To The Word – Day 28

₁Ka letšatši la seswai, letšatši la ka morago ga ge ditirelo tša go bea baprista di feditšwe, Moshe a bitša Arone le barwa ba gagwe le bagolo ba Baisraele. ₂A re go Arone: “Tšea powana le kgapa ye e se nago bosodi o direle Morena dihlabelo ka tšona; powana e be ya sehlabelo sa tshwarelo ya dibe, gomme kgapa e be ya sehlabelo sa go tšhungwa ka moka. ₃O botše Baisraele ba tšee phooko ya sehlabelo sa tshwarelo ya dibe, le namane ya ngwaga o tee, le kwanyana ya ngwaga o tee ye e se nago bosodi e be tša sehlabelo sa go tšhungwa ka moka, ₄le poo le kgapa e be tša sehlabelo sa kagišano. Ba direle Morena dihlabelo ka tšona gotee le kabelo ya bupi ye e hlakantšwego le makhura a mohlware. Ba swanetše go dira seo ka gobane Morena o tla iponagatša go bona lehono.”

₅Tšohle tše Moshe a bego a ba laetše tšona ba di tliša pele ga Tente ya bodulo bja Morena, gomme setšhaba ka moka sa bokana moo pele ga Morena. ₆Moshe a re: “Morena o le laetše gore le dire tše ka moka, gore seetša se se fahlago sa letago la gagwe se tle se bonagale go lena.” ₇A re go Arone: “Sepela aletareng o yo dira sehlabelo sa tshwarelo ya dibe, le sehlabelo sa go tšhungwa ka moka go ipoelanya le Morena, le go boelanya setšhaba le Morena. O dire sehlabelo se gomme o boelanye setšhaba le Morena, ka moo Morena a laetšego ka gona.”

₈Arone a ya aletareng mme a hlaba powana ye e bego e le ya sehlabelo sa tshwarelo ya dibe tša gagwe. ₉Barwa ba gagwe ba mo tlišetša madi, gomme a ina monwana wa gagwe go ona, a tlotša dinakana tša dikhutlo tša aletare, mme a tšhollela madi ao a šetšego thitong ya aletare. ₁₀A tšhuma makhura, le dipshio, le mphapha wo moteletšana wa sebete aletareng, ka moo Morena a laetšego Moshe ka gona. ₁₁Eupša nama le mokgopa a di tšhuma ka ntle ga mešaša.

₁₂A hlaba kgapa ye e bego e le ya sehlabelo sa go tšhungwa ka moka. Barwa ba gagwe ba mo tlišetša madi, gomme a foka aletare ka ona mahlakoreng ka moka. ₁₃Ba mo neela hlogo ya kgapa le ditho tše dingwe tša seruiwa seo, gomme a di tšhuma aletareng. ₁₄Ke moka a hlatswa dikateng le meomo, gomme a di tšhuma aletareng gotee le sehlabelo se sa go tšhungwa ka moka.

₁₅Ka morago ga moo a dira dihlabelo tša setšhaba. A tšea pudi ye e bego e tlile go dirwa sehlabelo sa tshwarelo ya dibe tša setšhaba, a e hlaba, a dira sehlabelo ka yona, bjalo ka ge a dirile ka sehlabelo sa tshwarelo ya dibe tša gagwe. ₁₆A tliša le seruiwa sa sehlabelo sa go tšhungwa ka moka gomme a dira sehlabelo ka yona, go ya ka melawana ya sehlabelo seo. ₁₇A tliša kabelo ya bupi a ntšha legoswi la bjona mme a di tšhuma aletareng. Se e be e le go tlaleletša sehlabelo sa go tšhungwa ka moka sa letšatši ka letšatši. ₁₈A hlaba poo le kgapa e le sehlabelo sa kagišano sa setšhaba. Barwa ba gagwe ba mo tlišetša madi, mme a foka aletare ka ona mahlakoreng ka moka. ₁₉A bea ditho tša makhura tša poo le tša kgapa, e lego mosela, le mabipi, le dipshio, le mphapha wo moteletšana wa sebete, ₂₀godimo ga maumo a diruiwa tšeo. Ka morago ga moo a tšhuma makhura aletareng, ₂₁mme a abela Morena maumo le dirope tša la go ja e le mpho ye e fiwago yena Morena ka tsela ye e itšeng, bjalo ka ge Moshe a laetše.

