To The Word – Day 30

₁Morena o laetše Moshe ₂go fa Arone le barwa ba gagwe le Baisraele ka moka melawana ye e latelago. _3-4Moisraele yo a ka direlago Morena sehlabelo ka kgomo goba kgapana goba pudi ka mešašeng goba ka ntle ga mešaša e se mojakong wa Tente ya bodulo bja Morena, o obile molato ka go tšholla madi. O tšholotše madi, gomme a kgaolwe setšhabeng sa gabo. ₅Se taelo ye e se šupago ke go re Baisraele bjale ba tlišetše Morena diruiwa tše ba bego ba tlwaetše go dira dihlabelo ka tšona kua nageng. Bjale ba di tliše go baprista mojakong wa Tente mme ba di bolaele fao ba direle Morena dihlabelo tša kagišano. ₆Moprista a foke aletare ya Morena mojakong wa Tente ka madi mahlakoreng, mme a tšhume makhura gore a dire monkgo wo o tsefelago Morena. ₇Baisraele ba se hlwe ba sa kgeloga go Morena ka go direla bademone ba ba swanago le diphooko dihlabelo. Baisraele ba phethe taelo ye mabakeng ka moka a a tlago.

_8-9Moisraele goba mofaladi yo a ka rego a dula setšhabeng sa Israele a direla Morena sehlabelo sa go tšhungwa ka moka goba sehlabelo se sengwe felo mo gongwe ntle le mojakong wa Tente, a kgaolwe setšhabeng sa gabo.

₁₀Moisraele goba mofaladi yo a ka rego a dula setšhabeng sa Israele a ja bobete, Morena o tla mo hlanamela gomme a mo kgaola setšhabeng sa gabo. ₁₁Bophelo bja sephedi se sengwe le se sengwe bo mading, gomme ke ka lebaka leo Morena a laetšego gore madi a tšhollelwe aletareng go boelanya batho le Morena. Madi ke bophelo, gomme a boelanya batho le Morena. ₁₂Ke ka lebaka leo Morena a boditšego Baisraele gore le o tee wa bona goba wa bafaladi ba ba dulago gare ga bona a se ke a ja bobete.

₁₃Ge Moisraele goba mofaladi yo a dulago setšhabeng sa Israele a ka bolaya phoofolo goba nonyana ye Baisraele ba e ilago, o swanetše go tšholla madi a yona mme a a khupetše ka mobu. ₁₄Bophelo bja sephedi se sengwe le se sengwe bo mading, gomme ke ka lebaka leo Morena a boditšego Baisraele gore ba se ke ba ja bobete, le gore yo a ka bo jago a kgaolwe setšhabeng.

₁₅Motho ofe le ofe, e ka ba Moisraele goba mofaladi, yo a ka jago nama ya phoofolo ye e ikhwetšego ka boyona goba ye e bolailwego ke dibata, a hlatswe diaparo tša gagwe a hlape le mmele, mme a letele go fihlela mantšiboa pele e ka ba yo a hlwekilego. ₁₆Ge a ka se dire bjalo, o ikobela molato.

₁Morena o boditše Moshe ₂gore a re go Baisraele: “Ke nna Morena Modimo wa lena. ₃Le se ke la latela ditlwaedi tša batho ba Egepeta moo le kilego la dula gona, goba tša batho ba naga ya Kanana moo ke le išago gona. ₄Le phethe melao ya ka mme le direng tše ke le laelago tšona. Ke nna Morena Modimo wa lena. ₅Le latele ditlwaedi le melao ye ke le fago yona; ge le ka dira bjalo le tla phela. Ke nna Morena.

