LEFITIKOSE 9

₁Ka letšatši la seswai, letšatši la ka morago ga ge ditirelo tša go bea baprista di feditšwe, Moshe a bitša Arone le barwa ba gagwe le bagolo ba Baisraele. ₂A re go Arone: “Tšea powana le kgapa ye e se nago bosodi o direle Morena dihlabelo ka tšona; powana e be ya sehlabelo sa tshwarelo ya dibe, gomme kgapa e be ya sehlabelo sa go tšhungwa ka moka. ₃O botše Baisraele ba tšee phooko ya sehlabelo sa tshwarelo ya dibe, le namane ya ngwaga o tee, le kwanyana ya ngwaga o tee ye e se nago bosodi e be tša sehlabelo sa go tšhungwa ka moka, ₄le poo le kgapa e be tša sehlabelo sa kagišano. Ba direle Morena dihlabelo ka tšona gotee le kabelo ya bupi ye e hlakantšwego le makhura a mohlware. Ba swanetše go dira seo ka gobane Morena o tla iponagatša go bona lehono.”

₅Tšohle tše Moshe a bego a ba laetše tšona ba di tliša pele ga Tente ya bodulo bja Morena, gomme setšhaba ka moka sa bokana moo pele ga Morena. ₆Moshe a re: “Morena o le laetše gore le dire tše ka moka, gore seetša se se fahlago sa letago la gagwe se tle se bonagale go lena.” ₇A re go Arone: “Sepela aletareng o yo dira sehlabelo sa tshwarelo ya dibe, le sehlabelo sa go tšhungwa ka moka go ipoelanya le Morena, le go boelanya setšhaba le Morena. O dire sehlabelo se gomme o boelanye setšhaba le Morena, ka moo Morena a laetšego ka gona.”

₈Arone a ya aletareng mme a hlaba powana ye e bego e le ya sehlabelo sa tshwarelo ya dibe tša gagwe. ₉Barwa ba gagwe ba mo tlišetša madi, gomme a ina monwana wa gagwe go ona, a tlotša dinakana tša dikhutlo tša aletare, mme a tšhollela madi ao a šetšego thitong ya aletare. ₁₀A tšhuma makhura, le dipshio, le mphapha wo moteletšana wa sebete aletareng, ka moo Morena a laetšego Moshe ka gona. ₁₁Eupša nama le mokgopa a di tšhuma ka ntle ga mešaša.

₁₂A hlaba kgapa ye e bego e le ya sehlabelo sa go tšhungwa ka moka. Barwa ba gagwe ba mo tlišetša madi, gomme a foka aletare ka ona mahlakoreng ka moka. ₁₃Ba mo neela hlogo ya kgapa le ditho tše dingwe tša seruiwa seo, gomme a di tšhuma aletareng. ₁₄Ke moka a hlatswa dikateng le meomo, gomme a di tšhuma aletareng gotee le sehlabelo se sa go tšhungwa ka moka.

₁₅Ka morago ga moo a dira dihlabelo tša setšhaba. A tšea pudi ye e bego e tlile go dirwa sehlabelo sa tshwarelo ya dibe tša setšhaba, a e hlaba, a dira sehlabelo ka yona, bjalo ka ge a dirile ka sehlabelo sa tshwarelo ya dibe tša gagwe. ₁₆A tliša le seruiwa sa sehlabelo sa go tšhungwa ka moka gomme a dira sehlabelo ka yona, go ya ka melawana ya sehlabelo seo. ₁₇A tliša kabelo ya bupi a ntšha legoswi la bjona mme a di tšhuma aletareng. Se e be e le go tlaleletša sehlabelo sa go tšhungwa ka moka sa letšatši ka letšatši. ₁₈A hlaba poo le kgapa e le sehlabelo sa kagišano sa setšhaba. Barwa ba gagwe ba mo tlišetša madi, mme a foka aletare ka ona mahlakoreng ka moka. ₁₉A bea ditho tša makhura tša poo le tša kgapa, e lego mosela, le mabipi, le dipshio, le mphapha wo moteletšana wa sebete, ₂₀godimo ga maumo a diruiwa tšeo. Ka morago ga moo a tšhuma makhura aletareng, ₂₁mme a abela Morena maumo le dirope tša la go ja e le mpho ye e fiwago yena Morena ka tsela ye e itšeng, bjalo ka ge Moshe a laetše.

₂₂Ge a feditše go dira dihlabelo tšeo ka moka, a emišetša matsogo setšhabeng a se šegofatša, mme a theoga. ₂₃Moshe le Arone ba tsena ka Tenteng ya bodulo bja Morena, gomme ge ba etšwa ba šegofatša setšhaba, mme seetša se se fahlago sa letago la Morena sa bonwa ke setšhaba ka moka. ₂₄Ke moka Morena a romela mollo wa metša sehlabelo sa go tšhungwa ka moka le ditho tša makhura godimo ga aletare. Ge setšhaba se di bona, ka moka sa goa mme ba itahlela fase ka difahlego.