₂₂Ge a feditše go dira dihlabelo tšeo ka moka, a emišetša matsogo setšhabeng a se šegofatša, mme a theoga. ₂₃Moshe le Arone ba tsena ka Tenteng ya bodulo bja Morena, gomme ge ba etšwa ba šegofatša setšhaba, mme seetša se se fahlago sa letago la Morena sa bonwa ke setšhaba ka moka. ₂₄Ke moka Morena a romela mollo wa metša sehlabelo sa go tšhungwa ka moka le ditho tša makhura godimo ga aletare. Ge setšhaba se di bona, ka moka sa goa mme ba itahlela fase ka difahlego.

₁Barwa ba Arone, Nadaba le Abihu, ba tšea dibjana tša bona tša magala ba lokela magala, ba tšhela seorelo godimo ga ona, gomme ba a tliša go Morena. Fela mollo wo o be o se wa dumelelwa, ka gobane Morena o be a se a ba laela go o tliša. ₂Ka bjako Morena a romela mollo, gomme wa ba tšhuma ba hwa gona moo pele ga gagwe. ₃Moshe a re go Arone: “Se ke se Morena a bego a bolela ka sona ge a re: ‘Ka moka bao ba ntirelago ba swanetše go hlompha bokgethwa bja ka; ke tla utollela setšhaba sa ka letago la ka.’ ” Eupša Arone a ikhomolela.

₄Moshe a bitša Mishaele le Elitsafane, barwa ba Usiele, rangwane wa Arone, a re go bona: “Tlang mo, le tlošeng ditopo tša bomorwarragolena Tenteng ye kgethwa, le di bee ka ntle ga mešaša.” ₅Ba tla ba di kuka di sa le ka diaparong tša boprista ba di iša ka ntle ga mešaša, ka moo Moshe a laetšego ka gona.

₆Ke moo Moshe a itšego go Arone le barwa ba gagwe, Eleasara le Ithamara: “Le se ke la tlogela meriri ya ba mahlafarara, goba la gagola diaparo tša lena. Ge le ka dira bjalo le tla hwa, gomme Morena o tla befelelwa setšhaba ka moka. Fela Baisraele ba gabolena ka moka bona ba dumeletšwe go ilela bahu ba ba bolailwego ka mollo woo Morena a o rometšego. ₇Le se ke la tloga mojakong wa Tente gore le se hwe, ka gobane le beilwe baprista ka makhura a Morena a tlotšo.” Ba dira bjalo ka ge Moshe a be a ba laetše.

₈Morena a re go Arone: ₉“Wena le barwa ba gago le se ke la tsena ka Tenteng ya bodulo bja ka le nwele beine goba bjala, gore le se hwe. Wo ke molao woo o swanetšego go phethwa ke ditlogolo tša gago ka moka. ₁₀Le kgetholle tše dikgethwa go tše e sego tše dikgethwa, le tše di hlwekilego go tše di sego tša hlweka. ₁₁Le ruteng setšhaba sa Israele melao ka moka ye ke le filego yona ka Moshe.”