₆“O se ke wa robala le mosadi yo mongwe wa leloko la geno la kgauswi la madi. Ke nna Morena. ₇O se ke wa goboša tatago ka go robala le mmago. Mmago ke mmago, mme o se ke wa mo goboša. ₈O se ke wa goboša tatago ka go robala le yo mongwe wa basadi ba gagwe. ₉O se ke wa robala le kgaetšedi ya gago ya letswele goba ya seyantlo goba ya motlabo wa tatago, ge a tswaletšwe ka lapeng le tee le wena goba a tswaletšwe mo gongwe. ₁₀O se ke wa robala le setlogolo sa gago; seo e ka ba go ikgoboša. ₁₁O se ke wa robala le kgaetšedi ya gago ya lapa le lengwe; le yena ke kgaetšedi ya gago. ₁₂O se ke wa robala le rakgadi wa gago; ke leloko la tatago la madi. ₁₃O se ke wa robala le mmamogolo wa gago goba mmangwane wa gago; ke leloko la mmago la madi. ₁₄O se ke wa goboša ramogolo wa gago goba rangwane wa gago ka go robala le mosadi wa gagwe; le yena ke mmamogolo wa gago goba mmangwane wa gago. ₁₅O se ke wa robala le ngwetši wa gago; ke mosadi wa morwa wa gago. ₁₆O se ke wa goboša morwarrago ka go robala le mosadi wa gagwe. ₁₇O se ke wa robala le morwedi goba setlogolo sa mosadi yo o kilego wa robala naye; ke madi a gagwe gomme ke bohlola. ₁₈O se ke wa nyala ngwanabo mosadi wa gago goba mogolwagwe mosadi wa gago a sa phela.

₁₉“O se ke wa robala le mosadi nakong ya ge a bone kgwedi, ka gobane o tšhilafetše. ₂₀O se ke wa robala le mosadi wa monna yo mongwe; seo se tla go tšhilafatša. ₂₁Ngwana wa gago o se ke wa mo neela Mologo, modimo wa seswantšho, gore e be sehlabelo sa gagwe, ka gobane seo se tla kgotlela leina la Modimo wa gago. Ke nna Morena. ₂₂Monna a se ke a robala monna yo mongwe; ke makgapha. ₂₃Go se ke gwa ba le monna goba mosadi yo a robalago le phoofolo; makgapha ao a a go tšhilafatša.

₂₄“Le se ke la itšhilafatša ka ye nngwe ya ditiro tše. Ye ke yona tsela ye baditšhaba ba ke ba rakago ge le goroga ba itšhilafaditšego ka yona. ₂₅Ditiro tša bona di tšhilafaditše naga ya bona, ka gona Morena o e otla ka go e dira gore e hlatše batho bao ba dutšego moo. _26-27Ba dirile dilo tše tša bohlola ka moka mme ba tšhilafatša naga, fela lena le se ke la di dira. Ka moka ga lena, Baisraele goba bafaladi, le phethe melao ya Morena le ditaelo tša gagwe, ₂₈ke moo naga e ka se le hlatšego, bjalo ka ge e hlatšitše baditšhaba bao ba dutšego fao pele le goroga. ₂₉Yo a ka dirago ye nngwe ya dilo tše tša bohlola o tla kgaolwa setšhabeng sa gabo.”

₃₀Gomme Morena a re: “Le phethe taelo ye ke le fago yona mme le se ke la latela ditlwaedi tša bohlola tša batho ba ba dutšego nageng yeo pele le goroga, gomme le se ke la itšhilafatša ka go dira ye nngwe ya dilo tše. Ke nna Morena Modimo wa lena.”

₁Morena o laetše Moshe ₂gore a botše setšhaba sa Israele a re: “Ebang ba bakgethwa, ka gobane nna, Morena Modimo wa lena, ke yo mokgethwa. ₃Yo mongwe le yo mongwe wa lena a hlomphe mmagwe le tatagwe, a hlomphe le Sabatha. Ke nna Morena Modimo wa lena.

₄“Le se ke la ntlhanogela la direla medimo ya diswantšho; le se ke la itirela medimo ka tshipi. Ke nna Morena Modimo wa lena.

₅“Ge le dira sehlabelo sa kagišano, le direng ka tsela ye e lego gore se tla amogelwa. ₆Nama yeo e swanetše go lewa ka letšatši le seruiwa se hlabilwego ka lona goba ka letšatši le le latelago. Nama ye e sa šetšego ka letšatši la boraro e tšhungwe, ₇ka gobane e tšhilafetše, gomme ge yo mongwe a ka e ja, nka se amogele sehlabelo seo. ₈Yo a ka e jago o tla ikobela molato wa go hlompholla se se abetšwego nna, gomme o tla kgaolwa setšhabeng sa gabo.

₉“Ge le buna mašemo a lena, le se ke la ripa diako ka moka tša ka mellwaneng, le gona le se ke la boela go yo budutša diako tše di šetšego. ₁₀Le se ke la fula diterebe ka moka merareng ya lena, goba la topa diterebe tše di welego; le di tlogeleleng badiidi le bafaladi. Ke nna Morena Modimo wa lena.

