To The Word – Day 31

₁Morena o laetše Moshe gore a botše baprista ba Baarone a re: “Go se be le moprista yo a itšhilafatšago ka go llela goba go ilela mohu wa leloko labo, ₂ge e se ge e le wa leloko la kgauswi la madi, e lego mmagwe goba tatagwe goba morwa wa gagwe goba morwedi wa gagwe goba mogolo wa gagwe goba moratho wa gagwe ₃goba kgaetšedi ya gagwe ye e sego ya nyalwa. ₄A se ke a itšhilafatša lehung la motho wa leloko labo la kgomo.

₅“Baprista ba se ke ba ipoola dihlogo, goba ba fokotša maledu, goba ba iphatša mebele go laetša gore ba iletše. ₆E be ba bakgethwa gomme ba se ke ba kgotlela leina la ka. Ba ntirela dihlabelo le dikabelo, e lego dijo tše di abelwago Modimo wa bona; ka gona e be ba bakgethwa. ₇Moprista a se ke a nyala mosadi wa segwebakathobalo, goba yo a kilego a robala le monna, goba yo a hladilwego; moprista o kgethetšwe go ntirela, nna, Modimo. ₈Setšhaba se swanetše go tšea moprista gore ke yo mokgethwa, ka gobane o ntirela dihlabelo le dikabelo, e lego dijo tše di abelwago Modimo wa bona. Nna, Morena, yo ke kgethwafatšago setšhaba sa ka, ke yo mokgethwa. ₉Ge morwedi wa moprista e ka ba segwebakathobalo, o a ikgotlela, o kgotlela le tatagwe; a tšhungwe ka mollo, a hwe.

₁₀“Moprista yo Mogolo yo a šegofaditšwego ka go tlotšwa ka makhura a tlotšo hlogong, a bile a šegofaleditšwe go apara diaparo tša baprista, a se ke a tlogela moriri e le mahlafarara, goba a gagola diaparo tša gagwe go laetša gore o iletše. _11-12O abetšwe nna ka go tlotšwa ka makhura, gomme ga a swanela go itšhilafatša goba go kgotlela tente ya ka ye kgethwa ka go tloga go yona a tsena ngwakong woo go lego mohu ka go wona, le ge mohu e le tatagwe goba mmagwe. Ke nna Morena. ₁₃O swanetše go nyala mosadi yo a sego a ka a robala le monna, ₁₄e sego mohlologadi, goba mosadi yo a hladilwego, goba yo e kilego ya ba segwebakathobalo. A nyale fela mosadi wa kgoro ya gabo yo a sego a ka a robala le monna. ₁₅Go sego bjalo gona, bana ba gagwe ba tla tšhilafala. Ke nna Morena yo ke mo hlaotšego gore e be Moprista yo Mogolo.”

₁₆Morena o laetše Moshe ₁₇gore a botše Arone a re: “Go se ke gwa ba le setlogolo sa gago seo se golofetšego se se kago ntirela sehlabelo goba kabelo, e lego dijo tše di abelwago Modimo wa sona. Taelo ye e phethwe mabakeng ka moka a a tlago. ₁₈Monna wa segole a se ke a dira sehlabelo goba kabelo: sefofu goba sehlotša goba sepoteganko goba kotwane goba tsogwane; ₁₉yo a robegilego leoto goba letsogo; ₂₀yo a nago le lehutla goba yo e lego kgopana kudu; yo a nago le bolwetši bja mahlo, goba yo a tšwilego lekhwekhwe, goba pudi, goba yo a pšhatlegilego bonna. ₂₁Setlogolo sa moprista Arone se se golofetšego se se ke sa ntirela sehlabelo goba kabelo, e lego dijo tše di abelwago Modimo wa sona. ₂₂Motho wa mohuta woo a ka ja dijo tše di abetšwego Modimo wa gagwe, e lego sehlabelo se sekgethwa le se sekgethwakgethwa, goba kabelo ye kgethwa le ye kgethwakgethwa, ₂₃eupša ka gore o golofetše, a se ke a batamela seširo se sekgethwa goba a ya aletareng. A se ke a kgotlela dilo tše kgethwa tše, ka gobane ke nna Morena yo ke di kgethwafaditšego.”

₂₄Seo ke se Moshe a se boditšego Arone le barwa ba gagwe le setšhaba ka moka sa Israele.