₁₂Moshe a re go Arone le go barwa ba gagwe ba babedi ba ba šetšego, Eleasara le Ithamara: “Tšeang kabelo ya bupi ye e šetšego mola dijong tše di abetšwego Morena, mme ka yona le direng senkgwa se se se nago komelo, gomme le se je ka lehlakoreng la aletare, ka gobane kabelo ye ke ye kgethwakgethwa. ₁₃Le se jeng felong mo gokgethwa; ke seripa se e lego sa gago le barwa ba gago sa dijo tše di abetšwego Morena. Seo ke se Morena a ntaetšego sona. ₁₄Gomme lena le ba malapa a lena le ka jela leumo le serope tšela di abelwago Morena e le mpho ye e fiwago yena, le kabelo ye e abelwago yena ka tsela ye e itšeng. Le ka di ja lefelong lefe le lefe le le hlweketšego tirelo. Diaba tše di filwe lena le bana ba lena e le seripa se e lego sa lena sa dihlabelo tša kagišano tša Baisraele. ₁₅Ba tliše serope seo le leumo leo ka nako ya ge makhura a tlišwa e le sehlabelo go Morena. Diaba tše ke tša lena le bana ba lena go ya go ile, ka moo Morena a laetšego ka gona.”

₁₆Moshe a botšiša ka pudi ya sehlabelo sa tshwarelo ya dibe, gomme a kwa gore e šetše e tšhumilwe. Ka gona a befelelwa Eleasara le Ithamara mme a ba botšiša a re: ₁₇“Ke ka lebaka lang le se la ja sehlabelo sa tshwarelo ya dibe felong mo go kgethwa? Ke se sekgethwakgethwa, gomme Morena o le file sona gore le tloše sebe sa setšhaba go se boelanya le Morena. ₁₈Ka ge madi a yona a se a tlišwa ka tenteng ye kgethwa, le be le swanetše go ja sehlabelo seo ka ntshe, ka moo ke laetšego ka gona.”

₁₉Arone a mo fetola a re: “Ge nkabe ke lle sehlabelo seo lehono, a seo se be se tla kgahla Morena? Setšhaba se diretše Morena sehlabelo sa sona sa tshwarelo ya dibe le sehlabelo sa go tšhungwa ka moka lehono, le ge go le bjalo ke hlagetšwe ke tše šoro tše.” ₂₀Ge Moshe a ekwa taba yeo, a kgotsofala.

₁Morena o file Moshe le Arone melawana ye ₂ya Baisraele. Le ka ja phoofolo efe goba efe ya nageng ₃ye e nago le ditlhako tša mapharo gape ye e otlago. _4-6Eupša le se ke la ja dikamela le dipela le mebutla. Tše di swanetše go tšewa gore di tšhilafetše; di a otla, eupša ga di ne ditlhako tša mapharo. ₇Le se ke la ja dikolobe. Di swanetše go tšewa gore di tšhilafetše; di na le ditlhako tša mapharo, fela ga di otle. ₈Le se ke la ja diphoofolo tše le ge e le go kgwatha ditoto tša tšona; di tšhilafetše.

₉Le ka ja dihlapi tša mohuta ofe le ofe tše di nago le diphegwana le magapi, ₁₀eupša se sengwe le se sengwe se se phelago ka meetseng se se ne diphegwana le magapi se tšhilafetše. ₁₁Dibopiwa tša mohuta woo di swanetše go tšewa gore ke ditšhila go lena. Ga le a swanela go di ja le ge e le go kgwatha ditoto tša tšona. ₁₂Se sengwe le se sengwe se se phelago ka meetseng mme se se ne diphegwana le magapi ke ditšhila go lena.

_13-19Dinonyana tše di latelago le se ke la di ja; ke ditšhila go lena: manong, le dintšhu, le maaka ka mehuta ya ona, le dipekwa ka mehuta ya tšona, le magokobu ka mehuta ya ona, le dimpšhe, le maribiši ka mehuta ya ona, le digotšane ka mehuta ya tšona, le dikokolohute, le megole, le bomašianoke ka mehuta ya bona, le dikukuku, le bomankgaganyane ka mehuta ya bona.

₂₀Dikhunkhwane ka moka tše di nago le diphego di tšhilafetše, ₂₁ntle le tšeo di nago le maotwana a di tabogatabogago ka ona. ₂₂Le ka ja tšie ya segongwane ka mehuta ya yona, le ditatakgope ka mehuta ya tšona, le mehloro ka mehuta ya yona, le ditlhakwanapitsi ka mehuta ya tšona. ₂₃Eupša dilo tše dingwe tše nnyane tše di nago le diphego gape di nago le maotwana a mane di swanetše go tšewa gore ke ditšhila go lena.