₁₁“Le se ke la utswa, goba la bolela maaka, goba la radia motho. ₁₂Le se ke la ena ka leina la ka ge le se la ikemišetša go phetha keno yeo; seo se goboša leina la ka. Ke nna Morena Modimo wa lena.

₁₃“Le se ke la jeletša yo mongwe goba la mo radia. Le se ke la gana le moputso, le ge e ka ba bošego bo tee fela, wa yo le mo thwetšego. ₁₄Le se ke la rogaka sefoa goba la bea selo pele ga sefofu gore se mo thetše. Le mpoifeng; ke nna Morena Modimo wa lena.

₁₅“Le botegeng mme le ahloleng melato ka toka; le se ke la emelela babotlana ka ge e le babotlana, goba la tšhaba batsebegi. ₁₆Le se ke la senya motho yo mongwe leina. Ge motho a le tshekong yeo go yona a kago ahlolelwa lehu, le se ke la homola ge e le gore bohlatse bja lena bo ka mo thuša. Ke nna Morena.

₁₇“O se ke wa swara motho ka pelo, eupša o mmotše diphošo tša gagwe mahlong, gore o se ke wa dira sebe ka lebaka la gagwe. ₁₈O se ke wa itefeletša go yo mongwe goba wa tšwela pele le go mo hloya; o rate bangwekawena bjalo ka ge o ithata. Ke nna Morena.

₁₉“Le phetheng ditaelo tša ka. O se ke wa goelanya diruiwa tše e sego tša mohuta o tee. O se ke wa gaša dipeu tša mehuta ye mebedi tšhemong e tee. O se ke wa apara diaparo tše di dirilwego ka mehuta ye mebedi ya lešela.

₂₀“Ge monna a holofeditše go rekišetša monna yo mongwe lekgoba la mosetsana gore e be motlabo wa gagwe, fela monna yoo a se a tšwe a mo lefela, goba mosetsana a se a tšwe a lokollwa, gona mong le mosetsana yoo ga ba swanela go bolawa ge ba ka robalana; ba swanetše go otlwa fela. Gabotsebotse e sa le lekgoba la gagwe. ₂₁Monna yoo a tliše kgapa mojakong wa Tente ya bodulo bja ka e le sehlabelo sa gagwe sa tefelo ya dibe, ₂₂gomme ka yona moprista a mmoelanye le nna ka ge a dirile sebe, gomme ke tla mo lebalela.

₂₃“Ge le fihla nageng ya Kanana gomme le bjetše mehlare ya mehuta ya dikenywa, mengwageng ye meraro ya mathomo dikenywa tšeo di tšhilafetše. Nakong yeo le se ke la di ja. ₂₄Ka ngwaga wa bone le nkabele dikenywa ka moka moketeng wa go godiša nna, Morena. ₂₅Eupša ka ngwaga wa go fetša seatla le ka ja dikenywa. Ge le ka dira bjalo, mehlare ya lena e tla enywa dikenywa tše ntši. Ke nna Morena Modimo wa lena.

₂₆“Le se ke la ja nama ye e sa nago le madi. Le se ke la ba didupe goba la dira tša boloi. _27-28Le se ke la ilela bahu ka go boola tlopo, goba ka go fokotša maledu a lena, goba ka go iphatša, goba la itlhaba dipadi mebeleng. Ke nna Morena.

₂₉“Le se ke la goboša barwedi ba lena ka go ba dira digwebakathobalo tša ditempeleng; ge le ka dira bjalo, le tla be le kgelogela go medimo ye mengwe gomme naga ya tlala bofebe. ₃₀Hlomphang Sabatha, gomme le hlompheng felo mo ke khunamelwago gona. Ke nna Morena.

₃₁“Le se ke la kgopela keletšo go batho ba malopo, goba go didupe. Ge le ka dira bjalo le tla tšhilafala. Ke nna Morena Modimo wa lena.

₃₂“Le hlompheng batšofadi, le ba godišeng. Mpoifeng; ke nna Morena.

