To The Word – Day 24

₁Nna, Simone Petrose, mohlanka le moapostola wa Jesu Kriste, ke dumediša bao, ka go loka ga Modimo wa rena, yena Mophološi Jesu Kriste, ba filwego tumelo ye bohlokwa bjalo ka ya rena, ke re:

₂Nke le okeletšwe kgaugelo le khutšo ka go tseba Modimo le Jesu, Morena wa rena.

₃Maatla a gagwe a bomodimo a re file tšohle tše re di hlokago gore re phele, le gore re mo direle ka go tseba yo a re biditšego ka go re bontšha letago la gagwe le boloki. ₄Ke ka tšona dilo tše ge a re file dilo tše bohlokwa le gona tše dikgolo kudu tše a re holofeditšego tšona, gore ka tšona le kgone go phonyokga bokgopo bjo ditumo tše mpe di bo tlišitšego lefaseng, mme le tle le hwetše kabelo ya se Modimo a lego sona. ₅Ka lebaka la yona taba ye le ikokoropele go oketša tumelo ya lena ka boloki; boloki le bo oketše ka tsebo; ₆tsebo le e oketše ka boitshwaro; boitshwaro le bo oketše ka kgotlelelo; kgotlelelo le e oketše ka borapedi; ₇borapedi le bo oketše ka go ratana ga badumedi; go ratana ga badumedi le go oketše ka leratorato. ₈Ge le na le tšeo ebile le na le tšona ka bontši, di tla le fa mafolofolo a go tseba Morena wa rena, Jesu Kriste, le go le kgontšha go phela go ya ka tsebo yeo. ₉Eupša yo a se nago le tšona o swana le motho wa go se bone gabotse, wa go bonela kgauswi. Modumedi yo mobjalo o lebetše gore Modimo o mo hlwekišitše dibe tšela tša gagwe tša pele.

₁₀Ka gona, banabešo, le itiišeng go dira gore go bitšwa le go kgethwa ke Modimo ga lena go thupele. Ge le ka dira bjalo, le ka se tsoge le kgelogile. ₁₁Ka mokgwa woo le tla bulelwa tsela ya go tsena mmušong wa go ya go ile wa Morena le Mophološi wa rena, Jesu Kriste.

₁₂Ka fao, ka mehla ke tla fela ke le gopotša ditaba tše le ge le šetše le di tseba le bile le tiišeditšwe nneteng yeo le nago le yona. ₁₃Ke bona go lebane gore ge ke sa phela ke fele ke le gopotša ditaba tše. ₁₄Gape ke a tseba gore kgauswinyana ke tla be ke ikhwetše, bjalo ka ge Morena wa rena, Jesu Kriste, a ntemošitše. ₁₅Ka gona, ke tla ikokoropela gore ge ke šetše ke itshepeletše, le šale le na le sa go le gopotša ditaba tše ka mehla.

₁₆Rena mola re le anegela tša maatla a Morena wa rena, Jesu Kriste, le tša go tla ga gagwe, re be re sa le theele dinonwane tša mahlajana a batho. Re be re le anegela tša borena bja gagwe bjo re bo bonego ka mahlo a rena. ₁₇O ile a hlompšha a ba a tumišwa ke Modimo Tate mola lentšu la go tšwa letagong le legologolo le bolela le yena le re: “Yo ke yena Morwa wa ka yo ke mo ratago; o nkgahla kudu.” ₁₈Rena ka borena lentšu le re le kwele le bolela le etšwa legodimong mola re na le yena thabeng ye kgethwa.

₁₉Ka gona, molaetša wa baprofeta wo re nago le wona o tshepagala kudu. Le ka dira gabotse ge le ka o ela hloko, gobane o swana le lebone le le bonegago felo ga leswiswi go fihlela go esa, mme naledi ya Mphatlalatšane e le bonegela menagano. ₂₀Tabakgolo le tsebe gore ga go motho yo a kago hlatholla ka boyena profeto ya ka Mangwalong a Makgethwa. ₂₁Gobane ga go motho yo a kilego a porofeta ka go ithatela ga gagwe, eupša batho ba be ba bega molaetša wa Modimo ka go hlohleletšwa ke Moya wo Mokgethwa.