_24-28Yo a ka kgwathago ditoto tša diphoofolo tše di latelago o tla tšhilafala go fihlela mantšiboa: diphoofolo ka moka tša ditlhako, ge e se ge ditlhako tša tšona e le mapharo gomme di otla, le diphoofolo ka moka tša maoto a mane tša borofa. Yo a ka rwalago ditoto tša tšona o swanetše go hlatswa diaparo tša gagwe, eupša o tla fela a sa tšhilafetše go fihlela mantšiboa.

_29-30Dirunya le magotlo le mahohomedi le mekgaritswane ye mengwe le maobu di swanetše go tšewa gore di tšhilafetše. ₃₁Yo a ka di kgwathago di hwile o tla tšhilafala go fihlela mantšiboa. ₃₂Gomme ge di ka wela godimo ga selo se sengwe di hwile, se tla tšhilafala, e ka ba se se dirilwego ka kota goba lešela goba mokgopa goba lesaka, go sa kgathalege gore se šomišwa go dira eng. Selo seo se inwe meetseng, eupša se tla no ba se tšhilafetše go fihlela mantšiboa. ₃₃Gomme ge ditoto tša tšona di ka wela ka pitšeng ya letsopa, se sengwe le se sengwe se se lego ka go yona se tla tšhilafala, gomme pitša yeo le e pšhatle. ₃₄Dijo tše di loketšego go lewa, ge di ka tšhelwa ka meetse a a tšwago ka pitšeng yeo, di tla tšhilafala, le seno sefe le sefe se se lego ka pitšeng yeo se tšhilafetše. ₃₅Selo sefe le sefe se se ka welwago ke ditoto tša dilo tšeo se tšhilafetše; ge e ka ba onto goba setofo sa letsopa se pšhatlwe; ₃₆ge e le mothopo goba molete wa meetse wona ga o tšhilafale, go tšhilafala se se ka kgwathago ditoto tša tšona tše di wetšego ka go wona. ₃₇Ge setoto sa tšona se ka wela godimo ga peu ye e yago go bjalwa, peu yeo e ka se tšhilafale. ₃₈Eupša ge peu yeo e ka welwa ke setoto sa tšona e šetše e innwe ka meetseng, gona peu yeo e tšhilafetše.

₃₉Ge phoofolo ye e lewago e ka hwa, yo a ka e kgwathago o tla tšhilafala go fihlela mantšiboa. ₄₀Gomme yo a ka jago nama ya yona, a hlatswe diaparo tša gagwe, fela o tla fela a sa tšhilafetše go fihlela mantšiboa; yo a ka rwalago setoto seo o swanetše go hlatswa diaparo tša gagwe, fela o tla fela a sa tšhilafetše go fihlela mantšiboa.

₄₁Le se ke la ja segagabi sefe le sefe, ₄₂e ka ba se se sepelago ka mpa, goba ka maoto a mane, goba ka maoto a mantši – tšohle di tšhilafetše. ₄₃Le se ke la itšhilafatša ka go ja se sengwe sa tšona. ₄₄Ke nna Morena Modimo wa lena, gomme ineeleng go nna, mme le beng ba bakgethwa, ka gore nna ke yo mokgethwa. ₄₅Ke nna Morena yo ke le ntšhitšego Egepeta gore ke tle ke be Modimo wa lena. Le beng ba bakgethwa, ka gobane nna ke yo mokgethwa.

₄₆Woo ke wona molao mabapi le diphoofolo, le dinonyana, le diphedi tšohle tša ka meetseng, le digagabi tšohle. ₄₇Molao wo ke wa gore le kgethologanye se se hlwekilego le se se sego sa hlweka, diphedi tše di ka lewago le tšeo di sego tša swanela go lewa.