₁Morena o laetše Moshe ₂gore a botše Arone le barwa ba gagwe a re: “Le hlompheng dihlabelo le dikabelo tše kgethwa tše Baisraele ba nkabelago tšona, gore le se ke la kgotlela leina la ka le lekgethwa. Ke nna Morena. ₃Ge yo mongwe wa ditlogolo tša lena yo a tšhilafetšego a ka batamela dihlabelo goba dikabelo tše kgethwa tše Baisraele ba di abetšego nna, a se ke a tsoga a tlile pele ga ka. Taelo ye e phethwe mabakeng ka moka a a tlago. Ke nna Morena.

₄“Setlogolo sa Arone se se ka bago le bolwetši bja letlalo bja go mo tšhilafatša, goba yo a ka tšwago seela, a se ke a ja sehlabelo goba kabelo ye kgethwa go fihlela ge a hlwekile. Moprista yo a kgwathilego selo se se tšhilafaditšwego ke go kgwathana le setopo, goba yo a tšwilego matšhedi, ₅goba yo a kgwathilego segagabi sa go mo tšhilafatša, goba motho wa go mo tšhilafatša, o tšhilafetše. ₆Moprista yo a tšhilafetšego o tla fela a tšhilafetše go fihlela mantšiboa, gomme le ka yona nako yeo a se ke a ja sehlabelo goba kabelo ye kgethwa a sešo a hlapa mmele. ₇Ge letšatši le diketše o tla ba a hlwekile, gomme a ka ja dihlabelo goba dikabelo tše kgethwa, ka gobane ke dijo tša gagwe. ₈A se ke a ja nama ya phoofolo ye e ikhwetšego ka boyona goba ye e bolailwego ke dibata; e tla mo tšhilafatša. Ke nna Morena.

₉“Baprista ka moka ba phethe ditaelo tša ka, gore ba se be le molato gomme ba hwa, ka ge ba tshetše ditaelo tše kgethwa. Ke nna Morena yo ke ba kgethwafatšago.

₁₀“Ke leloko fela la lapa la moprista le le ka jago sehlabelo goba kabelo ye kgethwa; go se be le yo mongwe yo a di jago – le ge e le motho yo a dulago le moprista goba yo moprista a mo thwetšego. ₁₁Fela makgoba ao moprista a a rekilego ka tšhelete ya gagwe goba ao a tswetšwego lapeng la gagwe, a ka ja dijo tšeo moprista a di amogelago. ₁₂Morwedi wa moprista yo a nyetšwego ke motho yo e sego moprista, a se ke a ja sehlabelo goba kabelo ye kgethwa. ₁₃Fela morwedi yo e lego mohlologadi goba yo a hladilwego, a se nago bana, mme a ipoetšego go tlo dula gape lapeng la tatagwe bjalo ka bjaneng bja gagwe, a ka ja dijo tšeo tatagwe a di amogelago ka ge e le moprista. Ke leloko fela la lapa la moprista le le kago ja dijo tšeo.

₁₄“Ge motho yo mongwe yo e sego wa lapa la moprista a ka ja sehlabelo goba kabelo ye kgethwa a se a ikemišetša, o swanetše go lefa moprista ka sa go lekana le seo a se llego, a be a oketše ka karolo ya bohlano ya sona. ₁₅Moprista ga a swanela go kgotlela dihlabelo goba dikabelo tše kgethwa ₁₆ka go lesa motho yo a se nago tokelo a di ja; se se tla tlišetša motho yoo molato le kotlo. Ke nna Morena yo ke kgethwafatšago dihlabelo le dikabelo.”

₁₇Morena o laetše Moshe ₁₈go fa Arone le barwa ba gagwe le Baisraele ka moka melawana ye e latelago: “Ge Moisraele goba mofaladi yo a dulago setšhabeng sa Israele a tliša sehlabelo sa go tšhungwa ka moka, e le go phethagatša keno goba e le sehlabelo sa boithaopo, ₁₉e se be seruiwa se se nago bosodi. E be se setona se se se nago bosodi gore se amogelwe. ₂₀Ge le ka dira sehlabelo ka seruiwa se se nago le bosodi, Morena a ka se se amogele. ₂₁Ge motho a direla Morena sehlabelo sa kagišano e le go phethagatša keno goba e le sehlabelo sa boithaopo, seruiwa sa gona e be se se se nago le bosodi bjo bongwenyana gore se tle se amogelwe. ₂₂Le se ke la direla Morena sehlabelo ka seruiwa se se foufetšego, goba se se golofetšego, goba se se kgaogilego setho, goba se se nago le sešo sa go tšwa boladu, goba se se nago le lekhwekhwe, goba se se nago le pudi; le se ke la direla Morena sehlabelo ka seruiwa se sebjalo aletareng. ₂₃Ge le direla Morena sehlabelo sa boithaopo, le ka se dira ka seruiwa se se nago le ditho tša go fetana, fela ge e le sehlabelo sa go phethagatša keno, se ka se amogelwe. ₂₄Le se ke la direla Morena sehlabelo ka seruiwa se se gobetšego botona, goba se kgatletšwego, goba se fagotšwego. Se ga se dumelelwe nageng ya lena.