₃₃“Le se ke la swara bafaladi ba ba dulago nageng ya lena gampe. ₃₄Le ba swareng ka mo le swarago Moisraelekalena, gomme le ba rateng bjalo ka ge le ithata, ka gobane le lena le kile la ba bafaladi nageng ya Egepeta. Ke nna Morena Modimo wa lena.

₃₅“Le se ke la radia yo mongwe ka go šomiša dikelo tša bofora ge le ela botelele goba boima goba bontši. ₃₆Le šomišeng dikala le dikeloboima le dikelo tše di nepagetšego. Ke nna Morena Modimo wa lena yo a le ntšhitšego nageng ya Egepeta. ₃₇Le phetheng melao ya ka le ditaelo tša ka ka moka. Ke nna Morena.”

₁Morena o boditše Moshe ₂gore a botše Baisraele a re: “Ge yo mongwe wa lena goba mofaladi yo a dulago gare ga lena a ka neela ngwana wa gagwe go Mologo, modimo wa seswantšho, a bolawe ka maswika ke setšhaba ka moka. ₃Ge yo mongwe a ka neela Mologo ngwana wa gagwe ka gona a tšhilafatša Tente ya ka ye kgethwa mme a goboša leina la ka le lekgethwa, ke tla mo hlanamela, ka mo kgaola setšhabeng sa gabo. ₄Fela ge setšhaba se ka hlokomologa taba ye a e dirilego mme sa se ke sa mmolaya, ₅nna ke tla mo hlanamela, yena le lapa la gagwe ka moka le bohle ba ba mo šalago morago ka go kgeloga go nna ba khunamela Mologo. Ke tla ba kgaola setšhabeng sa gabobona.

₆“Ge motho a ka kgeloga a kgopela keletšo go batho ba malopo goba a ya go didupe, ke tla mo hlanamela, ka mo kgaola setšhabeng sa gabo. ₇Le ineeleng go nna mme le beng ba bakgethwa, ka gobane ke nna Morena Modimo wa lena. ₈Le phetheng melao ya ka, ka gobane ke nna Morena yo ke le kgethwafatšago.

₉“Ka gona, yo a rogakago tatagwe goba mmagwe a bolawe; ke yena mong yo a ipolailego.

₁₀“Ge monna a ka otswa le mosadi wa Moisraelekayena, yena le mosadi yoo ba bolawe. ₁₁Monna yo a ka robalago le mosadi wa tatagwe o goboša tatagwe, gomme bobedi, yena le mosadi yoo, ba bolawe. Ke bona beng bao ba ipolailego. ₁₂Ge monna a ka robala le ngwetši wa gagwe, bobedi ba swanetše go bolawa. Ba dirile bohlola, gomme ke bona beng ba ba ipolailego. ₁₃Ge monna a ka robala monna yo mongwe, ba dirile taba ya bohlola, gomme bobedi ba bolawe. Ke bona beng bao ba ipolailego. ₁₄Ge monna a ka nyala mosadi le mmagomosadi yoo, a bolawe ka go tšhungwa gotee le bona ka babedi ka lebaka la taba ya dihlong ye ba e dirilego; taba ya mohuta woo e se ke ya ba gona gare ga lena. ₁₅Ge monna a ka robala phoofolo, yena le phoofolo yeo ba bolawe. ₁₆Ge mosadi a ka batamela phoofolo gore e mo robale, yena le phoofolo yeo ba bolawe. Ke bona beng bao ba ipolailego.

₁₇“Ge monna a ka nyala kgaetšedi ya gagwe ya letswele goba ya seyantlo goba ya motlabo wa tatagwe, ke taba ya dihlong, gomme ba swanetše go kgaolwa phatlalatša setšhabeng sa gabobona. O robetše le kgaetšedi ya gagwe gomme o ikobetše molato. ₁₈Ge monna a ka robala le mosadi nakong ya ge a bone kgwedi, bobedi ba swanetše go kgaolwa setšhabeng sa gabobona, ka gobane ba khupolotše mo lehlapo la mosadi yoo le tšwago gona.

₁₉“Ge monna a ka robala le mmamogolo wa gagwe goba mmangwane wa gagwe goba rakgadi wa gagwe, o robetše le leloko la gagwe la madi, gomme ba ikobetše molato. ₂₀Ge monna a ka goboša ramogolo wa gagwe goba rangwane wa gagwe goba malome wa gagwe ka go robala le mosadi wa gagwe, ba ikobetše molato; ba tla hwa ba se ne bana. ₂₁Ge monna a ka nyala mosadi wa moratho wa gagwe goba wa mogolo wa gagwe, ba tla hwa ba se na le bana. O dirile bohlola gomme o gobošitše yoo moratho goba mogolo wa gagwe.