₁Le setšhabeng sa Israele go bile le baprofeta ba maaka, mme ka wona mokgwa woo le mo go lena go tla ba le baruti ba maaka. Ba tla tla le dithuto tše e sego tšona tše di išago tahlegong, ba ba ba latola Mong wa bona yo a ba rekolotšego, gomme ka go dira bjalo ba ikobela lehu la tšhoganetšo. ₂Ba bantši ba tla ya le ditiro tša bona tša bohlola, gomme ka lebaka la bona Tsela ya therešo e tla nyefolwa. ₃Ka lebaka la megabaru ya bona ba tla le fora gore ba ikhole ka go le botša ditaba tša maaka. E šetše e le kgale Modimo a itokišetša go ba otla, mme o mo tseleng ya go tlo ba fediša.

₄Barongwa bale ba go ka ba dira dibe o ile a se ba šokele, eupša o ile a ba lahlela ka heleng moo ba kgokilwego ka diketane ka meleteng ya leswiswi, ba beetšwe Letšatši la Kahlolo. ₅Le lefase lela la kgale Modimo o ile a se le šokele, eupša lefase leo la bahlokamodimo o ile a le khupetša ka meetsefula; a phološa fela Noa, yo a bego a ruta batho go phela ka mokgwa wa go loka, a phološa le ba bangwe ba ba šupago. ₆Le motse wa Sodoma le wa Gomora o ile a e lahla, a e fediša ka go e fiša lorelore, a bontšha se se tlago hlagela bahlokamodimo. ₇A hlakodiša monna wa moloki, Lota, yo a bego a tshwentšwe ke bohlola bja batho bao ba go se phethe molao. ₈Monna yoo wa moloki yo a bego a agile le bona, ka mehla o be a tsota ge a bona a bile a ekwa ditiro tša bona tše kgopo. ₉Morena o kgona go hlakodiša batho ba barapedi melekong ya bona, bakgopo o ba bolokela Letšatši la Kahlolo go tlo ba otla, ₁₀gagolo ba ba latelago ditumo tša bona tše mpe tša ditšhila, le ba ba nyatšago pušo ya Modimo.

Bona baruti bao ba na le kgang le makoko, ga ba šie le go nyefola dihlolwabarongwa tša letago, ₁₁etšwe dihlolwabarongwa tšona, le ge di feta baruti bao ba maaka ka go tia le ka maatla, di sa ba bee molato ka go ba nyefola mo pele ga Morena. ₁₂Fela baruti ba ba swana le diphoofolo tše di sa kgonego go nagana, tše di yago ka tlhago ya tšona, diphoofolo tša naga tše di tswaletšwego go thewa le go bolawa. Ba nyefola se ba sa se kwešišego. Ba tla fedišwa bjalo ka diphoofolo tša naga, ₁₃gomme moputso wa bona e tla ba mahloko, ka lebaka la ge le bona ba hlotše mahloko. Mo go bona boipshino ke go hlwela botagwa letšatši ka moka. Ke bomahlabišadihlong ba ba le gobošago ka go ja le lena ba ntše ba phonkgela mojong. ₁₄Ka mehla ba tsoma mosadi yo ba ka robalago le yena; ba dula ba faletše go dira sebe. Ba goketša ba ba fokolago tumelong, mola bona beng ba hlalefetše megabaru. Ke ba ba rogakilwego ke Modimo. ₁₅Ba phamogile tseleng ya go loka mme ba timetše; ba tšere ka tsela yela e ilego ya tšewa ke Bileamo, morwa wa Bosoro, yola a bego a rata tšhelete ye a bego a e hwetša ka go dira tše kgopo, ₁₆gomme a kgalelwa bokgopo bja gagwe – pokolo ya gagwe, selo se se sa kgonego go bolela, ya bolela ka lentšu la motho gomme ya thibela bošilo bja moprofeta yoo.

₁₇Batho bao ba swana le didiba tše di pšhelego, ba bjalo ka maru a kgodi a a tšewago ke ledimo. Modimo o ba beetše madulo leswiswing le leso. ₁₈Dipolelo tša bona ke tša boikgogomošo le botlaela, gomme ba ba sa tšogo phonyokga ka go ikgaoganya le balahlegi, ba ba thea ka ditumo tša bona tše mpe tša nama. ₁₉Ba ba holofetša tokologo etšwe bona beng e le makgoba a mekgwa ye mebe – gobane motho e ba lekgoba la sengwe le sengwe se se mo fentšego. ₂₀Ge motho a ile a phonyokga motšhilafatšo wa bobe bja lefase ka go tseba Morena le Mophološi wa rena, Jesu Kriste, gomme ka morago motšhilafatšo woo wa boela wa mo kgakga, seemo sa gagwe sa mafelelo e ba se sebe go feta sela a bilego go sona pele. ₂₁Go ka be go bile kaone go yena ge a ka be a se a ka a tseba tsela ya boloki, go na le gore a re go e tseba a tle a furalele molao wo mokgethwa wo a o filwego. ₂₂Tše di mo hlagetšego di bontšha gore polelo ye e a rereša ye e rego: “Mpša e boela mahlatšeng a yona,” le ye e rego: “Kolobe e re go hlapa ya boelela go pshikologa ka lerageng.”