₁Morena o file Moshe melawana ye ₂ya Baisraele. Ge mosadi a ka belega ngwana wa mošemane, o tšhilafala matšatši a a šupago, go no swana le ge a tšhilafala ge a bone kgwedi. ₃Ka letšatši la seswai ngwana yoo a bolotšwe. ₄Go tla feta matšatši a mangwe a masome a mararo le metšo ye meraro gore mmagwe a hlweke ka ge a tšwele madi; a se ke a kgwatha selo se sekgethwa goba a tsena ka Tenteng ye kgethwa go fihlela ge nako ya gagwe ya go hlwekišwa e fetile.

₅Ge mosadi a ka belega ngwana wa mosetsana, o tšhilafala matšatši a lesome le a mane, go no swana le ge a tšhilafala ge a bone kgwedi. Go tla feta matšatši a mangwe a masome a a selelago le metšo ye e selelago gore a hlweke ka ge a tšwele madi.

₆Ge mosadi a belege ngwana wa mošemane goba wa mosetsana mme nako ya go hlwekišwa ga gagwe e fetile, a tliše kwanyana ya ngwaga o tee go moprista mojakong wa Tente ya bodulo bja Morena e le sehlabelo sa go tšhungwa ka moka; a tliše le leeba goba mokuru e le sehlabelo sa tshwarelo ya dibe. ₇Moprista a direle Morena sehlabelo seo sa mosadi yoo mme a mmoelanye le yena; ke moo a tlago ba a hlwekišitšwe ka ge a be a tšwele madi. ₈Seo ke se mosadi a swanetšego go se dira ge a seno belega.

₉Ge mosadi a se ne kwanyana, a tliše mekuru ye mebedi goba maeba a mabedi, le lengwe e be la sehlabelo sa go tšhungwa ka moka, mme le lengwe e be la sehlabelo sa tshwarelo ya dibe, gomme moprista a mmoelanye le Morena, mme o tla hlweka.

₁Moprista yo mongwe le yo mongwe yo Mogolo o kgethwa bathong a bewa go hlankela Modimo bakeng sa bona ka go mo neela dikabelo le dihlabelo tša dibe. ₂Ka ge le yena mong a fokola, o kgona go se be le sekgapho go bao ba dirago sebe ba sa tsebe. ₃Le gona ka gore yena mong o a fokola, o swanetše go dira dihlabelo e sego fela ka lebaka la dibe tša batho, eupša le ka lebaka la tša gagwe. ₄Motho ga a iphe bohlomphegi bjoo bja go ba Moprista yo Mogolo. Ke fela ge a biditšwe ke Modimo mo a bewago Moprista yo Mogolo bjalo ka Arone.

₅Le yena Kriste ga se a ipha bohlomphegi bja go ba Moprista yo Mogolo, eupša o bo filwe ke Modimo mola a re go yena:

₇Jesu ge a sa phela mo lefaseng o kile a rapela Modimo yo a bego a ka mo phološa lehung, a mo kgopela ka sello se segolo le meokgo. Ka ge a be a na le tlhompho, Modimo o ile a mo kwa. ₈Le ge e be e le yena Morwa wa Modimo, go tlaišwa ga gagwe go ile gwa mo dira gore a rate go phetha thato ya Modimo le go feta. ₉Ya re ge a phethagaditšwe ka ditlaišego, a ba yena wa go phološetša sa ruri bao ba mo theeletšago, ₁₀gomme Modimo a mmega gore ke Moprista yo Mogolo wa boprista bja go swana le bja Melkitsedeke.

₁₁Ke tše dintši tše re kago di bolela ka taba ye, fela ke mo gothata go le hlalošetša tšona, ka ge le diega go kwešiša. ₁₂Le be le swanetše go ba le šetše le le baruti, eupša le sa nyaka motho wa go le ruta dithuto tša mathomo tša molaetša wa Modimo. Bakeng sa go ja dijo tše di tiilego le sa swanetšwe ke lebese. ₁₃Mang le mang yo a fepšago ka lebese e sa le lesea, ga sešo a kgona go kgethologanya se se lokilego le se se sego sa loka. ₁₄Dijo tše di tiilego ke tša batho ba bagolo, ba ba šetšego ba ithutile ka go itlwaetša go kgethologanya botse le bobe.

