

nkutamiše ka fase ga phego tša gago

₉ge bakgopo ba ntlhasela.

Manaba a ntikaneditše,

a nyaka go mpolaya.

₁₀Ga ba ne lešoko,

ba bolela ka matepe.

₁₁Bjale ba ntikaneditše,

ba nyaka sebaka sa go mpapola.

₁₂Ba etša tau ye e nyakago go gagola phoofolo;

ba bjalo ka ditawana tše di bataletšego ka dirobeng tša tšona.

₁₃Nanoga, Morena,

o hlasele manaba a ka o a fenye!

Ntlhakodiše go bakgopo ka tšhoša ya gago;

₁₄ntlhakodiše go batho ba nama ka seatla sa gago,

ke ra batho ba nama bao ba nago le tšohle tše motho a ka di nyakago mo lefaseng.

O a ba humiša,

le bana ba bona ke bomonakhora,

le bona ba tlogelela bana ba bona lehumo.

₁₅Ka ge ke lokile ke tla kgona go go bona,

mme ge ke tsoga ka kgotsofatšwa ke go ba le wena.