BAHEBERU 9

₁Kgwerano yela ya mathomo e be e na le melao ya yona ya go khunamela Modimo, le lefelo la go mo khunamela mo lefaseng. ₂Go be go hlomilwe tente ya ka ntle, ye e bego e bitšwa Felo mo Gokgethwa. Ka gare ga yona go be go beilwe sehlomamabone le tafola ye go yona go bego go bewa dinkgwa tše dikgethwa. ₃Ka morago ga seširo sa bobedi go be go na le tente ye e bitšwago Felo mo Gokgethwakgethwa. ₄Ka gare ga yona go be go beilwe aletare ya gauta ya go tšhumela seorelo, le Polokelo ya Kgwerano ye e ritetšwego ka gauta mo gohle, ka moo go bego go beilwe sebjana sa gauta se se swerego manna, le patla ya Arone yela e bego e kile ya hloga matlakala, le matlapa ale a go ngwalwa Melao ye Lesome. ₅Ka godimo ga Polokelo go be go na le bakerubi ba letago la Modimo ba phurolotše diphego tša bona lefelong leo go lona go bego go swarelwa dibe. Fela tšeo ga se tše bjale re ka di bolelago ka botlalo.

₆Ke ka mo dilo tšeo di bego di beakantšwe ka gona. Baprista ba be ba fela ba tsena ka tenteng ya ka ntle ba dira mediro ya bona, ₇eupša ka tenteng ya ka gare go be go tsena fela Moprista yo Mogolo, le gona gatee ka ngwaga. A tsena a swere madi ao a bego a a neela go Modimo ka lebaka la yena mong, le ka lebaka la dibe tše setšhaba se di dirilego se sa lemoge. ₈Moya wo Mokgethwa o re bontšha ka dilo tše gore tsela ya go tsena ka Felo mo Gokgethwakgethwa e be e sešo ya bulwa nakong yela ya ge tente ya ka ntle e sa hlomilwe. ₉Tše ke seswantšho se se šupago tša mehla ya bjale. Go ra gore dikabelo le dihlabelo tše di neelwago Modimo di ka se kgone go hlwekiša pelo ya morapedi, ₁₀ka ge di amana fela le dijo le dino le ditirelo tše di fapafapanego tša go hlwekiša. Tšeo ka moka ke melawana ya go hlwekiša ye e ilego ya šoma go fihlela ge go etla nako ya gore dilo di mpshafatšwe.

₁₁Bjale Kriste o tlile e le Moprista yo Mogolo wa tše dibotse tše di šetšego di tlile. Tente ye a hlankelago ka go yona e feta yela ya pele ka bogolo le ka bophethegi; ga se ya go agwa ke batho, ke gore ga se ya lefase le. ₁₂Kriste o tsene ka Felo mo Gokgethwakgethwa gatee a tsenela sa ruri, a se a swara madi a diphooko le a manamane; se a tsenego le sona ke madi a gagwe yena mong, a hweletša batho phologo ya go ya go ile. ₁₃Bjale ge ešita le madi a diphooko le a dipoo le molora wa lethole, e lego dilo tše di fokelwago ba ba tšhilafetšego, ge di ba kgethwafatša di bile di ba hlwekiša go tšhilafala, ₁₄madi a Kriste ona a ka nama a se hlatswe le go feta dipelo tša rena ditiro tše di bolayago gore re tle re khunamele Modimo yo a phelago? Ka Moya wa go ya go ile Kriste o ikgafile ya ba sehlabelo se se se nago bosodi sa go neelwa Modimo.

₁₅Ke ka lebaka leo Kriste e lego Mmoelanyi wa batho le Modimo ka kgwerano ye mpsha, gore bao ba biditšwego ke Modimo ba fiwe bohwa bja go ya go ile bjo ba bo holofeditšwego. Taba ye e kgonega ka ge go bile le lehu le le lokollago batho dibeng tše ba di dirilego mola kgwerano yela ya mathomo e sa le gona.

₁₆Mabapi le lengwalo la go aba lefa go nyakega bohlatse bja gore mongwadi wa lona o hlokafetše, ₁₇gobane lengwalo le lebjalo ga le na mohola ge mongwadi wa lona a sa phela, le thoma go šoma ge a seno hlokafala. ₁₈Ke ka lebaka leo le kgwerano yela ya mathomo e theilwego ka go šomiša madi. ₁₉Gobane Moshe o rile go begela setšhaba se le ka moka ditaelo tšohle tša melao, a tšea madi a manamane le a diphooko a a hlakantšha le meetse, a foka puku ya melao le setšhaba sohle ka ona, a šomiša lehlakana la hisopo le boya bjo bohwibidu. ₂₀A re: “Se ke madi a a tiišetšago kgwerano ye Modimo a laetšego gore le e botegele.” ₂₁Ka wona mokgwa woo Moshe a foka le Tente ya bodulo bja Morena le ditlabakelo tšohle tše di šomišwago tirelong. ₂₂Go ya ka molao wa Moshe, tše di hlwekišwago ka madi nka no re e nyakile go ba dilo tšohle, gomme ke fela ka go tšholla madi mo batho ba swarelwago dibe.

₂₃Dilo tšeo tša go swantšha tša legodimong di be di hlwekiša ka yona tsela yeo. Kganthe tša legodimong tšona di lebanwe ke go hlwekišwa ka dihlabelo tše di phalago tšeo. ₂₄Gobane Kriste ga se a tsena ka Felo mo Gokgethwa ga go agwa ke batho, gona e lego seswantšho sa Felo mo Gokgethwa ga mmakgonthe. Yena o tsene ka legodimong gore bjale a iponagatše pele ga Modimo gore re tle re holege, ₂₅e se gore a itire sehlabelo gantši, bjalo ka Moprista yo Mogolo ge a tsena ka Felo mo Gokhethwakhethwa ngwaga ka ngwaga a swere madi a e sego a gagwe, ₂₆gobane moo o be a tla swanela go hlokofatšwa gantši go tloga tlholegong ya lefase. Eupša o iponagaditše gatee mehleng ye ya mafelelo, gore a tloše dibe ka go itira sehlabelo. ₂₇Ka ge batho ba abetšwe go hwa gatee mme ka morago ga moo ba ahlolwe, ₂₈Kriste le yena o dirilwe sehlabelo gatee go tloša dibe tša batho ba bantši. O tla iponagatša gape, fela bjale e se sa le go tlo tloša dibe, eupša e le go tlo hlakodiša bao ba mo letetšego ka phišego.