To The Word – Day 23

₁Ba roka diaparo tša botšhepi tše baprista ba di aparago ge ba dira mošomo wa baprista ka Felo mo Gokgethwa ka wulu ya botala bja legodimo, le ya bohubedu bja moretele, le ya bohubedu bja madi. Ba roka diaparo tše dikgethwa tša Arone ka moo Morena a laetšego Moshe.

₂Ba roka seaparo se sekgethwa ka lešela le boletiana, le ka wulu ya botala bja legodimo, le ya bohubedu bja moretele, le ya bohubedu bja madi, le ka tlhale ya gauta. ₃Ba natla diphaphathi tša gauta mme ba di ripaganya ya ba tše teletšana gore di tle di rokelelwe lešeleng le boletiana, le wulung ya botala bja legodimo, le ya bohubedu bja moretele, le ya bohubedu bja madi. ₄Ba roka mapantana a mabedi a seaparo se sekgethwa, mme ba a rokelela ka mathoko a sona gore se tle se tlengwe ka ona. ₅Lepanta le le logilwego gabotse, le le dirilwego ka tšona dilo tšeo, la rokelelwa seaparong se sekgethwa gore e be selo se tee le sona, ka moo Morena a laetšego Moshe. ₆Ba beakanya dikarneliene, mme ba di rokelela ka gauta. Tša tlokwa maina a barwa ba lesome le ba babedi ba Jakobo ka bothakga. ₇Ba di rokelela mapantaneng a mabedi a magetleng a seaparo se sekgethwa go emela dikgoro tše lesome le tše pedi tša Israele, ka moo Morena a laetšego Moshe.

₈Ba dira phaphathiana ya sehubeng ka dilo tša go swana le tša go dira seaparo se sekgethwa le mologelelo wa sona. ₉E be e lekalekana ka thoko tšohle mme e mennwe gabedi, e le ya disentimetara tše 22 ka botelele, le bophara bja disentimetara tše 22. ₁₀Ba rokelela methalo ye mene ya magakabje go yona; mothalong wa mathomo ba rokelela rubi, thopase le garneta; ₁₁mothalong wa bobedi ba rokelela emerale, safire le taamane; ₁₂mothalong wa boraro ba rokelela thekoise, agathe le amethesite, ₁₃mme mothalong wa bone ba rokelela berile, karneliene le jaspere. Magakabje a a rokelelwa ka tlhale ya gauta. ₁₄Le lengwe le le lengwe la magakabje a lesome le a mabedi a la tlokwa leina la yo mongwe wa barwa ba Jakobo go emela dikgoro tše lesome le tše pedi tša Baisraele. ₁₅Ba dira diketane tša phaphathiana ya sehubeng tše di logagantšwego bjalo ka thapo ka tlhale ya gauta ye e sego ya tswakwa. ₁₆Ba dira merokelelo ye mebedi ya gauta, le mekgoko ye mebedi ya gauta, mme ba rokelela mekgoko ye mebedi ye dikhutlong tša ka godimo tša phaphathiana ya sehubeng. ₁₇Ba tlemelela thapo tšela tše pedi tša gauta moo mekgokong ka mebedi, ₁₈mme dintlha tša dithapo tšeo tše pedi ba di tlemelela merokelelong yeo ye mebedi, mme ka tsela yeo ba tlemelela dithapo ka pele mapantaneng a magetleng a seaparo se sekgethwa. ₁₉Ba dira mekgoko ye mebedi ya gauta, mme ba e rokelela dikhutlong tše pedi tša ka fase tša phaphathiana ya sehubeng morumong wa ka gare kgauswi le seaparo se sekgethwa. ₂₀Ba dira mekgoko ye mengwe ye mebedi ya gauta, mme ba e rokelela seripeng sa ka fase ka pele mapantaneng ka mabedi a magetleng a seaparo se sekgethwa, kgauswi le morumo le ka godingwana ga lepanta la seaparo se sekgethwa. ₂₁Ba tlemaganya mekgoko ya phaphathiana ya sehubeng le ya seaparo se sekgethwa ka thapo ya botala bja legodimo, gore phaphathiana ya sehubeng e be godimo ga lepanta la seaparo se sekgethwa mme e se ke ya hlepha, ka moo Morena a laetšego Moshe ka gona.