₂₂“Le phetheng melao le ditaelo tša ka ka moka, gore naga ya Kanana ye ke le išago go yona, e se ke ya le hlatša. ₂₃Le se ke la latela mekgwa ya batho bao ke ba rakago ge le goroga. Ba ntshelekile ka ditlwaedi tšohle tša bona tše mpe. ₂₄Eupša ke le tshephišitše naga ye ya mokhora le monono gore e be ya lena tiitii, gomme ke tla le fa yona. Ke nna Morena Modimo wa lena yo ke le hlaotšego ditšhabeng tše dingwe. ₂₅Ka gona le swanetše go hlaola diphoofolo le dinonyana tše di hlwekilego go tšeo di sego tša hlweka. Le se ke la ja diphoofolo le dinonyana le tše di gagabago fase tše di sego tša hlweka. Ke di begile gore di tšhilafetše, gomme go di ja go tla le tšhilafatša. ₂₆Le beng ba bakgethwa ba le lego ba ka ke nnoši, ka gobane ke nna Morena gomme ke yo mokgethwa. Ke le hlaotše ditšhabeng tše dingwe gore le tle le be ba ka ke nnoši.

₂₇“Monna goba mosadi wa lelopo goba wa go ya go didupe a bolawe ka maswika; ke yena mong yo a ipolailego.”

₁Kgwerano yela ya mathomo e be e na le melao ya yona ya go khunamela Modimo, le lefelo la go mo khunamela mo lefaseng. ₂Go be go hlomilwe tente ya ka ntle, ye e bego e bitšwa Felo mo Gokgethwa. Ka gare ga yona go be go beilwe sehlomamabone le tafola ye go yona go bego go bewa dinkgwa tše dikgethwa. ₃Ka morago ga seširo sa bobedi go be go na le tente ye e bitšwago Felo mo Gokgethwakgethwa. ₄Ka gare ga yona go be go beilwe aletare ya gauta ya go tšhumela seorelo, le Polokelo ya Kgwerano ye e ritetšwego ka gauta mo gohle, ka moo go bego go beilwe sebjana sa gauta se se swerego manna, le patla ya Arone yela e bego e kile ya hloga matlakala, le matlapa ale a go ngwalwa Melao ye Lesome. ₅Ka godimo ga Polokelo go be go na le bakerubi ba letago la Modimo ba phurolotše diphego tša bona lefelong leo go lona go bego go swarelwa dibe. Fela tšeo ga se tše bjale re ka di bolelago ka botlalo.

₆Ke ka mo dilo tšeo di bego di beakantšwe ka gona. Baprista ba be ba fela ba tsena ka tenteng ya ka ntle ba dira mediro ya bona, ₇eupša ka tenteng ya ka gare go be go tsena fela Moprista yo Mogolo, le gona gatee ka ngwaga. A tsena a swere madi ao a bego a a neela go Modimo ka lebaka la yena mong, le ka lebaka la dibe tše setšhaba se di dirilego se sa lemoge. ₈Moya wo Mokgethwa o re bontšha ka dilo tše gore tsela ya go tsena ka Felo mo Gokgethwakgethwa e be e sešo ya bulwa nakong yela ya ge tente ya ka ntle e sa hlomilwe. ₉Tše ke seswantšho se se šupago tša mehla ya bjale. Go ra gore dikabelo le dihlabelo tše di neelwago Modimo di ka se kgone go hlwekiša pelo ya morapedi, ₁₀ka ge di amana fela le dijo le dino le ditirelo tše di fapafapanego tša go hlwekiša. Tšeo ka moka ke melawana ya go hlwekiša ye e ilego ya šoma go fihlela ge go etla nako ya gore dilo di mpshafatšwe.