₁Barategi, lengwalo le ke le ngwalelago lona bjale ke la bobedi. Ka mangwalo a mabedi a ke lekile go tsoša menagano ye e hlwekilego ka go lena ka go le gopotša ditaba tše. ₂Le gopole mantšu ao a kilego a bolelwa ke baprofeta ba bakgethwa kgale, le taelo ya Morena le Mophološi ye le e filwego ke baapostola ba gabolena. ₃Sa mathomo, le tsebe gore mehleng ya mafelelo go tla tšwelela bakodutli bao maitshwaro a bona a laolwago ke ditumo tša bona, ₄ba le botšiša ba re: “Kholofetšo ya gore Kriste o tla boa e feletše kae? Etse badumedi bale ba mathomo ba hwile, eupša tšohle di sa no swana le mola lefase le hlolwa!” ₅Batho bao ba itebatša taba e tee ya gore kgale Modimo o ile a ntšha taelo, gomme legodimo le lefase tša hlolega. Lefase le hlolegile meetseng le hlolwa ka meetse, ₆gomme ke ka meetse, meetse ale a morwalela, mo lefase la nako yela le ilego la fedišwa. ₇Legodimo la mehleng yeno le lefase la gona le tšona di lotolwa ka yona taelo yela ya Modimo, gore di tle di fedišwe ka mollo. Di beetšwe mohla bahlokamodimo ba tlago sekišwa ba fedišwa.

₈Barategi, taba e tee ye le sego la swanela go e lebala ke gore go Morena letšatši le tee le swana le mengwaga ye sekete, le mengwaga ye sekete e swana le letšatši le tee. ₉Morena ga a diege go phetha tše a di tshepišitšego batho, bjalo ka ge ba bangwe ba gopola. Sa gagwe ke go se le felele pelo, ka ge a sa nyake gore go lahlege motho, eupša a nyaka gore bohle ba itsholele dibe tša bona.

₁₀Letšatši la Morena le tla tla bjalo ka lehodu. Mohlang woo magodimo a tla nyamelela ka lešata le legolo; dilo ka moka tše di lego kua leratadimeng di tla fedišwa ka go fišwa; lefase gotee le tšohle tše di lego go lona di tla timelela. ₁₁Ka ge tšohle tše di tlilo fedišwa ka tsela ye, lena le swanetše go ba ba babjang? Le swanetše go ba ba bakgethwa ba ba ineetšego go Modimo, ₁₂le le gare le letetše Letšatši la Modimo, mme le le akgofiša – lona Letšatši le ka lona magodimo a tlago swa a fedišwa, gomme dilo tše di lego kua leratadimeng tša tološwa ke phišo. ₁₃Ge e le rena re letetše se Modimo a re hlofeditšego sona: e lego magodimo a mafsa le lefase le lefsa, moo go tlago aga toka.

₁₄Ka gona, barategi, ge le sa letetše dilo tšeo, le ikokoropele go ba ba ba se nago sepatso goba bosodi mo go Modimo le ithakgaletše le yena. ₁₅Le tšee go se fele pelo ga Morena e le sebaka sa go phološwa ga lena, go swana le Paulose, ngwanaborena, yo re mo ratago, ge a ile a le ngwalela mangwalo, a šomiša bohlale bjo a bo filwego ke Modimo. ₁₆Ke tšona tše a di bolelago ka mangwalo ka moka ao a a ngwadilego mabapi le taba ye. Ka mangwalong a gagwe go na le taba tše thata tšeo ba ba sego ba rutega le ba ba fokolago tumelong ba menolago tlhalošo ya tšona, go etša ge ba menola le tše dingwe ditemana tša Mangwalo a Makgethwa. Ke ka moo bona beng ba itahlago ka gona.

₁₇Le a tseba, lena barategi, gore batho ba bangwe ba menola tlhalošo ya ditemana tša Mangwalo a Makgethwa. Le itlhokomele, gore le se tlo timetšwa ke batho ba ba sa phethego molao, gomme la ba ba pelopedi tumelong ya lena. ₁₈Sa lena a e fele e eba go maatlafatšwa ke dimpho tša Morena le Mophološi wa rena, Jesu Kriste, le go mo tseba bokaone. Yena a a tumišwe bjale le ka mehla! Amene.