₂₅“Le se ke la dira sehlabelo e le dijo tše di abelwago Modimo wa lena ka seruiwa se sebjalo se etšwa go motho o šele. Diruiwa tše dibjalo di tšewa gore di golofetše, ga tša felela, gomme ga di amogelege.

_26-27“Namanyana goba kwanyana goba putšane ye e tswetšwego ga ya swanela go tlošwa go mmagoyona e sešo ya fetša matšatši a a šupago, fela go tloga ka tšatši la seswai e ka amogelega ya ba sehlabelo. ₂₈Ge le dira sehlabelo ka kgomo goba sehuswane, le se ke la e hlaba le ngwana wa yona ka letšatši le tee. ₂₉Ge le direla Morena sehlabelo sa tebogo, le se direng ka mokgwa wo se tlago amogelwa; ₃₀le se jeng ka lona letšatši leo gomme le se ke la se šadiša molatša go fihlela mosong wo o latelago. Ke nna Morena.”

₃₁Morena o itše: “Le phetheng ditaelo tša ka; ke nna Morena. ₃₂Le se ke la kgotlela leina la ka le lekgethwa; Baisraele ba swanetše go ntseba gore ke yo mokgethwa. Ke nna Morena yo ke le kgethwafatšago; ₃₃ke le ntšhitše Egepeta gore ke tle ke be Modimo wa lena. Ke nna Morena.”

₁Morena o file Moshe ₂melawana ye e latelago ya menyanya ya sedumedi, ge Baisraele ba swanetše go phuthegela tirelo. ₃“Le na le matšatši a a selelago ao ka wona le ka dirago mešomo ya lena, eupša letšatši la bošupa ke Sabatha, ke letšatši la go khutša. Ka letšatši leo le se ke la šoma, eupša le phuthegele tirelo. Sabatha ke sa Morena gohle mo le dulago gona. ₄Menyanya ye e beilwego ya sedumedi ye le swanetšego go kgobokana ka mabaka a yona še:

₅“Paseka, ye e ketekwago go hlompha Morena, e thoma ge letšatši la lesome le metšo ye mene la kgwedi ya mathomo le dikela. ₆Ka letšatši la lesome le metšo ye mehlano go thoma Monyanya wa Dinkgwa tše di se nago komelo, gomme matšatši a a šupago le je senkgwa se se sego sa dirwa ka komelo. ₇Ka letšatši la mathomo le phuthegele tirelo, mme le se ke la ba la dira mediro ya lena ya mehleng. ₈Le direleng Morena dihlabelo le dikabelo matšatši a a šupago. Ka letšatši la bošupa le phuthegeleng gape tirelo, mme le se ke la ba la dira mediro ya lena ya mehleng.

_9-10“Ge le gorogile nageng ye Morena a le fago yona mme le bunne mabele a lena, le išeng ngata ya mathomo go moprista. ₁₁A e abele Morena e le mpho ye e fiwago yena ka tsela ye e itšeng, gore a le amogele. Moprista a e tliše ka letšatši la ka morago ga Sabatha. ₁₂Ka letšatši le le tlišago kabelo yeo ya mabele ka lona, le dire le sehlabelo sa go tšhungwa ka moka ka kgapana ya ngwaga o tee ye e se nago bosodi. ₁₃Le se tliše le bupi bja dikilokramo tše pedi bjo bo hlakantšwego le makhura a mohlware e le kabelo ya bupi. Monkgo wa kabelo ye o tsefela Morena. Le tliše le kabelo ya litara e tee ya beine. ₁₄Le se ke la ja senkgwa goba dithuthupe tša mabele goba mabele a mafsa go fihlela ge le tlišitše kabelo yeo go Morena. Molawana wo o phethwe le ke ditlogolo tša lena ka moka nakong tšohle tše di tlago.”

₁₅“Le baleng dibeke tše di šupago tše di tletšego ka morago ga Sabatha seo ka sona le tlišago ngata ya lena ya mabele go tlo e abela Morena ka tsela ye e itšeng. ₁₆Ka letšatši la masome a mahlano, letšatši la ka morago ga Sabatha sa bošupa, le tlišetše Morena kabelo ye nngwe ya mabele a mafsa. ₁₇Lapa le lengwe le le lengwe le tliše dinkgwa tše pedi mme le di abele Morena e le mpho ye e fiwago yena ka tsela ye e itšeng. Dinkgwa tšeo di dirwe ka bupi bja dikilokramo tše pedi bjo bo dubilwego ka komelo, gomme di tlišetšwe Morena e le kabelo ya mabele a mathomo a a bunwago. ₁₈Gotee le dinkgwa tšeo setšhaba se tliše dikgapana tša ngwaga o tee tše di šupago, le poo e tee, le dipudi tše pedi; tšohle e be tše di se nago bosodi. Di dirwe sehlabelo sa go tšhungwa ka moka sa Morena, gotee le kabelo ya bupi le ya beine. Monkgo wa sehlabelo se o tsefela Morena. ₁₉Le dire le sehlabelo sa tshwarelo ya dibe ka phooko e tee, gomme ka dikgapana tše pedi tše di nago le ngwaga o tee le dire sehlabelo sa kagišano. ₂₀Moprista a tliše dihlabelo tšeo gotee le dinkgwa e le mpho ya baprista ye e fiwago Morena ka tsela ye e itšeng. Dihlabelo tšeo ke tše kgethwa. ₂₁Ka letšatši leo le se ke la dira mediro ya lena ya mehleng, eupša le phuthegele tirelo. Le ditlogolo tša lena di swanetše go phetha molawana wo mabakeng ka moka a a tlago gohle mo ba dulago gona.

₂₂“Ge le buna mašemo a lena, le se ke la ripa diako ka moka tša ka mellwaneng ya mašemo, le gona le se ke la boela go yo budutša diako tše di šetšego ge go bunwa; le di tlogeleleng badiidi le bafaladi. Ke nna Morena Modimo wa lena.

_23-24“Letšatši la pele la kgwedi ya bošupa e be letšatši la lena la segopotšo la go khutša, gomme le phuthegeleng tirelo ge mapapata a lla. ₂₅Le se ke la ba la dira mediro ya lena ya mehleng, gomme le direle Morena sehlabelo.

_26-27“Letšatši la lesome la kgwedi ya bošupa ke Letšatši la Poelano. Ka letšatši leo le ikokobetše ka go ikona dijo; le phuthegeleng tirelo, gomme le direle Morena sehlabelo. ₂₈Le se ke la šoma ka letšatši leo, ka gobane ke letšatši la go phethagatša tirelo ya go le boelanya le Modimo. ₂₉Yo a sa ikokobetšego ka go ikona dijo ka letšatši leo, a kgaolwe setšhabeng sa gabo. ₃₀Gomme yo a ka dirago modiro ofe le ofe ka letšatši leo, Morena o tla mmolaya. ₃₁Molawana wo o phethwe le ke ditlogolo tša lena ka moka gohle mo ba dulago gona. ₃₂Go tloga ge le dikela ka letšatši la senyane la kgwedi go fihlela ge le dikela ka letšatši la lesome, le hlompheng letšatši le e le letšatši la go khutša, leo ka lona le ikokobetšago ka go ikona dijo.

_33-34“Monyanya wa Mešaša o thoma ka letšatši la lesome le metšo ye mehlano la kgwedi ya bošupa, wa tšea matšatši a a šupago. ₃₅Ka letšatši la mathomo le phuthegeleng tirelo, gomme le se ke la ba la dira mediro ya lena ya mehleng. ₃₆Letšatši le lengwe le le lengwe la matšatši ao a šupago le direleng Morena sehlabelo. Ka letšatši la seswai le phuthegeleng tirelo gape mme le direleng Morena sehlabelo sa dijo. Ke letšatši le legolo, mme ka lona le se ke la swara modiro.

₃₇“Ye ke menyanya ya sedumedi yeo ka yona le hlomphago Morena ka go phuthegela tirelong le ka go tliša dihlabelo le dikabelo, e lego dihlabelo tša go tšhungwa ka moka, le dikabelo tša bupi, le dihlabelo tše dingwe, le dikabelo tša beine, ka moo go nyakegago letšatši ka letšatši. ₃₈Menyanya ye e tlaleletša Disabatha tša Morena, mme dihlabelo le dikabelo tše di tlaleletša dimpho tša lena tša mehleng, le dihlabelo tša lena tša go phethagatša dikeno, le dikabelo tša lena tša boithaopo tše le di fago Morena.

₃₉“Ka letšatši la lesome le metšo ye mehlano la kgwedi ya bošupa, ge le bunne mašemo a lena, le ketekeng monyanya wo matšatši a a šupago. Letšatši la pele le la seswai e be matšatši a go khutša. ₄₀Ka letšatši la pele le fuleng dikenywa tše kaonekaone tša mehlare ya lena, le tšeeng makala a mepalema le a mehlare ye metala le a mopopoliri gomme le ketekeng monyanya pele ga Morena Modimo wa lena. ₄₁Le o keteke matšatši a a šupago mo ngwageng. Molawana wo o phethwe le ke ditlogolo tša lena nakong tšohle tše di tlago. ₄₂Baisraele ka moka ba dule ka mešašeng matšatši a a šupago, ₄₃gore ditlogolo tša lena di tle di tsebe gore Morena o dirile gore Baisraele ba dule ka mešašeng ge a ba ntšha Egepeta. Ke yena Morena Modimo wa lena.”

₄₄Ke ka mo Moshe a filego setšhaba sa Israele melawana ya go keteka menyanya ya sedumedi go hlompha Morena.

₁Tumelo ke bonnete bja tše re holofelago gore di tla hlaga, ke go kgolwa tše re sa di bonego. ₂Gobane ke ka tumelo mo batho ba kgale ba bego ba kgahla Modimo.

₃Ke ka yona tumelo ge re kwešiša gore lefase le hlodilwe ke Modimo ka lentšu la gagwe, le gore tše di bonwago di tšweleditšwe ka tše di sa bonwego.

₄Ke tumelo ye e dirišitšego Abele sehlabelo sa go phala sa Kaine. Ka tumelo ya gagwe o ile a kgahla Modimo, Modimo a bontšha gore ke moloki ka go amogela dihlabelo tša gagwe. Abele, le ge a hwile, o sa bolela ka yona tumelo yeo ya gagwe.

₅Enoko, ka ge a be a na le tumelo, o ile a rotošetšwa go Modimo a se a hwa. Go ile gwa se be le yo a mo hwetšago, ka gobane Modimo o be a mo tšere. Mangwalo a Makgethwa a re le pele a tšewa o be a kgahlile Modimo. ₆Gape ge motho a se na tumelo a ka se kgahle Modimo, gobane yo a tlago go Modimo o swanetše go ba le tumelo ya go re Modimo o gona, le go re o putsa ba ba mo nyakago.

₇Ke ka tumelo mo Noa a ilego a phetha taelo ya Modimo ka boikokobetšo ge Modimo a mo sebotša mabapi le dilo tše a bego a sešo a di bona. A aga leselawatle la go phološa ba lapa la gagwe. Ka tumelo yeo ya gagwe lefase le ile la tšwiwa, eupša Noa yena a kgahla Modimo ka lebaka la ge a dumela go yena.

₈Ke tumelo ye e dirilego gore Abrahama a se gane mola Modimo a mo laya gore a ye nageng ye a bego a mo tshephišitše yona. A tloga nageng ya gabo a sa tsebe mo a yago gona. ₉Ke tumelo ye e dirilego gore a phele e le mofaladi nageng ye Modimo a bego a mo tshephišitše yona. A dula ka mešašeng bjalo ka Isaka le Jakobo, bao le bona Modimo a ilego a ba holofetša se a bego a se holofeditše Abrahama. ₁₀Gobane Abrahama o be a hlolosetše motse wa metheo ya sekgonkgothela, motse wo o akantšwego ke Modimo wa ba wa agwa ke yena.

₁₁Ke tumelo ye e ilego ya kgontšha Abrahama go tswala ngwana, le ge a be a šetše a tšofetše mme le yena Sara e le moopa, ka gobane o be a dumela gore Modimo o tla phetha se a mo holofeditšego sona. ₁₂Le ge Abrahama e be e le setšha a hwile, go monna o tee yoo go tšwile ditlogolo tše dintšintši bjalo ka dinaledi tša leratadima, bjalo ka dithorwana tše di sa balwego tša lešabašaba lebopong la lewatle.

₁₃Batho bao ka moka ba hwile ba na le tumelo, ba sešo ba amogela tše Modimo a bego a ba holofeditše tšona, eupša ba di bonetše bokgole mme ba di thabela, ba ipega gore ke bona bašele le bafaladi mo lefaseng. ₁₄Ba ba bolelago bjalo ba bontšha gabotse gore ba nyaka ya gabobona naga. ₁₅Ge ba ka be ba be ba gopola naga ye ba bego ba tlogile go yona, ba ka be ba bile le sebaka sa go boela go yona. ₁₆Kganthe se ba bego ba se hlolosetše ke naga ya gabobona ye kaone, e lego ya legodimong. Ka gona Modimo ga a lewe ke dihlong go bitšwa Modimo wa bona, gobane o ba agetše motse.

_17-18Se se nyakilego go diriša Abrahama sehlabelo ka Isaka, morwagwe, mola Modimo a mo leka, ke yona tumelo. Abrahama yo a bego a holofeditšwe ke Modimo mola a re: “Ke ka Isaka mo o tlago ba le ditlogolo tše ke go holofeditšego tšona,” o ile a ikemišetša go dira sehlabelo ka yena motswalwanoši yoo wa gagwe. ₁₉Abrahama ka pelong o ile a re: “Gape Modimo a ka kgona go tsoša motho bahung” – ebile re ka re ke setšha Abrahama a tsošeditšwe Isaka bahung.

₂₀Ke tumelo ye e ilego ya dira gore Isaka a šegofatše Jakobo le Esau gore tša ka moso di tle di ba sepelele gabotse.

₂₁Ke tumelo ye e ilego ya dira gore Jakobo a šegofatše barwa ba Josefa ka babedi mola a felela. A rapela Modimo a ithekgile ka lehlotlo la gagwe.

₂₂Ke tumelo ye e ilego ya dira gore Josefa, mola a ehwa, a bolele ka go huduga ga Baisraele Egepeta, a laela le gore go dirwe eng ka setopo sa gagwe.

₂₃Ke tumelo ye e ilego ya dira gore batswadi ba Moshe ba mo khutiše dikgwedi tše tharo ge a seno tswalwa. Ba be ba bona gore ke yo mobotse, ba sa boife taelo ya kgoši.

₂₄Ke tumelo ye e ilego ya dira gore Moshe ge a godile a gane go bitšwa morwa wa morwedi wa kgoši. ₂₅O ile a ikgethela go tlaišwa le setšhaba sa Modimo go na le gore a ipshine ga lebakanyana ka sebe. ₂₆A bona go tlaišetšwa Mesia go phala mahumo ohle a Egepeta kudu, ka ge a be a lebeletše moputso wa ka moso.

₂₇Ke tumelo ye e ilego ya dira gore Moshe a tloge Egepeta a sa boife bogale bja kgoši. A falela go phetha taelo ya Modimo mo nkego o bona Modimo yo a sa bonagalego. ₂₈Ke tumelo ye e ilego ya mo dira gore a hlome Paseka mme a laela gore madi a šašetšwe mabating, gore Morongwammolai a se tlo bolaya bašemane ba maitšibolo ba Baisraele.

₂₉Ke tumelo ye e ilego ya kgontšha Baisraele go tshela Lewatlekhubedu mo nkego ba tshela mo go omilego; Baegepeta bona ge ba leka go tshela ba betwa ke meetse.

₃₀Ke tumelo ye e ilego ya dira gore merako ya Jeriko e kgerege ge Baisraele ba seno e dikologa matšatši a a šupago. ₃₁Ke tumelo ye e ilego ya dira gore Rahaba, mosadi yola wa segwebakathobalo, a se bolawe le batho bale ba go se theeletše Modimo, gobane o ile a amogela dihlodi tša Baisraele ka ga gagwe.

₃₂Go hlwa go iša pele ka tše dingwe go thušang? Gape ge nka re ke le botša ka tša Gideone, Barake, Simsone, Jefta, Dafida, Samuele, le baprofeta, nako e ka ba ya mphelela. ₃₃Ka lebaka la tumelo ya bona ba be ba elwa le magoši ba a fenya. Ba be ba dira tše di lokilego, gomme Modimo a ba putsa ka mo a holofeditšego ka gona. Ba tlema ditau melomo, ₃₄ba tima mello ye e gaketšego, ba phonyokga go bolawa ka tšhoša. Ba be ba fokola, fela ba tia maatla; e be e le bagale ntweng gomme ba fenya madira a bašele. ₃₅Basadi, ka lebaka la tumelo ya bona, ba be ba tsošetšwa batho ba bobona ba ba hwilego.

Ba bangwe ba bolawa ka sehlogo, ba gana go lokollwa, e le gore ba tle ba tsošetšwe go phela bophelo bjo bokaone. ₃₆Ba bangwe ba be ba tlaišwa ka go kwerwa le go bethwa ka dikgati, mola ba bangwe ba kgokwa ba išwa kgolegong. ₃₇Ba bolawa ka maswika, ba ripša ka bogare, ba bolawa ka tšhoša. Ba sepela ba apere mekgopha ya dinku le ya dipudi – ba diila, ba tlaišwa mme ba swarwa gampe. ₃₈Lefase le be le se la ba swanela. Ba be ba ebela le mašoka le dithaba, ba phela ka maweng le ka meleteng.

₃₉Bona bao ka moka le ge ba be ba kgahla Modimo ka tumelo ya bona, tše Modimo a bego a ba holofeditše tšona ga se ba di hwetša, ₄₀ka gobane yena o be a ikemišeditše go re direla se sekaone. Se a bego a ikemišeditše sona ke gore ba be se yena a nyakago gore ba be sona, ba na le rena.

₁Ge e le rena, re na le lešaba le legolo la dihlatse tša tumelo le le re dikaneditšego. Ka gona, a re roleng tšohle tše di re imelago, le sebe, e lego selo se se re tanyago gabonolo, gore re tle re kgone go kgotlelela go kata mokato wo re swanetšego go o kata wo. ₂A re duleng re lebeletše Jesu, yo tumelo ya rena go Modimo e re tlelago ka yena, yo a bilego a tiišetša tumelo yeo. Sefapano ga se sa ka sa mo palediša go phetha maikemišetšo a gagwe. Ebile, ka lebaka la lethabo le a bego a le lebeletše, o ile a se lewe ke dihlong tša go hwela sefapanong, gomme bjale o dutše madulong a bogoši kgauswi le Modimo Kgoši.

₃Le fele le mo gopola, yena yo a ilego a kgotlelela mola a lwantšhwa ke badiradibe, gore le se felelwe ke tshepho goba la nolega moko. ₄Gobane ge le katana le sebe ga se la ka la katana wa go ba kotsing ya go bolawa. ₅Le lebetše širešire mantšu ale a Modimo a go le kgothatša bjalo ka bana ba gagwe a go re:

₁₂Bjale ge, tiišang matsogo a lena a a rephilego le dikhuru tše di rekeselago. ₁₃Le fele le swere tsela ya nnete, gore yo a fokolago tumelong a se wele ruri, a upše a tielele.

₁₄Le phegeleleng go phedišana le bohle ka khutšo, le lekeng le go phela bophelo bjo bokgethwa, ka gobane ga go yo a tlago bona Morena a sa phele ka mokgwa woo. ₁₅Le hlokomele gore go se be le yo a lobago kgaugelo ya Modimo, yo e bago semela sa borokgohlwele se se rego go mela sa tliša mathata, mme sa tšhilafatša ba bantši ka mpholo wa sona. ₁₆Go se be le yo a febago goba yo a gokwago ke tša lefase, go etša Esau yo a ilego a reka sa go ja ka ditokelo tša gagwe tša ge e le mošemane wa leitšibolo. ₁₇Gobane le a tseba gore ka morago, mola a nyaka tšhegofatšo ye e mo lebanego, o ile a ganwa, ka ge a be a ka se kgone go dirolla se a bego a se dirile, le ge a lekile ka meokgo.

₁₈Lena ga se la tla thabeng ya Sinai ye e tukago mollo wa nnete, ya leswiswi le manyami le ledimo; ₁₉moo go kwagalago mollo wa phala le lentšu la yo a bolelago. Ba ba le kwago ba ile ba kgopela gore le se sa bolela le bona, ₂₀gobane ba be ba sa kgone go kgotlelela taelo ye e rego: “Ešita le phoofolo ge e ka gata thaba ye e bolawe ka maswika.” ₂₁Tše ba di bonego di be di šiiša mo Moshe a ilego a ba a re: “Ke thothomela ka letšhogo!”

₂₂Lena le tlile thabeng ya Sinai le motseng wa Modimo yo a phelago, e lego motseng wa Jerusalema ya legodimong, motseng wo o nago le diketekete tša barongwa. ₂₃Le tlile kopanong ya lethabo ya bašemane ba maitšibolo ba Modimo, bao maina a bona a ngwadilwego legodimong. Le tlile go Modimo yo e lego yena Moahlodi wa batho ka moka, le tlile le go meoya ya batho ba ba lokilego ba ba se nago bosodi. ₂₄Le tlile go Jesu yo e lego Mmoelanyi wa batho le Modimo ka kgwerano ye mpsha, le tlile le mading a go foka, a a bolelago tše kaone go feta ale a Abele.

₂₅Ka fao, le hlokomele mme le se gane go mo kwa ge a bolela. Ba ba gannego go mo kwa ge a ba fa molaetša mola a le lefaseng ga se ba phonyokga. Bjale rena re ka phonyokga bjang ge re lahla yo a bolelago a le legodimong? ₂₆Mehleng yeo lentšu la gagwe le ile la šikinya lefase, eupša bjale o re holofeditše a re: “Ke sa tlilo šikinya lefase la mafelelo, e sego lona fela, eupša le legodimo.” ₂₇Mantšu a a go re “la mafelelo” a šupa gore dilo tše di bopilwego, tše di kago šikinywa, di tla šuthišwa, gore go šale tše di ka se šikinywego.

₂₈Ka gona, re lebogeng ka ge re fiwa mmušo wo o ka se šikinywego, gomme re khunameleng Modimo ka mokgwa wo a kago kgahlega, ka tlhompho le poifo, ₂₉gobane ruri Modimo wa rena ke mollo wo o fišago lorelore.

₁Dulang le ratana ka mo Bakriste ba swanetšego go ratana ka gona. ₂Le hlokomele go amogela baeng, le etše ba bangwe ba ba kilego ba amogela barongwa ba sa tsebe. ₃Le gopole ba ba lego kgolegong bjalo ka ge nke le golegilwe le bona. Le gopole ba ba tlaišwago, mme le dire tše nkego le lena le tlaišwa nabo.

₄Bohle le hlomphe lenyalo, gomme motho a se ke a otswa, gobane Modimo o tla otla digwebakathobalo le diotswa.

₅Le se ke la ba le marato tšheleteng, le gona le kgotsofale ka se le nago le sona. Gape Modimo o rile: “Nka se tsoge ke le tlogetše, ebile nka se tsoge ke le lahlile.” ₆Ka gona, a re boleleng re holofetše re re:

₇Gopolang baetapele bale ba lena ba pele, bale ba bego ba le botša molaetša wa Modimo. Gopolang ka mo ba ilego ba phela ka gona go fihlela ba ehwa, gomme le be le tumelo ya go swana le ya bona. ₈Jesu Kriste o a swana maabane le lehono le go ya go ile.

₉Le se ke la kgelošwa ke dithutwanathutwana di šele. Ke mo gobotse go maatlafatšwa moyeng ka kgaugelo ya Modimo, e sego ka melawana ya dijo, yona e sa holego ka selo bao ba e phethago.

₁₀Re na le aletare yeo baprista ba ba direlago ka Tempeleng ba se nago tokelo ya go ja sehlabelo se se dirwago mo go yona. ₁₁Moprista yo Mogolo o tliša madi a diphoofolo ka Tempeleng gore setšhaba se swarelwe dibe; ge e le ditoto tša diphoofolo tšeo tšona di tšhungwa ka ntle ga mešaša. ₁₂Ke ka lebaka leo Jesu le yena a bolailwego ka ntle ga motse, gore a tle a hlatswe setšhaba dibe ka madi a gagwe. ₁₃Ka gona, a re yeng go yena ka kua ntle ga mešaša, re mo rwadiše go gobošwa ga gagwe. ₁₄Gobane mo lefaseng ga re na motse wo o duletšego ruri; wo re o letetšego o se tla. ₁₅Ka ge Jesu a re hwetše, bjale a re duleng re tumiša Modimo, e be sona sehlabelo sa rena sa go dirwa ka melomo ye e begago gore Jesu ke Morena. ₁₆Le se ke la lebala go dira tše di lokilego le go ngwathelana le ba bangwe tše le nago le tšona, ka gobane ke tšona dihlabelo tša lena tše di kgahlago Modimo.

₁₇Le theeletše baetapele ba lena, le ikokobetše go bona, gobane ke bona ba ba le hlokometšego, ka ge e le bona ba swanetšego go tlo ikarabela go tše ba le diretšego tšona. Ge le dira bjalo, ba tla dira modiro wa bona ba thabile, ba sa ngongorege, gobane ge ba ngongorega, seo se ka se le hole ka selo.

₁₈Le re rapelele. Re tloga re sa itshetshengwe, ka ge ka mehla re rata go dira tše di lokilego. ₁₉Ke le kgopela ke tiišitše ke re le rapeleng gore Modimo a mpušetše moo go lena kgauswinyana.

_20-21Modimo o tsošitše Morena wa rena, Jesu, bahung, yena e lego Modiša yo Mogolo wa dinku, ka madi a gagwe ao kgwerano ya go ya go ile e tiišitšwego ka ona. Modimo wa khutšo a le fe tšohle tše dibotse tše le di nyakago, gore le tle le phethe thato ya gagwe; nke a re dire se se mo kgahlago ka Jesu Kriste. A Kriste a tumišwe go ya go ile! Amene.

₂₂Banabešo, ke le kgopela gore molaetša wo wa go le kgothatša le o amogele, gobane lengwalo le ke le ngwaletšego lona le ga se gore ke le letelele. ₂₃Tsebang gore ngwanaborena, Timotheose, o lokolotšwe kgolegong. Ge a ka tla ka pela ke tla tla naye ge ke etla go le bona.

₂₄Le dumediše baetapele ba lena ka moka le badumedi bohle. Bana ba borena ba go tšwa Italia ba a le dumediša.

₂₅Nke Modimo a le gaugele ka moka ga lena.