₁₁Bjale Kriste o tlile e le Moprista yo Mogolo wa tše dibotse tše di šetšego di tlile. Tente ye a hlankelago ka go yona e feta yela ya pele ka bogolo le ka bophethegi; ga se ya go agwa ke batho, ke gore ga se ya lefase le. ₁₂Kriste o tsene ka Felo mo Gokgethwakgethwa gatee a tsenela sa ruri, a se a swara madi a diphooko le a manamane; se a tsenego le sona ke madi a gagwe yena mong, a hweletša batho phologo ya go ya go ile. ₁₃Bjale ge ešita le madi a diphooko le a dipoo le molora wa lethole, e lego dilo tše di fokelwago ba ba tšhilafetšego, ge di ba kgethwafatša di bile di ba hlwekiša go tšhilafala, ₁₄madi a Kriste ona a ka nama a se hlatswe le go feta dipelo tša rena ditiro tše di bolayago gore re tle re khunamele Modimo yo a phelago? Ka Moya wa go ya go ile Kriste o ikgafile ya ba sehlabelo se se se nago bosodi sa go neelwa Modimo.

₁₅Ke ka lebaka leo Kriste e lego Mmoelanyi wa batho le Modimo ka kgwerano ye mpsha, gore bao ba biditšwego ke Modimo ba fiwe bohwa bja go ya go ile bjo ba bo holofeditšwego. Taba ye e kgonega ka ge go bile le lehu le le lokollago batho dibeng tše ba di dirilego mola kgwerano yela ya mathomo e sa le gona.

₁₆Mabapi le lengwalo la go aba lefa go nyakega bohlatse bja gore mongwadi wa lona o hlokafetše, ₁₇gobane lengwalo le lebjalo ga le na mohola ge mongwadi wa lona a sa phela, le thoma go šoma ge a seno hlokafala. ₁₈Ke ka lebaka leo le kgwerano yela ya mathomo e theilwego ka go šomiša madi. ₁₉Gobane Moshe o rile go begela setšhaba se le ka moka ditaelo tšohle tša melao, a tšea madi a manamane le a diphooko a a hlakantšha le meetse, a foka puku ya melao le setšhaba sohle ka ona, a šomiša lehlakana la hisopo le boya bjo bohwibidu. ₂₀A re: “Se ke madi a a tiišetšago kgwerano ye Modimo a laetšego gore le e botegele.” ₂₁Ka wona mokgwa woo Moshe a foka le Tente ya bodulo bja Morena le ditlabakelo tšohle tše di šomišwago tirelong. ₂₂Go ya ka molao wa Moshe, tše di hlwekišwago ka madi nka no re e nyakile go ba dilo tšohle, gomme ke fela ka go tšholla madi mo batho ba swarelwago dibe.

₂₃Dilo tšeo tša go swantšha tša legodimong di be di hlwekiša ka yona tsela yeo. Kganthe tša legodimong tšona di lebanwe ke go hlwekišwa ka dihlabelo tše di phalago tšeo. ₂₄Gobane Kriste ga se a tsena ka Felo mo Gokgethwa ga go agwa ke batho, gona e lego seswantšho sa Felo mo Gokgethwa ga mmakgonthe. Yena o tsene ka legodimong gore bjale a iponagatše pele ga Modimo gore re tle re holege, ₂₅e se gore a itire sehlabelo gantši, bjalo ka Moprista yo Mogolo ge a tsena ka Felo mo Gokhethwakhethwa ngwaga ka ngwaga a swere madi a e sego a gagwe, ₂₆gobane moo o be a tla swanela go hlokofatšwa gantši go tloga tlholegong ya lefase. Eupša o iponagaditše gatee mehleng ye ya mafelelo, gore a tloše dibe ka go itira sehlabelo. ₂₇Ka ge batho ba abetšwe go hwa gatee mme ka morago ga moo ba ahlolwe, ₂₈Kriste le yena o dirilwe sehlabelo gatee go tloša dibe tša batho ba bantši. O tla iponagatša gape, fela bjale e se sa le go tlo tloša dibe, eupša e le go tlo hlakodiša bao ba mo letetšego ka phišego.

₁Melao ya Moshe e re akanyetša tše dibotse tše di tlilogo tla; yona e dio ba moriti wa tšona. Ngwaga ka ngwaga go dirwa dihlabelo di tee leboelela, eupša melao yeo ga e kgone go dira selo gore ka dihlabelo tše bao ba tlago go Modimo e be ba ba phethegilego. ₂Ge barapedi ba Modimo ba ka be ba hlatswegile dibe ka nnete, ba ka be ba se sa lewa ke letswalo, le dihlabelo di be di tla kgaotšwa. ₃Eupša se se lego gona ke gore dihlabelo di gopotša batho dibe tša bona ngwaga ka ngwaga. ₄Gobane madi a dipoo le a diphooko a ka se kgone go tloša dibe.