₁A re tlogeleng thuto ye go thongwago ka yona ge go rutwa molaetša wa Kriste, re feteleng pele go rutwa tša Sekriste ka botlalo. A re se boeletšeng tša mathomong, mola re furalela mediro ye e se nago mohola re dumela go Modimo; ₂tša mola re rutwa mabapi le dikolobetšo le go bea batho diatla, le tša tsogo ya ba ba hwilego, le tša kahlolo ya go ya go ile. ₃A re gateleng pele, gomme seo ke se re tlago se dira ge eba e le thato ya Modimo.

₄Gobane ge motho a kile a bonegelwa ke seetša sa Modimo, a kwa bose bja mpho ya legodimong, a fiwa Moya wo Mokgethwa bjalo ka ba bangwe, ₅ge a kile a lemoga gore lentšu la Modimo le lokile, a ba a kwa maatla a mehla ye e tlago, ₆mme le ge go le bjalo a no kgeloga, ga go kgonege gore a boele a itshole, gobane yena mong o ipolaya ka go bapola Morwa wa Modimo gape sefapanong, a mo goboša.

₇Modimo o šegofatša mobu wo o nwago meetse a pula ye e atišago go o nela, wo o medišetšago bao ba o lemago dibjalo tše di ba holago. ₈Fela ge o ka mediša meetlwa le ditshehlo, o ka se hole ka selo; o šetše o le kgauswi le go rogakwa ke Modimo, gomme o tla fetša ka go tšhungwa.

₉Fela ge ke realo, baratiwa, ke tloga ke tseba gore le šegofaditšwe ka tše kaone tše di le išago phologong. ₁₀Modimo ga a kgetholle motho. A ka se lebale mediro ya lena le go mo rata ga lena ge le be le thuša badumedikalena mme le bjale le sa ba thuša. ₁₁Se re se dumago kudu ke gore mongwe le mongwe wa lena a bontšhe mafolofolo a mabjalo go fihlela mafelelong, gore tše le di holofelago di tle di phethagale. ₁₂Ga re rate ge le lapa, re rata ge le eba bjalo ka ba ba dumelago go Modimo mme ba kgotlelela, ka go dira bjalo ba hwetša tše Modimo a di holofeditšego badumedi.

₁₃Modimo mola a holofetša Abrahama o ikanne gore o tla phetha se a mo holofeditšego sona. Ka ge go se yo mongwe yo a mo fetago, o ile a ikana ka yena mong ₁₄a re: “Ke ikana gore ke tla go šegofatša kudu ka go fa ditlogolo tše dintši.” ₁₅Abrahama a se fele pelo, ka gona Modimo a mo fa tše a mo holofeditšego tšona. ₁₆Gape ge motho a ikana o ikana ka yo a mo fetago, gomme kano yeo e fediše kgang yohle, e nape e be gona go tiiša taba. ₁₇Bao Modimo a bego a tlilo ba fa se a ba holofeditšego sona o ratile go ba hlalošetša gabotse gore a ka se tsoge a hlaname; taba yeo a e tiiša ka go ikana. ₁₈Ka gona, tšeo ke taba tše pedi tše di ka se hlanamišwego, tšeo go tšona Modimo a ka se bolelego maaka. Gomme rena re tšhabetšego go yena re kgothatšega kudu go itshwarelela ka se re se holofelago. ₁₉Kholofelo ye ke bjona boithekgo bjo bo tiilego bja maphelo a rena, mme e putla seširo ya tsenelela ka Felo mo Gokgethwakgethwa. ₂₀Ke mo Jesu a re etilego pele a yo tsena gona gore a re hole, yena yo e lego Moprista yo Mogolo go ya go ile wa boprista bja go swana le bja Melkitsedeke.