₂₂Ba roka phurabura ye e aparwago ka godimo ga seaparo se sekgethwa, ya rokwa fela ka wulu ya botala bja legodimo. ₂₃Lešoba la yona la go tsenya hlogo la phethwa ka morumo wo o logilwego, gore seaparo se se ke sa gagoga. _24-26Go dikologa morumo wa ka fase wa phurabura ba lekeletša mekgabišo ya go swana le garenate ya lešela le boletiana, le ya wulu ya botala bja legodimo, le ya bohubedu bja moretele, le ya bohubedu bja madi, ya latelana le ditleloko tša gauta ye e sego ya tswakwa, ka moo Morena a laetšego Moshe ka gona.

₂₇Ba rokela Arone le barwa ba gagwe dihempe, ₂₈ba roka le tuku ya hlogo, le dikefana, le diaparo tša ka gare ka lešela, ₂₉le lepanta la bodiredi ka lešela le boletiana, le ka wulu ya botala bja legodimo, le ya bohubedu bja moretele, le ya bohubedu bja madi, le le logeletšwego mekgabišo ya bokgwari ya mebalabala, ka moo Morena a laetšego Moshe. ₃₀Ba dira sekgabišo se sekgethwa ka gauta ye e sego ya tswakwa, mme godimo ga sona ba tloka mantšu a: “Se abetšwe Morena”. ₃₁Ba se tlemelela tukung ya hlogo phatleng ka thapo ya botala bja legodimo, ka moo Morena a laetšego Moshe ka gona.

₃₂Modiro ka moka wa Tente ya bodulo bja Morena o ile wa phethwa. Baisraele ba be ba dirile se sengwe le se sengwe ka moo Morena a bego a laetše Moshe. ₃₃Ba tliša Tente ye kgethwa go Moshe le ditlabakelo ka moka tša yona, dikgwaetšo le mahlomo a go thekga, le dipalelo, le dikota, le mabogato; ₃₄sepipetši sa matlalo a dikgapa a a tloditšwego ka letsoku, le sepipetši sa mekgopa ye boletiana, le seširo sa go šira; ₃₅Polokelo ya Kgwerano yeo e bego e swere matlapa, le mapara a yona le sekhurumelo sa yona; ₃₆tafola le ditlabakelo tša yona ka moka, le dinkgwa tše di abetšwego Modimo; ₃₇sehlomamabone sa gauta ye e sego ya tswakwa le mabone a sona, le ditlabakelo tšohle tša sona, le makhura a mabone; ₃₈aletare ya gauta, le makhura a tlotšo, le seorelo sa go nkga bose, le seširo sa mojako wa Tente, ₃₉le aletare ya mphiri le papetla ya yona ya mphiri, le mapara a yona, le ditlabakelo ka moka tša yona, le sebjana sa go hlapela le bogato bja sona, ₄₀le diširo tša kgoro le dikota le mabogato a tšona, le seširo sa mojako wa kgoro le dithapo tša sona, le dibapola tša Tente le ditlabakelo ka moka tša tirelo ya Tenteng, ₄₁le diaparo tša botšhepi tše baprista ba bego ba swanetše go di apara Felo mo Gokgethwa – diaparo tše dikgethwa tša Arone, moprista, le tša barwa ba gagwe. ₄₂Baisraele ba be ba phethile modiro ka moo Morena a bego a laetše Moshe ka gona. ₄₃Moshe o ile a lekola se sengwe le se sengwe, mme a hwetša gore ba dirile tšohle ka moo Morena a bego a laetše ka gona. Ka fao Moshe a ba šegofatša.

₁Morena a re go Moshe: ₂“Ka letšatši la pele la kgwedi ya mathomo o hlome Tente ya bodulo bja ka. ₃Ka gare ga yona o bee Polokelo ya Kgwerano yeo e swerego Melao ye Lesome, mme o e širetše ka seširo. ₄O tsenye tafola ka Tenteng, mme o beakanye ditlabakelo godimo ga yona. O tsenye le sehlomamabone, mme o hlome mabone godimo ga sona. ₅O bee aletare ya gauta ya go tšhumela seorelo pele ga Polokelo ya Kgwerano yeo e swerego Melao ye Lesome, gomme o fege seširo mojakong wa Tente. ₆Pele ga mojako wa Tente o bee aletare ya dihlabelo. ₇O bee sebjana sa go hlapela gare ga Tente le aletare, mme o se tlatše meetse. ₈O hlome kgoro mme o fege seširo mojakong wa yona.

₉“Ka morago ga fao o kgethwafatše Tente le ditlabakelo tša yona ka moka ka go e tlotša ka makhura a tlotšo, mme e tla ba ye kgethwa. ₁₀Bjale o kgethwafatše aletare le ditlabakelo tša yona ka moka ka go e tlotša ka ona, mme e tla ba ye kgethwakgethwa. ₁₁O kgethwafatše le sebjana sa go hlapela le bogato bja sona ka yona tsela yeo.

₁₂“O tliše Arone le barwa ba gagwe mojakong wa Tente, gomme o ba hlapiše ka meetse. ₁₃O apeše Arone diaparo tše dikgethwa, o mo tlotše ka makhura ale, mme e be go mo kgethwafatša, gore a tle a kgone go ntirela e le moprista. ₁₄O tliše barwa ba gagwe, o ba apeše dihempe. ₁₅Bjale o ba tlotše ka wona mokgwa woo o tloditšego tatabo, gore ba tle ba kgone go ntirela e le baprista. Go tlotšwa mo go tla ba dira baprista ba go ya go ile.”

₁₆Moshe a dira tšohle ka moo Morena a mo laetšego. ₁₇Ka fao ka letšatši la pele la kgwedi ya mathomo ya ngwaga wa bobedi ka morago ga ge ba tlogile Egepeta, Tente ya bodulo bja Morena ya hlongwa. ₁₈Moshe a bea mabogato a yona, a hloma mahlomo a yona a go e thekga, a tlemelela dipalelo tša yona, mme a tsema dikota tša yona. ₁₉A phurolla sepipetši godimo ga Tente, a bea le sepipetši sa ka ntle godimo ga sona, ka moo Morena a laetšego ka gona. ₂₀Ka morago ga fao a tšea matlapa ale a mabedi a a bea ka Polokelong ya Kgwerano. A khwamela mapara mekgokong ya Polokelo, mme a e khurumela ka sekhurumelo. ₂₁Bjale a bea Polokelo ka Tenteng mme a fega seširo sa go e širetša. Ka tsela ye a šireletša Polokelo ya Kgwerano yeo e bego e swere matlapa, ka moo Morena a bego a laetše ka gona.

₂₂A bea tafola ka Tenteng, ka lehlakoreng la ka leboa ka ntle ga seširo, ₂₃gomme godimo ga yona a beakanya dinkgwa tšeo di bego di abetšwe Morena, ka moo Morena a bego a laetše ka gona. ₂₄A bea sehlomamabone ka Tenteng go lebana le tafola ka lehlakoreng la ka borwa, ₂₅gomme moo pele ga Morena a hloma mabone ale, ka moo Morena a bego a laetše ka gona. ₂₆A bea aletare ya gauta ka Tenteng pele ga seširo, ₂₇mme a tšhuma seorelo sa go nkga bose, ka moo Morena a bego a laetše ka gona. ₂₈A fega seširo mojakong wa Tente, ₂₉mme moo pele ga seširo a bea aletare ya dihlabelo. Godimo ga yona a dira sehlabelo sa go tšhungwa ka moka, le kabelo ya bupi, ka moo Morena a bego a laetše ka gona. ₃₀A bea sebjana sa go hlapela gare ga Tente le aletare, mme a se tlatša meetse. ₃₁Moshe le Arone le barwa ba gagwe ba hlapela diatla le maoto ka moo ₃₂nako ye nngwe le ye nngwe ge ba tsena ka Tenteng, goba ba batamela aletare, ka moo Morena a bego a laetše ka gona. ₃₃Moshe a hloma kgoro go dikologa Tente le aletare, mme a fega seširo mojakong wa kgoro. Ke ka mo a phethilego modiro ka moka.

₃₄Bjale leru la pipetša Tente ya bodulo bja Morena, mme seetša se se fahlago sa letago la Morena sa tlala Tente. ₃₅Ka lebaka leo Moshe a se ke a kgona go tsena ka Tenteng. ₃₆Mo leetong lohle la Baisraele, e be e re ge leru le apoga ka godimo ga Tente, Baisraele ba huduge. ₃₇Ge leru le sa apoge, ba be ba sa huduge. ₃₈Leetong la bona ka moka ba be ba bona leru la letago la Morena godimo ga Tente mosegare, le mollo wo o tukago ka godimo ga yona bošego.

_1-2Nna, Petrose, moapostola wa Jesu Kriste, ke ngwalela lena ba le kgethilwego ke Modimo, le phelago bjalo ka bašele ba ba gašaganego le selete sa Pontose, le sa Galatia, le sa Kapadokia, le sa Asia, le sa Bithinia. Le kgethilwe go ya ka mo Modimo Tate a beakantšego ka gona, gomme Moya wa gagwe wa le dira ba bakgethwa gore le tle le hlomphe Jesu Kriste gomme le fokwe ka madi a gagwe.

Nke le okeletšwe kgaugelo le khutšo.

₃A go tumišwe Modimo, Tatago Morena wa rena, Jesu Kriste! Ka lebaka la lešoko la gagwe le legolo o re tswetše ka bofsa ka go tsoša Jesu Kriste bahung. Se se re dira gore re dule re letetše ₄bohwa bjo le lena Modimo a le beetšego bjona legodimong. Ke bjo bo sa bolego, bjo bo se nago bosodi, le gona bo sa hwelelego. ₅Ke bja lena bao ka maatla a Modimo le lotwago ka tumelo, gore le tle le fihlele phološo ye e tlilogo utollwa mafelelong a nako.

₆Thabelang seo, le ge e le gore gabjale le tlemegile go nyama ka lebaka la meleko ya mehutahuta ye e le tlelago. ₇Meleko yeo e le tlela gore Modimo a bone ge eba tumelo ya lena ke ya nnete. Ešita le gauta, yona e kgonago go senyega, e lekwa ka mollo; bjale ge, le tumelo ya lena, yona e lego bohlokwa kudu go feta gauta, e swanetše go lekwa. Ge e le ya nnete le tla retwa, la tumišwa, la ba la hlompšha mohla Jesu Kriste a etla. ₈Gape le a mo rata, le ge le se la ka la mmona, ebile le dumela go yena, le ge bjale le sa mmone. Ka gona le thaba ka lethabo le legologolo leo motho a sa kgonego go le hlaloša, ₉ge le fihlela nepo ya tumelo ya lena, e lego go phološwa ga lena.

₁₀Phološo yeo baprofeta ba e nyakile kudu ba e latiša, ba porofeta mabapi le ka mo Modimo e bego e tlilo ba wa kgaugelo go lena. ₁₁Ba lekile go nyakišiša tša nako ya gona le gore e tla tla bjang. Ke yona nako ye Moya wa Kriste ka go bona o bego o e šupa ge o porofeta tša mahloko ao Kriste a bego a tlilo a kwešwa, le tša letago le le bego le tlilo latela. ₁₂Modimo o utolletše baprofeta bao gore modiro wa bona e be e se go ikhola, e be e le go hola lena, mola ba bolela ka ditaba tše bjale le di kwelego ka ba go le begela Taba ye Botse ka maatla a Moya wo Mokgethwa, yo a bego a romilwe a etšwa legodimong. Tše ke tšona ditaba tše le barongwa ba dumago go di tseba.

₁₃Ka gona, phafogang le be le boitshwaro, le dule le letetše ka mafolofolo mpho ya phološo ye le tlago e fiwa mohla Jesu Kriste a etla. ₁₄Ka ge le le ba ba theeletšago, le se dumele go lakwa ke ditumo tšela tša lena tša mola le sešo la tseba selo ka Modimo. ₁₅Sa lena a e be go ba bakgethwa go tšohle tše le di dirago, bjalo ka ge Modimo yo a le biditšego le yena e le yo mokgethwa. ₁₆Gape Mangwalo a Makgethwa a re: “Ebang ba bakgethwa, gobane nna ke yo mokgethwa.”

₁₇Etse ge le rapela Modimo, yena yo a ahlolago batho ka go se kgetholle, a yago ka tše motho a di dirilego, le re Tatagorena. Ka gona, phelang ka go mmoifa nakong yohle ya ge le le bafaladi mo lefaseng. ₁₈Gobane le a tseba gore le rekolotšwe bjang boitshwarong bjola bja lena bja go se be le mohola bjo le bo tšerego go borakgolokhukhu ba lena. Ga se la rekollwa ka se se felago, go etša silibera goba gauta, ₁₉eupša le rekolotšwe ka madi a bohlokwa a Kriste, yo a etšago kwana ye e se nago bosodi goba lebadi. ₂₀Ke yena yo a kgethilwego ke Modimo pele lefase le hlolwa, gomme a tla a le phološa mehleng yeno ya mafelelo. ₂₁Ke ka yena mo le dumelago go Modimo yo a mo tsošitšego bahung a mo godiša; gomme bjale tumelo ya lena le kholofelo ya lena di tsepeletše go Modimo.

₂₂Bjale ka gobane le itlhwekišitše ka go latela therešo gore le rate badumedikalena ka lerato la mmakgonthe, le rataneng e le ruri ka dipelo tša lena ka moka. ₂₃Gobane le tswetšwe ka bofsa ke lentšu le le phelago la go ya go ile la Modimo la ba bana ba motswadi yo a sa hwego, e sego yo a hwago. ₂₄Gobane Mangwalo a Makgethwa a re:

₁Bjale ge, tlogelang bobe bjohle le maaka ohle le boikaketši bjohle le mona wohle le lesebo lohle. ₂Le etše masea a a sa tšogo belegwa, le nyorelwe maswi a semoya a a sego a talošwa, gore ge le a nwa le gole mme le phološwe. ₃Gobane le itemogetše gore Morena ke yo botho.

₄Etlang go Morena, yena leswika le le phelago le le nyaditšwego ke batho, eupša la kgethwa ke Modimo a re ke le bohlokwa. ₅Dumelang go agiwa bjalo ka maswika a a phelago, le be tempele ya semoya, le be baprista ba bakgethwa, ba go dira dihlabelo tša semoya tše Jesu Kriste a dirago gore di amogelwe ke Modimo. ₆Gobane Mangwalo a Makgethwa a re:

₉Ke lena setšhaba se se kgethilwego ke Modimo, ke lena baprista ba Kgoši, setšhaba se sekgethwa, setšhaba se Modimo a ikgethetšego sona go bega ditiro tše maatla tša yena Modimo yo a le biditšego leswiswing a le tliša seetšeng sa gagwe se se tlabago. ₁₀Pele le be le se setšhaba sa Modimo, eupša bjale le sona; pele Modimo o be a sa le šokelwe, eupša bjale o le šoketšwe.

₁₁Barategi, ke le kgopela le le bafeti le bafaladi mo lefaseng ke re: Le se ke la ipha ditumo tša nama tše di dulago di elwa le moya. ₁₂Maitshwaro a lena ge le na le baditšhaba e be a mabotse, gore le ge ba le bolela gampe ba re le disenyi, ba bone tše dibotse tše le di dirago mme ba rete Modimo ka Letšatši la gagwe la go tla.

₁₃Ka lebaka la Morena le ikokobetše go batho ka moka ba ba le bušago, le ge e le kgošikgolo, yo e lego yena mmušabohle, ₁₄le ge e le babušiši ba ba beilwego ke yena gore ba otle basenyi, ba rete ba ba dirago tše dibotse. ₁₅Gobane se Modimo a se nyakago ke gore ka go dira tše dibotse le fediše dipolelo tša batho ba mašilo ba ba sa tsebego selo ka ditaba tša Sekriste. ₁₆Le phele le lokologile, fela bolokologi bja lena le se bo diriše go bipa bobe, eupša le phele bjalo ka makgoba a Modimo. ₁₇Le hlomphe batho bohle, le rate badumedikalena, le tšhabe Modimo, le hlomphe kgošikgolo.

₁₈Lena makgoba, le dumele go bušwa ke beng ba lena gomme le ba hlomphe ka mo go lebanego, e sego fela ba go loka le ba boleta, eupša le bona bao ba lego sekgapho. ₁₉Ke fela ka thušo ya Modimo mo motho a kgonago go kgotlelela bohloko bjo a tlaišwago ka bjona, a se na molato, e le ka gobane a rata go botegela Modimo. ₂₀Kgane ge le kgotlelela go otlelwa bosenyi bja lena le a holega? Eupša ge le kgotlelela bohloko bjo le bo kwešwago le ge le dirile tše di lokilego, ke go re le ba lehlogonolo pele ga Modimo. ₂₁Ke sona se Modimo a le bileditšego sona, gobane le Kriste o hlokofaditšwe ka lebaka la lena, a le tlogelela mohlala gore le o latele. ₂₂“Ga se a ka a dira sebe goba a bolela maaka.” ₂₃Mola a rogwa ga se a ka a ithogela; mola a hlokofatšwa ga se a ka a tšhošetša motho, eupša o ile a di gafela go Modimo, Moahlodi wa go loka. ₂₄Kriste o ithwešitše dibe tša rena, a fegwa le tšona sefapanong gore re tle re tlogele sebe gomme re phelele go phetha thato ya Modimo. Le lena le fodišitšwe ka dintho tša gagwe. ₂₅Le be le le bjalo ka dinku tše di timetšego, eupša bjale le boetše go Modiša le Mohlokomedi wa lena.

₁Le lena, basadi, le ikokobetše go banna ba lena, gore ge go na le ba ba sa dumelego lentšu la Modimo ba tle ba sokollwe ke maitshwaro a lena ntle le polelo, ₂ge ba tla be ba bona mesepelo ya lena ye e hlwekilego, le ka mo le ba hlomphago ka gona. ₃Botšhepi bja lena a e se be bja ka ntle, bjalo ka go loga meriri le go tšhepa ka dikgabišo tša gauta le diaparo tša mabaibai. ₄Bja lena botšhepi a e be bja ka pelong, botšhepi bjo bo sa senyegego bja moya wo boleta wo o thotšego, e lego wona wo Modimo a bonago e le wo bohlokwa. ₅Woo ke wona mokgwa wo basadi bale ba kgale ba ba bego ba ineela go Modimo mme ba mmotile ba bego ba ikgabiša ka wona ka go ikokobetša go banna ba bona, ₆go etša Sara ge a be a hlompha Abrahama, a mmitša mong wa gagwe. Gomme bjale lena le barwedi ba gagwe, ge eba le dira tše di lokilego, le sa boife se banna ba lena ba kago le dira sona.

₇Le lena, banna, le phedišane le basadi ba lena ka kwešišo ya gore mosadi ke sebjana se se swanetšego go hlekesetšwa. Ka gona, le ba sware ka tlhompho, ka gore le bona ba tlilo fiwa mpho ya bophelo gotee le lena. Seo le se direle gore dithapelo tša lena di se tlo paledišwa ke selo.

₈A ke fetše ka go re bohle le be ba pelo e tee, le kwelane bohloko, le rate badumedikalena, le be ba boleta le boikokobetšo. ₉Le se lefetše bobe ka bobe, goba lehlapa ka lehlapa; lena sa lena e be go šegofatša, ka ge go šegofatšwa e le se Modimo a le bileditšego sona. ₁₀Gobane le Mangwalo a Makgethwa a re:

₁₃Ke mang yo a kago le dira gampe ge eba le na le mafolofolo a go dira tše di lokilego? ₁₄Fela le ge eba le ka hlokofaletšwa go dira tše di lokilego, le ba lehlogonolo. Le se boife motho, le gona le se tšhošetšwe. ₁₅Fela Kriste yena le mo hlomphe ka dipelo tša lena ka ge e le Morena. Le dule le itokišeditše go iphetolela go yo a le hlohlago ka tša kholofelo ye le nago le yona, ₁₆eupša seo le se dire ka boleta le tlhompho. Le gona le se lewe ke letswalo, gore bao ba le bolelago gampe ka maitshwaro a lena a mabotse a Bokriste, ba inyatše ka tše ba le gobošago ka tšona. ₁₇Gobane go kaone ge le hlokofaletšwa go dira tše di lokilego, ge eba seo e le thato ya Modimo, go na le gore le hlokofaletšwe go dira tše mpe. ₁₈Gobane Kriste o hlokofaditšwe gatee a hlokofaletšwa sa ruri ka lebaka la dibe, e le moloki wa go hlokofaletšwa bakgopo, gore a le iše go Modimo. O bolailwe e le motho, fela a tsošwa e le mophedi wa semoya, ₁₉gomme ge a phela bophelo bjoo bja gagwe bja semoya a ya a begela meoya ye e golegilwego Taba ye Botse. ₂₀Yona meoya yeo ke ya bale ba go se theeletše Modimo mehleng yela ya ge a be a ba letetše a sa ba felele pelo, nakong yela Noa a aga leselawatle la gagwe. Malotwana ale a go tsena ka leselawatleng, e lego batho ba seswai, ba ile ba hlakodišwa meetseng, ₂₁ona e bego e le sešupo sa kolobetšo ye bjale e le phološago. Kolobetšo ga se go hlatswa tšhila ya mmele, eupša ke go kgopela Modimo gore a le fe letswalo le le lokilego. E le phološa ka tsogo ya Jesu Kriste bahung, ₂₂yena a rotogetšego legodimong moo a dutšego madulong a bogoši kgauswi le Modimo, yoo a mmeilego mmuši wa barongwa le balaodi ba semoya le maatla a semoya.

₁Ka ge Kriste a hlokofaditšwe mmeleng, le lena le itiišeng ka kgopolo ya go swana le ya Kriste, ya go re: Yo a hlokofatšwago mmeleng ga a sa laolwa ke sebe. ₂Ka gona, matšatši a a sa mo šaletšego mo lefaseng a se sa a phela ka go laolwa ke ditumo tša batho, eupša a a phele ka go laolwa ke thato ya Modimo. ₃Gobane bophelo bja lena bja pele le bo phetše go lekane, ge le be le dira tše di ratwago ke baditšhaba le laolwa ke bofebe, le ditumo tše mpe, le botagwa, le bohlola, le go ithabiša ka dino, le go khunamela medingwana, e lego taba ye e ganegago. ₄Bjale baditšhaba ba a tlabega ge le se sa phonkgela nabo bohloleng bjoo bja bona, gomme ba a le nyefola. ₅Eupša ba tla swanela go ikarabela go Modimo yo a šetšego a itokišeditše go ahlola ba ba phelago le ba ba hwilego. ₆Ke ka lebaka leo le ba ba hwilego ba ilego ba yo begelwa Taba ye Botse ya Modimo, bona bale bophelong bja bona bja nama ba bego ba šetše ba sekišitšwe bjalo ka mang le mang; ba ile ba e begelwa gore bophelong bja bona bja semoya ba tle ba phele bjalo ka Modimo.

₇Mafelelo a dilo ka moka a kgauswi. Ka gona le se tšeatšeege, le dule le phafogile, gore le kgone go rapela. ₈Go feta tšohle, le rataneng ka lerato le borutho, gobane lerato le bipa dibe tše dintši. ₉Le amogelaneng ka magaeng a lena le sa ngongorege. ₁₀Modimo o le file dimpho tše di fapanago, gomme mongwe le mongwe wa lena e swanetše go ba mohlokomedi wa mmakgonthe wa mpho ye a e filwego, mme a e šomišetše go hola bohle. ₁₁Yo a filwego mpho ya go bolela, a bolele dithuto tša Modimo; yo a filwego mpho ya go direla badumedikayena, a ba direle ka maatla ao a a filwego ke Modimo, gore dilong ka moka Modimo a tumišwe ka Jesu Kriste, yo letago le maatla e lego tša gagwe go ya go ile. Amene.

₁₂Barategi, le se ke la makatšwa ke moleko wo bohloko woo le hlokofatšwago ka wona boka ge le hlagetšwe ke se le sego la se tlwaela. ₁₃Le ka upše le thabele ge le hlokofatšwa le Kriste, gore le tle le hlabe mekgolokwane mohla letago la gagwe le utollwa. ₁₄Le ba lehlogonolo ge le rogwa ka lebaka la ge le le balatedi ba Kriste; seo se šupa gore Moya wa letago, e lego wona Moya wa Modimo, o dutše mo go lena. ₁₅Ge eba yo mongwe wa lena a ka hlokofatšwa, a e se be ka gobane e le mmolai goba lehodu goba sekebeka goba mpheane. ₁₆Fela ge a ka hlokofatšwa ka gobane e le Mokriste, a se ke a lewa ke dihlong, eupša a tumiše Modimo ka gobane a bitšwa ka leina leo.

₁₇Lebaka la gore kahlolo e thome le fihlile, gomme ba go ahlolwa pele e tla ba rena setšhaba sa Modimo. Bjale ge eba kahlolo ye e tlilo thoma ka rena, e yo feleletša bjang ka bao ba sa kgolwego Taba ye Botse ye ya go tšwa go Modimo? ₁₈Gobane le Mangwalo a Makgethwa a re:

₁Nna mong ke lego mogolo wa phuthego ke kgothatša bagolo ba phuthego moo go lena. Nna ke hlatse ya go hlokofatšwa ga Kriste, gomme ke tla hwetša kabelo letagong le le tlago utollwa. Ke le kgothatša ₂gore le be badiša ba mohlape wo Modimo a le gafetšego wona, mme le o hlokomele ka boithaopo, go ya ka mo go nyakago Modimo, e sego ka go gapeletšwa. Le dire modiro wa lena, le sa o direle tefo, eupša le o dira ka boithaopo. ₃Ba ba gafetšwego diatleng tša lena le se ba buše bjalo ka ge nke le dikgoši tša bona, eupša le be mohlala wo mobotse go bona e lego mohlape. ₄Gomme mohla Modiša yo Mogolo a tšwelela, le tla fiwa kgare ya letago le le sa fifalego.

₅Le lena bafsa, le ikokobetše go bagolo; gomme bohle le apare boikokobetšo, gore le direlaneng; gobane Mangwalo a Makgethwa a re: “Modimo o gana baikgogomoši, eupša baikokobetši ba a mo kgahla.” ₆Ka gona le ikokobetše go Modimo yo maatla, gore a tle a le phagamiše ka nako ye e lebanego. ₇Mathata a lena ohle le a lahlele go yena, gobane o a le šetša.

₈Le phafoge, le ntšhe mahlo dinameng, gobane Sathane, lenaba la lena, o phaphaila bjalo ka tau ye e bopago, o nyaka yo a ka mo rwaetšago. ₉Elwang le yena le tiile tumelong, le tseba gore ke ka mo le bana ba bolena lefaseng ka moka le bona ba tlaišwago ka gona. ₁₀Fela e tla re ge le tlaišitšwe lebakanyana, Modimo yo ka mehla a lokilego, yo a le bileditšego go ba letagong la gagwe la go ya go ile la ba ba tee le Kriste, yena ka noši a le dira ba ba feletšego, a le tiiša tumelong, a le kgwahliša, a dira gore le se tekateke. ₁₁Maatla a e be a gagwe go ya go ile. Amene.

₁₂Ke le ngwalela lengwalo le la seripana ke thušwa ke Silase, yo ke mmonago e le ngwanešo yo a botegago wa Mokriste. Ke ngwalela go le kgothatša le go le holofetša gore go tšohle tše di le hlagelago le gopole gore ruri Modimo ke wa kgaugelo go lena. Itshwareleleng ka kgaugelo ye ya gagwe.

₁₃Phuthego ya Babilone ya ba ba kgethilwego bjalo ka lena e a le dumediša; le Markose, morwa wa ka, o re le dumele. ₁₄Le dumedišane ka go atlana ka lerato la Sekriste.

Nke Modimo a fe lena bohle le lego ba Kriste khutšo.