₅Ka gona Kriste mola a etla lefaseng o rile go Modimo:

₁₁Letšatši ka letšatši moprista yo mongwe le yo mongwe o dira modiro wa gagwe wa boprista, gomme o dira dihlabelo di tee leboelela; eupša dihlabelo tše ga di kgone go tloša dibe. ₁₂Ge e le Kriste yena o dirile sehlabelo se tee sa dibe, ya ba sebego se se tlošetšago dibe sa ruri, ke moka a yo dula letsogong la go ja la Modimo. ₁₃Ke gona mo bjale a letetšego gore Modimo a be a mo fenyetše manaba a gagwe. ₁₄Ka gona, ka go itira sehlabelo gatee fela, bao ba lokafaditšwego o ba kgethwafaleditše sa ruri.

₁₅Le Moya wo Mokgethwa o a re hlatselela, gobane pelepele o re:

₁₉Bjale ge, banabešo, re na le maswanedi a go tsena ka Felo mo Gokgethwa ka lebaka la ge Jesu a re hwetše. ₂₀O re phuletše tsela ye mpsha, tsela ye e phelago, ye e phuleletšago seširo, e lego mmele wa gagwe. ₂₁Re na le Moprista yo Mogolo yo a hlokometšego Felo mo Gokgethwa kua legodimong. ₂₂Ka gona, a re batameleng go Modimo ka botshepegi le tumelo ya nnete, re se na boitshetshengo, re le mo nkego re hlapile ka meetse a a sekilego. ₂₃A re kgomareleng kholofelo ye re nago le yona, ka gobane Modimo yo a re holofeditšego o a botega. ₂₄A re hlokomelaneng, re kgothaletšaneng go ratana le go direlana mediro ye mebotse. ₂₅Re se lese go fela re eya dithapelong tša phuthego, ra etša ba ba itlwaeditšego go se ye. A re upše re kgothaletšaneng go fela re eya gona le go feta, ka ge le lena le iponela gore Letšatši la Kahlolo le a batamela.

₂₆Ga go sa na sehlabelo se se tlago tloša dibe, ge eba re tla no tšwela pele le go dira dibe ka boomo etšwe re šetše re tsebišitšwe therešo. ₂₇Se se re šaletšego ke go letela re boifa kahlolo le mollo wo bogale wo o tlago bolaya ba ba lwago le Modimo. ₂₈Ge motho a tshetše molao wa Moshe o be a bolawa ntle le lešoko ge go na le dihlatse tše pedi goba tše tharo. ₂₉Bjale motho yo a nyaditšego Morwa wa Modimo, yo a hlompholotšego madi a kgwerano ya Modimo ao a mo kgethwafaditšego, yo a rogilego Moya wa kgaugelo, na le bona gore yena a ka napa a se lebanwe ke kotlo ya go feta yela? ₃₀Gape re a tseba gore ke mang yo a rilego: “Ke nna ke lefeletšago; ke nna ke tlago bušetša,” gapegape a rilego: “Morena o tla sekiša setšhaba sa gagwe.” ₃₁Go wela diatleng tša Modimo yo a phelago go a šiiša!

₃₂Gopolang matšatši ale a ge le sa tšo bonegelwa ke seetša sa Modimo, mola le tlaišwa gabohloko, fela le kgotlelela. ₃₃Ka nako tše dingwe le be le rogwa mahlapa le bile le tlaišwa pepeneneng; ka nako tše dingwe le be le itswalanya le ba ba swerwego ka mokgwa woo. ₃₄Dibofša le be le di kwela bohloko, gomme ge le amogwa dithoto tša lena, le dumela ntle le go ngongorega, le tseba gore le beetšwe tše kaone tše di tlago dulela sa ruri. ₃₅Ka fao, le se felelwe ke tshepho, ka gobane yona e na le moputso wo mogolo. ₃₆Le se fele pelo ge le nyaka go phetha thato ya Modimo le go hwetša tše a le holofeditšego tšona. ₃₇Gape le Mangwalo a Makgethwa a re: